-
¿Tuku xTamapakgsin Dios?¡Kalipaxuwa latamat putum kilhtamaku! Biblia namasiyaniyan la natlawaya
-
-
TAKGALHTAWAKGA 31
¿Tuku xTamapakgsin Dios?
Tuku tlakg lichuwinan Biblia wa xTamapakgsin Dios. Jehová namaklakaskin xTamapakgsin xlakata namakgantaxti tuku xlakpuwanit xapulana xpalakata Katiyatni. ¿Tuku uma Tamapakgsin? ¿Tuku limasiya pi mapakgsinamaja? ¿Tuku tlawanit asta la uku? ¿Chu tuku natlawa kkilhtamaku nema aku mima? Umakgolh takgalhskinin natakgalhti kʼuma chu kʼakgtiy takgalhtawakga nema stala.
1. ¿Tuku xTamapakgsin Dios chu tiku xMapakgsina?
Xtamapakgsin Dios wa akgtum tamapakgsin nema Jehová lakkaxwililh. Xmapakgsina wa Jesucristo chu mapakgsinama lata kʼakgapun (Mateo 4:17; Juan 18:36). Biblia wan xpalakata Jesús: «Namapakgsinan [...] putum kilhtamaku» (Lucas 1:32, 33). Xlakata wa Mapakgsina xla uma Tamapakgsin, nakamapakgsi putum latamanin unu kKatiyatni.
2. ¿Tiku natamapakgsinankgo Jesús?
Jesús ni xʼakstu katimapakgsinalh. Latamanin «xliputum laklanka familias chu kachikinin chu laklanka kachikinin chu tipalhuwa tachuwin chuwinankgo [...] namapakgsinankgo kkatiyatni» (Apocalipsis 5:9, 10). ¿La xlilhuwa latamanin natamapakgsinankgo Cristo? Lata akxni Jesús xlama kKatiyatni, lhuwa latamanin laksakkgonit kstalaninanin nalitaxtukgo. Pero kajwatiya 144,000 kalaksakkanit xlakata naʼankgo kʼakgapun chu natamapakgsinankgo Jesús (kalikgalhtawakga Apocalipsis 14:1-4). Putum amakgapitsi kstalaninanin Cristo nalatamakgo unu kKatiyatni chu natapakgsinikgo xTamapakgsin Dios (Salmo 37:29).
3. ¿Tuku xlakata xTamapakgsin Dios tlakg tlan nixawa xtamapakgsinkan latamanin?
Wilakgo mapakgsinanin tiku tlawaputunkgo tuku tlan, pero nila makgantaxtikgo putum tuku lakpuwankgo. Chu chuna la titaxtu kilhtamaku atanu tiku tsukupara mapakgsinan, tiku max ni lu kalilakgaputsa latamanin. Pero Jesús, Mapakgsina kxTamapakgsin Dios, niti katitawi xlakgxokgo. Dios lakkaxwililh «akgtum tamapakgsin nema nikxni katimalakgsputuka» (Daniel 2:44). Jesús namapakgsinan kxlikalanka Katiyatni chu ni katilaksakpaxkinalh. Xla xapaxkina, tlan likatsi chu xaʼakgstitum, chu nakamasiyani latamanin xlakata nachuna nalikatsikgo (kalikgalhtawakga Isaías 11:9).
TLAKG KALAKPUTSANANIW
Kaʼakxilhwi tuku xlakata xTamapakgsin Dios tlakg tlan nixawa xtamapakgsinkan latamanin.
4. Akgtum Tamapakgsin nema namapakgsinan kxlikalanka Katiyatni
Jesucristo kgalhi litliwakga chu tlakg tlan namapakgsinan nixawa atanu mapakgsina nema latamanit. Kalikgalhtawakgatit Mateo 28:18 chu kalichuwinantit uma:
¿Tuku xlakata xlimapakgsin Jesús tlakg tlan nixawa xlimapakgsin chatum lataman?
Tamapakgsin xalak Katiyatni kaj ni lhuwa latamanin kamapakgsikgo chu chan kilhtamaku lakgsputkgo. ¿Nachuna naʼakgspula xTamapakgsin Dios? Kalikgalhtawakgatit Daniel 7:14 chu kalichuwinantit uma:
¿Tuku xlakata tlan nakitaxtu pi xTamapakgsin Dios ni katimalakgsputuka?
