Lichuwinan Dios kxlikalanka Galilea

Jesús chu kgalhtati kstalaninanin lhuwa taskujut kgalhikgonit kCapernaúm. Akxni tsiswalh, latamanin xalak kachikin linikgolh tatatlanin xlakata xkamapaksalh, wa xlakata ni kgalhinit kilhtamaku xlakata xʼakstu xtamakgxtakgli.

Lichali, tsisa taki, akxni nina liwana xkgakga. Taxtu chu putsa niku kakakswa xlakata natlawani oración xTlat. Pero ni lhuwa kilhtamaku xʼakstu tawila. Akxni Simón Pedro chu tiku anta tawilakgo akxilhkgo pi Jesús ni anta wi, ankgo putsakgo. Max wa Pedro tiku pulana chuna tlawa, xlakata Jesús anta xwi kxchik (Marcos 1:36; Lucas 4:38).

Akxni tekgskgo, Pedro wani: «Putum putsamakgon» (Marcos 1:37). Latamanin xalak Capernaúm lu paxtikatsinikgo tuku tlawanit Jesús pi asta machokgoputunkgo xlakata anta nakatatamakgxtakga (Lucas 4:42). Pero ¿milh Jesús kKatiyatni kaj xlakata natlawa milagros? Chu ¿kajwatiya kʼuma kachikin xlitlawat xtaskujut? Xla masta xatakgalhtin.

Kawani kstalaninanin: «Kaʼaw alakatanu, kkachikinin nema lakatsu wilakgolh, anta na naklichuwinan xatlan tamakatsinin, xlakata wa uma kilimalakgachakanit». Nachuna, kawani latamanin tiku machokgoputunkgo: «Na kiliʼanat alakatanu kachikinin xlakata naklichuwinan xatlan tamakatsinin xla xTamapakgsin Dios, xlakata wa uma kilimalakgachakanit» (Marcos 1:38; Lucas 4:43).

Chuna, pulaktum tuku xlakaskinka lakgminit Jesús kKatiyatni wa nalichuwinan tamakatsin xla xTamapakgsin Dios. Uma Tamapakgsin namasantujli xtukuwani xTlat chu makgtuminika namasputu xtaʼakglhuwitkan latamanin. Pero ¿tuku xlakata tlawa milagros? Xlakata nalimasiya pi wa Dios tiku malakgachanit. Makgasata, Moisés na tlawalh milagros xlakata nalimasiya pi wa Dios tiku xmalakgachanit (Éxodo 4:1-9, 30, 31).

Wa xlakata Jesús taxtu kCapernaúm xlakata nalichuwinan Dios kʼatanu kachikinin chu kgalhtati kstalaninanin taʼankgo: Pedro, Andrés, Juan chu xtala, Santiago. Kajku akgtum semana titaxtunit lata xla kawanilh pi xapulana kstalaninanin xlitaxtukgolh.

Tlan kakitaxtuni taskujut nema tlawakgo Jesús chu kgalhtati kstalaninanin lakatsu kʼGalilea. Tuku tlawa Jesús talakgatumi: kSiria, kʼakgkaw kachikinin nema wanikan Decápolis chu laktsu kachikinin nema wilakgo kxkilhtutu kgalhtuchokgo Jordán (Mateo 4:24, 25). Lhuwa latamanin xalak uma kachikinin, chuna la xalak Judea, stalanikgo Jesús chu kstalaninanin. Lhuwa liminikgo tatatlanin xlakata nakamapaksa chu xla kamapaksa. Putum kamapaksa chu kamakgtaya tiku kalaktanuma demonios.