TAKGALHTAWAKGA 50
¿La tlan xatapaxuwan natawila mifamilia? (Pulaktiy)
Kamanan akgtum xtamaskiwin Jehová chu xla lakaskin pi natlatni lu tlan kamakgtakgalhkgolh xkamanankan. Wa xlakata kamaxki laktlan tastakyaw xlakata chuna natlawakgo. Chu na kamaxki tastakyaw kamanan xlakata namakgtayanankgo tlan natawila familia.
1. ¿Tuku tastakyaw kamaxki Jehová natlatni?
Jehová lakaskin pi natlatni kapaxkikgolh xkamanankan chu kalimaxtukgolh kilhtamaku xlakata akxtum nakatatawilakgo. Na lakaskin pi kamakgtakgalhkgolh xlakata ni nakaʼakgspula tuku nitlan chu kakalistakyawakgolh Biblia (Proverbios 1:8). Akxni kalichuwinankan kamanan, Dios kawani tiku pulalinkgo familia: «Kakamakgastaktit chuna la wi [...] xlimapakgsin Jehová» (kalikgalhtawakga Efesios 6:4). Jehová lu lipaxuwa akxni natlatni kalimakgastakkgo xkamanankan tastakyaw nema min kBiblia chu ni mastakgo talakaskin pi atanu tiku natlawa uma taskujut nema kalakgchan.
2. ¿Tuku tastakyaw kamaxki Jehová kamanan?
Jehová kawani kamanan: «Kakgalhakgaxpattit minatlatnikan» (kalikgalhtawakga Colosenses 3:20). Komo kamanan namaxkikgo kakni chu nakgalhakgaxmatkgo xnatlatnikan, lu nakamakgapaxuwakgo chu na namakgapaxuwakgo Jehová (Proverbios 23:22-25). Jesús wililh akgtum lu xatlan liʼakxilhtit akxni aktsujku xwanit; maski xla ni xkgalhi talakgalhin, xkakgalhakgaxmata chu xkamaxki kakni xnatlatni, tiku xkgalhikgo talakgalhin (Lucas 2:51, 52).
3. ¿Tuku xlitlawatkan familia xlakata tlakg tlan natalalinkgo Jehová?
Komo wix kgalhiya kamanan, max lakaskina pi kapaxkikgolh Jehová chuna la wix paxkiya. Xlakata tlan nakamakgtayaya, katlawa uma tastakyaw xalak Biblia: “Nakamasiyaniya [xtachuwin Jehová] minkamanan chu nakalitachuwinana akxni natawilaya kminchik chu akxni lapat ktiji” (Deuteronomio 6:7). Nakamasiyaniya kilhchanima pi makglhuwa nakamalakapastakaya. Max wix katsiyata pi namin kilhtamaku natalakaskin pi makglhuwa wi tuku nakawaniparaya minkamanan xlakata nalakapastakkgo. Wa xlakata uma texto wamputun pi wix milimaxtut kilhtamaku xlakata chali chali nakalitachuwinana Jehová minkamanan. Nachuna, putum tiku xalak familia xlimaxtutkan kilhtamaku xlakata akxtum nakakninanikgo Dios akgatunu semana. Chu maski ni kgalhiya kamanan, lu namakgtayayan komo nalimaxtuya kilhtamaku akgatunu semana xlakata nalakputsananiya Biblia.
TLAKG KALAKPUTSANANIW
Kaʼakxilhwi makgapitsi tastakyaw nema lu kamakgtaya familia xlakata xatapaxuwan chu tlan natawilakgo.
4. Kalimasiya tapaxkit akxni nakastakyawaya minkamanan
Kastakyawakan kamanan max lu tuwa. ¿La tlan namakgtayayan Biblia? Kalikgalhtawakgatit Santiago 1:19, 20 chu kalichuwinantit uma:
¿Tuku xlitlawatkan natlatni xlakata nakalimasiyanikgo tapaxkit xkamanankan akxni nakatachuwinankgo?
¿Tuku xlakata chatum tlat nikxni xlistakyawat xkamanan akxni sitsinit?a
5. Kakakuentajtlawa minkamanan
Xlakata nakakuentajtlawaya minkamanan lu xlakaskinka nakalitachuwinana chatunu chatunu tuku kilhchanima talakgxtumit. Xlikana, max tuwa namakgkatsiya o namaxanana. Kaʼakxilhtit VIDEO chu kalichuwinantit uma:
¿Tuku xlakata makgapitsi natlatni tuwa makgkatsikgo nakalitachuwinankgo xkamanankan tuku kilhchanima talakgxtumit?
¿Tuku kamakgtayanit makgapitsi natlatni xlakata nakalitachuwinankgo xkamanankan tuku kilhchanima talakgxtumit?
Chuna la xlichuwinankanit, kxkakilhtamaku Satanás tlakg talhuwinit tuku nitlan. Kalikgalhtawakgatit 2 Timoteo 3:1, 13 chu kalichuwinantit uma:
Versículo 13 kalichuwinan latamanin tiku lixkajni likatsikgo, umakgolh latamanin kalikgamanankgo laktsu kamanan. Wa xlakata lu xlakaskinka pi natlatni nakalitachuwinankgo xkamanankan tuku kilhchanima talakgxtumit. ¿Tuku tlan natlawakgo natlatni xlakata ni nakalikgamanankan xkamanankan?
¿Xkatsiyata?
