¿Wi kminchik chatum tiku xatsakat?

1, 2. 1) ¿Tukuya parábola nema lichuwinalh Jesús limasiyalh pi tiku xpulalinkgo takanajla ni xkgalhakgaxmatkgo Dios? 2) ¿Tuku kinkamasiyaniyan uma parábola xlakata kamanan?

AKXNI nialh makgas xtsankga xlakata xnilh Jesús, kakgalhskilh tiku xpulalinkgo xtakanajlakan judíos xlakata xlilakpuwankgolh. Wa: «¿La mpuwanatit wixin? Chatum nchixku xwi nchatuy xkaman. Cha nchu lakgaIh nchatum wanilh: “Kgawasa, kapit nchu skuja kinkauvasna”. Chanchu xla nkgalhtinalh, waj: “Ni kamputun”. Wampi akxni nchu alistalh, talakgaspittayalh, pus alh. Cha nchu lakgalh achatum, na chuna wanilh. Cha nchu xla nkgalhtinalh, waj: “Tataj, nakan nkit”, na ni alh. “¿Ti ntiya ma xlichatuykan ntlawalh wa ntu xtalakaskin xtlat?” Cha nchu xlakan wankgolh: “Wa nti xakgasiya wanikaj”» (Mateo 21:28-31).

² Tuku wa Jesús limasiyalh pi tiku xkapulalinikgo xtakanajlakan judíos ni xkgalhakgaxmatkgo xlimapakgsin Dios. Xlitaxtukgo la xlichatiy kgawasa, tiku wa pi xʼama tlawa xtalakaskin Dios pero ni makgantaxtilh. Nachuna, lhuwa natlatni katsikgo pi parábola nema lichuwinalh Jesús limasiya pi liwana xkatsi la wi familia. Chuna la limasiyalh Jesús, tuwa katsikan tuku lakpuwankgo kamanan o nakatsiyaw tuku natlawakgo. Max chatum kgawasa akxni aku stakma lu ni kgalhakgaxmatnan pero akxni nastaka tlan nalikatsi chu namakgantaxti tuku nalakgayawakan. Wa uma tuku xlitalakapastakat akxni naʼakxilhkan tuku xlakata kamanan ni kgalhakgaxmatnankgo.

¿LA LIKATSI TIKU XATSAKAT?

3. ¿Tuku xlakata natlatni ni tunkun nalakpuwankgo pi xkamanankan xalaktsakat?

³ Min kilhtamaku kgaxmataw pi kamanan ni tapakgsiniputunkgo xnatlatnikan. Asta max katsiyaw pi kʼakgtum familia wi chatum kgawasa tiku tasiya pi lu xatsakat. Pero, tuwa katsikan komo chatum kgawasa xlikana xatsakat. Nachuna, tuwa katsikan tuku xlakata makgapitsi kamanan ni kgalhakgaxmatnankgo chu amakgapitsi ni chuna tlawakgo. Komo natlatni naʼakxilhkgo pi chatum xkgawasa lu xatsakat litaxtuma, ¿tuku xlitlawatkan? Xlakata tlan nakatsiyaw xtakgalhtin uma takgalhskinin, pulana kilikatsitkan tuku kilhchanima xatsakat.

4-6. 1) ¿Tiku kilhchanima xatsakat? 2) ¿Tuku xlilakapastakatkan natlatni akxni xkamanankan min kilhtamaku ni kgalhakgaxmatnankgo?

⁴ Tlan nawanaw pi chatum tiku xatsakat wa tiku putum kilhtamaku ni kgalhakgaxmatnan chu ni tapakgsiniputun tiku xlitapakgsinit. Xlakata «xlitonto kgawasa tachitawilanit kxnaku» (Proverbios 22:15), wa xlakata makgtum o makglhuwa putum kamanan ni katapakgsiniputunkgo xnatlatnikan chu atanu tiku kgalhikgo limapakgsin, chu tlakg chuna tlawakgo akxni aku stakmakgolh chu akxni tsuku talakgpali xtalakapastaknikan. Kgalhikan taʼakglhuwit akxni talakgpali kilatamatkan chu akxni tsukukgo stakkgo kamanan tlakg lhuwa talakgpalikgo. Kamanan chixkuta o puskata wankgo. Wa xlakata, makgapitsi natlatni chu kamanan tuwa makgkatsikgo nalaʼakgatekgsni umakgolh kata. Natlatni ni lakaskinkgo pi lakapala kachalh uma kata pero kamanan tlakg lakapala stakputunkgo.

