Pulaktiy tuku makgtayanan nikxni nalakxla tamakgaxtokgat

1, 2. 1) ¿La xlilhuwa kilhtamaku xlimakgapalat tamakgaxtokgat? 2) ¿Tuku nakamakgtaya nikxni nalamakgxtakga?

AKXNI Dios kamamakgaxtokgli xapulana chixku chu xapulana puskat, ni wa pi kaj tsinu kilhtamaku xʼama latatawila. Xtalakaskin pi Adán chu Eva nikxni xlamakgxtakgli (Génesis 2:24). Biblia wan pi kaj chatum chixku chu chatum puskat xlitamakgaxtokgat. Biblia wan pi tlan lakxtlawakan tamakgaxtokgat chu natatamakgaxtokgpara atanu kajwatiya akxni xachixku o xapuskat tatalakgxtumi atanu (Mateo 5:32).

² ¿Tlan lipaxuw natawilakgo putum kilhtamaku tiku tamakgaxtokgkgonit? Tlan, Biblia lichuwinan pulaktiy tuku makgtayanan chuna nakitaxtu. Komo xachixku chu xapuskat chuna natlawakgo, nakgalhikgo tapaxuwan chu lhuwa tasikulunalin. ¿Tuku uma nema nakamakgtaya?

XAPULANA TUKU MAKGTAYANAN

3. ¿Tuku pulaktutu tapaxkit xlikgalhitkan tiku tamakgaxtokgkgonit?

³ Xapulana tuku makgtayanan wa tapaxkit. Biblia lichuwinan tipalhuwa tapaxkit. Pulaktum wa tapaxkit nema kgalhinikan achatum, tapaxkit nema kgalhinikan chatum amigo (Juan 11:3). Atanu wa tapaxkit nema lakgalhinikan kfamilia (Romanos 12:10). Xlipulaktutu wa tapaxkit nema lakgalhini chixku chu puskat (Proverbios 5:15-20). Tiku tamakgaxtokgkgonit xlimasiyatkan umakgolh tapaxkit. Pero, wi xlipulaktati tapaxkit nema tlakg xlakaskinka nixawa amakgapitsin.

4. ¿Tuku atanu tapaxkit anan?

⁴ Tachuwin nema maklakaskinka xlakata xlipulaktati tapaxkit akxni tsokgka Tatsokgni xaGriego wa a·gá·pe. Wa uma tachuwin nema tamaklakaskin 1 Juan 4:8 nema wan: «Dios tapaxkit». Xlikana, “paxkinanaw, xampi pulh wa [Dios] kinkapaxkin” (1 Juan 4:19). Kstalanina Cristo pulana xlipaxkit Jehová Dios chu alistalh amakgapitsin (Marcos 12:29-31). Tachuwin a·gá·pe na tamaklakaskin kʼEfesios 5:2 nema wan: «Na kakgalhitit ntapaxkit nalatapayatit xtachuna lantla nkinkapaxkin nCristo, chu na tiʼakstutamastalh kkimpuxokgokan». Jesús wa pi uma tapaxkit xʼamaka kalilakgapaskan xaxlikana kstalaninanin: «Wa yuma nakalilakapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit [a·gá·pe] nchatunu chatunu» (Juan 13:35). Na kaʼakxilhti la tamaklakaskin tachuwin a·gá·pe 1 Corintios 13:13: «Namakgapalay ntakanajla, chu ntakgalhkgalhitin, chu ntapaxkit, wa yuma ntipatutu; wampi wa ntu ntlakg kgalhiy xkakni lantla xlipaks, wa ntapaxkit [a·gá·pe]».

5, 6. 1) ¿Tuku xlakata tapaxkit tlakg xlakaskinka nixawa takanajla chu takgalhkgalhin? 2) ¿Tuku xlakata tapaxkit makgtayanan xlakata ni nalakxla tamakgaxtokgat?

