¿La tlan chuntiya namatliwakglhaw tapaxkit nema lakgalhiniyaw?

1, 2. 1) ¿Tuku xlakata apóstol Pablo wa pi tapaxkit «tlakg xlakaskinka»? 2) ¿Tuku takgalhskinin nalichuwinanaw?

AKXNI apóstol Pablo xlichuwinama takanajla, takgalhkgalhin chu tapaxkit, xaʼawatiya wa: «Tuku tlakg xlakaskinka wa tapaxkit» (1 Cor. 13:13). ¿Tuku xlakata chuna wa? Xlakata kkilhtamaku nema aku mima, nialh katitalakaskilh nakanajlayaw pi Dios nalimin xasasti kakilhtamaku, xlakata uma tuku xkgalhkgalhimaw kgantaxtunita nawan. Pero ankgalhin natalakaskin napaxkiyaw Jehová chu nakapaxkiyaw latamanin. Uma tapaxkit chuntiya nastaka putum kilhtamaku.

² Xlakata ankgalhin talakaskin nalimasiyayaw tapaxkit, kalilakpuwaw uma akgtutu takgalhskinin. Pulana, ¿tuku xlakata talakaskin nalapaxkiyaw? Xlipulaktiy, ¿la nalimasiyayaw pi lapaxkiyaw? Chu xlipulaktutu, ¿la tlan chuntiya namatliwakglhaw tapaxkit nema lakgalhiniyaw?

¿TUKU XLAKATA TALAKASKIN NALAPAXKIYAW?

3. ¿Tuku xlakata xlakaskinka nalapaxkiyaw?

³ ¿Tuku xlakata xlakaskinka nalapaxkiyaw? Pulaktum, wa pi akxni chuna tlawayaw limasiyayaw pi xaxlikana kstalaninanin Cristo akinin. Jesús kawanilh xʼapóstoles: «Wa uma tuku nalitalakgapasatit pi wixin kintamakgalhtawakgen: komo lapaxkiyatit» (Juan 13:35). Nachuna, tapaxkit tlawa pi akxtum natawilayaw. Wa xlakata Pablo wa pi tapaxkit «tlawa pi latamanin makxtum nalakgo» (Col. 3:14). Anan atanu tuku xlakata lu xlakaskinka nalapaxkiyaw. Apóstol Juan katsokgnanilh xnatalan: «Tiku paxki Dios na kapaxkilh xtala» (1 Juan 4:21). Wa xlakata, akxni kapaxkiyaw kinatalankan, limasiyayaw pi na paxkiyaw Jehová.

4, 5. Kalichuwinanti akgtum liʼakxilhtit nema limasiya pi akxni kapaxkiyaw kinatalankan limasiyamaw pi paxkiyaw Dios.

⁴ ¿Tuku xlakata wanaw pi akxni kapaxkiyaw kinatalankan limasiyamaw pi paxkiyaw Dios? Xlakata naʼakgatekgsaw, kalilakpuwaw la putuminika kimaknikan limasiya la wi kinakujkan. Chatum makuchina katsi la wi xnaku chatum lataman akxni makgkatsini kxmakan la xlitliwakga skujma xnaku. ¿Tuku kinkamasiyaniyan uma liʼakxilhtit?

⁵ Xtachuna la chatum makuchina katsi la wi xnaku chatum lataman akxni akxilha pi tliwakga o ni tliwakga skujma xnaku, akinin na tlan nakatsiyaw la xlitliwakga tapaxkit nema kgalhiniyaw Jehová akxni naʼakxilhaw la xlilhuwa kapaxkiyaw kinatalankan. Komo naʼakxilhaw pi tapaxkit nema kakgalhiniyaw kinatalankan taxlajwanima, max tapaxkit nema kgalhiniyaw Jehová na taxlajwaninit. Pero komo lismaninitaw nakalimasiyaniyaw kinatalankan pi kapaxkiyaw, limasiya pi tapaxkit nema kgalhiniyaw Jehová lu tliwakga.

