Xlimaktiy Samuel
21 Pero kxkilhtamaku David analh tatsinksni chu makgapalalh akgtutu kata. Akxni David kgalhskilh Jehová, Jehová kgalhtilh: «Saúl chu tiku xalak xchik linkgo kuenta xlakata tastajtamakgalh kgalhni, xlakata kamakgnilh gabaonitas». 2 (Gabaonitas ni israelitas xwankgonit, wata amorreos tiku xlamakgolhku. Israelitas xkamalaknunikgonit pi ni xʼamakgo kamakgnikgo, pero Saúl kamasputuputulh xlakata lu xmalakatsali la xkamatliwakglhputun latamanin xalak Israel chu Judá). Wa xlakata mapakgsina katasanilh gabaonitas xlakata nakatachuwinan. 3 David kawanilh gabaonitas: «¿La tlan nakkamakgtayayan? ¿Tuku tlan nakkamaxkiyan xpalakata talakgalhin nema ktlawanitaw, xlakata wixin nasikulunatlawayatit tuku tapakgsini Jehová?». 4 Gabaonitas kgalhtikgolh: «Nipara plata nipara oro tlan xlakgxokgolh tuku kinkatlawanikgon Saúl chu putum tiku xalak xchik. Chu na nila wi tiku kmakgniyaw kʼIsrael». Chu David wa: «Kakiskinitit katuwa tuku nalakaskinatit chu akit naktlawa». 5 Xlakan wanikgolh mapakgsina: «Saúl kamakgnilh kinatalankan chu xlakkaxwilinit nakamasputukgo kxlilakgatum xtiyat Israel, 6 wa xlakata klakaskinaw pi kakilamaxkiw kgalhtujun xlakgkgawasan. Nakkachiwakayaw xanin xmaknikan* kxlakatin Jehová kʼGuibeá* xla Saúl, xtalaksakni Jehová». Mapakgsina wa: «Akit nakkamakamaxkiyan».
7 Pero mapakgsina lakgalhamalh Mefibóset xkgawasa Jonatán, xkgawasa Saúl, xlakata tamalaknun nema David chu Jonatán, xkgawasa Saúl, xtlawakgonit kxlakatin Jehová. 8 Mapakgsina laksakli Armoní chu Mefibóset, chatiy xlakgkgawasan Rizpá xtsumat Ayá, tiku xkatakgalhinit Saúl, chu kgalhkitsis xlakgkgawasan Mical* xtsumat Saúl, tiku xkatakgalhinit Adriel xkgawasa Barzilái tiku meholatita. 9 Alistalh kamakamaxkilh gabaonitas, chu xlakan kamawakakgolh xanin xmaknikan ksipi kxlakatin Jehová. Xkgalhtujunkan akxtum nikgolh. Kamakgnika kxapulana kilhtamaku akxni xmakimaka tachanan, akxni xtsukumaka makikan cebada. 10 Alistalh Rizpá xtsumat Ayá tiyalh lhakgat xla talipuwan* chu lakgstonkgmilh kxʼakgspun* chiwix. Anta tamakgxtakgli lata akxni tsukuka makikan tachanan asta akxni sen kamaktawakalh xanin xmaknikan; ni mastalh talakaskin pi animales nema kgoskgo xkalakgtaktakgolh kakuwani chu nipara xalakluku animales nema xlamakgo kkapukuxtun xkalakgtalakatsuwikgolh katsisni.
11 David litachuwinanka tuku xtlawanit chatum xpuskat Saúl, Rizpá xtsumat Ayá. 12 Wa xlakata David alh putsa xlukut Saúl chu xla xkgawasa Jonatán. Xlinkgonit napuxkun* xalak Jabés-Galaad, tiku xkikgalhankgonit kxplaza Bet-San, niku filisteos xkachiwakakgonit akxni filisteos makgatlajakgolh Saúl kʼGuilboa. 13 Xla limincha xlukut Saúl chu xlukut xkgawasa Jonatán, chu na kamakika xlukutkan lakchixkuwin tiku kamakgnika.* 14 Alistalh kamaknuka* xlukut Saúl chu xlukut xkgawasa Jonatán kxtiyat Benjamín, kZelá, niku xmaknukanit xtlat Quis. Akxni tlawakgolh tuku mapakgsina xlimapakgsinanit, Dios kakgaxmatnilh tuku xtasaskinimakgo xpalakata kachikin.
15 Amakgtum, filisteos chu israelitas tsukuparakgolh latalatlawakgo. Wa xlakata David kataʼalh xlakskujnin chu katalatlawalh filisteos, pero lu tsukulh tlakgwan. 16 Chatum refaimita, tiku xwanikan Isbí-Benob, xkgalhi kgantum lanza nema xlitatlawanit cobre chu xtsinkan max akgtutu kilo aitat* chu kgantum xasasti espada, xmakgniputun David. 17 Abisái xkgawasa Zeruyá tunkun milh lakgmaxtu. Talachipalh filisteo chu makgnilh. Alistalh ksoldados David malaknunikgolh mapakgsina: «¡Nialh kintilataʼaw akxni nakanaw talatlawananaw, xlakata ni namamixiya xmakgskgot Israel!».
18 Alistalh, amakgtum katatlawaparakgolh guerra filisteos, anta kʼGob. Ama kilhtamaku, Sibecái tiku xalak Husá xwanit makgnilh Saf, tiku mincha kxfamiliajkan refaím.
19 Amakgtum katalatlawaparakgolh filisteos anta kʼGob. Chu Elhanán xkgawasa Jaaré-Oreguim tiku xalak Belen xwanit makgnilh Goliat tiku xalak Gat xwanit, tiku xkiwi xlanza xtachuna xwanit la xkiwikan tiku xlakgastawanankgo.
20 Chu amakgtum anampa guerra. Tawi kʼGat, niku xwi chatum chixku tiku lu lanka xwanit, kʼakgatunu xmakan xkgalhi kganchaxan laktsu xmakan* chu kʼakgatunu xtantun xkgalhi kganchaxan laktsu xtantun,* xliputum, puxamatati xwankgonit. Xla na xalak xfamilia refaím xwanit. 21 Xlakata chuntiya xkalikgalhkgamanama israelitas, Jonatán xkgawasa Simeí, xtala David, makgnilh.
22 Umakgolh kgalhtati tiku xalak Gat xwankgonit chu xminkgoyacha kxfamilia refaím, David chu xlakskujnin kamakgnikgolh.