Xlakata tlan nakitaxtuni familia
1. ¿La xkamakgtaya sábado familias xalak Israel?
1 Limapakgsin xlakata sábado wa tuku xmastanit Jehová xlakata tlan xkakitaxtunilh familias xalak Israel: xkachikin xmakgxtakgkgo xtaskujutkan chu xkgalhikgo kilhtamaku nalakapastakkgo la tlan xkalikatsini Jehová chu la xtalalinkgo. Na xkamakgtaya natlatni xlakata uma kilhtamaku xkamasiyanikgo Limapakgsin xkamanan chu xlakgchalh kxnakujkan (Deu. 6:6, 7). Chuna, akgatunu semana, kachikin xlimaklakaskinkgo sábado xlakata xmatliwakglhkgo xtakanajlakan.
2. ¿Tuku kinkamasiyaniyan xlakata Jehová limapakgsin xla sábado?
2 Xlikana, Jehová ni kawani familias xala uku pi xlikgalhakgaxmatatkan limapakgsin xla sábado. Pero maski chuna, uma limapakgsin wi tuku kinkamasiyaniyan xlakata kiDioskan: xla putum kilhtamaku kuentajtlawani xtakanajlakan xkachikin (Isa. 48:17, 18). La uku, limasiya pi kinkapaxkiyan Jehová xlakata kinkamaxkiyan kilhtamaku nakakninaniyaw Dios kfamilia.
3. ¿Tuku xlakata lakkaxwilika nakakninanikan Dios kfamilia?
3 ¿Tuku xlakata kakninaniyaw Dios kfamilia? Kpapaʼ enero kata 2009, tsukulh tawila tamakxtumit niku xTalikgalhtawakga Maktum Libro kilhtamaku akxni tawila tamakxtumit Niku Masiyakan xlakata la Lichuwinankan Dios chu Tamakxtumit xlakata xTaskujut Dios. Lakgpalika uma tamakxtumit xlakata familias nalimaxtukgo akgtum kakgotanun akgatunu semana xlakata makxtum nakakninanikgo Dios chu namatliwakglhkgo xtakanajlakan. Wa xlakata kawanika familias pi wa nalimaklakaskinkgo kilhtamaku nema xtalimaklakaskin ktamakxtumit niku xTalikgalhtawakga Maktum Libro, chu komo tlan, ama kilhtamaku liwana nalikgalhtawakgakgo Biblia chu atanu temas nema namakgtaya familia.
4. ¿Pi kaj akgtum hora nakatakgalhtawakgayaw familia? Kalichuwinanti.
4 Akxni xʼanaw ktamakxtumit niku xTalikgalhtawakga Maktum Libro, xlimaxtuyaw kilhtamaku xlakata xtakaxtayayaw, makgat xʼanaw o atanu. Kilhuwakan, tlakg xlimaxtuyaw kilhtamaku akxni xʼanaw ktamakxtumit maski kaj akgtum hora xtawila. Xlakata lakgpalika kintamakxtumitkan, la uku kgalhiyaw uma kilhtamaku xlakata nakakninaniyaw Jehová kfamilia, wa xlakata, ni talakaskin kaj akgtum hora nakatakgalhtawakgayaw kifamiliajkan. Wata kililakapastakatkan tuku maklakaskin kifamiliajkan chu nakatakgalhtawakgayaw chuna la natalakaskin.
5. ¿Putum kilhtamaku makxtum nakgalhtawakgakgo familia? Kalichuwinanti.
5 ¿Putum kilhtamaku makxtum nakgalhtawakgakgo familia? Akxni likgalhtawakgakgo Biblia familias tiku kgalhikgo xkamanankan chu tiku ni kgalhikgo lamatliwakglhkgo (Rom. 1:12). Familias tlakg latalakatsuwini. Wa xlakata, akxni Kakninanikan Dios kFamilia wa nalichuwinankgo tuku wan Biblia. Pero, na tlan chatunu chatunu xalak familia xakstukan nakgalhtawakgakgo. Akgtum liʼakxilhtit, akxni makxtum kgalhtawakgakgonita, tlan chuntiya makxtum natawilakgo maski tanu tanu nakgalhtawakgakgo, max nalikgalhtawakgakgo tuku natalichuwinan ktamakxtumit o nalikgalhtawakgakgo revistas. Nachuna, makgapitsi familias ni mapasikgo televisión ama kakgotanun.