6. Komo tapaxkit nema kakgalhiniyaw kinatalankan taxlajwanima, ¿tuku xlakata xlilat nalilakgaputsayaw? (1 Juan 4:​7-9, 11).

⁶ Komo tapaxkit nema kakgalhiniyaw kinatalankan taxlajwanima, ¿tuku xlakata xlilat nalilakgaputsayaw? Xlakata uma wamputun pi nialh lu tlan talalinaw Jehová. Chuna limasiya tuku wa apóstol Juan: «Tiku ni paxki xtala, tiku akxilha, nila paxki Dios, tiku nila akxilha» (1 Juan 4:20). ¿Tuku kinkamasiyaniyan umakgolh tachuwin? Pi kajwatiya tlan namakgapaxuwayaw Jehová komo lapaxkiyaw (kalikgalhtawakga 1 Juan 4:​7-9, 11).

¿LA NALIMASIYAYAW PI LAPAXKIYAW?

7, 8. ¿La tlan nalimasiyayaw pi lapaxkiyaw?

⁷ Biblia makglhuwa kinkalimapakgsiyan: «Kalapaxkitit minchatunukan» (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Pero tapaxkit tsukuyacha kkinakujkan, niku nitila akxilha. Wa xlakata, ¿la tlan nalimasiyayaw tapaxkit xlakata amakgapitsin naʼakxilhkgo tuku wi kkinakujkan? Tlan nalimasiyayaw akxni wi tuku tlawayaw chu akxni wi tuku wanaw.

⁸ Pulaklhuwa la tlan nalimasiyayaw pi kapaxkiyaw kinatalankan. Biblia lichuwinan makgapitsi liʼakxilhtit. «Nalawaniyatit tuku xaxlikana» (Zac. 8:16). «Tlan kalatalalipitit minchatunukan» (Mar. 9:50). «Wixin pulana kamasiyatit pi kamaxkiyatit kakni amakgapitsin» (Rom. 12:10). «Xatapaxuwan kalamakgamakglhtinantit» (Rom. 15:7). «Chuntiya […] lu kalatapatiputuntit» (Col. 3:13). «Chatunu chatunu chuntiya kalalipinitit mintakukakan» (Gál. 6:2). «Chuntiya tlan kalalimamakgkatsinitit […] tachuwin» (1 Tes. 4:18). «Chuntiya […] kalamakgtayatit» (1 Tes. 5:11). «Kalapalakaskintit kʼoración» (Sant. 5:16).

9. ¿Tuku xlakata wanaw pi akxni tlan kamamakgkatsiniyaw amakgapitsin kalimasiyaniyaw pi kapaxkiyaw? (Na kaʼakxilhti dibujos).

⁹ Tlakg kalichuwinanaw pulaktum la tlan nalimasiyayaw tapaxkit nema lichuwinan párrafo 8. Pablo wa pi chuntiya tlan kalamamakgkatsiniw. ¿Tuku xlakata wanaw pi akxni tlan kamamakgkatsiniyaw amakgapitsin kalimasiyanimaw pi kapaxkiyaw? Maktum libro nema lichuwinan xlakata Biblia, wan pi tachuwin xagriego nema Pablo maklakaskilh «tlan mamakgkatsininankan» kilhchanima «pi natayaya kxpaxtun chatum lataman xlakata namatliwakglha akxni titaxtuma tuku tuwa». Wa xlakata, akxni tlan mamakgkatsiniyaw chatum tala tiku patinama, makgtayayaw xlakata chuntiya natlawan ktiji nema linan klatamat. Makgatunu akxni chatum tala lipuwama chu akinin tatasayaw chu ni makgxtakgaw, limasiyanimaw pi paxkiyaw (2 Cor. 7:​6, 7, 13).