¿Tuku xlakata tlan nakitaxtu pi namapakgsinan kxlikalanka Katiyatni?
5. Talakaskin nakamapanukan mapakgsinanin xalak katiyatni
¿Tuku xlakata talakaskin pi xTamapakgsin Dios natawila xlakgxokgo mapakgsinanin xalak katiyatni? Kaʼakxilhtit VIDEO chu kalichuwinantit uma:
¿Tuku nitlan tlawakgonit mapakgsinanin xalak katiyatni?
Kalikgalhtawakgatit Eclesiastés 8:9 chu kalichuwinantit uma:
¿Lakpuwana wix pi xTamapakgsin Dios xlitawilat xlakgxokgo mapakgsinanin xalak katiyatni? ¿Tuku xlakata chuna lakpuwana?
6. Tiku namapakgsinankgo kxTamapakgsin Dios kinkaʼakgatekgsnikgoyan
Xlakata kiMapakgsinakan, Jesús, latamalh kKatiyatni, «kinkaʼakgatekgsniyan akxni xlajwananaw» (Hebreos 4:15). Jehová kalaksakli 144,000 lakchixkuwin chu lakpuskatin tiku ni makgxtakgnankgo xlakata natamapakgsinankgo Jesús. Umakgolh latamanin kalaksakxtukanit klaklanka «familias chu kachikinin chu laklanka kachikinin chu tipalhuwa tachuwin chuwinankgo» (Apocalipsis 5:9).
¿Tlan mamakgkatsiniyan pi Jesús chu putum tiku natamapakgsinankgo katsikgo la makgkatsiyaw chu taʼakglhuwit nema titaxtuyaw? ¿Tuku xlakata?
Jehová kalaksaknit lakchixkuwin chu lakpuskatin tiku tanu tanu kilhtamaku latamakgolh chu tanu tanu xtalismaninkan xlakata natamapakgsinankgo Jesús
7. Limapakgsin xla xTamapakgsin Dios tlakg tlan nixawa xla latamanin
Mapakgsinanin lakkaxwilikgo limapakgsin xlakata nakamakgtayakgo chu nakakuentajtlawakgo latamanin. Xtamapakgsin Dios na lakkaxwilinit limapakgsin chu tiku tapakgsinikgo xlikgalhakgaxmatatkan. Kalikgalhtawakgatit 1 Corintios 6:9-11 chu kalichuwinantit uma:
¿La lakpuwana pi natawila kakilhtamaku akxni putum latamanin nakgalhakgaxmatkgo xlimapakgsin Dios xlakata la linkan latamat?a
¿Xlilat pi Jehová nakaskini putum latamanin nema natapakgsinikgo xTamapakgsin pi kakgalhakgaxmatkgolh umakgolh limapakgsin? ¿Tuku xlakata chuna lakpuwana?
¿Tuku masiya pi latamanin tiku nitlan linkgo xlatamatkan tlan natalakgpalikgo? (Kaʼakxilhtit versículo 11).
Mapakgsinanin lakkaxwilikgo limapakgsin xlakata nakakuentajtlawakgo latamanin. Limapakgsin nema lakkaxwili xTamapakgsin Dios tlakg tlan nixawa la xla mapakgsinanin chu na kamakgtaya tiku tapakgsinikgo
MAKGAPITSIN WANKGO: «Xtamapakgsin Dios wa pi natlawayaw tuku tlan chu nalatamayaw chuna la Dios lakaskin».
¿Tuku xwanti komo wi tiku chuna xwanin?
TUKU KATSINIW
Xtamapakgsin Dios akgtum gobierno nema wilacha kʼakgapun chu namapakgsinan kxlikalanka Katiyatni.
¿Tuku xkgalhtinanti?
¿Tiku namapakgsinankgo kxTamapakgsin Dios?
¿Tuku xlakata xTamapakgsin Dios tlakg tlan nixawa xla latamanin?
¿Tuku lakaskin Jehová pi katlawakgolh tiku tapakgsinikgo xTamapakgsin?
