Xlimaktiy Samuel

3 Xfamilia David chu xfamilia Saúl chuntiya xlatalatlawamakgolh. David tlakg xtatliwakglhtilhama chu xchik Saúl xtaxlajwanitilhama.

2 Amacha kilhtamaku, David kgalhilh xlakgkgawasan anta kʼHebrón. Xapuxku xkgawasa wa Amnón, xkgawasa Ahinoham xalak Jezreel. 3 Xlichatiy wa Kileab, xkgawasa Abigaíl xalak Carmelo, tiku xpuskat Nabal xwanit, chu xlikgalhtutu wa Absalón, xkgawasa Maacá, xtsumat Talmái, mapakgsina xalak Guesur. 4 Xlikgalhtati wa Adonías, xkgawasa Haguit, chu xlikgalhkitsis wa Sefatías, xkgawasa Abital. 5 Chu xlikgalhchaxan xkgawasa David wa Itream, tiku malakachinilh Eglá, xpuskat. Wa umakgolh lakgkgawasan nema David kakgalhilh kʼHebrón.

6 Akxni xfamilia Saúl chu xfamilia David chuntiya xlatalatlawamakgolh, Abner tlakg xtatliwakglhtilhama kxchik Saúl. 7 Pero, Saúl xkgalhinit atanu xpuskat tiku xwanikan Rizpá, xtsumat Ayá. Akgtum kilhtamaku, Is-Bóset wanilh Abner: «¿Tuku xlakata tatalakgxtupi xpuskat kintlat?». 8 Abner lu sitsilh xlakata tuku wanilh Is-Bóset chu wanilh: «¿Tantum chichi xalak Judá akit? Asta la uku, klimasiyaninit tapaxkit nema ni makgxtakgnan xchik mintlat, xnatalan chu xʼamigos. Ni kmakamastanitan kxmakan David. Maski chuna, la uku kiskiniya kuenta xpalakata tuku nitlan ktatlawanit chatum puskat. 9 Dios palha kakimalakgaxokgelh komo ni ktlawa xpalakata David tuku Jehová malaknunilh: 10 namapanu* xtamapakgsin xchik Saúl chu nalakkaxwili xlimapakgsin David kʼIsrael chu kJudá, lata kDan asta kBeer-Seba». 11 Is-Bóset nialhtu wanilh Abner xlakata xpekuani.

12 Abner tunkun kamalakgachanilh makatsininanin David xlakata nawani: «¿Tiku tapakgsini putum kachikin?». Chu wanipa: «Kakintatlawa akgtum talakkaxlan chu naktlawa putum tuku kmatlani xlakata putum Israel natatayayan». 13 David kgalhtinalh: «Lu tlan. Naktatlawayan akgtum talakkaxlan. Kajwatiya pulaktum tuku kskiniyan, pi akxni natana, ni kataya kkilakatin komo ni nalitana Mical, xtsumat Saúl». 14 Chu David malakgachanilh makatsininanin Is-Bóset, xkgawasa Saúl, xlakata nawani: «Kakimaxki kimpuskat Mical, akit kmastalh akgtum ciento kxuwa xlichixkukan filisteos xlakata naktatamakgaxtokga». 15 Wa xlakata Is-Bóset tlawalh pi xmakglhtika Paltiel, xchixku, tiku xkgawasa Lais xwanit. 16 Pero xchixku akxtum taʼalh, xtasatilha chuna la kstalanitilhama asta kBahurim. Chu Abner wanilh: «¡Kataspitti!». Chu xla taspitli.

17 Ama kilhtamaku, Abner kamalakgachanilh uma tamakatsinin lakgkgolotsin xalak Israel: «Lata makgasa wixin xlakaskinatit pi David mimapakgsinakan xlitaxtulh. 18 La uku katlawatit tuku talakaskin, xlakata Jehová wanilh David: “Xpalakata kiskujni David naklakgmaxtu kinkachikin Israel kxmakankan filisteos chu putum xtalatlawananin”». 19 Alistalh Abner katachuwinalh latamanin xalak Benjamín. Nachuna tsekg alh tachuwinan David kʼHebrón xlakata namakatsini tuku Israel chu putum tiku xalak xchik Benjamín xlakkaxwilikgonit.

20 Akxni Abner kataʼalh kgalhpuxam soldados xlakata natachuwinan David kʼHebrón, David katlawanilh akgtum lanka taway. 21 Alistalh Abner wanilh David: «Kakimaxki talakaskin nakan mamakxtumi putum kachikin Israel kxlakatin kimapakgsina tiku kgalhi lhuwa kakni, xlakata natatlawakgoyan akgtum talakkaxlan chu wix namapakgsiya putum tuku nalakaskina». Wa xlakata David maxkilh talakaskin naʼan chu Abner xatapaxuwan alh.