⁵ Kgawasa tiku xatsakat lakgmakgan xlimapakgsin xnatlatni; pero ni nalakpuwanaw pi xatsakat tiku kaj min kilhtamaku ni kgalhakgaxmatnan. Chu xlakata takanajla, max makgapitsi kamanan ni lu nalakgatikgo o nipara tsinu nakatsiputunkgo tuku wan Biblia, pero uma ni wamputun pi xatsakat. Natlatni ni tunkun nalakpuwankgo pi xkamanan xalaktsakat.

⁶ Putum tiku aku stakmakgo, ¿ni kgalhakgaxmatkgo xnatlatnikan? Nichuna. Kaj ni lhuwa kamanan tiku xlikana xalaktsakat. Pero ¿tuku tlan nawanaw xlakata tiku putum kilhtamaku ni kgalhakgaxmatnan? ¿Tuku tlawa ni kgalhakgaxmatnan?

TUKU TLAWA XALAKTSAKAT NAWANKGO

7. ¿La tlawa xkakilhtamaku Satanás xlakata kamanan ni nakgalhakgaxmatnankgo?

⁷ Pulaktum tuku tlawa pi ni nakgalhakgaxmatnankgo wa xkakilhtamaku Satanás. «Kxlitliwakga Akgskgawini wilakgo, xlipaks ntachixkuwitat.» (1 Juan 5:19.) Kakilhtamaku nema akgchipanit Satanás malakgatuminit nitlan tayat, nema ni xlikgalhitkan kstalaninanin Cristo (Juan 17:15). Kxkakilhtamaku tlakg lixkajni chuwinankan, tlakg kalipekua chu tlakg anan tuku nixatlan nixawa makgasa (2 Timoteo 3:1-5, 13). Komo natlatni ni nakastakyawakgo, ni nakamakatsinikgo chu ni nakakuentajtlawakgo xkamanankan, lakapala nakapasa «spiritu wa ntu asta chu skujma kxnakukan lakgachixkuwimakgananin» (Efesios 2:2). Chu tiku ni xlilat nakatalalinkgo nakamatlawiputunkgo tuku nitlan. Biblia wan: «Tiku katalalin tiku xalak tontos nitlan katikitaxtunilh» (Proverbios 13:20). Nachuna, tiku nakatalalin tiku kaʼakgchipanit xʼespíritu uma kakilhtamaku max na nakapasa. Kamanan putum kilhtamaku maklakaskinkgo nakamakgtayakan naʼakgatekskgo pi akxni kgalhakgaxmatkan tuku wan xtastakyaw Dios wa tuku tlakg makgtayanan (Isaías 48:17, 18).

8. ¿Tuku max natlawa pi kamanan ni nakgalhakgaxmatnamputunkgo?

⁸ Atanu tuku tlawa pi ni nakgalhakgaxmatnankgo wa xlakata la wi familia. Komo chatum xatlat xakgotni o wa droga, makgsnokga xpuskat, max xakamanan nachuna nalikatsikgo. Kfamilia niku tasiya pi tlan wilakgolh max kamanan ni katikgalhakgaxmatnankgolh komo namakgkatsikgo pi ni lu kapaxkikan. Pero ni putum tiku ni kgalhakgaxmatnankgo wa uma tuku chuna kamatlawi. Makgapitsi kamanan lakgmakgankgo xtastakyaw xnatlatni maski xlakan tlawakgo tuku wan Biblia chu kuenta katlawakan kʼuma kakilhtamaku. ¿Tuku xlakata? Max na wa xlakata talakgalhin nema kimputumkan kgalhiyaw. Pablo wa: «Ntsukulh ntalakgalhin nkatuxawat nkaj xpalakata nchatum nchixku [Adán], pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin sampi paks lakgalhinankgolh» (Romanos 5:12). Adán ni kgalhakgaxmatnalh chu xakstu paxkika chu kamakgxtakgnilh xkamanan tuku lu nitlan. Makgapitsi kamanan kaj ni kgalhakgaxmatnamputunkgo chuna la tlawalh Adán.