TLAKG KAKATSINI
Kaʼakxilhti tuku wa Jesús xlakata niku xʼama tawila Tamapakgsin.
«¿Kkinakujkan wi xTamapakgsin Dios?» (Artículo xalak jw.org)
¿Tuku xlakata xtatayananin Jehová wa tatayakgo xTamapakgsin Dios chu ni katatayakgo mapakgsinanin xalak katiyatni?
Kaʼakxilhti tuku wan Biblia xlakata 144,000 latamanin tiku Jehová kalaksaknit xlakata natamapakgsinankgo Jesús.
Kaʼakxilhti tuku makanajlilh chatum puskat tiku xtanuma kpulachin pi kajwatiya Dios natlawa pi kaʼanalh tuku xaʼakgstitum kkakilhtamaku.
«Kkatsilh tiku nalakkaxtlawa tuku ni xaʼakgstitum» (¡Despertad!, noviembre kata 2011)
a Ksección 3 natalichuwinan makgapitsi limapakgsin nema kilimakgantaxtitkan.
-
-
¡Xtamapakgsin Dios mapakgsinamaja!¡Kalipaxuwa latamat putum kilhtamaku! Biblia namasiyaniyan la natlawaya
-
-
TAKGALHTAWAKGA 32
¡Xtamapakgsin Dios mapakgsinamaja!
Xtamapakgsin Dios tsukulh mapakgsinan kʼakgapun kkata 1914. Watiya uma kata tsukulh xaʼawatiya xkilhtamakujkan mapakgsinanin xalak kKatiyatni. ¿Tuku likatsiyaw? La uku naʼakxilha tuku xlichuwinanit Biblia pi xʼama la, la xʼama tawila kakilhtamaku chu tuku tayat xʼamakgo kgalhikgo latamanin lata kkata 1914.
1. ¿Tuku lichuwinalh Biblia pi xʼama la?
Xlibro Daniel xlichuwinanita pi xTamapakgsin Dios xʼama mapakgsinan akxni ksputli kilhtamaku nema lilakgapaskan «pulaktujun kilhtamaku» (Daniel 4:16, 17). Akglhuwa ciento kata alistalh, Jesús lichuwinalh watiya uma kilhtamaku chu limapakuwilh la «kilhtamaku nema laklhkawilinikanit kachikinin» chu masiyalh pi uma kilhtamaku nina ksputa (Lucas 21:24). Chuna la naʼakxilhaw, pulaktujun kilhtamaku sputli kkata 1914.
2. ¿La tatekgsa kakilhtamaku chu tuku tayat kgalhikgo latamanin lata kkata 1914?
Xtamakgalhtawakgen Jesús kgalhskinkgolh: «¿Tuku nalitasiya pi kinkatawila nawan chu akxni talakatsuwinita xlisputni kakilhtamaku?» (Mateo 24:3). Jesús kawanilh pi lhuwa tuku xʼama la akxni xtsukulh mapakgsinan kʼakgapun kxTamapakgsin Dios. Akgtum liʼakxilhtit, lichuwinalh pi xʼama la guerras, xʼama anan tatsinkstat chu xʼama tachiki tiyat (kalikgalhtawakga Mateo 24:7). Biblia na lichuwinalh la xʼamakgo likatsikgo latamanin «kxaʼawatiya kilhtamaku» chu uma xʼama tlawa pi lu kalipekua xwa (2 Timoteo 3:1-5). Lata 1914, liwana tasiya pi kgantaxtuma putum uma.
3. ¿Tuku xlakata lu taliwakanit tuku nitlan kkatiyatni lata tsukulh mapakgsinan xTamapakgsin Dios?
Akxni nina makgas xtsukunit mapakgsinan Jesús kxTamapakgsin Dios, analh akgtum guerra kʼakgapun chu xla katalachipalh Satanás chu xdemonios. Satanás tlajaka chu chuna la wan Biblia, «tamakaktika kkatiyatni, [...] chu xʼángeles nachuna akxtum katamakaktikancha» (Apocalipsis 12:9, 10, 12). Satanás lu sitsinit xlakata katsi pi nialh makgas namalakgsputukan. Wa xlakata tlawama pi kaʼanalh lhuwa takatsanajwat chu tapatin kxlikalanka Katiyatni. Kakilhtamaku litatsamanit lhuwa tuku nitlan, pero xTamapakgsin Dios namasputu putum umakgolh taʼakglhuwit.