⁵ ¿Tuku tlawa pi tapaxkit a·gá·pe tlakg xlakaskinka nawan nixawa takanajla chu takgalhkgalhin? Xlakata tiku kgalhi uma tapaxkit tlawa tuku wan xTachuwin Dios (Salmo 119:105). Ni putsa tuku xla lakaskin wata kamakgtaya amakgapitsin chuna la lakaskin Dios, maski lakgchan o ni lakgchan namakgtayakan. Uma tapaxkit tlawa pi tiku tamakgaxtokgkgonit nastalanikgo uma xtastakyaw Biblia: «Kalapaxuwanalipinitit, chu na nalamatsankgananiyatit, [o nalatapatiyatit] nchatunu amakgapitsin lapi wi nti lamakgasitsiyatit; xtachuna lantla nkamatsankgananin [...] [Jehová], na chuna wixin nkatlawatit» (Colosenses 3:13). Tamakgaxtokgat tiku lapaxkikgo, kgalhikgo chu mastakakgo «ntapaxkit [a·gá·pe], xampi wa ntapaxkit, lakatsalay ntipalhuwa talakgalhin» (1 Pedro 4:8). Kaʼakxilhti, Biblia wan pi tapaxkit lakatsala, o patsankga, tipalhuwa talakgalhin, ni wan pi masputu, xlakata kimputumkan kgalhiyaw talakgalhin chu tlawayaw tuku nitlan (Salmo 130:3, 4; Santiago 3:2).

⁶ Akxni tiku tamakgaxtokgkgonit paxkikgo Dios chu na lapaxki, nila katilamakgxtakgli chu lipaxuw natawilakgo xlakata «tapaxkit nikxni sputa» (1 Corintios 13:8, TNM). Tapaxkit «lakatanks makxtum tlawanan» (Colosenses 3:14). ¿La tlan nakgalhikgo uma tapaxkit tiku tamakgaxtokgkgonit? Akxtum nalikgalhtawakgakgo xTachuwin Dios chu nalichuwinankgo; nalikgalhtawakgakgo xliʼakxilhtit Jesús la limasiyalh tapaxkit chu nachuna nalakapastakkgo chu natlawakgo la tlawalh. Na naʼankgo ktamakxtumit, niku masiyakan xTachuwin Dios, chu naskinkgo xtamakgtay Dios xlakata nakgalhikgo uma lu tlan tapaxkit, xtawakat espíritu santo (Proverbios 3:5, 6; Juan 17:3; Gálatas 5:22; Hebreos 10:24, 25).

XLIPULAKTIY TUKU MAKGTAYANAN

7. ¿Tuku kilhchanima mastakan kakni chu tiku xlimastat kakni ktamakgaxtokgat?

⁷ Komo tiku tamakgaxtokgkgonit xlikana lapaxkikgo, na nalamaxki kakni chu wa uma xlipulaktiy tuku makgtayanan xlakata xatapaxuwan natawila tamakgaxtokgat. Kakni kilhchanima «wi tiku lakaʼakxilhkan, ni skinikan tuku nila tlawa». Xtachuwin Dios kastakyawa putum kstalaninanin Cristo, asta lakchixkuwin chu lakpuskatin: «Chu xlakata nalamaxkiyatit kakni, wixin pulana katlawatit» (Romanos 12:10, TNM). Apóstol Pedro tsokgnalh: «Wixin xchixkukan lakchajan, wa lantla xlilat lakatitum natatawilakgoyatit, kamaxkikgotit nkakni mpi lakskalajwan xlakan» (1 Pedro 3:7). Xapuskat wanikan pi “kamaxkilh kakni xchixku” (Efesios 5:33). Komo wi tiku maxkiputunaw kakni, tlan likatsiniyaw, ni maktujuyaw chu kuenta tlawayaw tuku lakpuwan chu makgapaxuwaputunaw chuna la matlaniyaw.

8-10. ¿La makgtayanan lamaxkikan kakni xlakata tlan chu lipaxuw natawila tamakgaxtokgat?

