Xlimaktiy Samuel

13 Absalón, xkgawasa David, xkgalhi chatum xtala tsumat tiku lu stlan xtasiya chu xwanikan Tamar. Chu Amnón, atanu xkgawasa David, lu xlakgati. 2 Amnón lu xlakgaputsama xpalakata Tamar chu asta litatatlalh. Xlakata Tamar nina xtatalakgxtumi chatum chixku, Amnón lu tuwa xmakgkatsi wi tuku natlawani. 3 Pero Amnón xkgalhi chatum xʼamigo tiku xwanikan Jehonadab, xkgawasa Simeá,* xtala David. Chu Jehonadab chatum chixku tiku lu skgalala xwanit. 4 Wa xlakata kgalhskilh: «¿Tuku xlakata wix, xkgawasa mapakgsina, lu lakgaputsaya chali chali? ¿Tuku xlakata ni kiwaniya tuku akgspulaman?». Amnón kgalhtilh: «Lu klakgati Tamar, xtala kintala Absalón». 5 Wa xlakata Jehonadab wanilh: «Katapa chu kawanti pi tatatlaya. Akxni mintlat naminan akxilhan, kawani: “Katlawa litlan, kamilh kintala Tamar chu kakiliminilh liwat. Komo xla nakaxtlawa liwat kkilakatin nema kamaxkikan tiku tatatlakgo chu nakimaxki, akit nakwa”».

6 Wa xlakata Amnón tamalh chu wa pi xtatatla chu mapakgsina milh akxilha. Wa xlakata Amnón wanilh mapakgsina: «Katlawa litlan, kamilh kintala Tamar. Katlawalh kkilakatin maktiy kaxtalanchu nema tasiyakgo chuna la naku chu kakimaxkilh xlakata akit nakwa». 7 David malakgachanilh tamakatsinin Tamar, tiku xwi kchiki: «Katlawa litlan, kapit kxchik mintala Amnón chu kakaxtlawani tuku nawa». 8 Wa xlakata Tamar alh kxchik xtala Amnón, niku xla xma. Alistalh lakgkgochimilh skitit, chu kxlakatin tlawalh kaxtalanchu chu kamakchalh. 9 Alistalh tiyalh sartén chu mujunilh xkaxtalanchu, pero Amnón ni waputulh chu wa: «¡Putum kataxtukgolh!». Chu putum taxtukgolh.

10 Amnón wanilh Tamar: «Kalita liwat niku klhtata, xlakata wix nakimawiya». Wa xlakata Tamar tiyalh kaxtalanchu nema xtlawanit chu xtasiyakgo la naku chu linilh xtala Amnón, niku klhtata. 11 Akxni malakatsuwinilh kaxtalanchu xlakata xwalh, xla chipalh chu wanilh: «Katat, kintalatsumat, kakintatapa». 12 Pero xla kgalhtilh: «¡Nichuna katlawa, kintala! Ni kakimamaxani. Uma ni tlawakan kʼIsrael. Ni katlawa uma tuku lu lixkajni. 13 ¿La naklilatama uma tamamaxanit? Chu wix naliʼakxilhkana kʼIsrael la chatum chixku tiku lixkajni likatsi. Katlawa litlan, katachuwinanti mapakgsina, xlakata namaxkiyan talakaskin naktapakgsiniyan». 14 Pero Amnón ni kgaxmatniputulh. Xlakata xla tlakg tliwakga xwanit, likgamanalh chu mamaxanilh. 15 Kaj xalan Amnón lu tsukulh sitsini chu uma tasitsi tlakg lanka wa nixawa tapaxkit nema xkgalhininit xapulana. Wa xlakata wanilh: «¡Kataki chu kapit!». 16 Alistalh Tamar wanilh: «¡Nichuna, kintala, ni katlawa pi kaktaxtulh! ¡Uma tlakg nitlan katikitaxtulh nixawa tuku kintlawani!». Pero Amnón ni kgaxmatniputulh.

17 Tasanilh kgawasa tiku xkuentajtlawa chu wanilh: «Katlawa litlan, katamakxtu uma lataman kkilakatin, chu liwana kamalakchuwa». 18 (Tamar klhakganit maktum lu stlan lhakgat,* chuna klhakganankgo xlaktsumankan mapakgsinanin). Skujni tamakxtulh chu liwana malakchuwalh malakcha. 19 Alistalh Tamar xʼakstu akmawakaka lhkaka, xtitli lu xastlan klhakgat nema klhakganit chu chuna la xtlawama xʼakchipakanit chu pixlanka xtasatilha.

