Kaj natatamakgaxtokgkan tiku «kanajlaniy nkimPuchinakan» ¿tlanku chuna tlawakan?

Makgapitsi natalan tiku nina tamakgaxtokgkgo nachuna lakpuwankgo. Pero katsikgo pi Jehová lakaskin pi skujnin kaj natatamakgaxtokgkgo tiku «kanajlaniy nkimPuchinakan». Uma wamputun pi kaj natatamakgaxtokgaw xtatayana Jehová tiku tamununit (1 Cor. 7:39). Pero ¿tuku xlakata chuna lakpuwankgo?

TUKU XLAKATA CHUNA LAKPUWANKGO

Makgapitsi chuna lakpuwankgo xlakata katsikgo pi tlakg anan laktsuman nixawa lakgkgawasan tiku nina tamakgaxtokgkgo. Chu uma xlikana kmakgapitsi países. Akgtum liʼakxilhtit, kCorea, lata 100 xtatayananin Jehová 57 laktsuman chu 43 lakgkgawasan. Chu kColombia, lata 100 xtatayananin Jehová, 66 laktsuman chu 34 lakgkgawasan.

Kmakgapitsi países talismani pi kgawasa litatawilat nakamaxki lhuwa tumin chu tamaskiwin xnatlatni tsumat xlakata natatamakgaxtokga. Akxni xanatlatni ni xtatayananin Jehová, max naskinkgo lhuwa tumin chu tamaskiwin nema lu tapalaxla. Pero lhuwa natalan nila tamawakgo umakgolh tamaskiwin. Wa xlakata makgapitsi natalan laktsuman xalak uma países lakpuwankgo pi nila natatamakgaxtokgkgo chatum tala.a (Kalikgalhtawakga nota.)

KALIPAWANTI JEHOVÁ

Komo minit kilhtamaku chuna lakpuwanita, kalakapastakti pi Jehová katsi chu akgatekgsa la makgkatsiya (2 Crón. 6:29, 30).

Maski chuna, Jehová wan pi kaj natatamakgaxtokgaw tiku na xlakskujni. ¿Tuku xlakata? Xlakata katsi tuku tlakg tlan nakinkakitaxtuniyan chu kinkamakgtayaputunan. Ni lakaskin pi nalaksakaw tuku nakinkamakgapatinanan. Akxni xlama palakachuwina Nehemías, lhuwa judíos tatamakgaxtokgkgolh lakpuskatin tiku ni kskujnanikgo Jehová. Wa xlakata Nehemías kamalakapastakalh tuku akgspulalh Salomón. Kawanilh pi Dios xpaxki chu xmapakgsina Israel tlawalh. Pero Salomón katatamakgaxtokgli lhuwa lakpuskatin tiku ni kskujnikgo Jehová chu matlawikgolh talakgalhin (Neh. 13:23-26). Jehová kaj lakaskin tlan nakinkakitaxtuniyan. Wa xlakata kalimapakgsinit kskujnin pi kaj katatamakgaxtokgkgolh tiku na skujnikgo (Sal. 19:7-10; Is. 48:17, 18). Katsiyaw pi xlilat nakinkawaniyan tuku tlan chu tuku nila tlawayaw. Na paxtikatsiniyaw xtastakyaw xlakata limasiya pi kinkapaxkiyan chu putum kilhtamaku lakaskin tlan nakinkakitaxtuniyan (Prov. 1:5).

Komo natatamakgaxtokga tiku ni paxki Jehová, max nialh katiskujnani Jehová. Chu ni lakaskina chuna naʼakgspulayan (2 Cor. 6:14). Kalakapastakti pi xtastakyaw Jehová putum kilhtamaku kinkamakgtayayan. Chu la uku lhuwa xlakskujnin Jehová liwana laksakkgonit tuku natlawakgo chu makgantaxtikgonit uma tastakyaw. Pero makgapitsi nichuna tlawakgonit.

