Wantuku masiya xTachuwin Dios

¿Tuku xlakata namaklakaskinaw xtukuwani Dios?

Uma artículo namakgtayayan xlakata natekgsa kmiBiblia xtakgalhtin makgapitsi takgalhskinin nema max miakstu tlawanikanita. Komo lakaskina, xtatayananin Jehová tlan natalikgalhtawakgakgoyan umakgolh takgalhskinin.

1. ¿Tuku xlakata Dios wililh xtukuwani?

Kimputumkan lakgatiyaw nakinkalimapakwikanan kintukuwanikan. ¿Tuku xlakata? Xlakata kintukuwanikan wa tuku kinkalilakgapaskanan nixawa akxni kinkawanikanan «chixku» o «puskat». Dios kgalhi lhuwa tuku lilakgapaskan, makgapitsi wa umakgolh, «Malana tiku lakgchan namapakgsinan» «Dios tiku kgalhi putum litliwakga» «xaLanka Malakatsukina» (Génesis 15:2; 17:1; Eclesiastés 12:1). Pero laksakli pi nawilinikan xtukuwani xlakata tlakg liwana nalakgapasaw chu tlan natalalinaw. Kxaʼespañol uma tukuwani wa Jehová. (Kalikgalhtawakga Isaías 42:8.)

Maski lhuwa tiku matitaxtikgo kʼatanu tachuwin Biblia ni wilikgonit xtukuwani chu kaj wilikgonit «Dios» o «Puchina», atsinu ni chan akgtujun mil tatsokgnit xtukuwani Dios ktatsokgni xahebreo xala makgasa. Liwana tasiya pi Dios lakaskin kalakgapaswi xtukuwani. (Kalikgalhtawakga Isaías 12:4.)

2. ¿Tuku xlakata xlakaskinka nalakgapasaw xtukuwani Dios?

Nalakgapasaw xtukuwani Dios ni kajwatiya wamputun nakatsikan xtukuwani, na wamputun tlan natalalinkan Dios. Tukuwani Jehová, wamputun «Xla Tlaway pi Chuna Kakitaxtulh», uma kinkalimasiyaniyan pi Dios natlawa tuku natalakaskin xlakata namakgantaxti tuku lakaskin. Wa xlakata lakgapaskan xtukuwani Jehová wamputun pi kanajlaya pi namakgantaxti tuku lakpuwanit natlawa (Salmo 9:10). Tiku lakgapaskgo xtukuwani chu maklakaskinkgo kanajlanikgo Dios chu pulana tlawaputunkgo xtalakaskin kxlatamatkan. Jehová nakamakgtaya. (Kalikgalhtawakga Salmo 91:14.)

3. ¿Tuku xlakata Dios lakaskin pi nalakgapaskan xtukuwani?

Dios lakaskin pi latamanin kalakgapaskgolh xtukuwani xlakata kamakgtaya. ¿La kamakgtaya? Kamaxki talakaskin xʼamigos nawankgo chu tlan nakgalhkgalhikgo latamat nema ni kgalhi xlisputni. Uma kinkamakgtayayan naʼakgatekgsaw tuku xlakata Dios lakaskin natakatsi xtukuwani. (Kalikgalhtawakga Juan 17:3 chu Romanos 10:13, 14.)

Jesús masiyalh xtukuwani Dios akxni kamasiyanilh latamanin la lakpuwan chu tuku lakapastaknit natlawa. La uku, kstalaninanin Cristo masiyakgo xtukuwani Dios putum niku anan latamanin. “Yama ntachixkuwitat, liyankgoy xtukuwini” Dios. (Kalikgalhtawakga Hechos 15:14 chu Juan 17:26.)

4. ¿La natlawa xlakata namasantujli xtukuwani Dios?

Jehová masantujliputun xtukuwani xlakata maxkawalikanit. Lhuwa wankgo pi ni wa Dios tiku malakatsukilh kakilhtamaku, wa xlakata lakpuwankgo pi ni kilikgalhakgaxmatatkan. Makgapitsi wankgo pi ni kinkapaxkiyan chu xkuenta putum taʼakglhuwit nema kgalhiyaw. Pero putum umakgolh latamanin tiku nitlan lichuwinankgo Dios nialh makgas nakamalakgaxokge tiku maxkajwalikgo xtukuwani. (Kalikgalhtawakga Salmo 83:17, 18.)

Dios nasantujtlawa xtukuwani akxni xTamapakgsin nakamasputu putum mapakgsinanin xalak katiyatni chu nawili takaksni chu nialh katiʼanalh taʼakglhuwit kKatiyatni (Daniel 2:44). Nialh makgas, putum nakatsikgokan pi kaj chatum wi Dios. (Kalikgalhtawakga Ezequiel 36:23 chu Mateo 6:9.)

¿Tuku militlawat? Natalakatsuwiniya komo nalikgalhtawakgaya xTachuwin chu nakatalalipina tiku paxkikgo Dios. Xlikana Jehová nakalakapastaka xlakskujnin akxni nasantujtlawa xtukuwani (Malaquías 3:16).

Komo tlakg katsiputuna, kalikgalhtawakga capítulo 1 xla uma libro, ¿Tuku xlikana masiyay Biblia?, nema tlawakgonit xtatayananin Jehová.

[Dibujo xla página 18]

Xtukuwani Dios kxamakgan tatsokgni xahebreo