⁸ Tiku paxuwaputunkgo kxtamakgaxtokgatkan nalamaxkikgo kakni, “ni wa kaputsakgo wantuku kaj xlakan, wata wa putsakgo wantuku xla [tiku tamakgaxtokga]” (Filipenses 2:4). Ni wa putsakgo tuku kaj wa tlan nakakitaxtuni, xlakata uma wamputun pi xakstukan kapaxkikan, wata putsa tuku tlan nakitaxtuni tiku tamakgaxtokga. Pulana wili tuku lakaskin tiku tamakgaxtokga.

⁹ Akxni lamaxkikan kakni ktamakgaxtokgat makgtayanan xlakata ni nalakgmakgankgo atanu talakapastakni. Chatiy lataman nila putum kilhtamaku akxtum tuku nalakapastakkgo. Max tuku xlakaskinka akxilha xachixku ni xlakaskinka akxilha xapuskat chu tuku lakgati xapuskat max ni katilakgatilh xachixku. Pero chatunu nalamaxki kakni la lakapastakkgo chu tuku lakgatikgo, komo ni lakatsala xlimapakgsin chu xtastakyaw Jehová (1 Pedro 2:16; katamalakxtupi Filemón 14). Nachuna, ni nalamaktuju, ni katuwa nalawani chu ni nalalikgalhkgamanan kxlakatin amakgapitsin nipara akxni xakstukan wilakgo.

¹⁰ Xlikana, tapaxkit nema kgalhinikan Dios, tapaxkit chu lamaxkikan kakni wa uma pulaktiy nema lu xlakaskinka xlakata tlan natawila tamakgaxtokgat. ¿La tlan nalimasiyakan uma ktamakgaxtokgat?

PULALINANKAN CHUNA LA CRISTO

11. La wan Biblia, ¿tiku pulalinan ktamakgaxtokgat?

¹¹ Biblia wan pi chixku tlawaka xlakata xpulalinalh kfamilia. Wa xlakata, xʼama lakgataya kxlakatin Jehová pi tlan xtawilakgolh chu na tlan xtawi xtakanajlakan xpuskat chu xkamanan. Xtalakaskin liwana xlaksakli tuku natlawa nema xlimasiyalh xtalakaskin Dios chu xwililh liʼakxilhtit xlakata lu tlan xlilh xlatamat. «Wanti mpuchuwa lakchajan, kalakgachixkuwikgolh [...] xchixkukan, xtachuna lantla lakgachixkuwikgoy nkimPuchinakan. Sampi wa xchixku mpuskat, wa xpuxku mpuskat, xtachuna lantla nCristo, xpuxkukan nkgamputum nkanajlanin» (Efesios 5:22, 23). Pero, Biblia wan pi xachixku na kgalhi tiku mapakgsi. Apóstol Pablo tsokgnalh: «Klakaskin mpi nakatsiyatit mpi wa nCristo, xapuxku lantla xlipaks nchixkuwin; chu wa nchixku, na wa xpuxku mpuskat; chu wa Dios, xpuxku nCristo» (1 Corintios 11:3). Chatum chixku tiku liwana lakapastaka tuku natlawa katsini pulalinan chuna la tlawa xakgxakga, Cristo Jesús.

12. ¿La lu tlan liʼakxilhtit wililh Jesús xlakata la pulalinankan chu tapakgsinikan tiku pulalinan?

