TAKGALHTAWAKGA 34
¿La nalimasiyaniyaw Jehová pi paxkiyaw?
Lata tsuku likgalhtawakgaya Biblia, ¿makgkatsiya pi tlakg talalipina Dios? ¿Lakaskina pi tlakg tlan xtalalipi Dios? Komo chuna, kalakapastakti pi komo Jehová naʼakxilha pi chuna la titaxtutilha kilhtamaku tlakg paxkiya, xla na tlakg napaxkiyan chu nakuentajtlawayan. ¿La tlan nalimasiyaniya pi paxkiya?
1. ¿La tlan nalimasiyaniyaw Jehová pi paxkiyaw?
Akxni kgalhakgaxmataw limasiyaniyaw pi paxkiyaw (kalikgalhtawakga 1 Juan 5:3). Pero xla ni tlawa pi xafuerza kakgalhakgaxmatwi. Wata kinkamaxkiyan talakaskin nalaksakaw komo nakgalhakgaxmataw o ni. ¿Tuku xlakata? Xlakata Jehová lakaskin pi “xliputum kinakujkan nakgalhakgaxmatniyaw” (Romanos 6:17). Uma wamputun pi xla lakaskin nakgalhakgaxpata xlakata paxkiya. Secciones 3 chu 4 xla uma libro, pulaktiy la namakgtayayan xlakata nalimasiyaniya Jehová pi paxkiya: natlawaya tuku lakgati chu nalakgmakgana tuku ni lakgati.
2. ¿Tuku xlakata tuwa makgkatsiyaw nalimasiyaniyaw Jehová pi paxkiyaw?
«Lhuwa taʼakglhuwit kgalhi tiku xaʼakgstitum» (Salmo 34:19). Putum akinin tuwa makgkatsiyaw natlawayaw tuku tlan chu na kgalhiyaw amakgapitsi taʼakglhuwit, max ni kgalhiyaw tumin o kinkatlawanikanan tuku nitlan. Akxni titaxtuyaw tuku tuwa, max tlakg tuwa makgkatsiyaw natlawayaw tuku Jehová lakgati. Chu max uma natlawa pi ni nakgalhakgaxmataw. Pero akxni wix liskuja natlawaya tuku Jehová lakgati, limasiyaniya pi lu paxkiya chu ni makgxtakga. Chu xla na ni katimakgxtakgni (kalikgalhtawakga Salmo 4:3).
TLAKG KALAKPUTSANANIW
Kaʼakxilhwi tuku xlakata lu xlakaskinka nakgalhakgaxmataw Jehová chu tuku nakinkamakgtayayan nikxni namakgxtakgaw.
3. Satanás wi tuku limawakayan
Xlibro Job wan pi Satanás wi tuku limawakanalh. Pero ni kajwatiya Job limawakalh, na kalimawakalh putum tiku skujnaniputunkgo Jehová. Kalikgalhtawakgatit Job 1:1 chu 1:6–2:10 chu kalichuwinantit uma:
Chuna la wa Satanás, ¿tuku xlakata Job xkgalhakgaxmata Jehová? (Kaʼakxilhtit Job 1:9-11).
¿Tuku kinkalimawakayan Satanás putum akinin? (Kaʼakxilhtit Job 2:4).
Kalikgalhtawakgatit Job 27:5b chu kalichuwinantit uma:
¿La limasiyalh Job pi xlikana xpaxki Jehová?
Xlakata Job nikxni makgxtakglhli Jehová, limasiyalh pi xpaxki
Akxni ni makgxtakgaw Jehová limasiyayaw pi paxkiyaw
4. Kamakgapaxuwa xnaku Jehová
Kalikgalhtawakgatit Proverbios 27:11 chu kalichuwinantit uma:
¿La makgkatsi Jehová akxni wix kgalhakgaxpata chu laksaka tuku tlan? ¿Tuku xlakata?
5. Wix tlan nikxni namakgxtakga Jehová
Tapaxkit nema kgalhiniyaw Jehová kinkamakgtayayan nakalitachuwinanaw amakgapitsin xpalakata. Chu xlakata ni makgxtakgaw kinkamakgpuwantiniyan chuntiya nalichuwinanaw maski namin kilhtamaku tuwa namakgkatsiyaw. Kaʼakxilhtit VIDEO chu kalichuwinantit uma:
¿Tuwa makgkatsiya nakalitachuwinana amakgapitsin xlakata Jehová?
Chuna la akxilhti kvideo, ¿tuku makgtayalh Grayson nialh napekuan?
Tlakg ni tuwa makgkatsiyaw ni namakgxtakgaw Jehová akxni paxkiyaw tuku xla paxki chu xkajniyaw tuku xla xkajni. Kalikgalhtawakgatit Salmo 97:10 chu kalichuwinantit uma:
Chuna la katsininita asta la uku, ¿tuku paxki Jehová chu tuku xkajni?
¿Tuku militlawat xlakata napaxkiya tuku tlan chu naxkajniya tuku nitlan?
6. Akxni kgalhakgaxmataw Jehová litamakgtayayaw
Kgalhakgaxmatkan Jehová wa tuku tlakg tlan. Kalikgalhtawakgatit Isaías 48:17, 18 chu kalichuwinantit uma:
¿Kanajlaya wix pi Jehová katsi tuku tlakg tlan nakinkakitaxtuniyan? ¿Tuku xlakata chuna lakpuwana?
¿La makgtayanitan asta la uku mintakgalhtawakga xalak Biblia chu xlakata tlakg lakgapasnita xaxlikana Dios, Jehová?
MAKGAPITSIN WANKGO: «Dios nitu limakgkatsi tuku akit ktlawa».
¿Tuku texto xmaklakaskinti xlakata nalimasiyaya pi tuku tlawayaw tlan namakgapaxuwa o namakgalipuwan Jehová?
TUKU KATSINIW
Wix limasiyaya pi paxkiya Jehová akxni kgalhakgaxpata chu akxni ni makgxtakga maski tuwa tuku titaxtuya.
¿Tuku xkgalhtinanti?
¿Tuku masiyaniyan xliʼakxilhtit Job?
¿La nalimasiyaya pi paxkiya Jehová?
¿Tuku namakgtayayan nikxni namakgxtakga Jehová?
TLAKG KAKATSINI
Kakatsi tuku militlawat xlakata ni namakgxtakga Jehová chu congregación.
Tlakg kakatsi tuku limawakanalh Satanás.
«Job ni makgatsankganani Dios» (Biblia chu tuku lichuwinan, sección 6)
Kaʼakxilhti pi asta laktsu kamanan tlan nalimasiyakgo pi paxkikgo Jehová.
¿Tuku nakamakgtaya kamanan ni namakgxtakgkgo Dios akxni kamatlawiputunkan tuku nitlan?