Tamalaknun nema nakgantaxtu
Xalakwan tamakatsin xla xTamapakgsin Dios talichuwinama xlikalanka Katiyatni, chuna la wa Jesús (Mateo 24:14). Libro xalak Biblia nema wanikan Daniel wan pi uma Tamapakgsin, akgtum gobierno xalak akgapun. Kcapítulo 2 xla uma libro lichuwinan la xʼama tawilatilhakgo laklanka tamapakgsin lata xamakgan Babilonia asta kkinkilhtamakujkan, chu kversículo 44, kinkawaniyan tuku nala alistalh:
«Dios xalak akgapun nawili akgtum tamapakgsin nema nikxni katisputli. Chu ama tamapakgsin ni katimatitaxtinika atanu kachikin. Nakalakxpula chu nakamasputu putum tamapakgsin chu ama tamapakgsin xliputum kilhtamaku natawila».
Uma tamakatsin chu amakgapitsi nema lichuwinan Biblia, wankgo pi xTamapakgsin Dios natawila xlakgxokgo putum tamapakgsin xalak Katiyatni chu nalimin takaksni chu tapaxuwan. ¿La natawila latamat akxni namapakgsinan xTamapakgsin Dios? Kaʼakxilhwi makgapitsi lu stlan tamalaknun nema nialh makgas nakgantaxtu.
NI KATIʼANALH GUERRAS
Salmo 46:9, Salmos Ixtatlincan ti Talipawan Dios, SXP. Dios «masputu guerra nak ixlitilanka, katiyatni. Wa kalaktukxa arco y kalakka, litipni xla guerra, y kalhkuyu ixʼescudokan soldados nak lhkuyat».
¿Lilakpuwana la xwa kakilhtamaku komo putum tumin chu liskgalala nema maklakaskinkan xlakata natlawakan limakgnin, xtamaklakaskilh xlakata xkalimakgtayaka latamanin? Akxni natawila xTamapakgsin Dios, nialh katiʼanalh guerras.
NI KATIʼANALH TAJATAT
Isaías 33:24. «Ni chatum lataman nawan: “Ktatatlay”».
Kalilakpuwanti kakilhtamaku niku ni anan tajatat xla naku, nipara cáncer, nipara diabetes chu nipara atanu tuku kinkamakgapatinanan. Komo chuna xtawi kakilhtamaku, ni xtalakaskilh hospitales nipara likuchun. Putum tiku lamakgo kKatiyatni nialh katitatatlakgolh.
NI KATIʼANALH TATSINKSTAT
Salmo 72:16, SXP. «Kan aktsu lichanat nachankan y likuanit nalhuwan nak katiyatni, nachuna nak kalaksipijni».
Katiyatni namakgala lhuwa taway xlakata putum latamanin nakgalhikgo tuku nawakgo chu liwana namaʼakgpitsikan. Nialh katiʼanalh tatsinkstat chu putum nakgalhikgo tuku nawakgo.
NI KATIʼANALH TAKATSANAJWAT, TAPATIN CHU NIPARA LININ
Apocalipsis (Revelación) 21:4. «Na paks naxakanikgo Dios xlakgpixtajatkan; na nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat; sampi wa xlipaks nkatuwaj, wa ntu x’anan xakgasiya, paks lakgsputli».
Latamanin ni katikgalhikgolh talakgalhin chu putum kilhtamaku nalatamakgo kKatiyatni akxni akgtum paraíso nawan. Wa uma tuku kinkamalaknuninitan xapaxkina kiMalakatsukinakan, Jehová.
XLIKANA NAKGANTAXTU
¿Lakpuwana pi uma akgtum tamanixni? Maski lhuwa latamanin lakgatikgo latamat nema malaknu Biblia, lhuwa nila akgatekgskgo tuku kilhchanima latamat nema nikxni sputa. Chu uma ni kaks lilakawanaw, xlakata nipara chatum lataman latamanit putum kilhtamaku.
Latamanin lhuwata kilhtamaku kaʼakgchipanit talakgalhin chu linin pi asta lakpuwankgo pi chuna latamat, napatinanaw chu nakatsanajwananaw. Pero uma nipara tsinu tatalakxtumi tuku Dios xlakpuwanit xlakata latamanin.
Xlakata tlakg nalipawanaw tuku malaknunit, wa uma tuku Dios wa xlakata xtachuwin: «Ni katitaspitli komo ni nakgantaxtu, wata namakgantaxti tuku klakaskin, chu xlikana chuna nakitaxtu tuku klimalakgachanit» (Isaías 55:11).
Biblia wan pi Dios «niukxni akgsaninan» (Tito 1:2). Chu komo wa tiku kinkatlawaninitan uma lakstlan tamalaknun, lu xlakaskinka pi nalilakpuwanaw umakgolh takgalhskinin: «¿Xlikana tlan nalatamakan putum kilhtamaku kʼakgtum xastlan Katiyatni? ¿Tuku kilitlawatkan xlakata nalipaxuwayaw putum tuku Dios malaknunit?». Artículos nema stala namakgtayakgoyan natekgsa xtakgalhtin umakgolh takgalhskinin.