TLAKG KALAKPUTSANANIW
Kaʼakxilhwi tuku limasiya pi xTamapakgsin Dios tsukulh mapakgsinan kkata 1914 chu kaʼakxilhwi tuku kinkamakgpuwantiniyan natlawayaw.
4. Tuku Biblia xlichuwinanit pi xʼama la kgantaxtulh kkata 1914
Dios tlawalh pi Nabucodonosor, chatum mapakgsina kxamakgan Babilonia, xlimanaxnalh tuku lhuwa kilhtamaku alistalh xʼama kgantaxtu. Uma tamanixnat chu tuku lichuwinalh Daniel masiya pi wa xkilhchanima xtamapakgsin Nabucodonosor chu xTamapakgsin Dios (kalikgalhtawakgatit Daniel 4:17).a
Kalikgalhtawakgatit Daniel 4:20-26. Alistalh kamaklakaskintit tabla xlakata nakgalhtiyatit umakgolh takgalhskinin:
A) ¿Tuku akxilhli Nabucodonosor kxtamanixnat? (Kaʼakxilhtit versículos 20 chu 21).
B) ¿Tuku xʼama akgspula kiwi? (Kaʼakxilhtit versículo 23).
C) ¿Tuku xʼama la akxni ksputli «pulaktujun kilhtamaku»? (Kaʼakxilhtit versículo 26).
Kiwi nema tasiyalh ktamanixnat chu xTamapakgsin Dios
TUKU XWANKANIT PI XʼAMA LA (Daniel 4:20-36)
Tamapakgsin
A) Kgantum lanka kiwi
Lakxlalh tamapakgsin
B) «Katankapitit uma kiwi» chu kamastatit talakaskin «natitaxtu pulaktujun kilhtamaku»
Lakkaxwiliparakan tamapakgsin
C) «Namakglhtinamparaya mintamapakgsin»
Xapulana akxni kgantaxtulh:
D) ¿Tiku xkilhchanima uma kiwi? (Kaʼakxilhtit versículo 22).
E) ¿Tuku kilhtamaku nialh mapakgsinalh? (Kalikgalhtawakgatit Daniel 4:29-33).
F) ¿Tuku akgspulalh Nabucodonosor akxni titaxtulh «pulaktujun kilhtamaku»? (Kalikgalhtawakgatit Daniel 4:34-36).
XAPULANA AKXNI KGANTAXTULH
Tamapakgsin
D) Nabucodonosor, mapakgsina xalak Babilonia
Lakxlalh tamapakgsin
E) Akxni xtitaxtunita kata 606 a.n.J., Nabucodonosor akgwitilh chu nialhla mapakgsinalh akgtujun kata
Lakkaxwiliparakan tamapakgsin
F) Nabucodonosor tsukupa lakapastaknan chu tsukupa mapakgsinan
Xlipulaktiy akxni kgantaxtulh:
G) ¿Tiku xkakilhchanima uma kiwi? (Kalikgalhtawakgatit 1 Crónicas 29:23).
H) ¿Tuku kilhtamaku nialh mapakgsinankgolh? ¿Tuku likatsiyaw pi nialh wa xmapakgsinamakgo akxni Jesús xlama kKatiyatni? (Kalikgalhtawakgatit Lucas 21:24).
I) ¿Tuku kilhtamaku chu niku lakkaxwiliparaka uma tamapakgsin?
XLIPULAKTIY AKXNI KGANTAXTULH
Tamapakgsin
G) Mapakgsinanin xalak Israel nema xmapakgsinankgo xlakgxokgo Dios
Lakxlalh tamapakgsin
H) Jerusalén malakgsputukan kkata 607 a.n.J.; nialh analh mapakgsinanin xalak Israel 2,520 kata
Lakkaxwiliparakan tamapakgsin
I) Jesús tsukulh mapakgsinan kʼakgapun kxTamapakgsin Dios kkata 1914
¿La xlilhuwa makgapala pulaktujun kilhtamaku?
