¿Wi tiku kgaxmata oraciones?

«Xmin kilhtamaku xaklakpuwan pi nitu xʼanan Dios. Maski chuna xaklakpuwan, lakgachunin xaktlawani oración. Maski xaklakpuwan pi max niti xkinkgaxmatnima, pero xaklakaskin pi wi tiku xkinkgaxmatnilh. Ni xakpaxuwa chu nitu xaklakpuwan naktlawa kkilatamat. Ni xakkanajlaputun pi xʼanan Dios, xaklakpuwan pi kajwatiya xkanajlanikgo tiku ni lakgtliwakgan.» (PATRICIA, IRLANDA)a

¿NACHUNA makgkatsiya la patricia? ¿Tlawaya mioración maski lakpuwana pi max ni anan Dios? Ni kaj miakstu chuna lakpuwana.

◼ Kakgalhskinka max 2,200 tiku xalak Gran Bretaña litakatsilh pi 22% xlakpuwankgo pi xwi chatum Malakatsukina tiku kgaxmata oración. Pero 55% wankgolh pi kaj lakgachunin xtlawakgo oración.

◼ Na kakgalhskinka max 10,000 latamanin xala akgtati continentes, takatsilh pi atsinu ni 30% tiku xwakgo pi ni xkanajlanikgo Dios xtlawakgo oración.

¿Tuku xlakata ni lu kanajlakgo?

Chatum inglés wanikan Allan wan tuku xlakata ni xkanajla pi xʼanan Dios: «Xaklakpuwan pi takanajla kaj xlimaklakaskinkan xlakata nakaʼakgchipakan latamanin chu nakamakglhtikan tumin. Xaklakpuwan: “Komo xlikana xʼanalh Dios, ni xmastalh talakaskin pi xkatlawanika tuku nitlan lhuwa latamanin”. Maski chuna xaklakpuwan, xmin kilhtamaku xaktawila chu “wi tuku” xaktachuwinan. Kiʼakstu xkinkgalhskinkan tuku xlakata klama».

Lhuwa tapuwan tlawa pi latamanin ni nakanajlakgo pi wi tiku kgaxmata xʼoracionkan. Min kilhtamaku chuna lakpuwankgo xlakata ni tekgskgo xtakgalhtin takgalhskinin la uma:

◼ ¿Chatum Malakatsukina tiku kinkatlawan?

◼ ¿Tuku xlakata tasiya pi kaj wili taʼakglhuwit takanajla?

◼ ¿Tuku xlakata masta talakaskin Dios naʼanan lhuwa tapatin?

Chu wix, ¿tlakg xtlawa oración komo xkatsi xtakgalhtin umakgolh takgalhskinin?

[Nota nema wi kpágina]