22 Amacha kilhtamaku, Joab chu xlakskujnin David xkitaspitmakgolh chuna la xkitalachipakgonit akgtum kachikin chu xliminkgo tuku lhuwa xtapalh. Abner nialh xtawi David kʼHebrón xlakata xmaxkinit talakaskin xatapaxuwan xʼalh. 23 Akxni Joab katachalh putum soldados, wanika: «Abner xkgawasa Ner kitachuwinanchi mapakgsina David chu xla maxkilh talakaskin xatapaxuwan xʼalh». 24 Wa xlakata Joab tanulh niku xwi mapakgsina chu wanilh: «¿Tuku tlawa? Abner kilakglachin chu wix masta talakaskin pi xatapaxuwan xʼalh. ¿Tuku xlakata chuna tlawa? 25 ¡Wix liwana lakgapasa Abner xkgawasa Ner! Xla lakgmin xlakata naʼakgskgawiyan, xlakata nakatsi niku pina chu putum tuku tlawapat».

26 Alistalh Joab makgxtakgli David, kamalakgachalh makatsininanin xlakata xputsakgolh Abner chu xlakan maspitkgocha lata niku maʼakgstokgwilikan chuchut kSirá. Pero David ni katsilh uma. 27 Akxni Abner taspitli kʼHebrón, Joab alakatanu lilh xlakata tsekg natachuwinan, kxlakatin xmalakcha kachikin. Pero akxni anta xwilakgolh, tapalhtukulh chu Abner nilh. Uma chuna tlawalh xlakata xmakgninit xtala Asahel. 28 Alistalh, akxni David katsilh uma, wa: «Kxlakatin Jehová, akit chu kintamapakgsin nitu klinaw kuenta xpalakata xkgalhni Abner xkgawasa Ner. 29 Wa kalilh kuenta Joab chu putum xchik xtlat. ¡Anta kxchik Joab ankgalhin kaʼanalh chatum chixku tiku nakgalhi tajatat kxlichixku, o tiku nakgalhi lepra, o chatum chixku tiku nalakgastawanan,* o tiku nalimakgnikan espada, o tiku nakilhtsinksa!». 30 Chuna Joab chu xtala Abisái makgnikgolh Abner xlakata xmakgninit Asahel, xtalakan, ktatalachipat xalak Gabaón.

31 Alistalh David wanilh Joab chu putum soldados tiku xtaʼankgo: «Kaxtittit milhakgatkan, kawilitit lhakgat xla talipuwan* chu kalakgtasatit Abner». Asta mapakgsina David kstalanitilha putama niku xlinkan nin. 32 Maknukgolh* Abner kʼHebrón. Mapakgsina pixlanka tsukulh tasa kxpaxtun niku maknuka Abner, chu putum israelitas tsukukgolh tasakgo. 33 Mapakgsina kilhtlilh uma xpalakata Abner:

«¿Xlilat xwanit naniy Abner chuna la tiku ni liwana lakapastaknan?

Makgnikanti chuna la tiku makgnikgo xtlawananin tuku nitlan».*

Ama kilhtamaku, putum israelitas tsukuparakgolh lakgtasakgo.

35 Alistalh, putum latamanin minkgolh wanikgo David pi xwayalh akxni kakuwiniku xwanit, pero David malaknulh: «¡Dios palha kakimalakgaxokgelh komo nakwa kaxtalanchu o katuwa akxni nina tsankga chichini!». 36 Putum israelitas tlan akxilhkgolh uma. Chuna la putum tuku xtlawa mapakgsina, israelitas na tlan akxilhkgolh uma. 37 Chuna putum latamanin chu putum Israel katsikgolh ama kilhtamaku pi mapakgsina ni xlin kuenta xlakata xmakgnikanit Abner xkgawasa Ner. 38 Alistalh mapakgsina kawanilh xlakskujnin: «¿Ni katsiyatit pi la uku ninit kʼIsrael chatum príncipe chu chatum chixku tiku lu xlakaskinka xwanit? 39 Maski akit kilaksakkanit la mapakgsina, la uku ni tliwakga akit. Umakgolh lakchixkuwin, xlakgkgawasan Zeruyá, lu lixkajni likatsikgo. Jehová kamalakgaxokgelh tiku tlawa tuku nitlan».