Makgapitsi versículos xalak Biblia kinkamakgatekgsniyan tuku wankgo amakgapitsi versículos. Akgtum liʼakxilhtit, kʼApocalipsis wan pi pulaktutu kilhtamaku aitat kilhchanima 1,260 kilhtamaku (Apocalipsis 12:6, 14). Wa xlakata pulaktujun kilhtamaku kilhchanima 2,520 kilhtamaku. Kmakgapitsi versículos xalak Biblia, akgtum kilhtamaku kilhchanima akgtum kata (Ezequiel 4:6). Chuna putlekgekan tuku lichuwinan xlibro Daniel xlakata pulaktujun kilhtamaku: kilhchanima 2,520 kata.
5. Lata kkata 1914 kakilhtamaku talakgpalilh
Jesús lichuwinalh la xʼama tawila kakilhtamaku akxni xtsukulh mapakgsinan. Kalikgalhtawakgatit Lucas 21:9-11 chu kalichuwinantit uma:
Xliputum tuku lichuwinan uma texto, ¿tuku akxilhnita o tuku kgaxpatnita pi kgantaxtuma?
Apóstol Pablo tsokgwililh la xʼamakgo likatsikgo latamanin kxaʼawatiya kilhtamaku xla xtamapakgsinkan latamanin. Kalikgalhtawakgatit 2 Timoteo 3:1-5 chu kalichuwinantit uma:
Chuna la wan texto, ¿tuku tayat akxilhnita wix pi kgalhikgo latamanin?
6. Wi tuku kilitlawatkan xlakata xTamapakgsin Dios mapakgsinamaja
Kalikgalhtawakgatit Mateo 24:3, 14 chu kalichuwinantit uma:
¿Tuku lu xlakaskinka taskujut tlawamaka nema limasiya pi xTamapakgsin Dios mapakgsinamaja?
¿La tlan namakgtayanana kʼuma taskujut?
Xtamapakgsin Dios mapakgsinamaja chu nialh makgas namapakgsinan kxlikalanka Katiyatni. Kalikgalhtawakgatit Hebreos 10:24, 25 chu kalichuwinantit uma:
¿Tuku kilitlawatkan xlakata akxilhmaw pi «xkilhtamaku Dios talakatsuwima»?
Komo wi tuku xkatsini nema tlan xkamakgtayalh amakgapitsin chu tlan xkalakgmaxtulh, ¿tuku xtlawa?
MAKGAPITSIN KGALHSKININANKGO: «¿Tuku xlakata xtatayananin Jehová lichuwinankgo kata 1914?».
¿Tuku xwanti wix?
TUKU KATSINIW
Tuku lichuwinanit Biblia pi xʼama la chu chuna la wi kakilhtamaku, masiya pi xTamapakgsin Dios mapakgsinamaja. Akinin limasiyayaw pi kanajlayaw akxni lichuwinanaw uma Tamapakgsin chu anaw ktamakxtumit xalak congregación.
¿Tuku xkgalhtinanti?
¿Tuku lalh akxni sputli pulaktujun kilhtamaku nema lichuwinalh Daniel?
¿Tuku makanajliyan pi xTamapakgsin Dios tsukulh mapakgsinan kkata 1914?
¿La nalimasiyaya komo kanajlaya pi xTamapakgsin Dios mapakgsinamaja?
TLAKG KAKATSINI
Kaʼakxilhti tuku wankgo makgapitsi tiku lakputsananikgo tuku lanit makgasa xlakata la talakgpalinit kakilhtamaku lata 1914.
“La era en que los valores decayeron radicalmente” (¡Despertad!, abril kata 2007)
Kaʼakxilhti la lakgpalinilh xlatamat chatum chixku tuku wan Mateo 24:14.
¿La likatsiyaw pi tuku lichuwinan capítulo 4 xla Daniel wa kilhchanima xTamapakgsin Dios?
¿Tuku limasiya pi «pulaktujun kilhtamaku» nema lichuwinan capítulo 4 xla Daniel sputli kkata 1914?
a Kalikgalhtawakga xaʼawatiya akgtiy artículos xla sección «Tlakg kakatsini» xla uma takgalhtawakga.
