Xlimaktiy Samuel
5 Titaxtulh kilhtamaku, putum tribus xalak Israel minkgolh akxilhkgo David kʼHebrón chu wanikgolh: «¡Unu kwilaw! Akinin minatalan klitaxtuyaw.* 2 Lata xapulana, akxni Saúl kimapakgsinakan xlitaxtu, wix tiku xpulalipina Israel ktatalachipat.* Chu Jehová wanin: “Wix napulalipina kinkachikin Israel chu xpuxku nalitaxtuya”». 3 Chuna, putum lakgkgolotsin xalak Israel minkgolh akxilhkgo mapakgsina kʼHebrón, chu mapakgsina David katatlawalh akgtum talakkaxlan kxlakatin Jehová kʼHebrón. Alistalh laksakkgolh David chuna la mapakgsina xalak Israel.
4 David xkgalhi puxamakaw kata akxni mapakgsina litaxtulh, chu tipuxam kata mapakgsinalh. 5 Lata kʼHebrón, mapakgsinalh kJudá akgtujun kata chu akgchaxan papaʼ chu lata kJerusalén mapakgsinalh kʼIsrael chu kJudá puxamakututu kata. 6 Mapakgsina chu ksoldados ankgolh kJerusalén xlakata nakatalatlawakgo jebuseos nema xwilakgo kʼama tiyat. Pero jebuseos likgalhkgamanankgolh David chu wanikgolh: «¡Nikxni katitanu unu! Asta tiku nila tlawankgo chu nila lakawanankgo natlawakgo pi natsalaya». Xlakata xlakpuwankgo: «David nikxni katitanulh unu». 7 Pero David akgchipalh lanka kachikin nema xkgalhi patsaps chu xwi kSion, nema la uku xKachikin David. 8 Amacha kilhtamaku David wa: «¡Tiku nakatalatlawakgo jebuseos, kalaktanukgolh klhuku niku titaxtu chuchut xlakata nakamakgnikgo “tiku nila lakawanankgo chu tiku nila tlawankgo”, tiku David ni kaʼakxilhputun!». Wa xlakata wankan: «Tiku nila lakawanankgo chu tiku nila tlawankgo nila katitanukgolh kchiki». 9 Alistalh David tamakgxtakgli klanka kachikin nema xkgalhi patsaps, nema limapakuwika* xKachikin David chu lakatum lakatum tsukulh chikinan, lata kxaʼAktsu Sipi* asta kxpulakni. 10 Chuna David tsinu tsinu tlakg tatliwakglhtilhalh, chu Jehová, Dios tiku kapulalin lhuwa soldados, xmakgtayama.
11 Mapakgsina Hiram xalak Tiro malakgachanilh makatsininanin David. Na malakgachanilh xakiwi puksnankiwi, xwaknanin chu xtlawananin chiki xlakata natlawakgo patsaps, chu tsukukgolh tlawanikgo David akgtum chiki. 12 Chu David akgatekgsli pi Jehová tliwakglh xwilinit chuna la mapakgsina kʼIsrael chu pi xmalankinit xtamapakgsin xpalakata xkachikin* Israel.
13 Akxni David mincha kʼHebron, tlakg lhuwa lakpuskatin kakgalhilh chu katatamakgaxtokgli lakpuskatin anta kJerusalén, tiku katakgalhilh lhuwa lakgkgawasan chu laktsuman. 14 Wa umakgolh xtukuwanikan xlakgkgawasan tiku kakgalhilh kJerusalén: Samúa, Sobab, Natán, Salomón, 15 Ibhar, Elisúa, Néfeg, Jafía, 16 Elisamá, Eliadá chu Elifélet.
17 Akxni filisteos kgaxmatkgolh pi xlaksakkanit David la mapakgsina xalak Israel, xputumkan ankgolh putsakgo. David katsilh chu alh kxputatsekgni. 18 Filisteos chankgolh chu talakgatumikgolh kxakaxtum Refaím. 19 David kgalhskilh Jehová: «¿Kkan katalatlawa filisteos? ¿Nakamakamastaya kkimakan?». Jehová kgalhtilh: «Chuna, kapit, xlakata nakkamakamasta filisteos kmimakan». 20 Wa xlakata David alh kBaal-Perazim chu anta kamakgatlajalh. Chu wa: «Jehová kamapitsinit kintalamakgasitsin kkilakatin, chuna la chuchut mapitsinan akxni wi niku titaxtu». Wa xlakata anta limapakuwilh Baal-Perazim.* 21 Filisteos anta kaʼakgxtakgmakgankgolh xtatlawamakgxtukan chu David chu ksoldados kalinkgolh.
22 Alistalh, filisteos amparakgolh chu talakgatumikgolh kxakaxtum Refaím. 23 David kgalhskilh Jehová, pero xla kgalhtilh: «Ni kxlakatinkan kapit katalatlawaya. Wata kakamamakgspitti chu kxchakgenkan kakatalachipa, kxlakatin laktsu kiwi bacá.* 24 Chu akxni nakgaxpata kxʼakgan laktsu kiwi bacá xtachuna la tlawamakgolh soldados, tunkun katlawa tuku militlawat, xlakata Jehová taxtunit kmilakatin xlakata nakamakgatlaja ksoldados filisteos». 25 Wa xlakata David tlawalh chuna la Jehová xlimapakgsinit, chu kamakgatlajalh filisteos lata kʼGueba asta kʼGuézer.