Xlimaktiy Samuel
19 Joab makatsinika: «Mapakgsina tasama chu lakglipuwama Absalón». 2 Maski tlajanankgolh,* ama kilhtamaku talipuwan kitaxtulh xpalakatakan putum soldados, xlakata kgaxmatkgolh pi mapakgsina lu xlakglipuwama xkgawasa. 3 Akxni soldados taspitkgolh kkachikin nitu xchuwinamakgolh, xtachuna la tiku maxanankgo xlakata tsalaminkgocha kʼakgtum tatalachipat. 4 Mapakgsina talakgatlapalh chu pixlanka xwan: «¡Kinkgawasa, Absalón! ¡Kinkgawasa, Absalón! ¡Kinkgawasa, Absalón, kinkgawasa!».
5 Alistalh Joab tanulh kchiki niku xtanuma mapakgsina chu wanilh: «La uku kamamaxaninita putum milakskujnin, tiku la uku lakgmaxtukgon wix, milakgkgawasan, milaktsuman, milakpuskatin chu amakgapitsi milakpuskatin. 6 Wix kapaxkiya tiku ni akxilhputunkgoyan chu ni kaʼakxilhputuna tiku paxkikgoyan. La uku liwana limasiyanita pi minapuxkun chu milakskujnin nitu litaxtukgo mimpalakata, xlakata liwana kkatsi pi komo Absalón ni xtinilh chu kimputumkan xaktiniw, wix paxuwapat xwa. 7 La uku kataya chu kapit kamakgpuwantiniya milakskujnin. Komo nichuna natlawaya, kmalaknuniyan kxtukuwani Jehová pi uma katsisni nipara chatum chixku natatamakgxtakgan chu uma tlakg nitlan katikitaxtulh nixawa putum tuku nitlan akgspulanitan lata akxni kgawasaku xwanita». 8 Wa xlakata mapakgsina tayalh chu tawi kxmalakcha kachikin chu kamakatsinika putum kachikin: «Mapakgsina wi kmalakcha». Alistalh putum latamanin ankgolh kxlakatin mapakgsina.
Pero soldados xalak Israel xtsalakgonit, chatunu chatunu xʼankgonit kxchikkan. 9 Kputum tribus xalak Israel latamanin xtaʼakglhuwikgo chu xwankgo: «Mapakgsina kinkalakgmaxtun kxmakankan kintalamakgasitsinkan chu kinkalakgmaxtun kxmakankan filisteos. Pero la uku xtsalanima Absalón, wa xlakata taxtulh kkachikin. 10 Chu Absalón, tiku laksakwi xlakata kimapakgsinakan nalitaxtu, nilh ktatalachipat. ¿Tuku xlakata ninatu lakkaxwilipatit xlakata namaspitatit mapakgsina?».
11 Mapakgsina David kamalakgachanilh uma tamakatsinin sacerdotes Sadoc chu Abiatar: «Kakatachuwinantit lakgkgolotsin xalak Judá chu kakawanitit: “Mapakgsina kgaxmatnit anta kchiki niku wi, putum tuku kilhwamakgolh israelitas. ¿Tuku xlakata nakgalhkgalhiyatit pi atanu tiku namaspita mapakgsina kxchik? 12 Wixin kinatalan, talilakgapasni litaxtuyaw.* ¿Tuku xlakata nakgalhkgalhiyatit pi atanu tiku namaspita mapakgsina?”. 13 Chu kawanitit Amasá: “¿Ni talilakgapasni akinin?* Dios lu kakimalakgaxokgelh komo la uku ni naklakgayawayan xpuxkukan soldados nalitaxtuya kxlakgxokgo Joab”».
14 Chuna, mapakgsina tlawalh pi xnakujkan putum lakchixkuwin xalak Judá xtatayakgolh chu xlakan makatsinikgolh: «Kataspitti, wix chu putum milakskujnin».