Xtatayananin Jehová tlawakgo lhuwa likgalhtawakga nema kamakgtaya natlatni nakatsikgo la nakalitachuwinankgo xkamanankan tuku kilhchanima talakgxtumit chu nakamakgtayakgo xlakata niti nakalikgamanan. Wa uma makgapitsi:
Kakuentajtlawatit minkamanan (video)
«¿La tlan nakalitachuwinana minkamanan xlakata talakgxtumit?» (¡Despertad!, núm. 5 kata 2016)
6. Kakamaxki kakni minatlatni
Kamanan xlimaxkitkan kakni xnatlatnikan chu uma tasiya akxni latachuwinan. Kaʼakxilhtit VIDEO chu kalichuwinantit uma:
¿Tuku xlakata talakaskin pi kamanan nakalimasiyanikgo kakni xnatlatnikan akxni katachuwinankgo?
¿La nalimasiyakgo kamanan pi kamaxkikgo kakni xnatlatnikan?
Kalikgalhtawakgatit Proverbios 1:8 chu kalichuwinantit uma:
¿Tuku xlitlawatkan kamanan akxni xnatlatnikan nakawanikgo tuku xlitlawatkan?
7. Kakakninanitit Jehová kfamilia
Akgatunu semana xtatayananin Jehová limaxtukgo kilhtamaku xlakata nakakninanikgo Dios kfamilia. ¿La kakninanikan Dios kfamilia? Kaʼakxilhtit VIDEO chu kalichuwinanti uma:
¿Tuku nakamakgtaya familia xlakata nakakninanikgo Dios akgatunu semana?
¿Tuku xlitlawatkan natlatni xlakata putum familia nalitamakgtayakgo chu nalipaxuwakgo xtakakninkan? (Kaʼakxilhti dibujo nema min niku tsuku uma takgalhtawakga).
Chu wix, ¿lakpuwana pi wi tuku natlawa nila nakakninaniyatit Dios kfamilia? ¿Tuku max chuna natlawa?
Makgasata, Jehová xlakaskin pi putum familias israelitas xlismanikgolh nalichuwinankgo tuku wan tatsokgni. Kalikgalhtawakgatit Deuteronomio 6:6, 7 chu kalichuwinantit uma:
¿La tlan namakgantaxtiya wix uma tastakyaw?
Tuku max tlan natlawaya akxni nakakninaniya Dios kfamilia:
Kalakkaxwilitit tuku nataʼakxilha ktamakxtumit.
Kalikgalhtawakgatit chu kalichuwinantit akgtum liʼakxilhtit xalak Biblia nema nalakgatikgo putum familia.
Komo kgalhiya laktsu kamanan, kamakti o kamaxtuni copia pulaktum tuku min kjw.org nema katlawanikanit laktsu kamanan.
Komo kgalhiya kamanan nema tlakg laklankata, kalaksakti akgtum artículo xlakata kamanan, nema min kjw.org.
Kamatitaxtitit liʼakxilhtit nema talichuwinan kBiblia.
Kaʼakxilhtit chu kalichuwinantit akgtum video nema min kjw.org.
MAKGAPITSIN WANKGO: «Lhuwa taskujut kkgalhiyaw, wa xlakata nila kkamasiyaniyaw kinkamanankan tuku wan Biblia».
¿Tuku lakpuwana wix?
TUKU KATSINIW
Jehová lakaskin pi xanatlatni kakapaxkikgolh xkamanankan, kakastakyawakgolh chu kakakuentajtlawakgolh. Nachuna, lakaskin pi kamanan kakamaxkikgolh kakni xnatlatnikan, kakakgalhakgaxmatkgolh chu makxtum kakakninanikgolh Dios kfamilia.
¿Tuku xkgalhtinanti?
¿Tuku xlitlawatkan natlatni xlakata nakastakyawakgo xkamanankan?
¿La nalimasiyakgo kamanan pi kamaxkikgo kakni xnatlatnikan?
¿Tuku tlan kitaxtu akxni kakninanikan Dios kfamilia akgatunu semana?
TLAKG KAKATSINI
¿Tuku tayat xlikgalhitkan minkamanan la uku nema nakamakgtaya akxni nastakkgo?
“6 lecciones imprescindibles para sus hijos” (¡Despertad!, núm. 2 kata 2019)
Kaʼakxilhti makgapitsi tastakyaw nema nakamakgtaya tiku kakuentajtlawamakgolh xnatlatnikan tiku linkgoya kata.
«¿Lakaskin Dios pi kakakuentajtlawaw kinatlatnikan akxni linkgoya kata?» (Artículo xalak jw.org)
Kaʼakxilhti tuku makgtayalh chatum chixku tlan tlat nalitaxtu maski xapulana ni xkatsi la nakamakgastaka xkamanan.
Jehová kinkamasiyanin la nakkamasiyaniyaw kinkamanankan (5:58)
Kaʼakxilhti tuku xlitlawat chatum tlat xlakata tlakg tlan nakatalalin xkamanan.
«¿Tuku xlitlawat chatum tlat xlakata tlakg tlan nakatalalin xkamanan?» (Artículo xla Makatsinina)
a Akxni Biblia lichuwinan «tastakyaw», kilhchanima pi nakamasiyanikan kamanan tuku xlitlawatkan chu nakapulalinkan. Ni wa kilhchanima nakawilinikan o nitlan nakalikatsinikan (Proverbios 4:1).