Xlimaktiy Samuel
7 Akxni mapakgsina xtakaxtawilama kxchik chu Jehová xtlawanit pi xtalamakgasitsin tiku lakatsu xwilanikgolh nialh xtalatlawakgolh, 2 mapakgsina wanilh palakachuwina Natán: «Akit kwi kʼakgtum chiki nema litatlawanit xakiwi puksnankiwi, pero arca nema tapakgsini xaxlikana Dios wi kʼakgtum xaʼakgstilhakgat chiki». 3 Natán wanilh mapakgsina: «Katlawa tuku wan minaku, xlakata Jehová makgtayaman».
4 Watiya ama katsisni, Jehová maxkilh Natán uma tamakatsinin:* 5 «Kapit chu kawani kiskujni David: “Wa uma tuku wan Jehová: «¿Tuku xlakata wix nakintlawaniya akgtum chiki xlakata anta naktawila? 6 Lata akxni ktamakxtulh kʼEgipto kinkachikin Israel asta la uku, nikxni ktawilanit kʼakgtum chiki, wata lakatum lakatum ktawilanit kʼakgtum xaʼakgstilhakgat chiki chu kʼakgtum tabernáculo. 7 Kxliputum kilhtamaku la kkapulalilh israelitas, ¿milh kilhtamaku kkalitachuwinalh uma xpuxkukan tribus xalak Israel tiku akit kkalaksakli xlakata nakapulalin kinkachikin Israel? ¿Milh kilhtamaku kkakgalhskilh “¿Tuku xlakata ni kilatlawaninitaw akgtum chiki xla puksnankiwi?”?»”. 8 La uku kawani kiskujni David: “Wa uma tuku wan Jehová tiku kapulalin lhuwa soldados: «Akit ktlawalh pi nialh xpit kkasekgetni, niku xkapulalipina borregos, xlakata xpulalina kinkachikin Israel xlitaxtu. 9 Chu kaniwa niku napina akit nakmakgtayayan. Nakkamalakgsputu putum mintalamakgasitsin kmilakatin. Chu naktlawa pi nakgalhiya akgtum lanka tukuwani xtachuna la lakchixkuwin tiku lu xlakaskinka litaxtukgo kkatiyatni. 10 Naklaksaka niku natawila kinkachikin Israel. Anta nakkakaxwili chu anta nalatamakgo, chu nialh katikamaʼakglhuwika. Tiku nitlan likatsikgo nialh katikamakgapatinankgolh chuna la tlawakgolh makgasa, 11 lata akxni kkalaksakli jueces xlakata xlakputsananikgolh kinkachikin Israel. Chu naktlawa pi mintalatlawananin nialh namakglhuwikgoyan.
»”»Nachuna, Jehová waninitan pi Jehová natlawa pi minkamanan mapakgsinanin nalitaxtukgo. 12 Akxni naniya chu wix nakatajaxa xalakgmakgan minatlatni, akit naktlawa pi chatum minkgawasa mapakgsina nalitaxtu, chu tliwakglh nakwili xtamapakgsin. 13 Wa tiku natlawa akgtum chiki xpalakata kintukuwani, chu akit liwana naklakkaxwili xtamapakgsin putum kilhtamaku. 14 Akit xtlat naklitaxtu chu xla kinkgawasa nalitaxtu. Akxni natlawa tuku nitlan akit nakstakyawa, naksnokga xlakata nakmalakgaxokge chuna la tlawakgo lakchixkuwin. 15 Ankgalhin naklimasiyani tapaxkit nema ni makgxtakgnan, ni kaktilikatsinilh chuna la Saúl tiku nialh klimasiyanilh tapaxkit nema ni makgxtakgnan chu kmapanulh kmilakatin. 16 Minchik chu mintamapakgsin ankgalhin tliwakglh natawilakgo kmilakatin; mimpumapakgsin ankgalhin tliwakglh natawila»”».
17 Natán wanilh David putum umakgolh tachuwin chu putum tuku akxilhli.
18 Alistalh, mapakgsina David alh chu tawi kxlakatin Jehová, chu wa: «Malana Jehová Tiku lakgchan namapakgsinan, ¿tiku akit? ¿Tiku litaxtu kifamilia* xlakata natlawaya putum uma kimpalakatakan? 19 Chu maski lhuwata tuku kimaxkinita, Malana Jehová Tiku lakgchan namapakgsinan, na wana pi kifamilia putum kilhtamaku natawila; chu uma akgtum limapakgsin xpalakata putum latamanin, Malana Jehová Tiku lakgchan namapakgsinan. 20 ¿Chu tuku tlakg nakwaniyan akit, miskujni David? Wix liwana kilakgapasa, Malana Jehová Tiku lakgchan namapakgsinan. 21 Xpalakata mintachuwin chu xlakata chuna wi kminaku* tlawanita putum uma tuku laklanka chu makatsininita miskujni. 22 Wa xlakata wix lu lanka, Malana Jehová Tiku lakgchan namapakgsinan. Ni anan tiku mintachuna chu ni anan atanu Dios kajwatiya wix; putum tuku kkgaxmatnitaw kinkamakanajliyan uma. 23 Chu kkatiyatni ¿anan atanu kachikin chuna la minkachikin Israel? KiDios, wix pit chu lakgmaxtu xlakata minkachikin xlitaxtulh; lu lakgapaskanti akxni tlawa xpalakata tuku kaks malakawaninan. Xpalakata minkachikin, tiku lakgmaxtu kʼEgipto xlakata xtapakgsinin, kamasputu kachikinin chu xdioseskan. 24 Lakkaxwili pi israelitas minkachikin xlitaxtukgolh putum kilhtamaku. Chu wix, Jehová, xDioskan kalitaxtuninita.
25 »La uku, Jehová Dios, nikxni kalakgpali tuku malaknunita xpalakata miskujni chu xfamilia, chu kamakgantaxti tuku malaknunita. 26 Putum kilhtamaku katamalankilh mintukuwani chu chuna latamanin nawankgo: “Jehová tiku kapulalin lhuwa soldados wa xDios Israel”. Chu kinkamanan tiku mapakgsinanin nalitaxtukgo putum kilhtamaku tliwakglh katawilakgolh kmilakatin. 27 Xlakata wix, Jehová tiku kapulalin lhuwa soldados, xDios Israel, wi tuku makatsini miskujni akxni wanti: “Naktlawa pi minkamanan mapakgsinanin nalitaxtukgo”. Wa xlakata miskujni ni pekuan* chu tlawaniyan uma oración. 28 Malana Jehová Tiku lakgchan namapakgsinan, wix xaxlikana Dios chu mintachuwin xaxlikana. Chu malaknuninita miskujni putum uma tuku laktlan. 29 Wa xlakata kasikulunatlawa xchik miskujni, chu putum kilhtamaku katawi kmilakatin. Xlakata wix, Malana Jehová Tiku lakgchan namapakgsinan chuna malaknunita. Chu kasikulunatlawa putum kilhtamaku xchik miskujni».