Xlimaktiy Samuel
22 Chu David wanilh Jehová tachuwin nema min kʼuma takilhtlin akxni Jehová lakgmaxtulh kxmakankan putum xtalamakgasitsin chu kxmakan Saúl. 2 Xla wa:
«Jehová akgtum lanka chiwix niku tlan ktatsekga, chu kinkachikin nema kgalhi patsaps, kilakgmaxtuna.
3 KiDios lanka kinchiwix, tiku akit klitatsekga,
kiʼescudo, tliwakga kilakgmaxtuna,* anta niku nitu kiʼakgspula,
anta niku tlan ktsala, kilakgmaxtuna; wix tiku kilakgmaxtuya xlakata ni nakintlawanikan tuku nitlan.
4 Akit ktachuwinan Jehová tiku lakgchan namalankikan,
chu chuna nakilakgmaxtu kxmakankan kintalatlawananin.
5 Taʼakgayawana nema liminkgo linin kimakgstiliwilikgolh;
lhuwa lakchixkuwin tiku lixkajni likatsikgo chuna la kgalhtuchokgo nema staknit xkimakgapekuankgo.
6 Xtasiw Putaknun* kimakgstiliwilikgo;
xliʼakgsiyat linin xkintlawaniputunkgo tuku nitlan.
7 Akxni xaklakgaputsama ktasanilh Jehová,
chuntiya kkilhanilh kiDios.
Lata kxtemplo kgaxmatli kintachuwin,
kgaxmatli chuna la pixlanka xaktasaskima tamakgtay.
8 Katiyatni tsukulh tatsuwi chu tsukulh talakchiki:
xlaktay akgapun tsukulh tachiki
chu tsukulh tatsuwi xlakata xla lu ksitsinit.
9 Kxkinkan xtaxtu jini
chu kxkilhni xtaxtu akgtum lanka lhkuyat;
anta xtaxtu xalakgpasani jalanat.
10 Tlawalh pi akgapun xtakilhputalh akxni xla xtaktama,
chu kxtampin xtantun xwilakgolh lakgtsitsakga puklhni.
11 Kgosmincha, xkgewi chatum querubín.
Tasiyalh kxpakgen chatum ángel.
12 Alistalh, xlakata anta xtatsekgli, litamakgstililh niku kapukswa,
xalakgtsitsakga chuchut chu xalakgtsitsakga puklhni.
13 Kxkgakganat nema xwi kxlakatin taxtukgolh xalakgpasani jalanat.
14 Alistalh Jehová tlawalh pi xjililh lata kʼakgapun;
Tiku xala talhman tlawalh pi xtakgaxmatli xtachuwin.
15 Kamakgosulh xflechas chu chuna kamaʼakgawanilh;
nachuna tlawalh pi xmakglipli, chu chuna tlawalh pi lu xpekuankgolh.
16 Xtampun pupunu kalakgwan tawi;
xlaktay katiyatni kalakgwan tawilakgolh xlakata xtastakyaw Jehová,
xlakata lu tliwakga taxtulh un kxkinkan.
17 Lata kkatalhman stonkgli xmakan;
kinchipalh chu kimaxtulh anta kxakapulhman chuchut.
18 Kilakgmaxtulh kxmakan xatliwakga kintalatlawana,
kxmakankan tiku ni xkiʼakxilhputunkgo, tiku tlakg lakgtliwakgan nixawa akit.
19 Xlakan kintalatlawakgolh akxni kiʼakgspulalh tuku nitlan,
pero Jehová kimakgtayalh.
20 Kililh niku nitu xkiʼakgspulalh;*
kilakgmaxtulh xlakata xakmakgapaxuwa.
21 Jehová kisikulunatlawa xlakata ktlawa tuku xaʼakgstitum;
kimaxki tuku kilakgchan xlakata ni ktlawa tuku nitlan.*
22 Xlakata ankgalhin kanit kxtiji Jehová
chu ni ktlawanit tuku nitlan, ni ktamakgatlininit kiDios.
23 Liwana klakapastaka putum milimapakgsin;
ni kaktitamakgatlinilh mintastakyaw.
24 Kxlakatin chuntiya xaʼakgstitum naklitaxtu,
kuenta naktlawa xlakata ni naktlawa tuku nitlan.