15 Akxni mapakgsina tsukulh taspita chu chalh kJordán, lakchixkuwin xalak Judá minkgolh kʼGuilgal, xlakata natatanokglhkgo chu nakuentajtlawakgo akxni xtitaxtulh kJordán. 16 Simeí xkgawasa Guerá, tiku benjaminita xwanit xalak Bahurim, lakapala kataʼalh lakchixkuwin xalak Judá xlakata natatanokglhkgo mapakgsina David, 17 chu xtaʼankgo akgtum mil lakchixkuwin xalak Benjamín. Nachuna Zibá, skujni xalak xchik Saúl tiku xkataʼan kgalhkukitsis xkamanan chu kgalhpuxam xlakskujnin, lakapala taktalh* kJordán akxni nina xchin mapakgsina. 18 Titaxtulh* niku xpatakutkan kgalhtuchokgo xlakata nakamakgtaya tiku xalak xchik mapakgsina na napatakutkgo chu xlakata natlawa putum tuku mapakgsina xlakaskin. Pero akxni mapakgsina xʼamaja patakuta kgalhtuchokgo Jordán, Simeí xkgawasa Guerá lakgtatsokgostalh. 19 Chu wanilh mapakgsina: «Ni kakilimawakalh chu ni kalakapastakli tuku nitlan tlawanin miskujni akxni kimalana tiku kgalhi lhuwa kakni taxtulh kJerusalén. Uma ni lu xlakaskinka kaliʼakxilhli mapakgsina, 20 xlakata miskujni liwana katsi pi lakgalhinalh. Wa xlakata xliputum xchik José akit tiku pulana milh lakgapaxtokga kimalana tiku kgalhi lhuwa kakni».
21 Lakapala, Abisái xkgawasa Zeruyá wa: «¿Ni kilimakgnitkan Simeí xpalakata uma, xlakata lixkajni tuku wanilh xtalaksakni Jehová?». 22 Pero David wa: «¿Tuku xlakata makgtanuyatit wixin, xlakgkgawasan Zeruyá? ¿Tuku xlakata kilatalalakatawakayaw? ¿Ni mapakgsina klitaxtupara la uku kʼIsrael? ¿Tuku xlakata la uku wi tiku namakgnikan kʼIsrael?». 23 Alistalh mapakgsina wanilh Simeí: «Ni katini», chu tlawanilh akgtum tamalaknun.
24 Mefibóset, xtanat Saúl, na alh makgamakglhtinan mapakgsina. Ni xtuchakganit chu nipara ksitnit xkgalhchixit chu ni xchekgenit klhakgat lata akxni mapakgsina alh asta akxni taspitli chu nitu xʼakgspulanit. 25 Akxni chalh* kJerusalén xlakata namakgamakglhtinan mapakgsina, mapakgsina kgalhskilh: «Mefibóset, ¿tuku xlakata ni kistalani?». 26 Xla kgalhtilh: «Kimalana tiku kgalhiya lhuwa kakni, kiskujni kiʼakgskgawilh. Xlakata akit luntu, akit xakwanit: “Kakimaxki talakaskin nakkgetlapa kiburro xlakata nakkgetawila chu naktaʼan mapakgsina”. 27 Pero xla wanilh taʼakgsanin kimpalakata kimalana tiku kgalhi lhuwa kakni. Pero, kimalana tiku kgalhi lhuwa kakni xtachuna la chatum xʼángel xaxlikana Dios, wa xlakata katlawa tuku tlan akxilha. 28 Kimalana tiku kgalhiya lhuwa kakni, wix tlan xtikamakgni putum tiku xalak xchik kintlat, pero nichuna tlawa, wata tlawa pi miskujni na xwayalh kmimesa. ¿Tiku klitaxtu akit xlakata wi tuku nakliwani mapakgsina?».
29 Pero, mapakgsina wanilh: «¿Tuku xlakata chuntiya lichuwinamaw uma? Klakkaxwilinit pi wix chu Zibá nalatatapapitsiyatit tiyat». 30 Alistalh Mefibóset wanilh mapakgsina: «Xla putum katatamakgxtakgli, xlakata kimalana tiku kgalhi lhuwa kakni tlan taspitnit kxchik».