ELÍ NITU KAWANILH XKAMANAN CHU REHOBOAM LU MUSTSU CHIPANALH

9. ¿Tuku max namalakatsaliyaw nema natlawa pi kamanan ni nakgalhakgaxmatnankgo?

⁹ Atanu tuku tlawa pi kamanan ni nakgalhakgaxmatnankgo wa la kamakgastakkgo xnatlatni (Colosenses 3:21). Makgapitsi lakpuwankgo pi lu mustsu nakachipakgo chu palha nakastakyawakgo xkamanankan. Amakgapitsi kamaxkikgo talakaskin katlawakgolh tuku nalakaskinkgo chu ni kamasiyanikgo tuku nakamakgtaya xkamanan xlakata nitu nalanikgo. Tuwa nakatsiyaw la xlilat nakastakyawayaw. Nachuna, ni putum kamanan watiya tuku maklakaskinkgo. Max makgapitsi maklakaskinkgo tlakg nakapulalinkan. Pulaktiy liʼakxilhtit xalak Biblia nakinkamakgtayayan naʼakxilhaw tuku nitlan kitaxtu akxni lu mustsu chipanankan chu akxni nitu kawanikan kamanan.

10. ¿Tuku xlakata Elí nitlan tlat litaxtulh maski max lu tlan xapuxku sacerdote xwanit?

¹⁰ Elí chatum xapuxku sacerdote xwanit kʼIsrael xala makgasa tiku xkgalhi xkamanan. Tipuxum kata sacerdote wa chu liwana xlakgapasa xLimapakgsin Dios. Xlikana max chali chali liwana xmakgantaxti xtaskujut nema xlakgayawakanit chu na liskujli xlakata liwana xkamasiyanilh xLimapakgsin Dios xkamanan, Ofní chu Finehás. Pero, kamaxkilh talakaskin xtlawakgolh tuku xlakaskinkgolh. Ofní chu Finehás sacerdotes xwankgonit, «lakchixkuwin tiku nitu xlitaxtukgo» nema kajwatiya lhuwa tuku xwaputunkgo chu xtalakgxtumiputunkgo. Akxni tlawakgolh tuku xalimaxana niku kxasanto, Elí ni kamakglhtilh xtaskujutkan. Kaj tsinu kakilhnilh. Xlakata nitu kawanilh kamalankilh xlakgkgawasan nixawa Dios. Chu wa xlakata lakgmakgankgolh xaxlikana xtakaknin Jehová chu xfamilia Elí lu nitlan la kitaxtulh (1 Samuel 2:12-17, 22-25, 29; 3:13, 14; 4:11-22).

11. ¿Tuku kamasiyani natlatni nixatlan xliʼakxilhtit Elí?

¹¹ Xkamanan Elí laklankata xwankgonit akxni chuna lalh. Uma tuku talichuwinan limasiya pi nitlan akxni ni kastakyawakan kamanan (katamalakxtupi Proverbios 29:21). Makgapitsi natlatni lakpuwankgo pi paxkikgo xkamanan akxni kamaxkikgo talakaskin natlawakgo tuku nalakaskinkgo, ni liwana wankgo tuku xlitatlawat chu tuku ni xlitatlawat chu lakgpalitilhakgo tuku wankgo chu malakatsalikgo limapakgsin nema mastakgo. Ni kastakyawakgo, maski lakatsalakgo xlimapakgsin Dios. Akxni nitu kawanikgo natlatni, tlawa pi kamanan nalakgmakgankgo xlimapakgsin xtlatkan chu atanu (katamalakxtupi Eclesiastés 8:11).

12. ¿Tuku nitlan tlawalh Rehoboam akxni xmapakgsinama?

¹² Rehoboam limasiya atanu tuku ni xlitlawatkan tiku kgalhikgo limapakgsin. Xaʼawatiya mapakgsina xwanit xalak Israel akxni makxtum xwilakgolhku pero nitlan mapakgsinalh. Rehoboam xmakgamakglhtinanit akgtum tamapakgsin niku latamanin ksitsikgonit xlakata Salomón lu nitlan xkalikatsini. ¿Tlan kalikatsinilh Rehoboam? Ni. Akxni makgapitsi skinikgolh pi wi tuku nialh xkamatlawilh nema lu tuwa, ni tlawalh tuku wanikgolh kstakyawananin tiku xlinkgoya kata chu limapakgsinalh pi tlakg tuwa tuku xkamatlawika. Xlakata tlanka xmakgkatsikan tlawalh pi akgkaw laklanka familias nialh xtapakgsinikgolh chu xtamapakgsin pulaktiy lalh (1 Reyes 12:1-21; 2 Crónicas 10:19).

