2 | “Biblia kinkamaxkiyan litliwakga”

BIBLIA WAN: «Tuku makgasa tsokgwilika, tsokgwilika xlakata nakinkamasiyanikanan, chu kgalhiyaw takgalhkgalhin xlakata xtachuwin Dios nema tatsokgnit kinkamaxkiyan litliwakga chu kinkamakgtayayan natayaniyaw» (ROMANOS 15:4).

¿Tuku kilhchanima?

Biblia lichuwinan tuku tlan kinkamamakgkatsiniyan, tuku kinkamakgtayayan natayaniyaw chu kinkamaxkiyan litliwakga xlakata namakgatlajayaw tuku nitlan kinkamamakgkatsiniyan. Na kinkamalaknuniyan pi nialh makgas namalakgsputukan tuku nitlan kinkamamakgkatsiniyan.

¿La kinkamakgtayayan Biblia?

Putum akinin min kilhtamaku lipuwanaw, pero tiku kgalhikgo tajatat xla talipuwan talakaskin natatayanikgo uma tajatat chali chali. ¿La tlan nakamakgtaya Biblia?

Biblia lhuwa tuku lichuwinan nema tlan kinkamamakgkatsiniyan chu kinkamakgtayayan namakgatlajayaw tuku nitlan makgkatsiyaw (Filipenses 4:8). Kinkamakgtayayan nalimatsamayaw kintalakapastaknikan tuku natlawa pi nialh nalakgaputsayaw (Salmo 94:18, 19).
Biblia tlan nakinkamakgtayayan nialh nalakpuwanaw pi nitu litaxtuyaw (Lucas 12:6, 7).
Biblia lichuwinan pulaklhuwa tuku kinkamasiyaniyan pi ni kiʼakstukan wilaw chu pi kiMalakatsukinakan liwana akgatekgsa tuku makgkatsiyaw (Salmo 34:18; 1 Juan 3:19, 20).
Dios malaknu kBiblia pi nialh katilakapastakparaw tuku nitlan kinkamamakgkatsiniyan (Isaías 65:17; Apocalipsis 21:4). Komo liskujmaw namakgatlajayaw tuku nitlan lakpuwanaw chu tuku makgkatsiyaw, uma tamalaknun nakinkamaxkiyan litliwakga xlakata natayaniyaw.

Biblia makgtaya Jessica

Tuku nitlan kintlawani talipuwan

«Akxni xakkgalhi 25 kata, kaj xalan nialhla ktlawalh tuku xaklismaninit naktlawa chali chali, chu makuchinanin kiwanikgolh pi xakkgalhi tajatat xla talipuwan. Kaj xalan ktsukulh lakapastaka tuku nitlan xaktitaxtunit makgasa nema lu xkimakgalipuwan. Makuchinanin kiwanikgolh pi tuku nitlan xaktitaxtunit makgasa xtlawanit pi nitlan tuku naklakpuwan kimpalakata, chu wa xlakata xakkgalhi tajatat xla talipuwan. Talakaskilh nakimakuchikan chu naktachuwinan chatum makuchina xlakata xkimakgtayalh nakkatsi tuku xtlawa pi nitlan xakmakgkatsilh chu la tlan xaklakgapalilh uma tapuwan».

Biblia lu kimakgtaya

«Akxni lu xkintaliwakani kintalipuwan, lu xakpekuan, lu xaktsuku lakgaputsa chu nila xaklhtata. Akglhuwa tsisni nila xaklhtata xlakata watiya watiya xaklilakpuwan tuku xaklilakgaputsama. Pero chuna la wan Salmo 94:19, Dios kinkamakgoxomixiyan chu tlan kinkamamakgkatsiniyan akxni lakgaputsamaw. Wa xlakata, lakatsu kkimputama xakwilinit Biblia chu maktum libreta niku xakkalhkawilinit textos xalak Biblia nema lu tlan xkimamakgkatsini. Chu akxni nila xaklhtata xakmaklakaskin Biblia xlakata Dios tlan xkimamakgkatsinilh.

»Biblia kinkawaniyan pi kalakgmakgaw nixatlan talakapastakni nema talalakatawaka tuku katsininitaw xpalakata Dios. Akgtum liʼakxilhtit, akit xapulana xaklakpuwan pi nitu xaklitaxtu chu ni xkilakgchan pi wi tiku xkimpaxkilh. Pero kkatsilh pi uma ni wa tuku masiya Biblia. Biblia lichuwinan pi Dios xtachuna la xapaxkina chu xalakgalhamana Tlat tiku kinkalilakgaputsayan kinchatunukan. Tsinu tsinu, ktsukulh lakgpali tuku xaklakpuwan chu nialh kmastalh talakaskin pi tuku nitlan xaklakapastaka nakimakgatlaja. La uku kiʼakxilhkan chuna la Dios kiʼakxilha. Uma kimakgtayanit naklakgmakgan tuku nitlan xaklakpuwan kimpalakata.

»Lu kkgalhkgalhima pi kachilh kilhtamaku akxni nialh nalakapastakaw putum tuku nitlan kinkamamakgkatsiniyan. Liwana kkatsi pi kkilhtamaku nema aku mima putum tajatat xla talipuwan chu xla talakgaputsit nalakgsputkgo, chu uma kimatliwakglha xlakata chuntiya naktatayani kintajatat asta akxni nachin uma kilhtamaku, akxni nialh nakkgalhi tajatat xla talipuwan».