Kamakgtayakan tiku skujkgo kʼakgtum hospital namakgatlajakgo estrés

Bryn, chatum tala tiku lama kCarolina del Norte (Estados Unidos), makgtapakgsi kʼakgtum Comité de Enlace con los Hospitales xalak uma kachikin. Umakgolh comités akxtum kataskujkgo hospitales xlakata naʼakxilhkgo tuku maklakaskinkgo natalan tiku tanumakgolh khospital.

Xlakata anan pandemia xla COVID-19, lhuwa hospitales ni xmastamakgo talakaskin nakalakgapaxialhnankan tiku tanumakgolh anta. Wa xlakata, Bryn tachuwinalh director tiku lakgaya nalakkaxwili akxni xlitalakgapaxialhnat tiku tanuma khospital, xlakata nakatsi la chuntiya xkamakgtayaka natalan tiku tanumakgolh anta.

Tiku kgalhtinalh wa tiku makgtaya director, chu Bryn kgalhskilh komo tlan xkamaxkika natalan xnúmero xlakata tlan xkatachuwinalh. Chuna, maski nila xkalakgapialhnan natalan chuntiya tlan xkatachuwinalh. Tiku taskuja director wa pi tlan.

Bryn na kalitachuwinalh tiku skujkgo khospital. Wanilh pi lu xtapalh akxilha taskujut nema xtlawamakgolh chu pi xkgalhkgalhi pi tlan xtawilakgolh. Na wanilh pi xlikgalhtawakganit pi latamanin tiku wilakgolh xlilakgalanka kakilhtamaku, liwaka tiku skujkgo khospitales, lu taestresarlikgo xlakata anan pandemia.

Tiku taskuja director wanilh pi chuna, chu pi xlakata anan pandemia xla COVID-19, taskujut nema tlawakan khospital lu makgatlakgwanan.

Bryn wanilh: «Anta ksitiojkan anan lhuwa likgalhtawakga nema tlan nakamakgtaya latamanin nakatsikgo la namakgatlajakgo estrés. Komo natanuya kjw.org chu natsokgwiliya tachuwin estrés anta kbuscador, natekgsa makgapitsi artículos nema tlan nakamakgpuwantini tiku skujkgo khospital».

Akxni xkgalhchuwinamakgolh, tiku makgtaya director tanulh kkisitiojkan, chu tsokgwililh tachuwin estrés anta kbuscador chu akxilhli artículos nema tatekgsa anta. Wa: «¡Lu tla tuku limin! Nakmasiyani director. Uma lu nakamakgtaya tiku skujkgo khospital chu lhuwa latamanin. Maklhuwa nakkaʼimprimirli chu alistalh nakkamaʼakgpitsi».

Makgapitsi semanas alistalh, Bryn tachuwinalh director, chu xla wa pi xtanunit kkisitiojkan chu xʼimprimirlinit artículos nema lichuwinan estrés chu amakgapitsi temas nema tatalakxtumi chu xkamaxtuninit xacopias. Xkamaxkikanit enfermeros chu amakgapitsi tiku na anta skujkgo kʼuma hospital.

Bryn wan: «Director kimpaxtikatsinilh xlakata taskujut nema tlawayaw chu xlakata artículos nema liwana katsokgkanit. Wa pi lu makgtayanankgo».