TAKGALHTAWAKGA 15
¿Tiku Jesús?
Jesús, chatum tiku latamalh makgasa nema lu lichuwinankgo latamanin. Pero lhuwa tiku kajwatiya katsikgo tuku wanikan chu tanu tanu tuku lakpuwankgo xlakata tiku Jesús. ¿Tuku masiya Biblia xlakata Jesús?
1. ¿Tiku Jesús?
Jesús chatum tliwakga espíritu nema lama kʼakgapun. Wa xapulana tiku Jehová malakatsukilh nixawa amakgapitsin tuku anan. Wa xlakata limapakuwikan «xapulana kam xliputum tamalakatsukin» (Colosenses 1:15). Biblia wan pi Jesús wa «xachastum xKgawasa» Dios, xlakata akxni Jehová malakatsukilh Jesús, niti makgtayalh (Juan 3:16). Jesús akxtum taskujli xTlat, Jehová, makgtayalh namalakatsuki putum tuku anan (kalikgalhtawakga Proverbios 8:30). Chu asta la uku, chuntiya lu tlan latalalin. Jesús wa «Tachuwin», uma wamputun pi wa makatsininan tuku xTlat lakaskin katlawaka (Juan 1:14).
2. ¿Tuku xlakata Jesús milh kKatiyatni?
Titaxtunita 2,000 kata, Jehová maklakaskilh xʼespíritu santo xlakata natlawa akgtum milagro: tlawalh pi Jesús, chatum tliwakga ángel, kstakli kxpan chatum tsumat nema xwanikan María. Chuna, Jesús lakachilh la chatum lataman (kalikgalhtawakga Lucas 1:34, 35). Xla milh kKatiyatni xlakata Cristo o Mesías xlitaxtulh nema xmalaknukanit, chu na milh xlakata nakalakgmaxtu latamanin.a Putum tuku xlichuwinankanit xpalakata Mesías kgantaxtulh kxlatamat Jesús. Uma kamakgtayalh latamanin nakatsikgo pi Jesús wa «Cristo, xKgawasa xastakna Dios» (Mateo 16:16).
3. ¿Niku wi Jesús la uku?
Akxni Jesús nilh, malakastakwanika la chatum espíritu chu taspitli kʼakgapun. Anta Dios «wililh putum tuku anan kxtampin xtantun chu xʼakgxakga tlawalh putum tuku anan» (Efesios 1:22). La uku Jesús kgalhi lhuwa limapakgsin. Kajwatiya Jehová tlakg tliwakga nixawa xla.
TLAKG KALAKPUTSANANIW
Tlakg kakatsiniw tiku Jesús chu tuku xlakata lu xlakaskinka nalakgapasaw.
4. Jesús ni wa Dios tiku kgalhi putum litliwakga
Maski Jesús lama kʼakgapun chu kgalhi litliwakga, Biblia wan pi kgalhakgaxmata Jehová, tiku xDios chu xTlat. ¿Tuku xlakata chuna wanaw? Kaʼakxilhtit VIDEO xlakata nakatsiyatit pi Jesús ni xtachuna Dios tiku kgalhi putum litliwakga.
Umakgolh textos nakinkamakgtayayan naʼakgatekgsaw pi Jehová chu Jesús ni lakxtum. Kalikgalhtawakgatit akgatunu texto chu kalichuwinantit uma:
Kalikgalhtawakgatit Lucas 1:30-32.
¿Tuku wa ángel xlakata Jesús?
Kalikgalhtawakgatit Mateo 3:16, 17.
¿Tuku takgaxmatli kʼakgapun akxni tamunulh Jesús?
¿Tiku lakpuwana wix pi xchuwinama?
Kalikgalhtawakgatit Juan 14:28.
¿Tiku tlakg kgalhi limapakgsin? ¿Chatum tlat o xakgawasa?
Jesús xlimapakuwi Jehová Tlat, ¿tuku kinkamasiyaniyan uma?
