Xlimaktiy Samuel
2 Alistalh, David kgalhskilh Jehová: «¿Xlilat naktalakakxtu kʼakgtum xkachikin Judá?». Jehová kgalhtilh: «Chuna, kapit». David kgalhskimpa: «¿Niku kkan?». Xla kgalhtilh: «Kapit kʼHebrón». 2 Wa xlakata David kataʼalh chatiy xlakpuskatin, Ahinoam tiku xalak Jezreel xwanit chu Abigaíl xalak Carmelo, tiku xpuskat Nabal xwanit. 3 David na kataʼalh ksoldados tiku akxtum xtawilakgolh, chatunu chatunu chu xfamiliajkan, chu latamakgolh kxkachikinin xtiyat Hebrón. 4 Alistalh lakchixkuwin xalak Judá minkgolh chu anta laksakkgolh David chuna la mapakgsina xalak Judá.
Chu wanikgolh David: «Wa lakchixkuwin xalak Jabés-Galaad tiku maknukgolh* Saúl». 5 Wa xlakata David kamalakgachanilh makatsininanin lakchixkuwin xalak Jabés-Galaad xlakata nakawanikgo: «Jehová kakasikulunatlawan xlakata limasiyanitit tapaxkit nema ni makgxtakgnan mimalanakan Saúl akxni maknutit. 6 Jehová putum kilhtamaku kakalimasiyanin tapaxkit nema ni makgxtakgnan. Akit na tlan nakkalikatsiniyan xlakata tuku tlawatit. 7 La uku tliwakga kawantit chu ni kapekuantit, xlakata mimalanakan Saúl ninit chu tiku xalak Judá kilaksakkgonit la xmapakgsinakan».
8 Pero Abner xkgawasa Ner, xpuxkukan ksoldados Saúl, xlinit Is-Bóset, xkgawasa Saúl, kxakilhtutu kgalhtuchokgo, kMahanaim. 9 Chu mapakgsina xlimaxtukanit kʼGalaad, kJezreel, kʼEfraín, kBenjamín chu putum kʼIsrael chu xlakata na xkamapakgsilh asuritas. 10 Is-Bóset, xkgawasa Saúl, xkgalhi tipuxam kata akxni mapakgsina litaxtulh kʼIsrael, chu akgtiy kata mapakgsinalh. Pero tiku xalak xchik Judá makgtayakgolh David. 11 David kamapakgsicha lata kʼHebrón tiku xalak xchik Judá akgtujun kata chu akgchaxan papaʼ.
12 Titaxtulh kilhtamaku, Abner xkgawasa Ner chu xlakskujnin Is-Bóset, xkgawasa Saúl, taxtukgocha kMahanaim chu ankgolh kʼGabaón. 13 Joab xkgawasa Zeruyá chu xlakskujnin David na taxtukgolh chu latatanokglhkgolh niku lakatum wi chuchut kʼGabaón. Akgtum grupo tawilakgolh kxpaxtun niku lakatum wi chuchut, chu atanu grupo, tawilakgolh kxakilhtutu. 14 Wa xlakata Abner wanilh Joab: «Katayakgolh lakgkgawasan chu kalatalachipakgolh* kkilakatinkan». Chu Joab wa: «Tlan, kalatalachipakgolh». 15 Wa xlakata tayakgolh chu ankgolh kxlakatinkan. Xtachuna xlilhuwakan xwankgonit: kgalhkutiy xlakskujnin Benjamín chu Is-Bóset, xkgawasa Saúl, chu kgalhkutiy xlakskujnin David. 16 Chatunu chatunu lalichipakgolh xʼakgxakgakan, chu lalitapalhtukukgolh xʼespadajkan, chu xputumkan nikgolh. Wa xlakata limapakuwika Helcat-Hazurim* niku latalatlawakgolh, nema wi kʼGabaón.
17 Ama kilhtamaku lu lipekua latalachipalh, chu xlakskujnin David kamakgatlajakgolh Abner chu soldados xalak Israel. 18 Na anta xwilakgolh kgalhtutu xlakgkgawasan Zeruyá: Joab, Abisái, chu Asahel. Asahel tlan lakapala xkgosnan chuna la tantum juki kgosnan kkapukuxtun. 19 Asahel tokgosun* stalanilh Abner. Akxni stalanilh ni talakgaspitli kxpakgastakat* nipara kxpakgxwiki. 20 Akxni Abner talakgaspitli, kgalhskininalh: «¿Wix Asahel?». Xla kgalhtinalh: «Chuna, akit». 21 Alistalh Abner wanilh: «Kapit kpakgastakat o kpakgxwiki, kachipa chatum kgawasa chu katatamakgxtakgti putum tuku namakglhtiya». Pero Asahel chuntiya stalanilh. 22 Wa xlakata Abner wanipa Asahel: «Nialh kakistalani. ¿Tuku xlakata tlawaya pi nakmakgniyan? ¿La naklakaʼakxilha alistalh mintala Joab?». 23 Pero xla ni tachokgoputulh, wa xlakata Abner lipalhtukulh xlanza, chu lanza taxtucha kstipun. Anta tamalh chu nilh. Putum tiku xtitaxtukgo niku Asahel xanin xma tsinu xtachokgokgo.
24 Wa xlakata Joab chu Abisái tsukukgolh stalanikgo Abner. Akxni kgotanulh,* chankgolh ksipi Amá, nema wi kxlakatin Guíah, kxtiji xakaskakni tiyat nema an kʼGabaón. 25 Chu benjaminitas tamakxtumikgolh kxchakgen Abner, akgtum grupo lakgolh chu tistum tayakgolh kxʼakgspun* sipi. 26 Abner pixlanka wanilh Joab: «¿Nikxni katikgalhkgaskgolh kiʼespadajkan? ¿Ni akxilha pi kaj talipuwan nakinkaliminikgoyan? ¿Tuku kgalhkgalhipat xlakata nakawaniya misoldados pi nialh kakastalanikgolh xnatalankan?». 27 Akxni Joab kgaxmatli uma, wa: «Kmalaknuniyan kxtukuwani xastakna Dios, pi komo nitu xwanti, soldados tiku akxtum kintaminkgo chuntiya xkastalanikgolh xnatalan asta akxni kxkgakgalh». 28 Wa xlakata Joab matasilh akgalokgot chu soldados nialh kastalanikgolh israelitas, chu sputli tatalachipat.
29 Abner chu ksoldados tlawankgolh kʼArabá putum ama katsisni, patakutkgolh Jordán, titaxtukgolh ktalhpan* chu chankgolh kMahanaim. 30 Akxni Joab nialh stalanilh Abner, kamamakxtumilh putum tiku xtaʼankgo. Xliputum xlakskujnin David, xkitsankgakgo kgalhkunajatsa lakchixkuwin, chu nachuna Asahel. 31 Pero xlakskujnin David xkamakgatlajakgonit benjaminitas chu ksoldados Abner; xnikgonit 360 ksoldados. 32 Linkgolh Asahel chu maknukgolh niku xmaknukanit xtlat, anta kBelén. Alistalh Joab chu ksoldados tantaskaka tlawankgolh chu chankgolh kʼHebrón akxni xkgakgalh.