10. ¿Tuku xlakata wanaw pi xlakata tlan nakamamakgkatsiniyaw amakgapitsin talakaskin nakalakgalhamanaw?

¹⁰ Xlakata tlan nakamamakgkatsiniyaw amakgapitsin, talakaskin nakalakgalhamanaw. ¿Tuku xlakata chuna wanaw? Xlakata akxni chatum lataman lakgalhaman tiku patinama, tlan mamakgkatsiniputun chu wi tuku tlawaputun xlakata namakgtaya. Wa xlakata, pulana wi tiku lakgalhamanaw chu alistalh uma tuku makgkatsiyaw kinkamakgpuwantiniyan tlan namamakgkatsiniyaw. Pablo lichuwinalh pi talakgalhaman nema Jehová kakgalhini latamanin, maʼakgpuwantini tlan nakamamakgkatsini. Xla wa pi Jehová «Tlat tiku kgalhi lhuwa talakgalhaman chu Dios tiku tlan kamamakgkatsini latamanin» (2 Cor. 1:3) Wa xlakata, komo xla «Tlat tiku kgalhi lhuwa talakgalhaman» chu «tiku tlan kamamakgkatsini latamanin», tlan kamamakgkatsini putum tiku titaxtumakgo tuku tuwa (2 Cor. 1:4). Xtachuna la chuchut nema taxtu kʼakgtum taxtunu tlan kamamakgkatsini latamanin akxni kgalhputimakgo, Jehová makaksa chu tlan kamamakgkatsini xnakujkan tiku patinamakgo. ¿Tuku nakinkamakgtayayan nakalakgalhamanaw chu tlan nakamamakgkatsiniyaw amakgapitsin chuna la tlawa Jehová? Talakaskin nakgalhiyaw tayat nema nakinkamakgtayayan tlan nakamamakgkatsiniyaw amakgapitsin. Kaʼakxilhwi makgapitsi umakgolh tayat.

11. Chuna la wan Colosenses 3:12 chu 1 Pedro 3:​8, ¿tuku nakinkamakgtayayan nakapaxkiyaw chu tlan nakamamakgkatsiniyaw amakgapitsin?

¹¹ ¿Tuku nakinkamakgtayayan chuntiya nalapaxkiyaw chu tlan nakamamakgkatsiniyaw amakgapitsin chali chali? Tlan chuna natlawayaw akxni nalimasiyayaw pi makgkatsiyaw tuku makgkatsikgo amakgapitsin, nakapaxkiyaw xtachuna la kapaxkiyaw kifamiliajkan, chu tlan nakalikatsiniyaw (kalikgalhtawakga Colosenses 3:12; 1 Pedro 3:8). Akxni lismaniyaw kalakgalhamanaw amakgapitsin chu kgalhiyaw atanu laktlan tayat, tlan kamamakgkatsiniputunaw tiku titaxtukgo tuku tuwa. Jesús chuna lichuwinalh: «Xlakata tuku litsama naku wa tuku taxtuyacha kkilhni. Chixku tiku tlan likatsi lichuwinan tuku laktlan, xlakata xnaku litsama tuku laktlan» (Mat. 12:​34, 35). Chuna la akxilhwi, akxni tlan kamamakgkatsiniyaw kinatalankan kalimasiyaniyaw pi kapaxkiyaw.

¿LA TLAN CHUNTIYA NAMATLIWAKGLHAW TAPAXKIT NEMA LAKGALHINIYAW?

12. 1) ¿Tuku kuenta kilitlawatkan? 2) ¿Tuku takgalhskinin nakgalhtiyaw?