¹² Jesús na kgalhi xʼakgxakga, wa Jehová, tiku tapakgsini chuna la xlilat. Jesús wa: «Sampi ni wa ktlaway nkintalakaskin, wampi wa xtalakaskin wa nti nkimalakgachalh» (Juan 5:30). ¡Lu tlan liʼakxilhtit kinkawiliniyan! Jesús tiku «xakgasiyaj xwija lantla xlipaks tamalakatsukun», Mesías wa (Colosenses 1:15). Xʼama litaxtu xʼAkgxakga congregación xla kstalaninanin tiku kalaksakkanit naʼankgo kʼakgapun chu xMapakgsina kxTamapakgsin Dios, tlakg xapuxku nixawa ángeles (Filipenses 2:9-11; Hebreos 1:4). Maski lu xlakaskinka tuku xʼamaka lakgayawakan chu lu tlan tuku xʼamaka maxkikan, Jesús tlan kalikatsinilh amakgapitsin chu ni kaskinilh tuku nila xtlawakgo. Ni kawanilh kstalaninanin pi xla xkgalhi limapakgsin chu xlikgalhakgaxmatatkan xwanit. Xapaxkina xwanit chu xalakgalhamana pero tlakg chuna kalikatsinilh tiku nitlan xkalikatsinikan. Wa: «Kakilakgtantit xlipaks wixin wa nti skujtamakganitantit, chu nkukananitantit, lakimpi kit nakkamajaxayan. Kalipitit nkimukiwi kmiokgspunkan, chu na kakinkatsinitit, mpi luwa xasmalhwa nkit, chu na tsatata nkinaku. Na natakgsniyatit ntajaxni milistaknakan. Sampi wa nkimukiwi, luwa ni tuwa liyankan, chu wa nkintakuka, skapaka [o ni tsinka]» (Mateo 11:28-30). Lu tlan xtamakgkatsi xtalalinkan Jesús.

13, 14. ¿La napulalinan chixku chuna la Cristo?

¹³ Chixku tiku lakaskin pi xatapaxuwan katawi xfamilia xliʼakxilhat xalakwan xtayat Jesús. Xatlan chixku ni kaj mapakgsinamputun, ni limaklakaskin limapakgsin nema kgalhi xlakata nalimakgapekuamputun xpuskat. Wata paxki chu maxki kakni. Komo Jesús “tsatata xnaku” xwanit, xachixku tlakg chuna xlitlawat xlakata tlawa tuku nitlan ni xawa Cristo chu maklakaskin pi xpuskat kaʼakgatekgsnilh. Wa xlakata, chixku tiku tataktuju litaya tuku nitlan tlawalh maski min kilhtamaku tuwa namakgkatsi nawan: «Kintapati, tlan tuku xkiwanipat». Tlakg ni tuwa katimakgkatsilh xapuskat natlawa tuku nawan xchixku komo xla tataktuju chu wan tuku nila tlawa nixawa komo tlankajwa chu xatsakat. Nachuna, xapuskat tiku masta kakni skin katapatika akxni wi tuku nitlan tlawa.

¹⁴ Akxni Dios tlawalh puskat maxkilh lakwan tayat nema makgtayanan xlakata xatapaxuwan natawila tamakgaxtokgat. Tiku skgalala chixku chuna akxilha xpuskat chu ni lakpuwan pi nixlikana. Puskat tlakg lakgalhamanan chu tlakg xapaxkina, tayat nema talakaskin xlakata nakuentajtlawa xfamilia chu tlan nakatalalin amakgapitsin. Puskat lakgati tlan katawi xchik. «Puskat tiku kgalhi lakwan tayat» nema lichuwinan capítulo 31 libro xla Proverbios xkgalhi lhuwa lakwan tayat nema lu litamakgtayalh xfamilia. ¿Tuku xlakata? Xlakata xchixku “lipawa” (Proverbios 31:10, 11).

15. ¿La tlan xachixku napaxki chu namaxki kakni xpuskat, chuna la tlawalh Cristo?

