Ni lhuwa kaxtalanchu chu skiti maklakaskin xlakata nakamawi lhuwa mil

Kgalhkutiy apóstoles lipaxuwakgonit la lichuwinankgonit Dios kʼGalilea chu akxni kitaspitkgo wanikgo Jesús putum tuku tlawakgonit. Tlakgwankgonit, pero ni kgalhikgo kilhtamaku nawayankgo xlakata anan lhuwa latamanin. Wa xlakata Jesús kawani: «Katantit, kaʼaw niku tlan kiʼakstukan natawilayaw xlakata tlan najaxatit tsinu» (Marcos 6:30, 31).

Tawakakgo kbarco, max lakatsu kCapernaúm chu ankgo niku lakgamakgat, pakganacha kBetsaida, nema wi pakganacha kkgalhtuchokgo Jordán. Pero lhuwa kaʼakxilhkgo akxni taxtukgo chu amakgapitsin tiku katsikgolh tokgosun ankgo kxkilhtun kgalhtuchokgo chu pulana chinkgo nixawa barco.

Akxni taktakgo kbarco chu akxilhkgo lhuwa latamanin, Jesús kalakgalhaman xlakata litaxtukgo la borregos nema ni kgalhikgo xmapuchwayaninakan. Wa xlakata lhuwa tuku tsuku kamasiyani xlakata xTamapakgsin Dios (Marcos 6:34). Na kamapaksa putum tiku tatatlakgo (Lucas 9:11). Akxni kgotanu, xtamakgalhtawakgen wanikgo: «Lu kgotanumaja chu makgat niku lamaw; kakawani latamanin pi kaʼankgolha xlakata tlan naʼankgo klaktsu kachikinin chu natamawakgo tuku tlan nawakgo» (Mateo 14:15).

Pero Jesús kakgalhti: «Ni talakaskin pi naʼankgo; wixin kakamawitit» (Mateo 14:16). Maski xla katsiya tuku natlawa, liʼakxilha Felipe chu kgalhskin: «¿Niku natamawayaw kaxtalanchu xlakata nawayankgo umakgolh latamanin?». Wa kgalhskin Felipe xlakata xla xalak Betsaida. Pero nila tamawakan kaxtalanchu xpalakata lhuwa latamanin. Anta wilakgo 5,000 lakchixkuwin chu, komo kaputlekgekan lakpuskatin chu kamanan, max liwaka 10,000 wilakgo. Wa xlakata Felipe wan: «Maski akgtiy ciento denarios kaxtalanchu natamawayaw ni katikaʼakchanilh maski kaj akatsunin nawakgo» (Juan 6:5-7). Kalakpuwanti, ¡akgtum denario wa tuku tlajakan akgtum kilhtamaku!

Xlakata limasiyaputun pi nila putum kamawikan, Andrés wan: «Unu wi chatum aktsu kgawasa tiku kgalhi makkitsis kaxtalanchu [...] chu tantiy laktsu skiti. Pero ¿la nakaʼakchani uma xputumkan?» (Juan 6:9).

Xlakata primavera, laktsu sipi litsamakgo sakgat, nialh lhuwa kilhtamaku tsankga xlakata xtsukulh Pascua kkata 32. Wa xlakata Jesús kaskini xtamakgalhtawakgen kakawanikgolh latamanin katawilakgolh kkasakgatna, makgapitsi akgtum ciento chu amakgapitsin itat ciento. Jesús tiya makkitsis kaxtalanchu chu tantiy skiti chu paxtikatsini Dios. Lakgchakga o lakxtuli kaxtalanchu chu kamaxki xtamakgalhtawakgen, na kamaxki skiti xlakata nakamaxkikgo latamanin. Maski nila takanajla, putum wayankgo asta kgalhkgaskgo.

Alistalh, kawani xtamakgalhtawakgen: «Kamamakgstokgtit xatalakgchakgataman nema akgataxtulh, xlakata ni kaj paxkat nawan» (Juan 6:12). Xlakan chuna tlawakgo chu matsamakgo 12 canastas.