13. ¿Tuku xlitlawatkan natlatni xlakata ni nalikatsikgo chuna la Rehoboam?

¹³ Natlatni wi tuku lu xlakaskinka nakatsinikgo xlakata Rehoboam. Talakaskin pi akxni natlawakgo oración «natekgskgo Jehová» chu naʼakxilhkgo la limaklakaskimakgolh xtastakyaw Biblia akxni kamasiyanikgo xkamanan (Salmo 105:4). Eclesiastés 7:7 wan: «Taʼakglhuwit tlawa pi chatum xaskgalala chixku nialh nalakpuwan tuku natlawa». Akxni liwana lakapastakkan tukuya limapakgsin kamaxkikan kamanan tlawa pi tlan nastakkgo chu na kamakgtaya. Pero ni xlilat pi kamanan nitu nakamaxkikan talakaskin natlawakgo chu na ni nakamaxkikan talakaskin wi tuku xakstukan natlawakgo nema nakalimakgtaya tlan namakgkatsikgo. Akxni natlatni ni lu mulhman nakamakgxtakgkgo o ni lu mustsu nakachipakgo, lhuwa kamanan tlakg kgalhakgaxmatnankgo.

NAKAMAXKIKAN TUKU MAKLAKASKINKGO MAKGTAYANAN NI XATSAKAT NAWANKGO

14, 15. ¿La xliʼakxilhatkan natlatni akxni xkamanan tsukukgo stakkgo?

¹⁴ Maski natlatni lakgatikgo akxni akxilhkgo pi xkamanan stakmakgolh chu chixku o puskat nawankgo, max lilakgaputsakgo xlakata xkamanan nialh putum kgalhskininankgo tuku natlawakgo. Akxni stakmakgolh ni kaks nalilakawankgo natlatni komo namin kilhtamaku ni lu nakgalhakgaxmatnankgo. Kalakapastakwi pi natlatni tiku kstalaninanin Cristo xliskujatkan xlakata xkamanankan naskujnanikgo Jehová, liwana nalakapastaknankgo chu namakgantaxtikgo tuku nakalakgayawakan (katamalakxtupi 1 Corintios 13:11; Efesios 4:13, 14).

¹⁵ Maski tuwa namakgkatsikgo, natlatni ni putum kilhtamaku wa nakawanikgo tuku natlawakgo xkamanankan. Talakaskin pi xakstukan nalakkaxwilikgo la nalikatsikgo. Makgapitsi kamanan limasiyakgo pi katsikgo tuku xlitlawatkan akxni lu lakgkgawasanku. Akgtum liʼakxilhtit, Biblia wan xlakata mapakgsina Josías: «Akxni kgawasaku xwanit [max xkgalhi 15 kata], tsukulh putsa xDios David». Uma kgawasa tiku tlan xlikatsi, xlikana liwana xmakgantaxti tuku xlakgayawakanit (2 Crónicas 34:1-3).

16. ¿Tuku xlikatsitkan kamanan akxni tlakg kamaxkikan talakaskin wi tuku natlawakgo?

¹⁶ Pero akxni wi tiku maxkikan talakaskin wi tuku natlawa xlakaskinka nakatsi pi wi tuku na lakgaya. Wa xlakata natlatni nakalimakgxtakgkgo xkamanankan napatikgo xlakata tuku nitlan laksakkgolh natlawakgo. Biblia wan: «Xlipaks wa ntu xchalh nchixku kxlatamat, na wa nakimakgalay», uma texto kakilhchanima tiku lakgkgawasanku chu tiku laklankata (Gálatas 6:7). Nila putum kilhtamaku nakakuentajtlawaya minkamanan. ¿Chu komo minkgawasa natlawaputun tuku lu nitlan? Xatlat tiku liwana lakapastaka nawani «ni». Chu maski max nawani tuku xlakata, nitu natlawa pi nalakgpali tuku waninit (katamalakxtupi Mateo 5:37). Pero akxni nawani pi «ni» talakaskin pi ni nasitsi, xlakata «akxni liwana chuwinanaw, tlawa pi achatum nialh kasitsilh» (Proverbios 15:1).