6. ¿La tlan nakgalhtawakgakgo familia?
6 ¿La natlawakan? Ni talakaskin putum kilhtamaku natlawakan takgalhskinin chu nakgalhtinan familia. Xlakata lilakgatit natlawakgo akxni kakninanikgo Dios, lhuwa familias tlawakgo chuna la tawila kintamakxtumitkan: pulaklhuwa la kgalhtawakgakgo chu tanu tanu la tlawakgo. Akgtum liʼakxilhtit, makxtum likgalhtawakgakgo Biblia, likgalhtawakgakgo makgapitsi tuku nataʼakxilha ktamakxtumit, chu tuku nawankgo akxni naʼankgo lichuwinankgo Dios. Kpágina 6 wilaparakgo amakgapitsi tastakyaw.
7. ¿La xlitlawatkan natlatni akxni nakatakakninanikgo Dios xfamilia?
7 ¿La nakamamakgkatsini natlatni xfamilia akxni nakgalhtawakgakgo? Kamanan tlakg liwana katsinikgo akxni anan tapaxkit chu ni nakgalhtawakgakgo la tlawakan ktamakxtumit. Max tlan nakgalhtawakgaya kkilhtin komo tlan wi kilhtamaku. Akxni natalakaskin tlan najaxkgo. Makgapitsi familias akxni masputukgo xtakgalhtawakgakan wi tuku wakgo. Max natlatni nalimaxtukgo kilhtamaku xlakata nakamakgtaya xkamanankan komo wi tuku tlawamakgo nema nitlan o komo akxilhkgolh pi kgalhikgo akgtum taʼakglhuwit, pero ni nalimaklakaskinkgo akxni kakninanikgo Dios kfamilia xlakata kaj nakalikilhni o nakalistakyawa. Tlakg tlan nawan atanu hora o atanu kilhtamaku xakstu natachuwinan xlakata ni namamaxani kxlakatin xnatalan. Akxni Kakninanikan Dios kFamilia ni chuna xliwanat la tamakxtumit xalak congregación chu ni natlawayaw pi nalakgachanikgo familia, lipaxuw xliwanat chuna la kiDioskan xapaxuwana tiku kakninaniyaw (1 Tim. 1:11).
8, 9. ¿Tuku pulana xlitlawat xatlat?
8 ¿Tuku tlan natlawa xatlat? Familia tlakg nalitamakgtaya komo xatlat pulana naputsa tuku nakatalikgalhtawakga akxni nakakninanikgo Dios kfamilia chu nalakputsa la natlawa (Pro. 21:5). Lakchixkuwin tlan nakakgalhskinkgo xpuskatkan xlakata uma (Pro. 15:22). Nachuna, namin kilhtamaku na tlan nakakgalhskinkgo xkamanankan. Komo chuna natlawakgo, nakatsikgo tuku lakgatikgo chu tuku lilakgaputsakgo xkamanan.
9 Na ni lu talakaskin lu lhuwa kilhtamaku pulana nakgalhtawakga xatlat. Max familia wi tuku lakgati tlawa akgatunu semana; chu ni katitalakaskilh pi xatlat putum kilhtamaku nalakkaxwili tuku nalikgalhtawakgakgo. Tlakg namakgtaya xatlat komo akxni katakgalhtawakgakgonita tunkun naputsa tuku nakatalikgalhtawakgapara kʼatanu semana xlakata katsijku tuku maklakaskin xfamilia. Makgapitsi natlatni tsokgwilikgo chu mawakakgo niku familia tlan naʼakxilhkgo, la krefrigerador. Uma tlawa pi familia nakgalhtawakgaputunkgo chu nakamaxki kilhtamaku xlakata nalikgalhtawakgakgo tuku naʼakxilhkgo.
10. ¿Tuku tlan nalikgalhtawakgakgo tiku kaj xakstukan wilakgolh?
10 ¿Chu akit tuku naktlawa xlakata kaj kiʼakstu? Tiku kaj xakstukan wilakgolh, tlan xakstukan nakgalhtawakgakgo. Tlan liwana nalakkaxwili akgtum programa, natsokga pi nalikgalhtawakga Biblia, nalikgalhtawakga tuku nataʼakxilha ktamakxtumit chu nalikgalhtawakga revista Makatsinina chu ¡Despertad! Makgapitsi natalan na putsanankgo xlakata akgtum tema. Chu max namin kilhtamaku nawanikgo chatum tiku lichuwinan Dios o akgtum familia xlakata nakatalikgalhtawakga Biblia.
