¿La tlan nalakgtalakatsuwiyaw Dios?

1. ¿Kgaxmata Dios putum oraciones?

Dios kawani putum latamanin katlawakgolh oración xlakata tlan nalakgtalakatsuwikgo (Salmo 65:2). Pero uma ni wamputun pi kakgaxmatni o makgamakglhtinan putum oración. Biblia wan pi tiku nitlan likatsini xpuskat max «nasokgaliy» xʼoración (1 Pedro 3:7). Chu akxni israelitas chuntiya xtlawakgo tuku nitlan, Dios nialh xkgaxmata xʼoracionkan. Pero, maski wi tiku tlawakgonit laklanka talakgalhin, chu xlikana makgxtakgkgo tuku nitlan xtlawakgo kakgaxmatni xʼoracionkan. (Kalikgalhtawakga Isaías 1:15 chu 55:7.)

Kaʼakxilhti video ¿Kgaxmata Dios putum oraciones?

2. ¿La natlawayaw kioracionkan?

Na likakninaniyaw Dios akxni tlawayaw oración, wa xlakata kaj wa Jehová tiku natlawaniyaw oración (Mateo 4:10; 6:9). Xlakata akinin kgalhiyaw talakgalhin, talakaskin pi kxtukuwani Jesús natlawayaw oración, xla nilh xpalakata kintalakgalhinkan (Juan 14:6). Jehová ni lakaskin natsokgwiliyaw chu watiya watiya nawaw kkioracionkan, wata lakaskin pi nawanaw tuku wi kkinakujkan. (Kalikgalhtawakga Mateo 6:7 chu Filipenses 4:6, 7.)

Kimalakatsukinakan kgaxmata oración asta maski ni natakgaxmata (1 Samuel 1:12, 13). Chu kinkawaniyan pi tlan putum kilhtamaku natlawaniyaw oración, akxni nalakgaxkgakgayaw chu akxni nalhtatayaw, akxni wayanaw o akxni tuwa tuku titaxtumaw. (Kalikgalhtawakga Salmo 55:22 chu Mateo 15:36.)

3. ¿La kinkamakgtayayan tamakxtumit?

Lamaw niku latamanin ni kanajlanikgo Dios chu asta likgalhkgamanankgo akxni wanaw pi Dios nalimin takaksni kKatiyatni. Max uma nakinkamaxlajwaniputunan xlakata nialh natalakatsuwiniyaw Dios (2 Timoteo 3:1, 4; 2 Pedro 3:3, 13). Wa xlakata talakaskin nakatatamakxtumiyaw kstalaninanin Cristo chu chuna nakinkamatliwakglhkgoyan. Xlakan na maklakaskinkgo nakamatliwakglhaw. (Kalikgalhtawakga Hebreos 10:24, 25.)

Akxni katatamakxtumiyaw tiku paxkikgo Dios tlakg talakatsuwiniyaw. Akxni anaw ktamakxtumit xla xtatayananin Jehová tlawa pi tlan nalitatliwakglhaw xtakanajlakan amakgapitsin. (Kalikgalhtawakga Romanos 1:11, 12.)

4. ¿La tlan natalakatsuwiniya Dios?

Tlan natalakatsuwiniya akxni nalilakapastaka tuku katsininita kBiblia xlakata Dios. Kalakapastakti tuku tlawanit, xtastakyaw chu tuku wan pi natlawa. Akxni nalilakapastaka chu natlawaya oración namakgtayayan xlakata naʼakgatekgsa, o namakgachakgxiya, pi lu kinkapaxkiyan chu lu skgalala Dios. (Kalikgalhtawakga Josué 1:8 chu Salmo 1:1-3.)

Tlan natalakatsuwiniya komo nakanajlaniya chu nalipawana. Pero takanajla xtachuna la tuku staknan: talakaskin putum kilhtamaku namawikan chu xlakata takanajla talakaskin nalilakapastakaw tuku xlakata chuna kanajlayaw. (Kalikgalhtawakga Mateo 4:4 chu Hebreos 11:1, 6.)

5. ¿La namakgtayayan natalakatsuwiniya Dios?

Jehová kapaxki tiku na paxkikgo. Kamakgtaya akxni wi tuku maxlajwaniputun xtakanajlakan chu tuku laktlawaputun latamat nema kgalhkgalhimakgolh tuku ni kgalhi xlisputni (Salmo 91:1, 2, 7-10). Kawani tuku tayat ni xlitlawatkan xlakata ni lu natatatlakgo chu napaxuwakgo, chu kamasiyani la tlakg tlan nalatamakgo. (Kalikgalhtawakga Salmo 73:27, 28 chu Santiago 4:4, 8.)