17. ¿Tuku maklakaskinkgo kamanan nema natlatni xlimaxkitkan?

¹⁷ Kamanan liwana xlikatsitkan pi lakatanks kastakyawakan maski namin kilhtamaku nalisitsikgo akxni wi tuku ni nakamaxkikan talakaskin natlawakgo o limapakgsin nema nakamaxkikan. Ni lakgatikgo akxni kaj lakapala kalakgpalinikan tuku kawanikanit, kaj xlakata la makgkatsi xatlat. Nachuna komo kamanan nakamakgtayakan ni nakatamakgatlini amakgapitsin, ni namaxanankgo o xlakata ni nalakpuwankgo pi nila tuku tlawakgo, max akxni laklankata nawankgo lu tlan nalinkgo xlatamatkan. Kamanan na tlan limakgkatsikgo akxni kalipawankan xlakata tlan likatsikgo (katamalakxtupi Isaías 35:3, 4; Lucas 16:10; 19:17).

18. ¿Tuku kinkamakgapaxuwayan xlakata makgapitsi kamanan?

¹⁸ Natlatni tlan makgkatsikgo akxni katsikgo pi kamanan ni kgalhikgo taʼakglhuwit akxni stakkgo xlakata kfamilia tlan latalalinkan, tlan wi chu lapaxkikgo (Efesios 4:31, 32; Santiago 3:17, 18). Lhuwa kamanan tiku stakkgo kxfamilia niku wilakgolh tiku xakgotni, anan taʼakglhuwit o tanu tuku nitlan, ni mastakgonit talakaskin nakatlawani tuku nitlan chu akxni laklankata tlan likatsikgo. Wa xlakata, komo kamanan stakkgo kʼakgtum chiki niku tlan namakgkatsikgo, chu katsikgo pi kapaxkikan, chu kakuentajtlawakan, maski max namin kilhtamaku wi tuku ni nakamaxkikan talakaskin natlawakgo chu nakalistakyawakan Biblia, akxni laklankata nawankgo tlan nalikatsikgo chu akinin tlan namakgkatsiyaw (katamalakxtupi Proverbios 27:11).

AKXNI KAMANAN TANUKGO KTAʼAKGLHUWIT

19. Maski natlatni nakamasiyanikgo xkamanan tuku tiji natiyakgo, ¿tuku xlitlawatkan kamanan?

¹⁹ Akxni liwana kamasiyanikan kamakgtaya kamanan. Proverbios 22:6 wan: «Kamamakgatawakga kgawasa chuna la na wan xtiji; chu akxni nakgolon ni namakgxtakga». Pero ¿tuku natlawayaw akxni kamanan tanukgo klaklanka taʼakglhuwit maski xnatlatni tlan likatsikgo? ¿Tlan chuna nala? Tlan. Atanu versículos xalak Biblia masiya pi uma texto wamputun pi kamanan kalakgchan “nakgaxmatkgo” tuku nakawanikgo xnatlatnikan (Proverbios 1:8). Natlatni chu kamanan xlimakgantaxtitkan tastakyaw nema wi kBiblia xlakata tlan natawila familia. Komo natlatni chu kamanan ni makgtayanankgo naʼanan taʼakglhuwit.

20. Akxni kamanan tlawakgo tuku nitlan, ¿tuku xlitlawatkan natlatni?

²⁰ ¿Tuku xlitlawatkan natlatni akxni chatum kgawasa tlawa tuku nitlan chu tanu ktaʼakglhuwit? Talakaskin pi namakgtayakan uma kgawasa. Komo natlatni nalakapastakkgo pi uma kgawasa nina kgalhi lhuwa liskgalala, uma nakamakgtaya ni lu nasitsinikgo. Pablo kawanilh natalan tiku tliwakga xwi xtakanajlakan: «Lapi wi nti xaliʼakgchakgxtayalh mpala tu nitlan, wixin nti lu wa xtalakaskin espíritu lilapatit, tasmalhwan kalilakgmaxtutit» (Gálatas 6:1). Natlatni tlan natlawakgo chuna la wan uma texto akxni makgtayamakgo kgawasa tiku tlawa tuku nitlan. Liwana xliwanitkan tuku xlakata nitlan tuku tlawalh chu tuku xlitlawat xlakata ni natlawapara uma tuku nitlan. Nachuna liwana nawanikgo pi tuku nitlan wa tuku tlawalh (katamalakxtupi Judas 22, 23).

