TAKGALHTAWAKGA 14
¿Tuku kilitlawatkan xlakata Dios namakgamakglhtinan kintakakninkan?
Chuna la katsiniw ktakgalhtawakga akgkututu, Dios ni makgamakglhtinan putum takanajla o religión. Pero tlan nakakninaniyaw kiMalakatsukinakan chuna la xla lakgati. ¿Tuku «takaknin» o «takanajla» makgamakglhtinan? (Santiago 1:27). Kaʼakxilhwi tuku masiya Biblia.
1. ¿Tuku nakinkamakgtayayan nakatsiyaw la nakakninaniyaw Dios?
Biblia kinkamasiyaniyan la nakakninaniyaw Dios. Jesús wanilh Dios: «Mintachuwin xaxlikana» (Juan 17:17). Lhuwa takanajla ni kuenta tlawakgo tuku wan xTachuwin Dios, Biblia; wata tlakg lakgatikgo xtamasiykan chu xtalismaninkan latamanin. Pero Jehová ni lakgati pi “ni namakgantaxtikan xlimapakgsin” (kalikgalhtawakga Marcos 7:9). Pero akinin lu makgapaxuwayaw akxni tlawayaw tuku wan Biblia chu makgantaxtiyaw xtastakyaw.
2. ¿La lakaskin Jehová pi nakakninaniyaw?
Xlakata Jehová wa kiMalakatsukinakan, kajwatiya xla lakgchan nakakninaniyaw (Apocalipsis 4:11). Uma wamputun pi kajwatiya xla napaxkiyaw chu nakakninaniyaw chu ni namaklakaskinaw akgtum imagen o ídolo xlakata nakakninaniyaw (kalikgalhtawakga Isaías 42:8).
Kintakakninkan “xasanto xliwanat” xlakata Jehová tlan namakgamakglhtinan (Romanos 12:1). Uma wamputun pi kililatamatkan chuna la Dios lakgati. Akgtum liʼakxilhtit, tiku paxkikgo Jehová kuenta tlawakgo chu kgalhakgaxmatkgo xlimapakgsin xlakata tamakgaxtokgat. Na lakgmakgankgo nixatlan talismanin: ni maklakaskinkgo droga, ni xkulikgo chu ni malakatsalikgo akxni wakgo kuchu.a
3. ¿Tuku xlakata akxtum nakatakakninaniyaw Jehová tiku na kgalhakgaxmatputunkgo?
Kkintamakxtumitkan nema tlawayaw akgatunu semana tlan namalankiyaw «Jehová [...] kcongregación» (Salmo 111:1, 2). Pulaktum la tlan namalankiyaw Dios wa pi nakilhtliniyaw (kalikgalhtawakga Salmo 104:33). Jehová kinkawaniyan pi katamakxtumiw xlakata kinkapaxkiyan chu xla katsi pi umakgolh tamakxtumit nakinkamakgtayayan nalipaxuwayaw latamat putum kilhtamaku. Akxni tamakxtumiyaw, kamakgpuwantiniyaw amakgapitsin chu na kinkamakgpuwantinikgoyan.
TLAKG KALAKPUTSANANIW
Kakatsiniw tuku xlakata Jehová ni lakaskin namaklakaskinaw imágenes xlakata nakakninaniyaw. Kaʼakxilhwi la tlan nakakninaniyaw.
4. Ni kilimaklakaskinatkan imágenes xlakata nakakninaniyaw Dios
¿La katsiyaw pi Dios ni lakgati uma? Kaʼakxilhtit VIDEO chu kalichuwinantit uma:
¿Tuku lalh makgasa akxni israelitas lakpuwankgolh pi tlan xmaklakaskinkgolh ídolo xlakata xkakninanikgolh Jehová?