31 Alistalh Barzilái tiku galaadita xwanit chu xlama kRoguelim, talakaktalh kJordán xlakata nakuentajlin mapakgsina asta kkgalhtuchokgo Jordán. 32 Barzilái xlina kata, xkgalhi 80 kata. Putum kilhtamaku akxni mapakgsina xtamakgxtakgma kMahanaim, Barzilái maxkilh tuku xmaklakaskin xlakata xkgalhi lhuwa tumin. 33 Wa xlakata mapakgsina wanilh Barzilái: «Akxtum kapatakutwi kgalhtuchokgo xlakata akit naklakkaxwili pi nitu katitsankganin kJerusalén». 34 Pero Barzilái wanilh mapakgsina: «¿La akglit kata chuntiya naklatama? ¿Tuku xlakata naktaʼan mapakgsina kJerusalén? 35 Akit kkgalhiya 80 kata. ¿Tlan kakxilha tuku tlan chu tuku nitlan? ¿Tlan uma miskujni nakgalhwanan tuku wa chu tuku likgotnan? ¿Tlanku kkakgaxmatni tiku kilhtlikgo? ¿Tuku xlakata uma miskujni akgtum takuka nalitaxtuni kimalana tiku kgalhiya lhuwa kakni? 36 Akit lu tlan klimakgkatsiya xlakata ktamilh mapakgsina asta kkgalhtuchokgo Jordán. ¿Tuku xlakata mapakgsina namaxki kskujni uma lanka tasikulunalin? 37 Katlawa litlan kamaxki talakaskin miskujni pi kataspitli. Kakimaxki talakaskin nakni kkinkachikin lakatsu niku kamaknukanit* kintlat chu kintse. Pero, kaʼakxilhti, unu wi miskujni Kimham. Xla kaʼalh chu katapatakutli kgalhtuchokgo kimalana tiku kgalhi lhuwa kakni. Katlawa xpalakata tuku tlan akxilha».
38 Wa xlakata mapakgsina wanilh Barzilái: «Kimham akxtum nakintapatakuta kgalhtuchokgo, chu akit naktlawa xpalakata tuku wix tlan naʼakxilha. Putum tuku nakiskiniya naktlawa mimpalakata». 39 Alistalh latamanin tsukukgolh patakutkgo kgalhtuchokgo Jordán. Chu mapakgsina, akxni xʼamaja patakuta, lakpitsukli* Barzilái chu sikulunatlawalh. Chu Barzilái taspitli kxchik. 40 Akxni mapakgsina patakutli kgalhtuchokgo xlakata xʼalh kʼGuilgal, Kimham taʼalh. Putum latamanin xalak Judá chu itat xliputum latamanin xalak Israel taʼankgolh mapakgsina kxakilhtutu kgalhtuchokgo.
41 Alistalh putum lakchixkuwin xalak Israel kgalhskinkgolh mapakgsina: «¿Tuku xlakata kinatalankan, lakchixkuwin xalak Judá tsekg liminkgonit mapakgsina chu tlawakgonit pi napatakuta kgalhtuchokgo Jordán chu nachuna putum tiku xalak xchik chu putum ksoldados David?». 42 Putum lakchixkuwin xalak Judá kakgalhtikgolh lakchixkuwin xalak Israel: «Xlakata mapakgsina xalak kifamiliajkan. ¿Chu tuku xlakata sitsiyatit? ¿Wi tuku kwanitaw nema tapakgsini mapakgsina David o kmakglhtinanitaw akgtum tamaskiwin?».*
43 Pero lakchixkuwin xalak Israel kawanikgolh tiku xalak Judá: «Akinin akgkaw tribus, wa xlakata tlakg kinkatapakgsiniyan David nixawa wixin. ¿Tuku xlakata kilalakgmakgaw? ¿Ni pulana akinin kililakkaxwilitkan xwanit nakmaspitparayaw mapakgsina?». Pero tuku wankgolh lakchixkuwin xalak Judá tlakg xlakaskinka* litaxtulh nixawa tuku wankgolh lakchixkuwin xalak Israel.