TLANKU CHUNA TLAWAKAN

Maggy, chatum tala xalak Australia, tsukulh lakgati tiku ni xtatayana Jehová.b (Kaʼakxilhti nota.) Xla wan pi makglhuwa ni xʼan ktamakxtumit kaj xlakata akxtum natatawila uma kgawasa. Chu uma tlawalh pi nialh tlan xtalalilh Jehová. Achatum tala xalak India nema wanikan Ratana tsukulh lakgati chatum xcompañero xalak escuela. Xla na tsukulh likgalhtawakga Biblia pero kaj xlakata akxtum natatawila Ratana. Alistalh, nialh skujnilh Jehová chu lakgpalilh xtakanajla xlakata tlan natatamakgaxtokga uma kgawasa.

Chatum tala xalak Camerún tiku wanikan Ndenguè akxni xkgalhi 19 kata tamakgaxtokgli tiku ni xtatayana Jehová. Xla xwaninit pi tlan chuntiya xtatayana Jehová xlitaxtulh. Pero kaj akgtiy semana titaxtulh lata xtamakgaxtokgnit nialh maxkilh talakaskin naʼan ktamakxtumit. Xla wan pi xakstu xwi xmakgkatsikan chu lu xtasa. Katsilh pi nialhla xakstu xmapakgsi xlatamat chu xmakgkatsi pi xkuenta tuku akgspulalh.

Max nalakpuwana: «Wilakgolh natalan tiku tatamakgaxtokgkgolh tiku ni xtatayananin Jehová chu tlan likatsikgo». Uma xlikana. Pero komo wix natatamakgaxtokga tiku ni xtatayana Jehová, ¿la nakitaxtuniyan xlakata la talalipina Jehová? ¿La namakgkatsiya xlakata ni makgantaxti xtastakyaw Jehová nema maxkin xlakata tlan nakitaxtuniyan? Chu tuku tlakg xlakaskinka, ¿la namakgkatsi Jehová? (Prov. 1:33.)

Lhuwa natalan kgalhakgaxmatkgo xtastakyaw Jehová chu kaj tatamakgaxtokgkgo tiku na xtatayananin Jehová. Katsikgo pi wa tuku tlakg tlan natlawakgo. Chu chuna tlawakgo xlakata makgapaxuwaputunkgo Jehová. Akgtum liʼakxilhtit, Michiko chatum tala tsumat xalak Japón xkgalhakgaxmatputun Dios, pero xfamilia xlakaskin xtatamakgaxtokgli tiku ni xtatayana Jehová. Na akxilhli la xʼamigos xtatamakgaxtokgkgo tiku na xtatayananin Jehová chu xla niti tiku xtatamakgaxtokga. Lu tuwa makgkatsilh. Pero xmakgtaya akxni xlakapastaka pi xlakata napaxuwakan ni talakaskin natamakgaxtokgkan o ni. Tuku xlakaskinka wa naskujnikan Jehová, Dios tiku xapaxuwana (1 Tim. 1:11). Na kinkawaniyan pi Jehová kinkamaxkiyan tuku lakaskinaw. Wa xlakata wan pi komo wi tiku tamakgaxtokgputun, pero ni tekgsa tiku skujnani Jehová, tlakg tlan nina natamakgaxtokga. Titaxtulh kilhtamaku, Michiko tatamakgaxtokgli chatum xtatayana Jehová tiku tlan likatsi. Chu paxuwa pi kgalhakgaxmatli Jehová.

