Xlimaktiy Samuel

4 Akxni Is-Bóset, xkgawasa Saúl, katsilh pi Abner xninit kʼHebrón, lu pekualh* chu putum israelitas lu lakgaputsakgolh. 2 Xwilakgolh chatiy lakchixkuwin tiku xkapuxkunanikgo akgtiy grupos xla kgalhananin nema xkatapakgsini xkgawasa Saúl: chatum xwanikan Baaná* chu achatum Recab. Xlakgkgawasan xwankgonit Rimón tiku xalak Beerot, xalak xtribu Benjamín. (Ama kilhtamaku Beerot xliʼakxilhkan pi xmakgtapakgsi kxtribu Benjamín. 3 Tiku xalak Beerot xwankgonit tsalakgolh kʼGuitaim, chu anta lamakgolh asta la uku chuna la tiku xalak atanu kachikin).

4 Pero, Jonatán, xkgawasa Saúl, xkgalhi chatum kgawasa tiku xwanikan Mefibóset. Xla luntu xwanit.* Akxni xkgalhi akgkitsis kata, makatsininanka kJezreel pi Saúl chu Jonatán xnikgonit. Xkuentajtlawana chaxli chu tsalalh, pero akxni lakapala xtsalama makgxtakgli chu lata ama kilhtamaku luntu wa.

5 Xlakgkgawasan Rimón tiku xalak Beerot xwanit, Recab chu Baaná, ankgolh kxchik Is-Bóset akxni tlakg klhkaknama, akxni xla klhtatama tastunut. 6 Recab chu xtala Baaná tanukgolh kchiki chuna la xputsakgolh trigo chu litapalhtukukgolh espada Is-Bóset. Alistalh taxtukgolh chu tsalakgolh. 7 Akxni xlakan tanukgolh kchiki, xla xtanuma niku klhtata chu xma kxputama. Tapalhtukukgolh chu makgnikgolh; alistalh pixkaktikgolh chu linkgolh xʼakgxakga. Tantaskaka tlawankgolh kxtiji Arabá. 8 Chankgolh kʼHebrón, chu linikgolh mapakgsina David xʼakgxakga Is-Bóset chu wanikgolh: «Unu wi xʼakgxakga Is-Bóset xkgawasa Saúl, mintalamakgasitsin, tiku xmakgniputunan. La uku Jehová maxkinit talakaskin kimapakgsina tiku kgalhi lhuwa kakni namalakgaxokge Saúl chu xkamanan».

9 Pero David kakgalhtilh Recab chu xtala Baaná, xlakgkgawasan Rimón tiku xalak Beerot xwanit: «Kkamalaknuniyan kxtukuwani Jehová, tiku kilakgmaxtulh kxliputum kintalakgaputsit, 10 chixku tiku milh xlakata nakiwani “Saúl ninit” chu xlakpuwan pi xkiliminima xalaktlan tamakatsinin, kchipalh chu kmakgnilh kZiclag. ¡Wa uma tatlaja nema kmaxkilh xlakata kimakatsinilh! 11 ¡Nachuna nakkatlawani lakchixkuwin tiku lixkajni likatsikgo tiku makgnikgolh chatum chixku tiku nitu xtlawanit chu xma kxputama anta kxchik! ¿Ni xlilat nakkaskiniyan kuenta chu nakkamasputuyan xlakata xkgalhni?». 12 David kalimapakgsilh ksoldados pi xkamakgnikgolh. Kamaktinika xmakankan, xtantunkan chu kachiwakaka lakatsu niku xmastokgkan chuchut kʼHebrón. Pero xʼakgxakga Is-Bóset linka chu maknuka* niku xmaknukanit Abner, kʼHebrón.