¹⁵ Kmakgapitsi kachikinin malakatsalikan la akxilhkan xlimapakgsin chixku chu lakpuwan pi ni maxkimaka kakni komo wi tuku nakgalhskinkan. Chu kʼama kachikinin maxkikan talakaskin naliʼakxilha xpuskat la chatum skujni. Akxni chuna pulalin familia nialh liwana talalin xpuskat chu nachuna Dios (katamalakxtupi 1 Juan 4:20, 21). Nachuna, makgapitsi lakchixkuwin ni wa pulalinankgo wata mastakgo talakaskin pi xpuskatkan napulalin chiki. Chixku tiku kgalhakgaxmata Cristo ni lu maskuju xpuskat chu nachuna maxki kakni. Wata, paxkinan chuna la Jesús chu tlawa chuna la wa Pablo: «Wixin mpuchuwa chixkuwin, kapaxkitit mimpuskatkan, xtachuna lantla mpaxkilh nCristo kgamputum nkanajlanin [o congregación] chu na tiʼakstumastalh xpalakatakan» (Efesios 5:25). Cristo Jesús lu kapaxkilh kstalaninanin asta mastalh xlatamat xpalakatakan. Xatlan chixku nachuna xlitlawat, naputsa pi tlan katawilalh xpuskat chu ni lhuwa tuku naskini. Akxni xachixku tapakgsini Cristo, paxkinan chu masta kakni la tlawalh, xapuskat xatapaxuwan tapakgsini (Efesios 5:28, 29, 33).

PUSKAT TAPAKGSINI XCHIXKU

16. ¿Tukuya lakwan tayat xlimasiyanit puskat xchixku?

¹⁶ Akxni xmalakatsukinita Adán, «Jehová Dios wa: “Nitlan xakstu nalatama chixku. Naktlawani xmakgtayana xlakata nalitakgatsi”» (Génesis 2:18). Dios tlawalh Eva xlakata “xtatakgatsin” xwa chu ni chatum tiku natalatlajaputun. Tamakgaxtokgat xliwanat la barco niku ni anan chatiy tiku matlawaniputunkgo. Xachixku xlimasiyat tapaxkit akxni napulalinan chu xapuskat xlimasiyat tapaxkit, kakni chu xatapaxuwan natapakgsini xchixku.

17, 18. ¿La tlan xapuskat xlikana xmakgtayana xchixku nalitaxtu?

¹⁷ Pero, xatlan puskat ni kaj tapakgsini xchixku. Liskuja xlakata namakgtaya tuku nalaksaka natlawa. Xlikana, tlakg ni tuwa katimakgkatsilh komo nachuna lakpuwan. Pero maski ni lakgati, komo natataya uma natlawa pi tuku laksaknit xchixku tlakg tlan nakitaxtu.

¹⁸ Wilakgo atanu tuku nalimakgtaya xchixku xlakata tlan napulalinan. Tlan napaxtikatsini tuku tlawa chu ni nawani pi nitlan tuku tlawalh o ni namamakgkatsini pi nikxni makgapaxuwa. Akxni putum kilhtamaku natataya xchixku, xlilakapastakat pi tiku kgalhi «espíritu xakakswa chu ni lakapala sitsi [...] lhuwa xtapalh kxlakatin Dios» chu ni kajwatiya kxlakatin xchixku (1 Pedro 3:3, 4, TNM; Colosenses 3:12). ¿Chu komo xachixku ni xtatayana Jehová? Maski chuna, kBiblia kawanikan lakpuskatin pi «napaxkikgoy xchixkukan, chu xlakgskgatankan chu mpi tlan talakapastakna nkakgalhikgolh, xakakswan, kuintaj katlawakgolh xchikkan, xapaxkinanin, chu na kalakgachixkuwikgolh xchixkukan lakimpi wa xTachuwin Dios, ni natamaxkajwaliy» (Tito 2:4, 5). Komo wi tuku xtalakapastakni ni maxki talakaskin natlawa, max xachixku tiku ni xtatayana Jehová ni xafuerza katimatlawilh komo «lakatitum, chu na takakswan» nawani. Makgapitsi lakchixkuwin tiku ni xtatayananin Jehová «nalitlajakgoyatit nakanajlakgoy ni wa xpalakata mintachuwinkan, wampi xpalakata ntu ntlan milatamatkan wixin xlakchajankan, akxni naʼukxilhkgoy akgstitum milatamatkan, chu mpi maxkiyatit nkakni» (1 Pedro 3:1, 2, 15; 1 Corintios 7:13-16).

