Xpuxnimat Pablo ni pekualh

Naklitachuwinanan xlakata chatum kgawasa tiku lakgmaxtulh apóstol Pablo. Ni katsiyaw la xwanikan, pero katsiyaw pi xpuxnimat Pablo xwanit. Uma kgawasa ni xpekuan. ¿Katsiputuna tuku tlawalh?...

Pablo xtanuma kpulachin kJerusalén. Tamaknuka kpulachin xlakata xkalitachuwinan Jesús latamanin. Pero makgapitsi lakchixkuwin ni xakxilhputunkgo Pablo chu lakkaxwilikgolh wi tuku natlawanikgo. Xwaniputunkgo xapuxku soldado: «Kakamalakgacha misoldados kalinkgolh Pablo kpumapakgsin». Xlakan xʼamakgolh tatsekgkgo ktiji chu akxni Pablo chu soldados xtitaxtulh, ¡xʼamakgolh makgnikgo!

Xpuxnimat Pablo kgaxmatli tuku xlakkaxwilimaka. ¿Tuku tlan xtlawalh? Alh wani xkuku tuku kgaxmatli. Wa xlakata Pablo wanilh: «Lakapala kalakgpi xapuxku soldado chu kawani putum tuku kgaxpatti». Uma lu tuwa xwanit, xlakata xapuxku soldado chatum chixku tiku lu xlakaskinka xlitaxtu. ¿Tlan xtachuwinalh xpuxnimat Pablo xapuxku soldado?... Chuna, ni pekualh chu wanilh tuku xkgaxmatnit.

Xapuxku soldado liwana kgaxmatnilh. Xlakata nitu xtlawanika Pablo, alakatanu malakgachalh kʼakgtum kachikin wanikan Cesarea. Na limapakgsinalh pi 500 soldados xtaʼankgolh Pablo. Kawanilh: «Uma katsisni kalipitit». ¿Lakgtaxtulh Pablo o makgnika? ¿Tuku lakpuwana?... Chuna, ¡lakgtaxtulh! Umakgolh lakchixkuwin nitu tlawanikgolh.

¿Lakgati uma takgalhtawakga?... ¿Akxilhti pi xpuxnimat Pablo ni pekualh? ¡Wix tlan na ni napekuana chuna la xpuxnimat Pablo! Talakaskin ni napekuanaw xlakata tlan nakatachuwinanaw amakgapitsin xlakata Jehová. ¿Tlan ni napekuana chu nalichuwinana Jehová?... Lu xlakaskinka chuntiya nalichuwinanaw Dios. Komo chuna natlawaya tlan nalakgtaxtukgo lhuwa latamanin.