25 Jehová kakisikulunatlawalh xlakata ktlawanit tuku xaʼakgstitum,
kakisikulunatlawalh xlakata ni ktlawanit tuku nitlan kxlakatin.
26 Tiku ni makgxtakgnan wix ni makgxtakga;
chixku* tiku ni tlawa tuku nitlan wix tlan likatsiniya;
27 tiku skulunku na skulunku likatsiniya,
pero tiku lixkajni likatsi naʼakgskgawiya.
28 Xlakata kalakgmaxtuya tiku taʼaktujukgo,
pero nitlan kaʼakxilha tiku tlankajwanankgo, chu kamaktujuya.
29 Xlakata wix kimakgskgot, Jehová;
wa Jehová tiku makaxkgakge niku kapukswa ktitaxtu.
30 Xlakata mintamakgtay tlan kkatalachipa kgalhananin;
xlakata xlitliwakga Dios tlan ktawakatnan kʼakgtum patsaps.
31 Xtiji xaxlikana Dios xatlan;*
xtachuwin Jehová xaskulunku.
Putum tiku litatsekgkgo xla kalitaxtuni akgtum escudo.
32 ¿Wi atanu Dios nixawa Jehová?
¿Tiku litaxtu akgtum lanka chiwix chuna la kiDioskan?
33 Xaxlikana Dios kimputatsekgni,
chu xla natlawa pi kintiji xatankswa nawan.
34 Xla tlawa pi kintantun nalitaxtu xtachuna la xla tantum juki;
tliwakglh kiwili niku katalhman.
35 Xla kimamakgatawakge xlakata naktalachipanan;
kimakxpan tlan lhtankgo akgtum arco nema litatlawanit cobre.
36 Wix kimaxkiya escudo xla lakgtaxtut,
chu mintataktujut lanka kintlawa.
38 Nakkaputsastalani kintalatlawananin chu nakkamalakgsputu;
ni ktitaspitli asta akxni nakkamasputukgo.
39 Nakkamalakgsputu chu nakkalakchita, xlakata ni natakikgo;
kxtampin kintantun natamakgoyacha.
40 Wix nakimaxkiya litliwakga xlakata naktalatlawanan;
natlawaya pi kintalatlawananin natamakgoyacha kkilakatin.
41 Natlawaya pi kintalatlawananin nakintsalanikgo;
nakkamalakgsputu* tiku ni kiʼakxilhputunkgo.
42 Xlakan tasaskinkgo tamakgtay, pero ni anan tiku nakalakgmaxtu;
asta lakgkilhankgo Jehová pero xla ni kakgalhti.
43 Nakkalakgswakga asta smatanka nakkamakgxtakga chuna la pokgxni xalak katutsu;
laktsu laktsu nakkatlawa chu nakkalaktayami chuna la putlun xalak tiji.
44 Wix nakilakgmaxtuya xlakata kinkachikin ni lixkajni nakilichuwinan;
Nakinkuentajtlawaya xlakata nakkapulalin kachikinin;
akgtum kachikin nema ni klakgapasnit nakiskujnani.
45 Tiku xalak atanu kachikin nataxwataminkgo kkilakatin;
tuku nakgaxmatkgo kkimpalakata natlawa pi nakinkgalhakgaxmatkgo.*
46 Tiku minkgoyacha kʼatanu kkachikinin napekuankgo;
lhpipitilhakgo nawan akxni naminkgoyacha kxkachikinkan nema kgalhikgo patsaps.
47 ¡Jehová lama! ¡Katamalankilh lanka kinChiwix!
¡Kamalankika kiDios, chiwix nema kilakgmaxtu!
48 Xaxlikana Dios an malakgaxokgenan kimpalakata;
tlawa pi nakkamapakgsi kachikinin;
49 kilakgmaxtu kxmakankan kintalatlawananin.
Wix talhman kiwiliya niku ni makachankgo kintalatlawananin;
wix kilakgmaxtuya xlakata nitu nakintlawani chixku tiku lixkajni likatsi.
50 Wa xlakata, Jehová, nakpaxtikatsiniyan kxlakgstipan kachikinin,
chu nakkilhtlini mintukuwani xlakata nakmalankiyan:
51 xla tlawa tuku kaks limalakawaninan xlakata nalakgmaxtu xmapakgsina;
putum kilhtamaku limasiyani tapaxkit nema ni makgxtakgnan xtalaksakni,
David chu xkamanan».