¿Tuku xlakata ni wilikanit xtukuwanikan makgapitsi tiku kalichuwinan Biblia?

Anta klibro xla Rut chatum tiku ni makgantaxtilh tuku xlitlawat xwanit chuna la xwan xlimapakgsin Moisés kaj wanikan chixku (Rut 4:1-12). Xlakata ni maklakaskinkan xtukuwanikan kBiblia, ¿wamputun pi nitlan xlikatsikgo o kaj ni xlakaskinka xwankgonit?

Ni. Kaʼakxilhwi atanu liʼakxilhtit. Akxni atsinu kilhtamaku xtsankga nakatawayan kPascua kstalaninanin, Jesús kawanilh «kalakgpitit yama nchatum nchixku [...] kkachikin» xlakata xkaxtlawakgolh niku xwayankgolh (Mateo 26:18). ¿Nitlan xlikatsi uma chixku o kaj nitu xliʼakxilhkan? Ni. Uma chixku kstalanina Jesús xwanit, pero ni xtalakaskin xwanka xtukuwani.

Biblia wan xtukuwani lhuwa latamanin tiku lixkajni likatsikgolh, pero lakgachunin ni kamapakuwikan tiku tlan likatsikgolh. Akgtum liʼakxilhtit, putum katsikgokan pi xapulana puskat xwanikan Eva. Pero xlakata akstu paxkika chu ni kgalhakgaxmatnalh tlawalh pi Adán xmakglakgalhinalh, chu lu nitlan la kitaxtunit (Romanos 5:12). Nachuna Biblia ni wan xtukuwani xpuskat Noé, maski lu lhuwa skujli, chu kgalhakgaxmatnalh, makgtayalh xchixku xlakata xtlawalh akgtum lu xlakaskinka taskujut. Maski ni wilika xtukuwani kBiblia ni wamputun pi nitu xliʼakxilhkan o nitlan xakxilha Dios.

Anta kBiblia talichuwinan makgapitsin latamanin pero ni wankan xtukuwanikan, maski lu xlakaskinka tuku tlawakgolh, makgtayanankgolh xlakata xkgantaxtulh xtalakaskin Dios. Kalakapastakwi aktsu tsumat xalak Israel tiku kskujnani xpuskat Naamán, chatum xapuxku soldado xalak Siria. Xla ni pekualh akxni litachuwinalh xmalana xlakata xpalakachuwina Jehová tiku xwi kʼIsrael. Xlakata chuwinalh uma aktsu tsumat lalh akgtum milagro (2 Reyes 5:1-14). Atanu liʼakxilhtit wa xtsumat chatum juez xalak Israel xwanikan Jefté. Xla ni tamakgaxtokgli chu ni kgalhilh kamanan xlakata xmakgantaxtilh tuku xwanit xtlat (Jueces 11:30-40). Nachuna, ni talakgapasa xtukuwanikan makgapitsin tiku tsokgkgolh liwaka tipuxum salmos chu makgapitsin palakachuwinanin tiku makgantaxtikgolh lu xlakaskinka taskujut (1 Reyes 20:37-43).

Akgtum tlakg xatlan liʼakxilhtit wa ángeles. Maski akglhuwa ciento millones anankgo, Biblia kaj chatiy mapakuwi: Gabriel chu Miguel (Daniel 7:10; Lucas 1:19; Judas 9). Chu amakgapitsin ni katsiyaw xtukuwanikan. Akgtum kilhtamaku Manóah, xtlat Sansón, kgalhskilh chatum ángel: «¿Tuku wanikana, xlakata akxni nakgantaxtu mintachuwin xlikana nakkapaxtikatsiniyan?». Angel kgalhtilh: «¿Tuku xlakata kinkgalhskina kintukuwani?». Uma ángel ni lakaskilh namaxkikan kakni nema kajwatiya Jehová lakgchan (Jueces 13:17, 18).

Biblia ni lichuwinan tuku xlakata makgapitsi kalimapakuwi xtukuwanikan latamanin chu amakgapitsi ni. Pero, lhuwa tuku kinkamasiyanikgoyan uma latamanin tiku skujnikgolh Dios, xlakata ni lakpuwankgolh pi wata wa xlakaskinka xkaʼakxilhka.