-
-
¿Tuku natlawa xTamapakgsin Dios?¡Kalipaxuwa latamat putum kilhtamaku! Biblia namasiyaniyan la natlawaya
-
-
TAKGALHTAWAKGA 33
¿Tuku natlawa xTamapakgsin Dios?
Xtamapakgsin Dios mapakgsinamaja, nialh makgas lhuwa tuku nalakgpali kKatiyatni. Kaʼakxilhwi makgapitsi tuku natlawa uma Tamapakgsin nema namakgapaxuwayan.
1. ¿Tuku natlawa xTamapakgsin Dios xlakata naʼanampara takaksni chu tuku xaʼakgstitum kKatiyatni?
Anta kʼguerra xla Armagedón, Jesús, mapakgsina kxTamapakgsin Dios, nakamasputu latamanin tiku lixkajni likatsikgo chu mapakgsinanin (Apocalipsis 16:14, 16). Amacha kilhtamaku, uma tamalaknun nema min kBiblia kgantaxtunita nawan: «Nialh lhuwa kilhtamaku tsankga chu tiku lixkajni likatsikgo nialh katitawilakgolh» (Salmo 37:10). Jesús namaklakaskin uma Tamapakgsin xlakata nawili takaksni chu tuku xaʼakgstitum kxlikalanka Katiyatni (kalikgalhtawakga Isaías 11:4).
2. ¿La nawan latamat akxni natatlawa xtalakaskin Dios kKatiyatni?
Akxni wa namalanan xTamapakgsin Dios, «tiku xaʼakgstitum wa nakamaxkikan katiyatni chu putum kilhtamaku nalatamakgo anta» (Salmo 37:29). ¡Kalilakpuwanti la nawan latamat akxni putum latamanin tlan nalikatsikgo, napaxkikgo Jehová chu nalapaxkikgo! ¡Lu stlan nawan! Nialhti katitatatlalh chu putum kilhtamaku nalatamakgo.
3. ¿Tuku namakgantaxti xTamapakgsin Dios akxni kamasputunita nawan tiku lixkajni likatsikgo?
Akxni Jesús kamasputunita nawan tiku lixkajni likatsikgo, namapakgsinan Akgtum Mil Kata. Uma kilhtamaku, Jesús chu 144,000 tiku natamapakgsinankgo, nakamakgtayakgo latamanin xlakata nialh nakgalhikgo talakgalhin. Akxni sputnita nawan Akgtum Mil Kata, putum Katiyatni akgtum paraíso nawan chu nalitatsamakgo latamanin tiku xatapaxuwan nalatamakgo xlakata nakgalhakgaxmatkgo xlimapakgsin Jehová. Wa xlakata, Jesús namakamaxkipara tamapakgsin xTlat, Jehová. Chu xtukuwani Dios natamasantujli chuna la nikxni chuna xlanit (Mateo 6:9, 10). Liwana tasiyanit nawan pi Jehová xatlan Mapakgsina chu kuentajtlawa xkachikin. Alistalh, Jehová namasputu Satanás, xdemonios chu putum tiku nalakatakiputun xtamapakgsin (Apocalipsis 20:7-10). Putum tuku namakgantaxti xTamapakgsin Dios namakgapala putum kilhtamaku.
TLAKG KALAKPUTSANANIW
Kaʼakxilhwi tuku xlakata tlan nakanajlayaw pi Dios namaklakaskin xTamapakgsin xlakata namakgantaxti putum tuku malaknunit natlawa kkilhtamaku nema aku mima.
4. Xtamapakgsin Dios nakamasputu mapakgsinanin xalak katiyatni
«Chixku akgchipanit chixku xlakata natlawani tuku nitlan» (Eclesiastés 8:9). Jehová namaklakaskin xTamapakgsin xlakata nalakkaxtlawa putum tuku nitlan tlawakgonit mapakgsinanin.
Kalikgalhtawakgatit Daniel 2:44 chu 2 Tesalonicenses 1:6-8 chu kalichuwinantit uma:
¿Tuku nakatlawanikgo Jehová chu Jesús mapakgsinanin xalak katiyatni chu tiku tatayakgo?
¿La makanajliyan tuku katsiyata xlakata Jehová chu Jesús pi tuku natlawakgo xaʼakgstitum chu ni katilaksakpaxkinankgolh?