Lhuwa latamanin lakpuwankgo pi tlakg talakatsuwinikgo Dios akxni maklakaskinkgo imágenes xlakata nakakninanikgo. Pero ¿xlikana kamakgtaya natalakatsuwinikgo Dios? Kalikgalhtawakgatit Éxodo 20:4-6 chu Salmo 106:35, 36 chu kalichuwinantit uma:
¿Tuku imágenes akxilhnita wix pi maklakaskinkgo latamanin?
¿Tuku lakpuwan Jehová akxni maklakaskinkan imágenes?
Chu wix, ¿tuku lakpuwana xlakata maklakaskinkan imágenes?
5. Komo kajwatiya nakakninaniyaw Jehová, nialh kintikaliʼakgskgawikan nixaxlikana tamasiy
Kaʼakxilhwi tuku xlakata akxni kakninaniyaw Jehová chuna la xla lakgati, kinkamakgtayayan nialh nakinkaliʼakgskgawikanan nixaxlikana tamasiy. Kaʼakxilhtit VIDEO.
Kalikgalhtawakgatit Salmo 91:14 chu kalichuwinantit uma:
Komo nalimasiyaniyaw Jehová pi paxkiyaw chu pi kajwatiya kakninaniyaw, ¿tuku wan pi natlawa kimpalakatakan?
6. Kakninaniyaw Dios ktamakxtumit
Akxni kilhtliyaw chu mastayaw kintakgalhtinkan ktamakxtumit, malankiyaw Jehová chu na lamakgpuwantiniyaw chatunu chatunu. Kalikgalhtawakgatit Salmo 22:22 chu kalichuwinantit uma:
¿Lakgatiya takgalhtin nema mastakan ktamakxtumit?
¿Lakkaxwiliputuna akgtum takgalhtin xlakata namastaya ktamakxtumit?
7. Jehová lu lakgati akxni kalitachuwinanaw amakgapitsin tuku katsinimaw
Pulaklhuwa la tlan nakalitachuwinanaw amakgapitsin tuku masiya Biblia. Kalikgalhtawakgatit Salmo 9:1 chu 34:1 chu kalichuwinantit uma:
Xliputum tuku katsininita xlakata Biblia, ¿tuku kalitachuwinamputuna amakgapitsin?
MAKGAPITSIN WANKGO: «Ni lu xlakaskinka la nakakninaniyaw Dios, tuku xlakaskinka wa pi tlan nalikatsiyaw».
¿Tuku lakpuwana wix?
TUKU KATSINIW
Makgapaxuwayaw kiMalakatsukinakan akxni kajwatiya xla kakninaniyaw, akxni malankiyaw ktamakxtumit xalak congregación chu akxni kalitachuwinanaw amakgapitsin tuku katsininitaw.
¿Tuku xkgalhtinanti?
¿Tuku nakinkamakgtayayan nakatsiyaw la lakaskin Dios nakakninaniyaw?
¿Tuku xlakata kajwatiya Jehová kilikakninanitkan?
¿Tuku xlakata akxtum nakatakakninaniyaw Jehová tiku na kgalhakgaxmatputunkgo?
TLAKG KAKATSINI
Kbiografía nema wanikan «Nialh kkaskujnani ídolos», kaʼakxilhti tuku makgtayalh chatum puskat nialh nakakninani ídolos.
«Biblia kalakgpalinilh xlatamatkan» (Artículo xla Makatsinina)
Kaʼakxilhti tuku tlan natlawaya xlakata namastaya mintakgalhtin ktamakxtumit.
«Kamalankiw Jehová ktamakxtumit» (Makatsinina, enero kata 2019)
Kaʼakxilhti la tamakxtumit makgtayalh chatum kgawasa maski lu tuwa xmakgkatsi naʼan.
Lhuwa latamanin lakpuwankgo pi kstalaninanin Cristo xlimaklakaskinatkan cruz, ¿pero tuku xlakata ni kilimaklakaskinatkan?
«¿Tuku xlakata xtatayananin Jehová ni limaklakaskinkgo cruz?» (Artículo xalak jw.org)
a Uma tlakg nalichuwinanaw kʼatanu takgalhtawakga.