19. ¿Tuku xlitlawat puskat komo xchixku nawani pi kalakatsalalh xlimapakgsin Dios?

¹⁹ Komo xachixku nawani xpuskat pi katlawalh tuku Dios wan pi nitlan, ¿tuku xlitlawat? Xlilakapastakat pi Dios wa xMapakgsina chu natlawa la tlawakgolh apóstoles akxni mapakgsinanin kalimapakgsikgolh pi ni xkgalhakgaxmatkgolh xlimapakgsin Dios. Hechos 5:29 wan: «[...]Pedro, chu ntalakgachanin, wankgolh: “Xlakaskinka mpi pulh wa nakkgalhakgaxmataw Dios, ni xawa nchixkuwin”».

LIWANA NALATACHUWINAN

20. ¿Niku na lu xlakaskinka nalalimasiyanikgo tapaxkit chu kakni tiku tamakgaxtokgkgonit?

²⁰ Tapaxkit chu kakni na lu xlakaskinka akxni latachuwinankan. Chixku tiku paxki xpuskat litachuwinan tuku tlawalh tantaku, xtaʼakglhuwit, tuku lakpuwan chu atanu. Xla maklakaskin. Chixku tiku limaxtu kilhtamaku natachuwinan xpuskat chu xlikana kgaxmata tuku wan limasiyani pi paxki chu maxki kakni (Santiago 1:19). Makgapitsi lakpuskatin wankgo pi xchixkukan ni lu katachuwinankgo, chu uma lu nitlan. Xlikana pi uma kilhtamaku niku max lakchixkuwin akglhuwa hora ankgo skujkgo chu xlakata ni lu anan tumin max na natlawa pi xapuskat na naskuja. Pero tiku tamakgaxtokgkgonit talakaskin nalimaxtukgo kilhtamaku akxtum natawilakgo. Komo nichuna natlawakgo, max tanu tanu tuku natlawakgo chu ni nalatapakgsini, chu max natawila laklanka taʼakglhuwit komo chatum naputsa tiku tlan namamakgkatsini.

21. ¿La namakgtayanan tlan nachuwinankan xlakata naʼanan tapaxuwan ktamakgaxtokgat?

²¹ Chuna la nalatachuwinan na lu xlakaskinka. «Lakwan tachuwin [...] masakgsi latamat chu makuchi lukut.» (Proverbios 16:24.) Maski tiku tamakgaxtokga xtatayana Jehová o ni, na xlitlawat uma xtastakyaw Biblia: «Mintachuwinkan putum kilhtamaku tlan katakgaxmatli, xtachuna kawa la akxni limakgamikanit matsat» (Colosenses 4:6, TNM). Akxni wi tiku lu tuwa tuku titaxtulh, lu namakgtaya komo tiku tamakgaxtokga nawani laktlan tachuwin. «Xtachuna la manzanas nema litatlawanit oro chu kawilikanit niku litatlawanit plata chuna litaxtu tachuwin nema wanaw akxni xlilat.» (Proverbios 25:11.) Chuna la nawankan chu tuku nawankan lu xlakaskinka. Akgtum liʼakxilhtit, max wi tiku nawani achatum chu takgaxmata pi sitsinit: «¡Kamalakchuwa malakcha!». Pero komo nawankan «Katlawa litlan kamalakchuwa malakcha» nema ni takgaxmata pi sitsima, limasiya pi “xtachuna pi limakgamima matsat”.

22. ¿Tuku nakamakgtaya tiku tamakgaxtokgkgonit liwana nalatachuwinan?