¹² Kimputumkan kgalhakgaxmatputunaw uma limapakgsin: «Chuntiya kalapaxkiw chatunu chatunu» (1 Juan 4:7). Pero na talakaskin pi nalakapastakaw tuku wa Jesús pi xʼama la: «Tlakg lhuwa tiku nialh katilapaxkikgolh» (Mat. 24:12). Jesús ni xwamputun pi kstalaninanin nialh xʼamakgo lapaxkikgo. Maski chuna, kuenta kilitlawatkan pi ni nakinkapasayan xtayat uma kakilhtamaku chu nialh napaxkinanaw. Wa xlakata, kaʼakxilhwi xatakgalhtin uma takgalhskinin: ¿tuku nakinkamakgtayayan nakatsiyaw komo tapaxkit nema kakgalhiniyaw kinatalankan chuntiya tliwakga?

13. ¿Tuku kilhtamaku litasiya komo xlikana kapaxkiyaw kinatalankan?

¹³ Pulaktum la tlan nakatsiyaw komo tapaxkit nema kakgalhiniyaw kinatalankan chuntiya tliwakga, wa akxni naʼakxilhaw tuku tlawayaw akxni wi tuku titaxtuyaw kkilatamatkan (2 Cor. 8:8). Pulaktum wa tuku lichuwinalh apóstol Pedro: «Lu kalapaxkitit chatunu chatunu, xlakata tiku paxkinan putum kilhtamaku tapatiputun achatum» (1 Ped. 4:8). Litasiya la xlilhuwa kapaxkiyaw kinatalankan akxni wi tuku nitlan tlawakgo o akxni nitlan kinkamamakgkatsinikgoyan.

14. Chuna la wan 1 Pedro 4:​8, ¿la xliwanat tapaxkit nema kakgalhiniyaw amakgapitsin? Kalichuwinanti akgtum liʼakxilhtit.

¹⁴ Tlakg kalichuwinaw tuku wa Pedro. Tuku litsuku versículo 8 kinkawaniyan la xliwanat tapaxkit nema kilikgalhitkan: «Lu kalapaxkitit». Tachuwin xagriego nema Pedro maklakaskilh akxni wa «lu kalapaxkitit» kilhchanima «pi tlan talhmani». Xlipulaktiy tuku lichuwinan versículo, wa tuku kitaxtu akxni lu paxkinanaw: tlawa pi natapatinamputunaw. Ktachuwin xagriego nema matitaxtikan «tapatinankan» kilhchanima pi wi tuku litlapanankan. Xlakata tlan naʼakgatekgsaw, kawiliw akgtum liʼakxilhtit: kalilakpuwaw pi tlan lichipayaw kimakankan tapaxkit nema kakgalhiniyaw kinatalankan xtachuna la titsu tela nema taxtonkga, chu tlan naxtonkgaw xlakata tlan naliʼakgtlapayaw, ni kaj akgtum chu ni kaj akgtiy talakgalhin, wata lhuwa talakgalhin. Xtachuna la titsu tela tlan akgtlapa tuku xkajwanit, tapaxkit tlan naʼakgtlapa putum tuku nitlan kinkatlawanikgoyan kinatalankan.

15. ¿Tuku tlawayaw akxni lu kapaxkiyaw amakgapitsin? (Colosenses 3:13).

¹⁵ Tapaxkit nema kakgalhiniyaw kinatalankan lu lanka xliwanat, chu asta xlitlawat pi nakatapatiyaw tuku nitlan kinkatlawanikgoyan asta maski tuwa namakgkatsiyaw chuna natlawayaw (kalikgalhtawakga Colosenses 3:13). Akxni katapatiyaw amakgapitsin, limasiyayaw pi kintapaxkitkan lu tliwakga chu makgapaxuwaputunaw Jehová. ¿Tuku atanu nakinkamakgtayayan nakatapatiyaw amakgapitsin tuku nitlan kinkatlawanikgoyan chu tuku nitlan kinkalimamakgkatsinikgoyan?

16, 17. ¿Tuku atanu nakinkamakgtayayan ni wa kuenta natlawayaw tuku nitlan kinkatlawanikgoyan amakgapitsin? Kalichuwinanti akgtum liʼakxilhtit. (Na kaʼakxilhti dibujos).

