Xlimaktiy Samuel
20 Ama kilhtamaku, xlama chatum chixku tiku xwanikan Seba xkgawasa Bicrí, chatum benjaminita tiku lu xtaʼakglhuwi. Matasilh akgalokgot chu wa: «David ni xalak kifamiliajkan; xkgawasa Jesé nitu nakinkamaxkiyan. ¡Kaʼaw, Israel! ¡Chatunu chatunu kakalakgtaspitli xdioses!». 2 Akxni wankgolh uma, putum lakchixkuwin xalak Israel nialh stalanikgolh David chu stalanikgolh Seba xkgawasa Bicrí. Pero lakchixkuwin xalak Judá, lata kJordán asta kJerusalén, ni makgxtakgkgolh xmapakgsinakan.
3 Akxni mapakgsina David chalh kxchik kJerusalén, kgalhkaw amakgapitsi xlakpuskatin tiku xkamakgxtakgnit xlakata xkuentajtlawakgolh chiki, tlawalh pi xkakuentajtlawaka kʼakgtum chiki. Xtlawa pi xkamaxkika liwat, pero nialh katatalakgxtumipa. Anta kalakgachinuka asta akxni nikgolh, latamakgolh chuna la lakpuskatin tiku xnikgonita xchixkukan maski xchixkukan xlamajku.
4 Alistalh mapakgsina wanilh Amasá: «Kakamatasaninanti lakchixkuwin xalak Judá xlakata naminkgo tuxama chu wix na katat». 5 Wa xlakata Amasá alh xlakata nakatasani lakchixkuwin xalak Judá, pero ni taspitli kilhtamaku akxni xwanikanit. 6 Alistalh David wanilh Abisái: «Seba xkgawasa Bicrí max tlakg nitlan tuku xkinkatlawanin nixawa Absalón. Kakalipi xlakskujnin mimalana chu kaputsastalani xlakata ni natsala kʼakgtum kachikin nema kgalhi patsaps chu natatsekga». 7 Wa xlakata ksoldados Joab, keretitas, peletitas chu putum lakgtliwakga lakchixkuwin tsukukgolh stalanikgo; taxtukgolh kJerusalén xlakata naputsastalanikgo Seba xkgawasa Bicrí. 8 Akxni chankgolh lakatsu klanka chiwix nema wi kʼGabaón, Amasá milh tatanokglha. Joab xwilinit klhakgat nema xlitalatlawanan chu xtampulakgwaka xʼespada. Pero akxni talakatsuwilh, xʼespada taxtulh niku xtajuma chu tamacha kkatutsu.
9 Joab kgalhskilh Amasá: «¿Kintala, putum tlan wi?». Alistalh xpakgastakat lichipalh kxkgalhchixit Amasá, xtachuna la xʼama lakatsuka.* 10 Amasá ni kuenta tlawanilh espada nema Joab xchipanit. Joab litapalhtukulh Amasá chu xpaluwa taxtukgolh chu kkatutsu tamakgocha. Ni makgtiy chuna tlawalh; kaj makgtum limakgnilh. Alistalh, Joab chu xtala Abisái chuntiya putsastalanikgolh Seba xkgawasa Bicrí.
11 Chatum ksoldado Joab tayalh lakatsu niku xanin xma Amasá chu tsukulh wan: «¡Tiku tataya Joab chu makgtaya David, kastalanilh Joab!». 12 Pero Amasá xlitapilima xkgalhni kxlakʼitat tiji. Akxni ama chixku akxilhli pi putum latamanin xtachokgokgo anta, mapanulh Amasá ktiji chu makgxtakgli kkakiwin. Nachuna liʼakgtlapamilh maktum lhakgat xlakata akxilhli pi putum tiku xtitaxtukgo kxpaxtun xtachokgokgo. 13 Akxni xmapanunita ktiji, putum lakchixkuwin stalanikgolh Joab xlakata xputsastalanikgolh Seba xkgawasa Bicrí.
14 Seba xtitaxtutilha kxliputum tribus xalak Israel asta akxni chalh kʼAbel xla Bet-Maacá. Chu bicritas tamakxtumikgolh chu nachuna tanukgolh kkachikin.
15 Joab chu ksoldados* chankgolh kʼAbel xla Bet-Maacá chu makgstiliwilikgolh kachikin xlakata Seba anta xwi. Uma kachikin xkgalhi akgtiy patsaps. Kachikin xlitamakgstiliwilinit akgtum patsaps xla tiyat, akxni chankgolh kʼuma patsaps mamakxtumikgolh lhuwa tiyat xlakata tlan xlakpakgoskgolh. Alistalh, akxni lakpakgoskgolh xapulana patsaps, ksoldados Joab tsukukgolh waxnankgo kxtampin xliʼakgtiy patsaps xlakata nalaktilhkgo. 16 Alistalh, lata kkachikin chatum skgalala puskat pixlanka tsukulh wan: «¡Kakgaxpattit, kakgaxpattit! Katlawatit litlan, kawanitit Joab pi kamilh xlakata ktachuwinamputun». 17 Wa xlakata Joab talakatsuwilh, chu puskat kgalhskilh: «¿Wix Joab?». Xla kgalhtinalh: «Chuna». Alistalh puskat wanilh: «Kakgaxpatti xtachuwin miskujni». Joab kgalhtinalh: «Kkgaxmatniyan». 18 Xla wampa: «Makgasa ankgalhin xwankan “Kakgalhskininankgolh kʼAbel”, chu xtalakkaxtlawa taʼakglhuwit. 19 Akit kkapalakachuwinan tiku ni taʼakglhuwikgo chu ni makgxtakgnankgo xalak Israel. Wix malakgsputuputuna akgtum kachikin nema litaxtu la chatum tse anta kʼIsrael. ¿Tuku xlakata namalakgsputuya tuku tapakgsini Jehová?». 20 Joab kgalhtilh: «Nikxni xaklilakpuwa nakmalakgsputu. 21 Ni, nichuna ktlawaputun. Chatum chixku tiku xalak xkasipijni Efraín tiku wanikan Seba xkgawasa Bicrí lakatakinit* mapakgsina David. Kajwatiya kilamakamaxkiw uma chixku chu naktamakgatlini kachikin». Alistalh puskat wanilh Joab: «¡Nakkamakaniyachan xʼakgxakga kxʼakgspun* patsaps!».
22 Tunkun, xaskgalala puskat alh katachuwinan putum latamanin xalak kachikin chu xlakan pixchukuktikgolh Seba xkgawasa Bicrí chu lakgmakankgolh Joab xʼakgxakga. Alistalh, matasilh akgalokgot chu putum lakchixkuwin tamakgatlinikgolh kachikin, chatunu chatunu ankgolh kxchikkan. Chu Joab taspitpa kJerusalén, anta niku xwi mapakgsina.
23 Ama kilhtamaku Joab xkapulalin putum soldados xalak Israel, chu Benaya xkgawasa Jehoiadá xkapulalin keretitas chu peletitas. 24 Adoram xkapulalima tiku kskujnanikgo mapakgsina, chu Jehosafat xkgawasa Ahilud wa tiku xtsokgwili tuku xtlawakan. 25 Sevá makgatsokgna xlitaxtu, chu Sadoc chu Abiatar sacerdotes xwankgonit. 26 Irá tiku jairita xwanit, na lu xlakaskinka puxku* litaxtunilh David.