Akgtiy xtamakatsinin Dios

Tlan nawanaw pi putum tuku lichuwinan Biblia akgtum xtamakatsinin Dios. KinTlatkan xalak akgapun kinkamaxkinitan xlakata lhuwa tuku nakinkamasiyaniyan. Pero la uku nalichuwinanaw pulaktiy lu xlakaskinka tamakatsinin nema mastalh Dios liwakaya akgtiy mil kata chu maklakaskilh ángel Gabriel. Biblia wan pi uma ángel “skuja kxlakatin Dios” (Lucas 1:19). ¿Tuku kilhtamaku chu niku mastalh ángel Gabriel umakgolh xlakaskinka tamakatsinin? ¿Tiku kamaxkilh uma tamakatsinin?

Ángel Gabriel masta xapulana tamakatsinin lakatsu kkata 3 akxni nina xlakachin Jesús. Anta kkasipijni xtiyat Judea lakatsu kJerusalén, lama chatum ksacerdote Jehová nema wanikan Zacarías. Xla chu xpuskat, Elisabet, linkgoya kata chu ni kgalhikgo kamanan. La uku Zacarías sacerdote litaxtu kxtemplo Dios anta kJerusalén. Akxni Zacarías wi kxpulakni santuario, anta tasiyani ángel Gabriel kxpaxtun pumakamastan niku lhkuyukan incienso.

Zacarías pekuan, pero ángel Gabriel tlan mamakgkatsini akxni wani umakgolh tachuwin: «Ni kapekuanti Zacarías, xlakata Dios kgaxmatli tuku tasaskininita, mimpuskat Elisabet nakgalhi chatum kgawasa, chu nalimapakuwiya Juan». Gabriel na wani Zacarías pi xkgawasa «lanka nalitaxtu kxlakatin Jehová». Nachuna, wani pi Juan nalakkaxwilini Jehová akgtum kachikin (Lucas 1:13-17).

Zacarías nila kanajla tuku makatsinikan, xlakata xla chu Elisabet linkgoya kata chu nialhla kgalhikgo kamanan. Wa xlakata Gabriel wani: «Nila katichuwinanti asta [...] akxni nakgantaxtukgo uma, xlakata ni kanajla kintachuwin» (Lucas 1:20).

Latamanin tiku yakgo kxkilhtin santuario akstu kakgalhskinkan tuku xlakata ni lakapala taxtu Zacarías. Akxni taxtu, nila chuwinan. Kaj matsuwi xmakan xlakata namasiya tuku wamputun. Liwana tasiya pi wi tuku akxilhnit ksantuario.

Akxni masputunita xtaskujut ktemplo, Zacarías taspita kxchik. Ni makgas titaxtu, Elisabet katsi pi ama kgalhi skgata. Akgkitsis papaʼ ni taxtu kxchik asta akxni lakachin kskgata.

Ama kilhtamaku ángel Gabriel wi tiku tasiyani. ¿Tiku? Chatum tsumat tiku wanikan María chu lama kkachikin nema wanikan Nazaret, kxtiyat Galilea, kxnorte Jerusalén. Ángel wani María: «Tlan akxilhan Dios. Chu ¡kaʼakxilhti!, nakgalhiya skgata chu namalakachiniya chatum aktsu kgawasa, chu nalimapakuwiya Jesús. Xla lanka nalitaxtu chu nalimapakuwikan xKgawasa Tiku xala talhman, [...] chu namapakgsinan kxchik Jacob putum kilhtamaku, chu xTamapakgsin nikxni katilakgsputli» (Lucas 1:30-33).

Xlikana pi Gabriel lu xlakaskinka liʼakxilha namasta uma akgtiy tamakatsinin. Kcapítulos nema stala naʼakxilhaw tuku xlakata lu xlakaskinka umakgolh tamakatsinin.