LECCIÓN 10

Kalakgpalitilha la chuwinana

Proverbios 8:4, 7

TUKU NATALICHUWINAN: Kalakgpali la xlipixlanka, la xlilakapala chu la takgaxmata akxni chuwinana xlakata liwana nataʼakgatekgsa tuku masiyapat chu wi tuku namakgkatsikgo tiku kgaxmatnimakgon.

LA NATLAWAYA

Kalakgpalitilha la xlipixlanka chuwinana. Tlakg pixlanka kachuwinanti xlakata namasiyaya tuku xlakaskinka chu nakamakgpuwantiniya tiku kgaxmatmakgolh. Nachuna katlawa akxni likgalhtawakgaya textos xalak Biblia nema lichuwinan tuku nalimalakgaxokgenan Dios. Tlakg pixtsu kachuwinanti xlakata tiku kgaxmatmakgo nakatsiputunkgo tuku stala o xlakata nalimasiyaya tapekua o talipuwan.

Ni xpuntsunin pixlanka kachuwinanti xlakata tiku kgaxmatnimakgon ni nalakpuwankgo pi kakilhnipat. Ni kamalakatsali la chuwinana xlakata ni kaj wix lu xlakaskinka naʼakxilhkana.
Kalakgpalitilha la takgaxmata akxni chuwinana. Komo tlan chuna tlawakan kmintachuwin, tlakg akgapixlatata kachuwinanti xlakata nalimasiyaya tapaxuwan o xlakata namasiyaya la xlilanka o xlimakgat tuku lichuwinampat. Tlakg akgapixlanka kachuwinanti xlakata nalimasiyaya talipuwan o talakgaputsit.
Kalakgpalitilha la xlilakapala chuwinana. Tlakg lakapala kachuwinanti xlakata nalimasiyaya tuku makgkatsiya. Tlakg lakatsuku kachuwinanti akxni lichuwinana tuku xlakaskinka.

Xlakata ni nakamakgapekuana tiku kgaxmatnimakgon, ni kaj lakapala kalakgpali la chuwinana. Ni lakapala kachuwinanti xlakata ni nalakgpaliya akgtum tachuwin.