Xlimaktiy Samuel
6 David kamamakxtumipa tlakg xalaktlan soldados xalak Israel: puxamakaw mil soldados. 2 Alistalh David chu putum soldados tiku akxtum xtawilakgo ankgolh kBaale-Judá xlakata lata anta xliminkgocha arca nema xtapakgsini xaxlikana Dios. Kxlakatin uma Arca latamanin mapakuwikgo Jehová tiku kapulalin lhuwa soldados, tiku wi kxlaktawilh kxʼakgspun* querubines. 3 Pero xlakata tlan xlinkgolh arca nema tapakgsini xaxlikana Dios lata kxchik Abinadab, nema xwi ksipi, mawakakgolh kʼakgtum xasasti carreta. Chu Uzá chu Ahío, xlakgkgawasan Abinadab, xpulalimakgo xasasti carreta.
4 Wa xlakata maxtukgolh arca nema tapakgsini xaxlikana Dios kxchik Abinadab, nema xwi kʼaktsu sipi, chu Ahió xtlawama kxlakatin Arca. 5 David chu putum tiku xalak xchik Israel xlipaxuwamakgo ama kilhtamaku kxlakatin Jehová chu xtlakgmakgo tipalhuwa litlakgni nema xlitatlawakgonit xakiwi enebro, arpas chu atanu litlakgni nema xkgalhikgo cuerdas, panderetas, sistros* chu címbalos.* 6 Pero akxni chankgolh niku xlakpajnan Nacón, Uzá tapakgastonkgli chu chipalh arca nema tapakgsini xaxlikana Dios, xlakata toros atsinu ni xmakgpuspitkgo. 7 Wa xlakata Jehová lu sitsinilh Uzá. Xaxlikana Dios anta makgnilh xlakata ni maxkilh kakni chu xla nilh kxpaxtun arca nema tapakgsini xaxlikana Dios. 8 Pero David sitsilh* xlakata Jehová lu ksitsininit Uzá, chu asta uku anta limapakuwikan Pérez-Uzá. 9 Chu David lu pekuanilh Jehová ama kilhtamaku chu wa: «¿La naklimin xʼarca Jehová?». 10 David ni limimputulh xʼarca Jehová niku xla xwi, kxKachikin David. Wata tlawalh pi xlinka kxchik Obed-Edom, tiku guitita xwanit.
11 Arca nema tapakgsini Jehová tamakgxtakgcha akgtutu papaʼ kxchik Obed-Edom tiku guitita xwanit, chu Jehová chuntiya ksikulunatlawama Obed-Edom chu putum tiku xalak xchik. 12 Chu makatsinika mapakgsina David: «Xpalakata arca nema tapakgsini xaxlikana Dios, Jehová sikulunatlawanit xchik Obed-Edom chu putum tuku kgalhi». Wa xlakata David lu xatapaxuwan alh putsa arca nema tapakgsini xaxlikana Dios kxchik Obed-Edom xlakata nalin kxKachikin David. 13 Akxni tiku xchaxlimakgo xʼarca Jehová makgchaxan xtatukikgonit, xla makamastalh tantum toro chu tantum animal nema xmakgonukanit.
14 David xtantlima kxlakatin Jehová xliputum xlitliwakga chu klhakganit maktum efod nema xlitatlawanit lino. 15 David chu putum xchik Israel xtatalakakxtumakgochi xʼarca Jehová chu xatapaxuwan pixlanka xkatasatilhakgo* chu xmatasitilhamakgo akgalokgot. 16 Pero akxni xʼarca Jehová lichanka kxKachikin David, Mical, xtsumat Saúl, talakaxtulh kxventana chu lakglakalh pakgalhu, chu akxni akxilhli pi mapakgsina David xlinkxma* chu xtantlima kxlakatin Jehová, tsukulh lakgmakgan kxnaku. 17 David xlakkaxwilinit akgtum xaʼakgstilhakgat chiki xlakata anta xmanuka xʼarca Jehová. Wa xlakata anta manukgolh chu wilikgolh niku xlakgchan. Alistalh David tlawalh xalhkun tamakamastan chu tamakamastan xla takaksni kxlakatin Jehová. 18 Akxni David makamastakgolh xalhkun tamakamastan chu tamakamastan xla takaksni, sikulunatlawalh kachikin kxtukuwani Jehová tiku kapulalin lhuwa soldados. 19 Nachuna, putum kachikin, lhuwa latamanin tiku xwilakgolh kʼIsrael, chatunu chixku chu chatunu puskat, maxkilh maktum xakgalhstilili kaxtalanchu, maktum xatalakchitani xtawakat mokgot* nema xkamaskakakanit chu maktum xatalakchitani pasas, alistalh chatunu chatunu latamanin ankgolh kxchikkan.
20 Akxni David taspitli xlakata nakasikulunatlawa tiku xalak xchik, Mical, xtsumat Saúl, alh tatanokglha chu wanilh: «¡Lhuwa lilanka makglhtinanit la uku mapakgsina xalak Israel! ¡Mastalh talakaskin pi tsinu xalhtantala* xʼakxilhkgolh kskitiwinanin xlakskujnin, xtachuna la chatum tonto tamakgxtu klhakgat kxlakatinkan amakgapitsin!». 21 Alistalh David wanilh Mical: «Wa kxlakatin Jehová xakpaxuwama. Xla kilaksakli akit nixawa mintlat chu tiku xalak xchik, chu xla kilaksakli chuna la xpulalina Israel, xkachikin Jehová. Wa xlakata naklipaxuwa kxlakatin Jehová 22 chu tlakg naktaktuju nixawa la uma chu lhuwa tuku naktlawa xlakata naklimasiya pi nitu klitaxtu. Pero skitiwinanin tiku kalichuwinanti nakimalankikgo». 23 Chu Mical, xtsumat Saúl, ni kgalhilh kamanan asta akxni nilh.