5. Jesús wa tlakg xatlan Mapakgsina
Xlakata Jesús wa Mapakgsina kxTamapakgsin Dios, natlawa tuku tlan xpalakatakan latamanin. Kaʼakxilhtit VIDEO xlakata nakatsiyatit la limasiyalh Jesús pi lu kamakgtayaputun latamanin chu Dios maxkinit litliwakga xlakata chuna natlawa.
Tuku tlawalh Jesús akxni xlama kKatiyatni, kaj tsinu limasiya tuku natlawa xTamapakgsin Dios. Xliputum tamalaknun nema naʼakxilha, ¿tuku tlakg lakgatiya pi xkgantaxtulha? Kalikgalhtawakgatit putum textos niku tatekgskgo umakgolh tamalaknun.
AKXNI XLAMA KKATIYATNI, JESÚS...
LATA KʼAKGAPUN, JESÚS...
... makaksalh tliwakga unisen (Marcos 4:36-41).
... nalakkaxtlawa tuku latamanin nitlan tlawanikgonit Katiyatni (Isaías 35:1, 2).
... kamawilh lhuwa latamanin (Mateo 14:17-21).
... namasputu tatsinkstat kkakilhtamaku (Salmo 72:16).
... kamapaksalh lhuwa latamanin (Lucas 18:35-43).
... natlawa pi nialh natatatlakgo putum latamanin (Isaías 33:24).
... kamalakastakwanilh makgapitsi latamanin (Lucas 8:49-55).
... nakamalakastakwani tiku nikgonita chu namasputu linin (Apocalipsis 21:3, 4).
6. Xtamapakgsin Dios natlawa pi nakgalhiyaw xastlan latamat
Jehová namaklakaskin xTamapakgsin xlakata namakgantaxti tuku xlakpuwanit natlawa xapulana xpalakatakan latamanin. Nalatamakgo putum kilhtamaku kKatiyatni akxni akgtum paraíso nawan. Kaʼakxilhtit VIDEO xlakata nakatsiyatit la Jehová maklakaskima xKgawasa, Jesús, xlakata namakgantaxti tuku lakpuwanit natlawa.
Kalikgalhtawakgatit Salmo 145:16 chu kalichuwinantit uma:
¿La makgkatsiya xlakata katsipat pi Jehová nakamaxki «tuku maklakaskinkgo putum tuku staknankgo»?
MAKGAPITSIN WANKGO: «Komo putum xtlawaw tuku tlan, tlan xlakkaxtlawaw taʼakglhuwit nema anan kkakilhtamaku».
¿Tuku taʼakglhuwit nila lakkaxtlawakgo mapakgsinanin, pero xTamapakgsin Dios tlan nalakkaxtlawa?
TUKU KATSINIW
Dios namaklakaskin xTamapakgsin xlakata namakgantaxti tuku xlakpuwanit natlawa. Katiyatni akgtum paraíso nawan chu nalitatsama latamanin tiku tlan likatsikgo nema nakakninanikgo Jehová putum kilhtamaku.
¿Tuku xkgalhtinanti?
¿La namaklakaskin xTamapakgsin Jehová xlakata namasantujli xtukuwani?
¿Tuku likatsiyaw pi xTamapakgsin Dios namakgantaxti tamalaknun nema min kBiblia?
Xliputum tuku natlawa xTamapakgsin Dios, ¿tuku lakaskina wix pi xkgantaxtulha?
TLAKG KAKATSINI
Kaʼakxilhti tuku Armagedón.
Kaʼakxilhti tuku nala akxni nachin kilhtamaku nema Jesús limapakuwilh «Lanka tapatin».
¿Tuku tlan natlawakgo familias xlakata naʼakxilhlakachankgo pi lipaxuwamakgolha tuku ama tlawa xTamapakgsin Dios?
Xlakata nakatsiya la tekgsli tamakgtay chatum chixku tiku lu xmakgtanu kpolítica, kalikgalhtawakga biografía nema wanikan «Lhuwa takgalhskinin xakkgalhi».
«Biblia kalakgpalinilh xlatamatkan» (Artículo xla Makatsinina)
-