11, 12. Kawanti la makgtayanan akxni akgatunu semana Kakninanikan Dios kFamilia.
11 ¿Tuku tlan nakitaxtu komo akgatunu semana naKakninanikan Dios kFamilia? Akxni xliputum kinakujkan kakninaniyaw xaxlikana Dios, tlakg talakatsuwiniyaw Jehová. Nachuna, familias tiku akxtum kgalhtawakgakgo tlakg tlan latalalin. Xlakata uma tasikulunalin nema limin, akgtum tamakgaxtokgat wankgolh: «Kinchatiykan precursores, chu nikkgalhiyaw kamanan, wa xlakata lu klakaskinaw pi kalakgchalh hora akxni nakkakninaniyaw Dios kfamilia. Kmakgkatsiyaw pi tlakg tlan klatalalalinaw chu tlakg ktalakatsuwiniyaw kinTlatkan xalak akgapun. Akxni lakgchan kilhtamaku pi akxtum nakkgalhtawakgayaw, tsisa klawaniyaw: “¿Lakapastaka tuku kinkalakgchanan uku? ¡Kinkalakgchanan nakakninaniyaw Dios kFamilia!”».
12 Limaxtukan akgtum kilhtamaku xlakata nakakninanikan Dios kfamilia, na kamakgtaya familias tiku kgalhikgo lhuwa taskujut. Chatum tse tiku kaj xakstu kamakgastakma chatiy xlakgkgawasan chu liskujma precursora regular, tsokgnalh: «Xapulana ni lu xakkatakgalhtawakga kifamilia. Lu nialhtu xaktlawaputun, wa xlakata ni lu xakkgalhtawakgayaw chu kaj xmin kilhtamaku xakkgalhtawakgayaw. Ni xaktekgsaw kilhtamaku xlakata nakkgalhtawakgayaw. Wa kkalitsokgnaniman xlakata nakkapaxtikatsiyan pi lakkaxwilitit natawila kilhtamaku akxni Kakninanikan Dios kFamilia. La uku, akgatunu semana kkgalhtawakgayaw chu kakxilhmaw la kinkamakgtayaman».
13. ¿Tuku natlawa la xlilhuwa nakamakgtaya familia akxni nakakninanikgo Dios?
13 Chuna la limapakgsin xla sábado nema xmastakanit, Kakninanikan Dios kFamilia wa tuku kinkamaxkinitan kinTlatkan xalak kʼakgapun nema kamakgtaya familias (Sant. 1:17). Makgasa, chuna la akgatunu familia xalak Israel xmaklakaskin sábado chuna xmakgtaya kxtakanajla. Chuna la maklakaskinaw uku kilhtamaku xlakata nakakninaniyaw Dios kfamilia chuna nakinkamakgtayayan (2 Cor. 9:6; Gál. 6:7, 8; Col. 3:23, 24). Komo kmifamilia liwana namaklakaskinatit uma kilhtamaku, nachuna namakgkatsiyatit la makgkatsilh salmista: «Pero akit nakputsa la tlakg naktalakatsuwini Dios, wa kimaxki lipaxaw latamat, porque xla nakimakgtakgalha [o nakinkuentajtlawa] y ni kama paxtokga tu nitlan» (Sal. 73:28).
[Blurb on page 5]
Akxni Kakninanikan Dios kFamilia ni chuna xliwanat la tamakxtumit xalak congregación chu ni natlawayaw pi nalakgachanikgo familia, lipaxuw xliwanat chuna la kiDioskan xapaxuwana tiku kakninaniyaw
[Box on page 6]
LAKATUM KAWILI
Pulaklhuwa la tlan nakakninaniyatit Dios kfamilia
Biblia:
• Tlan nalikgalhtawakgayatit tuku natalikgalhtawakga xalak Biblia kcongregación. Akxni tuku talikgalhtawakgama kBiblia chalhuwa tiku chuwinan, na chalhuwa tiku kalikgalhtawakgalh kfamilia.
