3 Dios mapatininan. ¿Pi xlikana?
Makgapitsi wankgo: «Dios makitilha xtalakgalhinkan latamanin chu kamakan kpupatin».
«Dios tlawa kaʼanalh tuku masputunan xlakata nakamalakgaxokge lakgalhinanin.»
Wantuku masiya Biblia: Anta 2 Pedro 3:9 wan pi Jehová «ni chatum lakaskin natsankgay, chi wampi paks [...] nalakgaspittayanikgoy xtalakgalhinkan». Dios ni wa tlakg akxilha tuku nitlan tlawayaw wata wa akxilha tuku tlan tlawayaw. Nachuna «lakputsama kxlikalanka katiyatni, la nalimaklakaskin xlitliwakga xlakata nakamakgtaya tiku xliputum xnaku [o anima] skujnanikgo» (2 Crónicas 16:9).
Biblia ni masiya pi anan pupatin. Chu Dios nipara tsinu lakpuwan wi tiku xpatinalh. Akxni niy chatum tiku nitlan likatsi Jehová akxilha pi lakgaxokgolha xtalakgalhin (Jeremías 7:31; Romanos 6:7). Chu lhuwa tuku masputunan ni wa Dios makamin, uma kaj xalan lay chu katiwa tiku chuna naʼakgspula (Eclesiastés 9:11).
La namakgtayayan nakatsiya tuku xaxlikana: Akxni katsiyaw pi Dios “matsankgenaninan”, o tapatinan chu ni lakapala lakpuwan pi ni katilakgpaliw kintayatkan tlawa pi nalakgtalakatsuwiputunaw (Salmo 86:5). Ni naskujniyaw kaj xlakata lakpuwanaw pi wi tuku tlawanitaw chu pekuaniyaw nakinkamalakgaxokgeyan. Xlakata xaxlikana paxkiyaw Jehová staka kintakanajlakan. Wa xlakata lu natlawaputunaw tuku lakgati (Mateo 22:36-38; 1 Juan 5:3).
Maski Dios lakaskin pi putum latamanin katlawakgolh tuku tlan, na katsi pi lhuwa ni chuna katitlawakgolh. Komo ni xkamasputulh tiku lixkajni likatsikgo, xkitaxtulh la mapakgsina tiku lakkaxwili xlimapakgsin pero ni makgantaxti, chu wa xlakata putum kilhtamaku anan tuku nitlan chu tapatin (Eclesiastés 8:11). Akxni katsiyaw pi Dios namasputu tuku nitlan, tlawa pi lipaxuw nakgalhkgalhiyaw kilhtamaku nema aku namin. Jehová wan pi nakamasputu tiku chuntiya tlawakgo tuku nitlan. Chu chuna, tiku tlan likatsikgo xatapaxuwan nalatamakgo kKatiyatni putum kilhtamaku chuna la pulana xlakaskin Dios (Salmo 37:10, 11, 29).a
[Nota nema wi kpágina]
a Kcapítulo 3 chu 8 xla libro ¿Tuku xlikana masiyay Biblia?, tlakg nakatsiya pi Dios natlawa kKatiyatni akgtum paraíso.
[Tuku wan página 6]
¿Lakaskin Dios nakakninaniyaw kaj xlakata ni nakinkamapatiniyan?
[Tiku tapakgsini fotografía xla página 6]
Xdibujo Doré