Na wilakgolh natalan lakgkgawasan tiku kgalhkgalhikgo natatamakgaxtokgkgo tiku xlilat. Akgtum liʼakxilhtit, Bill, chatum tala xalak kʼAustralia wan pi xmin kilhtamaku xkalakgati laktsuman tiku ni xtatayananin Jehová. Pero nikxni lu tlan kalikatsinilh xlakata ni xtatamakgaxtokgputun tiku ni xtatayana Jehová. Alistalh, na tsukulh kalakgati makgapitsi natalan laktsuman. Pero xlakan ni xlakgatikgo Bill. Xla kgalhkgalhilh puxamakaw kata asta akxni tekgsli chatum tala tiku na kskujniputun Dios la xla. Bill wan pi tlan makgkatsi. Paxuwa pi xla chu xpuskat tlan lichuwinankgo Dios, kgalhtawakgakgo chu akxtum skujnikgo Jehová. Na lipaxuwa akxtum nakatatawila xʼamigos xpuskat xlakata na skujnanikgo Jehová. Wan pi xlakata makgantaxti xtastakyaw Biblia matliwakglha xtamakgaxtokgat.

TUKU TLAN NATLAWAYA AKXNI KGALHKGALHIPAT

Komo nina tamakgaxtokga xlakata kgalhakgaxmatputuna Jehová, ¿tuku namakgtayayan chuntiya nakgalhkgalhiya? Tlan nalakpuwana la paxuwa Jehová akxni akxilha pi kgalhakgaxmatputuna (1 Sam. 15:22; Prov. 27:11). Na namakgtayayan lhuwa natlawaya oración xlakata nawaniya Dios tuku makgkatsiya (Sal. 62:8). Chu komo liskuja nalakgmakgana tuku nitlan tlawaputuna, chuna la natitaxtutilha kilhtamaku tlakg tlan natalalipina Jehová. Kalakapastakti pi xla lu xlakaskinka akxilhan. Liwana kakatsi pi xlakaskinka akxilha tuku maklakaskina. Xla ni wan pi nakamaxki chatum chixku o puskat, pero katsi la namakgtayayan xlakata napaxuwaya (Sal. 145:16; Mat. 6:32).

Max namin kilhtamaku namakgkatsiya la mapakgsina David. Akxni lu xlipuwama, skinilh Jehová lakapala xmakgtayalh xlakata nialh xkgalhi litliwakga (Sal. 143:5-7, 10). Pero ni kataxlajwani. Kakgalhkgalhi akxni Jehová nakgalhti miʼoraciones. Kalikgalhtawakga Biblia chu kalilakpuwanti tuku likgalhtawakgaya. Chuna nakatsiya tuku Jehová lakaskin natlawaya chu la kamakgtayalh xlakskujni xalamakgasa. Uma namakgtayayan tlakg nalipawana chu nakgalhakgaxpata.

¿Tuku na tlan natlawaya akxni kgalhkgalhipat? Tlan naliskuja xlakata tlakg tlan natalalipina Jehová chu tlan nalichuwinankana. Na tlan nakatsiniya la tlan nakatalalipina amakgapitsin, lhuwa tuku namastaya, lhuwa naskuja chu ni namakgxtakga Jehová. Uma tayat lu xlakaskinka xlakata xatapaxuwan natawila tamakgaxtokgat (Gén. 24:16-21; Rut 1:16, 17; 2:6, 7, 11; Prov. 31:10-27). Lhuwa kaskujti kcongregación chu kalichuwinanti Dios. Uma namakgtayayan ni nalaksaka natlawaya tuku nitlan. Bill wan pi akxni nina xtamakgaxtokga lakapala titaxtulh kilhtamaku xlakata kskujma la precursor.

Kgalhakgaxmatkan Jehová chu kajwatiya natatamakgaxtokgkan tiku «kanajlaniy nkimPuchinakan», tlanku makgantaxtikan. Komo nalaksakaw natatamakgaxtokgaw tiku xtatayana Jehová, namalankiyaw Jehová chu napaxuwayaw. Biblia wan pi tiku xatapaxuwan kgalhakgaxmata Jehová xatapaxuwan nalatama putum kilhtamaku (Sal. 112:1, 3). Wa xlakata putum kilhtamaku kalilakapastakti xlimapakgsin Jehová niku wan pi kaj katatamakgaxtokgti tiku «kanajlaniy nkimPuchinakan».