20 Akxni Absalón akxilhli Tamar, kgalhskilh: «¿Wa mintala Amnón tiku tlawanin uma? Kintala, nitu kawanti. Xla mintala, nialh kalilakgapusa uma kminaku». Lata akxni chuna lalh, Tamar tamakgxtakgli kxchik xtala, Absalón, chu xkatamakgatlininit latamanin. 21 Akxni mapakgsina David katsilh putum uma, lu sitsilh. Pero xla nitu wanilh xkgawasa Amnón xlakata ni xmakgalipuwamputun. Xlakata xapuxku xkgawasa xwanit chu lu xpaxki. 22 Chu Absalón nitu wanilh Amnón, ni wanilh tuku tlan nipara tuku nitlan, xlakata Absalón lu ksitsini Amnón xlakata xmamaxaninit xtala, Tamar.

23 Akxni xtitaxtunita akgtiy kata, tiku xkamakgsitkgo xborregos Absalón xwilakgolh kBaal-Hazor, lakatsu kʼEfraín, wa xlakata Absalón kawanilh putum xlakgkgawasan mapakgsina pi xʼankgolh kʼakgtum lanka taway. 24 Absalón lakgalh mapakgsina chu wanilh: «Kkamakgsitma kiborregos. Katlawa litlan, mapakgsina chu xlakskujnin akxtum kakintaminkgolh». 25 Pero mapakgsina kgalhtinalh: «Ni, kinkgawasa. Komo kimputumkan nakanaw, akgtum takuka nakkalitaxtuniyan». Maski Absalón makglhuwa wanilh, mapakgsina ni amputulh, pero sikulunatlawalh. 26 Chu Absalón kgalhtilh: «Komo wix ni natana, katlawa litlan, akxtum kakinkatamin kintala Amnón». Mapakgsina kgalhskilh: «¿Chu tuku xlakata lakaskina pi xla kakataʼan?». 27 Chu, xlakata Absalón makglhuwa wanilh, akxtum katamalakgachalh Amnón chu putum xlakgkgawasan mapakgsina.

28 Chu Absalón kalimapakgsilh xlakskujnin: «Skgalalh katawilatit. Akxni xnaku Amnón napaxuwa xlakata vino, nakkawaniyan “¡Kachipatit Amnón!”. Akxni nakkawaniyan uma, wixin namakgniyatit. Ni kapekuantit, ¿pi ni akit kkalimapakgsiman? Lakgtliwakga kawantit chu ni kapekuantit». 29 Wa xlakata xlakskujnin Absalón tlawanikgolh Amnón chuna la Absalón xkalimapakgsinit. Ama kilhtamaku, putum amakgapitsin xlakgkgawasan mapakgsina tayakgolh chu xchatunukan kgetawilakgolh xmulajkan chu tsalakgolh. 30 Akxni xʼamakgolh ktiji, David malakgachanika uma tamakatsin: «Absalón kamakgninit putum xlakgkgawasan mapakgsina; nipara chatum lakgtaxtulh». 31 Akxni kgaxmatli uma, mapakgsina tayalh xtitli klhakgat nema klhakganit chu tamalh kkatutsu, chu putum xlakskujnin paxtutayakgolh chu na kxtitkgonit klhakgatkan.

32 Pero Jehonadab xkgawasa Simeá,* xtala David, wa: «Ni kakanajlalh kimalana pi kamakgnikanit putum xlakgkgawasan mapakgsina, xlakata kajwatiya Amnón nilh. Wa Absalón tiku chuna limapakgsinalh, chuna xlakkaxwilinit lata akxni Amnón mamaxanilh xtala Tamar. 33 Kimapakgsina, kimalana tiku kgalhiya lhuwa kakni, ni kuenta katlawa* uma tamakatsinin pi putum xlakgkgawasan mapakgsina nikgonit, xlakata kajwatiya Amnón nilh».

34 Pero Absalón tsalalh. Alistalh, tiku xkuentajtlawanama talakayawalh chu akxilhli pi lhuwa latamanin xmimakgo ktiji kxchakgen, lakatsu ksipi. 35 Alistalh Jehonadab wanilh mapakgsina: «¡Kaʼakxilhti! Xlakgkgawasan mapakgsina taspitkgonit. Miskujni wanin tuku xaxlikana». 36 Akxni wankgolh uma, xlakgkgawasan mapakgsina tanukgolh chu lu xtasatilhakgo. Chu mapakgsina chu putum xlakskujnin na lu tasakgolh. 37 Chu Absalón, tsalalh anta niku xwi Talmai xkgawasa Amihud, mapakgsina xalak Guesur. Akglhuwa kilhtamaku David lu talipuwanilh xpalakata xkgawasa. 38 Akxni xʼanita kʼGuesur Absalón akgtutu kata tamakgxtakgli anta.

39 Alistalh, mapakgsina David nialh lu lilakgaputsalh* xlakata xninit Amnón chu la uku lu xʼamputun akxilha Absalón.