Aktsu kgawasa nema xmalaknunit Dios

José chu María nialh taspitkgo kNazaret, wata tamakgxtakgkgo kBelén. Akxni Jesús kgalhi akgtsayan kilhtamaku, puakstilichukukan chuna la xwan xLimapakgsin Dios (Levítico 12:2, 3). Uma kilhtamaku na xlismanikan xkawilinikan xtukuwanikan laktsu kamanan. Wa xlakata José chu María limapakuwikgo Jesús, chuna la xkawaninit ángel.

Titaxtu liwaka akgtum papaʼ chu Jesús makgatsinita tipuxam kilhtamaku. Wa xlakata, xnatlatni linkgo ktemplo, nema lakatsu wi lata niku xlakan wilakgo. Limapakgsin wan pi tipuxum kilhtamaku alistalh lata akxni lakachinit chatum aktsu kgawasa talakaskin pi xtse nalin akgtum tamakamastan ktemplo xlakata nataskulunki (Levítico 12:4-8).

Wa uma tuku tlawa María, lin tantiy laktsu tsiktsi xlakata namakamasta. Uma limasiya pi José chu María limaxkgen xwankgonit. Limapakgsin xwan pi xatse xlimastat tantum carnero chu tantum tsiktsi. Pero komo ni kgalhi tumin xlakata natamawa uma, tlan nalin tantiy tórtolas o tantiy palomas. Xlakata María limaxkgen, wa uma tuku masta.

Ktemplo, José chu María katalakatsuwini chatum chixku tiku linata kata. Wa Simeón. Dios waninit pi ni katinilh komo ni pulana naʼakxilha Cristo o Mesías tiku Jehová malaknunit. Uma kilhtamaku espíritu santo tlawanit pi naʼan ktemplo. Akxni akxilha José chu María pi linkgo skgata, xla chaxa.

Uma kilhtamaku, Simeón paxtikatsini Dios chu wani: «Malana Tiku lakgchan namapakgsinan, makgxtakgpat pi miskujni tlantiya naniy, xlakata kgantaxtulh tuku xmalaknunita, xlakata kilakgastapu akxilhnit tiku nalilakgmaxtunana nema wix mastanita xlakata latamanin tlan naʼakxilhkgo, akgtum xkgakganat nema namapanu tuku tlawa pi nila naʼakxilhkgo latamanin, chu namalanki minkachikin Israel» (Lucas 2:29-32).

José chu María kaks lilakawankgo uma. Simeón kasikulunatlawa chu wani María pi xkgawasa wa «Dios malakgachanit kʼIsrael, chu makgapitsi naliʼakgchakgxkgo kaj xpalakata chu amakgapitsin natakiparakgo», na wani María pi nalakgchin talipuwan xtachuna la kgantum espada (Lucas 2:34).

Uma kilhtamaku na anta wi Ana, chatum xpalakachuwina Jehová nema kgalhi 84 kata. Xla ankgalhin an ktemplo. Katalakatsuwini José, María chu skgata. Paxtikatsini Dios chu tsuku kalitachuwinan Jesús tiku anta wilakgolh.

¿Lilakpuwana la paxuwakgo José chu María xlakata putum tuku lanit ktemplo? Uma tlawa pi nakanajlakgo pi xkgawasakan wa mapakgsina nema Dios malaknunit.