• La akgtum drama natlawayatit tuku wan Biblia.
• Putum familia nalikgalhtawakgayatit capítulos xalak Biblia nema natalikgalhtawakga kcongregación, chu chatunu chatunu natsokga akgtum o akgtiy takgalhskinin xlakata tuku likgalhtawakgakgolh. Alistalh, akxtum naputsakgo xtakgalhtin xtakgalhskininkan.
• Akgatunu semana natsokgkgo kmaktum tarjeta akgtum texto, nakatsinikgo chuna la wan chu nawankgo tuku kilhchanima. Namastokgko tarjetas chu naʼakxilhkgo akgatunu semana xlakata nakatsikgo la akglit textos lakapastakkgo.
• Nakgaxpata akgtum grabación xalak Biblia chu nastalanitilhaya kmiBiblia.
Tamakxtumit:
• Akxtum nalikgalhtawakgayatit akgtum taʼakgchuwin nema natamasta ktamakxtumit.
• Kalikilhtlitit takilhtlin nema natamaklakaskin kcongregación semana nema aku mima.
• Komo chatum xalak familia lakgchan namatitaxti akgtum taʼakgchuwin Niku Masiyakan xlakata la Lichuwinankan Dios o lakgchan akgtum liʼakxilhtit kTamakxtumit xlakata xTaskujut Dios, tlan namakgtayakan la natlawa chu nalimasiya kxlakatin familia la natlawa.
Tuku xlitlawat familia:
• Na tlan nalikgalhtawakgayatit libros Los jóvenes preguntan o Aprendamos del Gran Maestro.
• Na tlan nalimasiyakgo la natlawakgo xlakata natayanikgo taʼakglhuwit nema max natitaxtukgo kʼescuela.
• Tlan natlawakgo pi natlanatni, xakamanan nalitaxtukgo chu xakamanan, natlatni nalitaxtukgo. Kamanan naputsananikgo akgtum tema nema nakalimakgatakgsnikgo xnatlatnikan.
Akxni lichuwinankan Dios:
• Nalimasiyakgo la natlawakgo akxni nalichuwinankgo Dios sábado chu domingo.
• Familia na naʼakxilhkgo la natlawakgo xlakata tlakg nalichuwinankgo Dios akxni Lakapastakkan akxni Tinilh Jesús o akxni kgalhikgo vacaciones.
• Nalimaxtukgo kilhtamaku xlakata chatunu chatunu naputsanani xtakgalhtin akgtum takgalhskinin nema max nakatlawanikan akxni naʼankgo lichuwinankgo Dios.
Amakgapitsi tastakyaw:
• Akxtum nalikgalhtawakgakgo xalaksasti revistas.
• Chatunu chatunu xalak familia kalikgalhtawakgalh kxalaksasti revista akgtum artículo nema lakgatilh chu alistalh kalichuwinalh akxni nakakninanikan Dios kfamilia tuku katsinilh.
• Namin kilhtamaku tlan nawaniya chatum tiku lichuwinan Dios o tiku tamakgaxtokgkgonit kaʼankgolh akxni nakakninaniya Dios kfamilia, chu max tlan nakatlawaniya makgapitsi takgalhskinin.
• Naʼakxilhatit chu nalikgalhchuwinanatit makgapitsi videos xla xtatayananin Jehová.
• Akxtum nalikgalhtawakgayatit sección «Los jóvenes preguntan» o «Actividades para la familia» xalak revista ¡Despertad!
• Akxtum nalikgalhtawakgayatit sección «De padres a hijos» o «El rincón del joven» xalak revista La Atalaya.
• Tlan nalikgalhtawakgakgo chu nalikgalhchuwinankgo akgtum sección xla Anuario xla kata nema titaxtuma o maktum likgalhtawakga nema tamastalh ktamakxtumit xaʼakgtutu kilhtamaku.
• Nalichuwinankgo tuku katsinikgolh akxni nakitaspitkgo ktamakxtumit kxaʼakgtum o kxaʼakgtiy o kxaʼakgtutu kilhtamaku.
• Naʼakxilhkgo tuku tlawanit Jehová chu nalichuwinankgo tuku kinkamasiyaniyan xlakata kiMalakatsukinakan.
• Wi tuku akxtum natlawakgo, la akgtum maqueta, akgtum mapa o akgtum gráfica.