Xlimaktiy Samuel
10 Alistalh, xmapakgsinakan ammonitas nilh chu xkgawasa Hanún xasasti mapakgsina litaxtulh. 2 Chu David wa: «Naklimasiyani tapaxkit nema ni makgxtakgnan Hanún xkgawasa Nahás chuna la xtlat kilimasiyanilh». Wa xlakata David kamalakgachalh xlakskujnin xlakata namakgoxomixikgo xlakata xninit xtlat. Pero akxni xlakskujnin David chankgolh kxtiyatkan ammonitas, 3 príncipes xalak Ammón wanikgolh xmalanakan, Hanún: «¿Lakpuwana pi David kamakaminit xlakskujnin xlakata namakgoxomixikgoyan, xlakata maxkiputun kakni mintlat? ¿Ni kaj kamalakgachalh xlakata nakinkaskgalakgoyan chu naʼakxilhkgo la wi kachikin xlakata naʼakgchipakgo?». 4 Wa xlakata Hanún kachipalh xlakskujnin David, itat kachukunilh xkgalhchixitkan, kachukunilh klhakgatkan asta kxtampulakgnikan anta niku xwi xtankan,* chu kamaspitpa. 5 Akxni makatsinika uma mapakgsina David, pi lu xkamamaxanikanit, xla tunkun kamalakgachalh lakchixkuwin xlakata nakatatanokglhkgo chu nakawanikgo: «Katamakgxtakgtit kJericó asta akxni nastakpara minkgalhchixitkan chu alistalh nataspitatit».
6 Titaxtulh kilhtamaku, ammonitas katsikgolh pi xtlawakgonit pi David xkasitsinilh, wa xlakata kamalakgachakgolh makatsininanin xlakata xkasakuakgolh sirios xalak Bet-Rehob chu xalak Zobá, akgpuxam mil soldados tiku katantun xʼankgo, chu nachuna mapakgsina Maacá tiku xkgalhi akgtum mil ksoldados chu akgkutiy mil soldados xalak Istob.* 7 Akxni David katsilh, malakgachalh Joab chu putum ksoldados, nachuna tlakg xalakgtliwakgan ksoldados. 8 Chu ammonitas tistum ankgolh tayakgo xlakata natlawakgo guerra kxmalakcha kachikin chu sirios xalak Zobá, xalak Rehob, xalak Istob* chu Maacá, lakatanu xwilakgolh, niku kalakgwan.
9 Akxni Joab akxilhli pi soldados tiku xkatalatlawamakgo xmimakgo kxlakatin chu kxchakgen, kalaksakli tlakg xalakgtliwakga soldados xalak Israel chu kakaxyawalh xlakata xkatalatlawakgolh sirios. 10 Chu tlawalh pi xtala, Abisái, xpuxku xkalitaxtunilh amakgapitsi soldados xlakata tistum xtayakgolh chu xkatalatlawakgolh ammonitas. 11 Chu wanilh: «Komo sirios kimakgatlajamakgolh, wix katat kilakgmaxtuya. Chu komo ammonitas makgatlajamakgon, akit naklakgmaxtuyan. 12 Xpalakata kinkachikinkan chu xpalakata xkachikin kiDioskan, lakgtliwakgan kiliwanatkan chu ni kilipekuanatkan chu Jehová natlawa tuku tlan naʼakxilha».
13 Alistalh Joab chu ksoldados ankgolh xlakata nakatalatlawakgo sirios, chu xlakan tsalanikgolh Joab. 14 Akxni ammonitas akxilhkgolh pi sirios xtsalakgonit, tsalanikgolh Abisái chu tanukgolh kkachikin. Alistalh, Joab nialh katalatlawalh ammonitas chu taspitli kJerusalén.
15 Akxni sirios akxilhkgolh pi Israel xkamakgatlajakgonit, makxtum laparakgolh. 16 Hadadézer kamatasaninalh sirios tiku xwilakgolh ktiyat lakatsu kKgalhtuchokgo,* chu xlakan minkgolh kʼHelam chu xkapulalima Sobac, xpuxkukan ksoldados Hadadézer.
17 Akxni makatsinika David, xla tunkun kamamakxtumilh putum soldados xalak Israel, patakutli kgalhtuchokgo Jordán chu chalh kʼHelam. Alistalh sirios tistum tayakgolh xlakata natalatlawakgo David chu talatlawakgolh. 18 Pero sirios katsalanikgolh israelitas. David kamakgnilh 700 tiku xmatlawanikgo putlaw chu 40,000 sirios tiku xkgetawilakgo kawayu, nachuna masipanilh* Sobac, xpuxkukan ksoldados, tiku anta nilh. 19 Akxni putum mapakgsinanin, tiku kskujnanikgo Hadadézer, akxilhkgolh pi Israel xkamakgatlajanit, tunkun talakkaxlakgolh Israel xlakata nitu xkatlawanilh chu xlakskujnin litaxtukgolh. Chu sirios nialh kamakgtayaputunkgolh ammonitas.