²² Lakwan tachuwin, lalakaʼakxilhkan, tlan likatsikan, laʼakgatekgsnikan chu xapaxkina wankan makgtayanan xlakata liwana nalatachuwinankan. Komo xachixku chu xapuskat liskujkgo xlakata liwana nalatachuwinan, xchatiykan nawankgo tuku lakaskinkgo chu tlan nalamakgtaya akxni nalipuwankgo o naʼanan taʼakglhuwit. Xtachuwin Dios wan: «Namakgpuwantinikgoyatiy wa nti laklatayakgoy» (1 Tesalonicenses 5:14). Namin kilhtamaku akxni xachixku nitlan namakgkatsi chu namin kilhtamaku nachuna namakgkatsi xapuskat. Komo “nalawani lakwan tachuwin” akxni chuna natitaxtukgo lu nakamakgtaya (Romanos 15:2).

23, 24. ¿La namakgtayanan tapaxkit chu kakni akxni anan taʼakglhuwit? Kawili akgtum liʼakxilhtit.

²³ Tiku limasiya tapaxkit chu kakni ni katilakpuwa pi lanka taʼakglhuwit akxni ni akxtum lakpuwankgo. Naliskuja xlakata “ni akglakgwa nasitsini” (Colosenses 3:19). Xchatiykan xlilakapastakatkan pi “akxni liwana chuwinankan, masputu tasitsi” (Proverbios 15:1). Ni namaktujuyaw chu ni nawaniyaw pi nitlan akxni ni lakatanks nakinkawaniyan tuku makgkatsi tiku tamakgaxtokgaw. Wa kaliʼakxilhwi pi uma nakinkamakgtayayan naʼakgatekgsniyaw tiku tamakgaxtokgaw. Lichatiy nalakkaxtlawayaw taʼakglhuwit.

²⁴ Kalakapastakwi akxni Sara wanilh xchixku, Abrahán, la xlakkaxtlawalh akgtum taʼakglhuwit nema ni xtlawaputun. Pero Dios wanilh Abrahán: «Kakgaxmatni» (Génesis 21:9-12). Abrahán chuna tlawalh chu sikulunatlawaka. Nachuna, komo xapuskat nawan atanu tuku ni xtachuna la lakapastaka xchixku, xlikgaxmatat tuku kilhwama. Nachuna, xapuskat ni kaj wa nachuwinan, na nakgaxmata tuku wan xchixku (Proverbios 25:24). Ni katilimasiyalh tapaxkit chu kakni komo chatum putum kilhtamaku nawan pi katatlawalh tuku lakaskin.

25. ¿La makgtayanan akxni liwana latachuwinankgo xlakata naʼanan tapaxuwan akxni latatalakgxtumi?

²⁵ Tiku tamakgaxtokgkgonit na talakaskin liwana nalalitachuwinan xlakata talakgxtumit. Nachuna akxni kaj xakstukan kapaxkikan chu ni machokgokgo tuku tlawaputunkgo anan taʼakglhuwit ktamakgaxtokgat xlakata talakgxtumit. Talakaskin lakatanks nalalitachuwinan chu ni lakapala nalasitsini. Akxni xchatiykan ni kaj putsakgo tuku lakgatikgo, ni katikgalhikgolh taʼakglhuwit xlakata talakgxtumit. Uma chu atanu, «ti ni chatum kaputsalh wa lantla nkaj xakstu [tlan nakitaxtu], wampi na kaputsalh lantla ntlan [nakitaxtuni] achatum» (1 Corintios 7:3-5; 10:24).

26. Maski putum tamakgaxtokgat kgalhikgo taʼakglhuwit, ¿la nakinkamakgtayayan xtastakyaw xTachuwin Dios xlakata napaxuwayaw?

²⁶ Xtachuwin Dios masta tlakg tlan tastakyaw. Xlikana pi putum tamakgaxtokgat kgalhikgo taʼakglhuwit. Pero akxni tiku tamakgaxtokga lakapastakkgo chuna la Jehová masiya kBiblia, lapaxki chu lamaxki kakni, xtamakgaxtokgatkan putum kilhtamaku namakgapala chu naʼanan tapaxuwan. Ni kaj xchatiykan nalamaxki kakni, wata na namaxkikgo kakni tiku malakatsukilh tamakgaxtokgat, Jehová Dios.