Tiku likgalhtawakgakgo katsiputunkgo
¿Tuku xlakata Dios kamapakgsilh israelitas pi ni xtatamakgaxtokgkgolh tiku ni israelita?
▪ Limapakgsin nema Dios kamaxkilh israelitas xmin uma limapakgsin: «Ni nakatatlawaya talakkaxlan xla tamakgaxtokgat [kachikinin nema mintalakatsu]. Ni namaxkiya mintsumat xkgawasa, ni natatamakgaxtokga minkgawasa xtsumat» (Deuteronomio 7:3, 4). ¿Tuku xlakata mastaka uma limapakgsin?
Pulaktu, xlakata Jehová xkatsi pi Satanás xlaktlawaputun putum israelitas, xlakaskin pi xkakninanikgolh nixaxlikana dioses. Dios kawanilh israelitas pi komo xtatamakgaxtokgkgolh tiku ni xkakninanikgo Jehová xtamakgatlinikgolh chu kskujnanikgolh amakgapitsi dioses. Lu nitlan xʼama kakitaxtuni. Akxni nialh xtalalinkgolh Jehová chu nialh xkamakgtayalh lakapala xkamasputulh xtalamakgasitsinkan. Komo chuna xlalh, ¿la xlakachilh Mesías nema xwankanit pi namin kʼIsrael? Wa xlakata Satanás xlakaskin pi israelitas xtatamakgaxtokgkgolh tiku atanu takanajla xkgalhikgo.
Chu Jehová chatunu chatunu xkapaxki. Xla xkatsi pi komo tlan xtalalinkgolh Jehová, xpaxuwakgolh chu tlan xtawilakgolh. ¿Xlikana nitlan xkitaxtulh komo xtatamakgaxtokgkgolh tiku ni xkakninani Jehová? Kalakpuwanti mapakgsina Salomón. Xla xkatsi pi nitlan xtatamakgaxtokgka tiku ni xkakninani Jehová, xla xwanit: «Natlawakgo pi mi nakujkan nakakninani xdioseskan». Ni kuenta tlawanilh tu Dios xwanit. ¿La kitaxtunilh? «Tsinu tsinu xlakpuskatin tlawakgolh pi xnaku tsukulh [...] kaknina amakgapitsi dioses.» ¡Lu nitlan! Salomón nialh tlan talalilh Jehová chu xlakata ni kgalhakgaxmatli, xtamapakgsin tapitsilh (1 Reyes 11:2-4, 9-13).
Max wi tiku nawan pi ni paks chuna kaʼakgspula la Salomón. La Mahlón tatamakgaxtokgli Rut, tiku lu tlan kskujnanima Dios. Pero xlikana pi lu nitlan xtatamakgaxtokgkan tiku moabita. Wa xlakata Biblia ni wan pi Mahlón tlan tuku tlawalh xlakata tatawi Rut. Lu kgawasaku nilh, max akxni Rut nina xkakninani Jehová. Chu Kilión, tatamakgaxtokgli Orpá, chatum moabita tiku ni makgxtakgli «xdioses». Pero Boaz tatamakgaxtokgli Rut akxni xkakninaniya Jehová. Tlan nawanaw pi Rut xʼakxilhkan la «lu tlan xkakninanina xDioskan judíos». Lu tlan kitaxtulh pi Boaz chu Rut latatamakgaxtokgkgolh (Rut 1:4, 5, 15-17; 4:13-17).
Xlakata tuku aku lichuwinaw, ¿tlan nalakpuwanaw pi chuna la Mahlón tatamakgaxtokgli Rut wamputun pi nitlan xtastakyaw Jehová? Komo chuna nalakpuwanaw xtachuna la akxni wi tiku tlaja klotería xlakata nawankan pi takgaman xlakata lotería tlan litlajakan taway. ¿Ni xlikana pi uma kaj nitlan tapuwan?
Biblia kawani kstalaninanin Cristo xala uku, «xman wa lapi kanajlaniy nkimPuchinakan [Jehová]» natatamakgaxtokgkan. Kawani uma tachuwin «ni katatalakgxtupikgotit yama nti ni kanajlakgo». Wa kawanikan xaxlikana kstalaninanin Cristo tiku tamakgaxtokgputunkgo. Pero tiku tatamakgaxtokgkgonita tiku ni kanajlakgo Biblia, kawani uma tastakyaw xlakata lu tlan nakakitaxtuni xlakata tuwa linkan tamakgaxtokgat (1 Corintios 7:12-16, 39; 2 Corintios 6:14). Uma litasiya pi Jehová, tiku malakatsukilh tamakgaxtokgat, lakaskin pi xlakskujnin tiku tamakgaxtokgkgonit o nitu napaxuwakgo.