21. Chuna la tlawakan kcongregación, ¿tuku xlitlawatkan natlatni komo chatum kgawasa tlawa lanka talakgalhin?

²¹ ¿Tuku xlitatlawat komo kgawasa natlawa lanka talakgalhin? Natalakaskin namakgtayakan chu liwana napulalinkan. Akxni chatum xalak congregación tlawa akgtum lanka talakgalhin, wanikan pi kamakgxtakgli tuku tlawama chu kakaskinilh xtamakgtay lakgkgolotsin (Santiago 5:14-16). Akxni makgxtakga tuku tlawama, lakgkgolotsin makgtayakgo xlakata natatliwakglhpara xtakanajla. Kfamilia, wa natlatni tiku kalakgchan namakgtayakgo tiku makglakgalhinan chu max na natalakaskin pi nakalitachuwinankgo lakgkgolotsin. Natlatni ni namatsekgnikgo lakgkgolotsin xalak congregación akxni xkgawasakan natlawa lanka talakgalhin.

22. Chuna la Jehová, ¿tuku xlitlawatkan natlatni akxni xkamanankan natlawakgo akgtum lanka talakgalhin?

²² Natlatni tuwa makgkatsikgo nalakkaxtlawakgo akgtum lanka taʼakglhuwit nema makgtanumakgo xkamanan. Max xlakata ni katsikgo tuku natlawakgo lu lisitsikgo, pero akxni chuna tlawakgo kaj tlakg nalimakgalipuwankgo xkgawasakan tiku tlawalh tuku nitlan. Chuna la nalikatsiniyaw kgawasa akxni titaxtuma tuku lu nitlan wa tuku natlawa alistalh. Na kalakapastakwi pi Jehová katapatilh xkachikin akxni tlawakgolh tuku nitlan pero xtalakaskin pi xmakgxtakgkgolh tuku xtlawamakgo. Wa uma lu tlan tachuwin nema kawanilh: «Katantit, chu kalakaxtlawaw taʼakglhuwit. Maski mintalakgalhinkan xtachuna la escarlata xwankgolh, snapapa nakatlawakan la miki; chu maski lu spinini la lhakgat xla carmesí, la lana nawankgo» (Isaías 1:18). Uma lu tlan liʼakxilhtit xlakata natlatni.

23. ¿Tuku xlitlawatkan chu tuku ni xlitlawatkan natlatni akxni xkamanankan natlawakgo akgtum lanka talakgalhin?

²³ Wa xlakata nawaniyaw kgawasa tiku ni kgalhakgaxmatnan pi kalakgpalilh xtayat. Tlan nakaskiniyaw tastakyaw natlatni tiku tlakg katsikgo chu lakgkgolotsin xalak congregación (Proverbios 11:14). Ni nawanaw chu ni akglakgwa tuku natlawayaw nema natlawa pi nakinkatamakgatliniyan. Ni lu nasitsiyaw nema katuwa tuku nakinkamatlawiyan (Colosenses 3:8). Ni kalakpuwaw pi nialhla tuku tlawakan (1 Corintios 13:4, 7). Maski naxkajniyaw tuku nitlan, ni nakalakgmakganaw kinkamanankan chu ni nakasitsiniyaw. Chu tuku tlakg xlakaskinka, akinin natlatni nawiliyaw lu tlan liʼakxilhtit chu lu nakanajlaniyaw Dios.

