¿Kinkamakgtayakgoyan natalakatsuwiniyaw Dios putum takanajla o religión?

Biblia kinkamaxkiyan xatakgalhtin

Ni, ni putum takanajla o religión lakxtum. Biblia kinkalitachuwinanan makgapitsi liʼakxilhtit xla takaknin nema Dios ni lakgati. Pulaktiy tapitsinit.

Pulaktum: Tiku kakninanikgo nixaxlikana dioses

Biblia wan pi nitu litaxtu kakninanikan nixaxlikana dioses (Jeremías 10:3-5; 16:19, 20). Jehováa kawanilh xamakgan kachikin Israel: «Ni milikgalhit atanu dioses» (Éxodo 20:3, 23; 23:24). Akxni israelitas kakninanikgolh atanu dioses, «Jehová lu kasitsinilh» (Números 25:3; Levítico 20:2; Jueces 2:13, 14).

Dios chuntiya nitlan akxilha akxni kakninanikan tiku «kalimapakuwikan pi mat dioses» (1 Corintios 8:5, 6; Gálatas 4:8). Tiku kakninaniputunkgo Jehová, xla kaskini pi ni kamakgtanukgolh knixaxlikana takanajla. Biblia wan: «Kataxtutit kxlakgstipankan chu kakatamakgatlinitit» (2 Corintios 6:14-17). ¿Xmastalh Dios uma limapakgsin komo putum takanajla lakxtum xwa chu putum xkinkamakgtayakgon natalakatsuwiniyaw Dios?

Pulaktiy: Tiku kakninanikgo Dios pero nichuna la xla lakgati

Jehová kalakgmakgalh israelitas akxni tsukukgolh tlawakgo talismanin nema xkalikakninanikan nixaxlikana dioses chu lakxtum tatlawakgolh xaxlikana tuku nixaxlikana (Éxodo 32:8; Deuteronomio 12:2-4). Jesús kawanilh xpulalinanin takanajla xalak xkilhtamaku pi nitlan la xkakninanimakgo Dios. Xlakan kaj xlimasiyakgo pi xkakninanikgo Dios, pero lakgaputiyunanin xwankgonit chu nialh xmakgantaxtimakgo «tuku tlakg xlakaskinka nema min kLimapakgsin [...]: tuku xaʼakgstitum, talakgalhaman chu ni makgxtakgnankan» (Mateo 23:23).

La uku, kajwatiya akgtum takanajla nema kinkamakgtayayan natalakatsuwiniyaw Dios. Uma takanajla takilhtinit kBiblia (Juan 4:24; 17:17; 2 Timoteo 3:16, 17). Putum takanajla nema masiyakgo tuku ni min kBiblia, tlawakgo pi latamanin natamakgatlinikgo Dios. Lhuwa takanajla wankgo pi Biblia lichuwinan Trinidad, pi kilistaknakan ni niy chu pi anan pupatin (Marcos 7:7, 8).

Dios na ni lakgati takanajla nema lakgaputiyunankgo (Tito 1:16). Xlakata akgtum takanajla nakinkamakgtayayan natalakatsuwiniyaw Dios, ni kajwatiya talakaskin nakinkamasiyaniyan makgapitsi talismanin; wata nalitasiya pi lakgpalima kilatamatkan chali chali. Akgtum liʼakxilhtit, Biblia wan: «Komo wi tiku lakpuwan pi kakninani Dios pero ni katsini mapakgsi ksimakgat, akgskgawima xnaku chu takaknin nema maxkima Dios nitu litaxtu. Wa uma takaknin nema kinTlatkan Dios akxilha pi skulunku chu ni taxkajwaninit: nakakuentajtlawayaw akxni titaxtumakgolh tuku tuwa tiku ni kgalhikgo xnatlatnikan chu tiku nikgonita xchixkukan chu ni nalixkajwananaw kakilhtamaku» (Santiago 1:26, 27).