¹⁶ Wa kalilakpuwaw tuku tlan tlawakgo amakgapitsin, ni wa tuku nitlan tlawakgo. Kalilakpuwanti pi wix katawila makgapitsi natalan chu lakpuwanatit natamakxtuyatit maktum foto xlakata nalakapastakatit uma kilhtamaku. Xlakata nakgalhiya tlakg xatlan foto, maktutu tamakxtuya. Pero akxilha pi kmaktum foto chatum tala nitlan taxtulh. ¿Tuku natlawaya? Naxapaya uma foto chu kajwatiya nakatatamakgxtakga maktiy fotos niku putum lakalitsimakgo.

¹⁷ Fotos nema makiyaw xtachuna tuku makiyaw kkintalakapastaknikan. Ankgalhin wa lakapastakaw tuku tlan katatlawaw kinatalankan o tuku akxtum lipaxuwaw. Pero kalilakpuwaw pi min kilhtamaku chatum tala wan o tlawa tuku nitlan kinkamamakgkatsiniyan. ¿Tuku natlawayaw? ¿Naxapayaw uma tuku nitlan kinkatlawanin xtachuna la kxapaw nixatlan foto? (Prov. 19:11; Efes. 4:32). Xlakata anan tuku tlakg lhuwa akxtum tatlawanitaw uma kintalakan nixawa tuku makgtum nitlan tlawalh, tlakg tlan nawan komo naxapayaw uma tuku nitlan kinkamamakgkatsinin. Chu kajwatiya namakiyaw tuku akxtum tatlawaw kintalakan «xtachuna la xalakstlan fotos».

¿TUKU XLAKATA LU XLAKASKINKA TAPAXKIT LA UKU?

18. ¿Tuku lichuwinanitaw kʼuma artículo?

¹⁸ ¿Tuku xlakata lu xlakaskinka pi tapaxkit nema lakgalhiniyaw chuntiya tliwakga nawan? Chuna la akxilhwi, xlakata akxni kalimasiyaniyaw tapaxkit kinatalankan na limasiyamaw pi paxkiyaw Jehová. ¿Tuku tlan natlawayaw xlakata tlan nalimasiyayaw pi kapaxkiyaw kinatalankan? Pulaktum tuku tlan natlawayaw wa pi tlan nakamamakgkatsiniyaw. Chu xlakata chuntiya natlawayaw uma, talakaskin nakalakgalhamanaw. ¿La tlan chuntiya namatliwakglhaw tapaxkit nema lakgalhiniyaw? Lu naliskujaw nakatapatiyaw amakgapitsin tuku nitlan kinkatlawanikgoyan.

19. ¿Tuku xlakata lu xlakaskinka nalalimasiyaniyaw tapaxkit la uku?

¹⁹ ¿Tuku xlakata lu xlakaskinka nalalimasiyaniyaw tapaxkit la uku? Kaʼakxilhwi tuku wa Pedro: «Talakatsuwinit xlisputni putum tuku anan. Wa xlakata […] lu kalapaxkitit chatunu chatunu» (1 Ped. 4:​7, 8). ¿Tuku nala chuna la natalakatsuwitilha xlisputni uma kakilhtamaku? Akxni Jesús xlichuwinama tuku xʼama kaʼakgspula xtamakgalhtawakgen, wa: «Ni katikaʼakxilhputunkgon putum kachikinin kaj xlakata kintukuwani» (Mat. 24:9). Xlakata chuntiya naskujnaniyaw Jehová maski latamanin ni kinkaʼakxilhputunkgoyan, talakaskin makxtum natawilayaw. Satanás kinkamapapitsiputunan, pero nila chuna katitlawalh komo akinin chuntiya nalalimasiyaniyaw tapaxkit, xlakata tapaxkit «tlawa pi latamanin makxtum nalakgo» (Col. 3:14; Filip. 2:​1, 2).