LA NAMAKGTAYAKAN TIKU XATSAKAT

24. Min kilhtamaku, ¿tuku lu nitlan tawila kfamilia chu tuku xlitlawatkan natlatni?

²⁴ Min kilhtamaku liwana tasiya pi chatum kgawasa nipara tsinu kgalhakgaxmatnamputun chu ni stalaniputun xlimapakgsin Dios. Akxni chuna la, natlatni tlakg nakamakgtayakgo amakgapitsi xkamanankan. Kuenta natlawakgo xlakata ni kaj wa tiku ni kgaxmata tlakg namakgtayakgo chu ni kuenta nakatlawakgo amakgapitsi. Ni nakamatsekgni taʼakglhuwit amakgapitsi tiku xalak familia, tlan nakalitachuwinan kaj wa tuku xlakaskinka pero ni nakamamakgkatsini pi nialhla tuku tlawakan (katamalakxtupi Proverbios 20:18).

25. 1) Chuna la tlawakan kcongregación xla kstalaninanin Cristo, ¿tuku max xlitlawatkan natlatni akxni chatum xkgawasa xatsakat? 2) ¿Tuku xlilakapastakatkan natlatni komo chatum xkgawasa xatsakat nawan?

²⁵ Apóstol Juan wa xlakata tiku xatsakat kcongregación: «Ni timakgamakglhtinanatit kminchikkan, na ni tiwaniyatit: “Luwa tlan mpi tat”» (2 Juan 10). Natlatni na tlan chuna natlawakgo komo xkgawasakan lankata chu lu xlikana xatsakat. Tuwa namakgkatsikgo chuna natlawakgo chu asta lu nalilipuwankgo pero lu xlakaskinka xlakata amakgapitsi xalak familia tlan natawilakgo. Talakaskin pi putum kilhtamaku nakuentajtlawakan chu naʼakxilhkan la wi familia. Wa xlakata, chuntiya nakawaniyaw la nalinkgo xlatamatkan pero ni namalakatsaliyaw. Talakaskin nakatachuwinanaw amakgapitsi kinkamanankan chu nakakgalhskinaw la kakitaxtunima kʼescuela chu kcongregación. Na nakawaniyaw pi nitlan akxilhaw xtayat tiku xatsakat, pero ni wamputun pi ni akxilhputunaw. Ni nawaniyaw pi ni akxilhputunaw kgawasa wata xtayat ni akxilhputunaw. Akxni chatiy xkamanan Jacob kaliminkgolh talipuwan xfamilia xlakata tlawakgolh tuku nitlan, Jacob wa pi tuku nitlan xtlawakgonit wa tuku ni xakxilhputun chu ni wa xkamanan (Génesis 34:1-31; 49:5-7).

26. ¿Tuku nakamatliwakglha natlatni tiku makgantaxtikgo tuku lakgayakgo komo chatum xkaman xatsakat nawan?

²⁶ Max namakgkatsiyaw pi kinkuentajkan xlakata tuku lama kfamilia. Pero komo tlawaninitaw oración Jehová, tlawaw tuku talakaskilh chu tlawanitaw chuna la kinkalimapakgsiyan, ni nalakpuwanaw pi kinkuentajkan. Maski nila lu tlan tlat nawanaw pero komo liskujnitaw namakgantaxtiyaw tuku lakgayaw tlan kilimakgkatsitkan (katamalakxtupi Hechos 20:26). Lu nitlan tamakgkatsi akxni kfamilia wi chatum tiku xatsakat; pero komo namin kilhtamaku chuna natitaxtuyaw, liwana kakatsiw pi Dios katsi tuku titaxtumaw chu nikxni katikamakgxtakgli tiku kakninanikgo (Salmo 27:10). Wa xlakata, kaliskujwi xlakata kkifamiliajkan tlan namakgkatsikgo kamanan chu tlan natatliwakglha xtakanajlakan.

27. Chuna la lichuwinalh Jesús parábola xlakata kgawasa tiku akglakgwa lilh xlatamat, ¿tuku xlilakpuwanatkan natlatni xlakata xkgawasakan tiku xatsakat?

²⁷ Pero, nikxni kalakpuwaw pi ni katikgaxmatkgolh. Max tuku masiyanika akxni aktsujku xwanit kgawasa tiku xatsakat alistalh nalakgchan kxnaku chu natalakgpali (Eclesiastés 11:6). Lhuwa familias xla kstalaninanin Cristo chuna titaxtukgonit chu makgapitsi akxilhkgonit la xkamanankan tiku xatsakat taspitpara, chuna la kgawasa tiku akglakgwa lilh xlatamat nema lichuwinalh Jesús (Lucas 15:11-32). Chu max nachuna nakinkaʼakgspulayan.