Jesús Masiya Kperea Akxni Ama Kjudea

Jesús tamakgxtakgnit kPerea ni lhuwa kilhtamaku, «kxaʼakilhtutu Jordán» (Juan 10:40). Chu la uku ama kJerusalén.

Pero ni xʼakstu. Taʼankgo xtamakgalhtawakgen, chu «lhuwa latamanin». Na anta makgtanumakgo xmatajinanin lilakgaxokgon chu makglakgalhinanin (Lucas 14:25; 15:1). Fariseos chu lakgtsokgkinanin tiku lu nitlan lichuwinankgo tuku Jesús wan chu tlawa, na anta ankgo. Lhuwa tuku xlilakapastakatkan xlakata kgaxmatkgonit liʼakxilhtit xla borrego nema xtsankganit, kgawasa nema xtsankganit chu xlakata chixku tiku lhuwa tuku xkgalhi chu Lázaro (Lucas 15:2; 16:14).

Akxni Jesús tsuku katachuwinan xtamakgalhtawakgen chu kalitachuwinampara tuku xkalitachuwinanita kʼGalilea, max lilakpuwamajku tuku nitlan wankgo xtalatlawananin chu la lakgmakgankgo.

Akgtum liʼakxilhtit, kawani: «Putum kilhtamaku naʼanan tuku namatlawinan talakgalhin. Pero ¡kgoxota ama chixku tiku matlawinan talakgalhin! [...] Kuentajkatlawatit. Komo mintala tlawa akgtum talakgalhin, kastakyawa; komo namakgxtakga xtalakgalhin, katapati. Maski asta makgtujun lata tantaku xtlawanin tuku nitlan chu makgtujun xlakgtaspitni, chu xwanin: “Kakintapati”, xlilat natapatiya» (Lucas 17:1-4). Max uma tachuwin malakapastaka Pedro akxni kgalhskininalh komo talakaskin nalatapatikan asta makgtujun (Mateo 18:21).

¿Tlan namakgantaxtikgo xtamakgalhtawakgen Jesús umakgolh tachuwin? Xlakan wanikgo: «Tlakg kakinkamaxki takanajla». Chu xla kawani: «Komo xkgalhitit mintakanajlakan xtachuna xlilanka xtalhtsi mostaza, xwanitit uma xakiwi mora: “¡Katapulhu chu katachanti kpupunu!”, chu xkakgalhakgaxmatnin» (Lucas 17:5, 6). Chuna, komo kgalhikan maski kaj tsinu takanajla lhuwa tuku tlan tlawakan.

Alistalh, Jesús kamasiyani pi lu xlakaskinka nataktujukgo chu ni namalakatsalikgo la kaʼakxilhkan: «Komo chatum miskujnikan lakgwaxnama kkapukuxtun, o kuentajtlawama borregos, ¿la xmakgamakglhtinantit akxni xkitaspitli kpukuxtu? ¿Xwanitit: “Tunkun katat unu chu kawayanti”? Ni chuna katitlawatit, wata nawaniyatit: “Wi tuku kakinkaxtlawani xlakata nakwayan, chu kawili milakatitawakat chu kakimaxki tuku kmaklakaskin asta akxni nakwayankgo, chu alistalh na tlan nawayana”. ¿Ni xlikana pi malana ni katipaxtikatsinilh skujni xlakata tlawalh tuku limapakgsilh? Nachuna, akxni namakgantaxtikgoyatit putum tuku kalimapakgsikanitantit, kawantit: “Akinin skujnin tiku nitu klitaxtuyaw. Tuku ktlawanitaw wa tuku kilitlawatkan xwanit”» (Lucas 17:7-10).

Putum kskujnin Dios xliʼakgatekgsatkan pi lu xlakaskinka pulana wilikan tuku xla takanajla chu xlilakapastakatkan pi akgtum talakgalhaman kakninanikan Dios chu makgtapakgsikan kxkachikin.

Alistalh, wi tiku limin xtamakatsin María chu Marta, xnatalan Lázaro, tiku wilakgolh kBetania, anta kJudea. Makatsinina wan: «Malana, ¡kaʼakxilhti!, tatatla ama tiku lu lakgkatsana» (Juan 11:1-3).

Akxni Jesús katsi pi Lázaro tatatla, talipuwan ni malakgachokgo. Wata wan: «Uma tajatat ni katitlawalh pi kkalinin nakitaya, wata natalimalanki Dios, xlakata xKgawasa Dios nalimalankikan xpalakata uma». Jesús titamakgxtakga akgtiy kilhtamaku chu alistalh kawani xtamakgalhtawakgen: «Kaʼamparaw amakgtum kJudea». Pero xlakan lakpuwankgo pi nitlan chu wanikgo: «Rabí, nina makgas xʼaktalaputunkgoyan tiku xalak Judea, ¿chu napimparaya amakgtum?» (Juan 11:4, 7, 8).

Jesús kakgalhti: «Kakuwani kgalhi akgkutiy hora, ¿ni xlikana? Komo wi tiku tlawama akxni kakuwani, nitu liʼakgchakgxa, xlakata akxilha kxkgakganat kakilhtamaku. Pero komo wi tiku tlawama katsisni, akgchakgxa, xlakata nitu kgalhi xkgakganat» (Juan 11:9, 10). Max tuku Jesús wamputun wa pi kilhtamaku nema maxkinit Dios xlakata natlawa xtaskujut nina sputa. Wa xlakata, liwana xlimaklakaskinat kilhtamaku nema kgalhi.

Alistalh wampara: «Kiʼamigojkan Lázaro lhtatanit, pero akit kama anta xlakata nakmastakwani». Xlakata xtamakgalhtawakgen lakpuwankgo pi Lázaro kaj jaxma, xlakan wanikgo: «Malana, komo lhtatama, natatlanipara». Wa xlakata Jesús liwana kawani: «Lázaro ninit [...]. Pero kalakgaw» (Juan 11:11-15).

Maski Tomás katsi pi kJudea max makgniputunkan Jesús, xla makgtayaputun chu akxtum tatawilaputun. Wa xlakata kawani amakgapitsi tamakgalhtawakgen: «Na kaʼaw, xlakata akxtum nataniyaw Jesús» (Juan 11:16).