Kalikgalhtawakgatit Juan 12:49.
¿Xlakpuwan Jesús pi xla xtachuna xTlat xwanit? ¿Tuku lakpuwana wix?
5. Anan tuku limasiya pi Jesús wa Mesías
Biblia lichuwinan lhuwa tuku xʼama la nema xʼama kamakgtaya latamanin xkatsikgolh tiku Mesías, uma kilhchanima tiku Dios xlaksaknit xlakata xkalakgmaxtulh putum latamanin. Kaʼakxilhtit VIDEO nema nakalitachuwinanan tsinu makgapitsi tuku kgantaxtulh kxlatamat Jesús akxni xlama kKatiyatni.
Kalikgalhtawakgatit umakgolh tuku Biblia xlichuwinanit pi xʼama la chu kalichuwinantit uma:
Kalikgalhtawakgatit Miqueas 5:2 xlakata nakatsiyatit niku xʼama lakachin Mesías.b
¿Kgantaxtulh uma tuku xlichuwinankanit akxni lakachilh Jesús? (Mateo 2:1).
Kalikgalhtawakgatit Salmo 34:20 chu Zacarías 12:10 xlakata nakatsiyatit makgapitsi tuku xwankanit xlakata la xʼama niy Mesías.
¿Kgantaxtulh uma tuku xlichuwinankanit? (Juan 19:33-37).
¿Lakpuwana wix pi wa Jesús lakkaxwililh putum uma tuku akgspulalh?
¿Tuku masiyaniyan putum uma xpalakata Jesús?
6. Lu nalitamakgtayayaw komo nalakgapasaw Jesús
Biblia masiya pi lu xlakaskinka nalakgapasaw Jesús chu nakatsiyaw tuku Dios lakgayawanit natlawa. Kalikgalhtawakgatit Juan 14:6 chu 17:3 chu kalichuwinantit uma:
¿Tuku xlakata lu xlakaskinka nalakgapasaw Jesús?
Jesús kinkamakgtayayan xlakata tlan xʼamigos Dios nawanaw chu masiyalh tuku xaxlikana xlakata Jehová. Nachuna, Jesús kinkamakgtayayan nakgalhiyaw latamat nema nikxni sputa
MAKGAPITSIN WANKGO: «Xtatayananin Jehová ni kanajlanikgo Jesúcristo».
¿Tuku xwanti wix?
TUKU KATSINIW
Jesús chatum tliwakga espíritu, xKgawasa Dios chu Mesías.
¿Tuku xkgalhtinanti?
¿Tuku xlakata Jesús lilakgapaskan «xapulana kam xliputum tamalakatsukin»?
¿Tuku xtlawa Jesús akxni nina xmin kKatiyatni?
¿Tuku kinkamasiyaniyan pi Jesús wa Mesías?
TLAKG KAKATSINI
Kaʼakxilhti atanu tuku limasiya pi Jesús wa Mesías.
«¿Limasiya tuku xlichuwinanit Biblia pi xʼama la pi Jesús wa Mesías xwanit?» (Artículo xalak jw.org)
Kaʼakxilhti tuku wamputun Biblia akxni wan pi Dios xtlat Jesús.
«¿Tuku xlakata wankan pi Jesús xKgawasa Dios?» (Artículo xalak jw.org)
Kaʼakxilhti tuku xlakata wanaw pi Biblia ni lichuwinan trinidad.
Kaʼakxilhti la talakgpalilh xlatamat chatum puskat akxni katsilh tuku masiya Biblia xlakata Jesús.
«Chatum judía lichuwinan tuku xlakata lakgpalilh xtakanajla» (¡Despertad!, mayo kata 2013)
a Ktakgalhtawakga 26 chu 27 lichuwinan tuku xlakata xtalakaskin pi xkalakgmaxtuka latamanin chu la Jesús kinkalakgmaxtun.