Kaputsaw kachikin nema putum kilhtamaku namakgapala

1. ¿Tuku wa Jesús pi xʼama akgspula Jerusalén kxapulana siglo?

AKXNI nialh lhuwa kilhtamaku xtsankga xlakata Jesús xmakgnika, kalitachuwinalh xtamakgalhtawakgen tuku xʼama la. Uma xapulana kgantaxtulh akxni Jerusalén chu templo kamalakgsputuka kxapulana siglo. Jesús kawanilh pi xʼama min kilhtamaku akxni “lhuwa soldados kstiliwilikgolh Jerusalén” (Luc. 21:20). Kawanilh pi akxni xkgantaxtulh uma, xtsalataxtukgolh. Tuku Jesús wa kgantaxtulh akxni soldados xalak Roma stiliwilikgolh Jerusalén (Luc. 21:​21, 22).

2. ¿Tuku kamalakapastakalh apóstol Pablo kstalaninanin Cristo tiku xlamakgo kJudea chu kJerusalén?

² Akxni nialh akglhuwa kata xtsankga xlakata soldados xalak Roma kstiliwilikgolh Jerusalén, apóstol Pablo katsokgnanilh kstalaninanin Cristo xalak uma kachikin chu tiku xlamakgo kJudea maktum carta niku xkamakatsinima tuku xlakaskinka xlitlawatkan xwanit. La uku lilakgapasaw tuku katsokgnanika Hebreos. Anta kawanilh tuku xkamakgtayalh xlakata xkatsikgolh tuku xtlawakgolh akxni xmalakgsputuka Jerusalén. Komo umakgolh kstalaninanin Cristo xlakgtaxtuputunkgo, xtalakaskin pi xmakgxtakgkgolh xchikkan chu xtaskujutkan. Wa xlakata, akxni Pablo xlichuwinama Jerusalén, tsokgwililh: «Unu ni kgalhiyaw akgtum kachikin nema putum kilhtamaku natawila, wata putsamaw xliputum kinakujkan akgtum kachikin nema nalakkaxwilikan kkilhtamaku nema aku mima» (Heb. 13:14).

3. ¿Tuku kilhchanima kachikin «nema nalakkaxwilikan kkilhtamaku nema aku mima», chu tuku xlakata putsamaw uma kachikin?

³ Max latamanin kalikgalhkgamanankgolh kstalaninanin Cristo akxni tsalataxtukgolh kJerusalén chu kJudea, pero lakgtaxtukgolh xlakata tsalataxtukgolh. La uku, latamanin na kinkalikgalhkgamanankgoyan xlakata ni lipawanaw tumin chu tuku malaknukgo latamanin. ¿Tuku xlakata nichuna tlawayaw? Xlakata katsiyaw pi uma kakilhtamaku namalakgsputukan chu akinin putsamaw «kachikin nema kgalhi xaxlikana xkilhtsukut», «nema nalakkaxwilikan kkilhtamaku nema aku mima». Uma kachikin kilhchanima xTamapakgsin Dios (Heb. 11:10; Mat. 6:33).a Kʼuma artículo, nalichuwinanaw makgapitsi tastakyaw nema Pablo kawanilh hebreos. Naʼakxilhaw la umakgolh tastakyaw kamakgtayalh xapulana kstalaninanin Cristo chuntiya xputsakgolh «kachikin nema nalakkaxwilikan kkilhtamaku nema aku mima». Na na’akxilhaw la kamakgtayalh xlakgtaxtukgolh akxni masputuka Jerusalén chu tuku kinkamasiyaniyan uma kkinkilhtamakujkan.

KALIPAWAW PI JEHOVÁ NIKXNI KINTIKAMAKGXTAKGNI

4. ¿Tuku xlakata kstalaninanin Cristo xlakaskinka xliʼakxilhkgo Jerusalén?

⁴ Kstalaninanin Cristo lu xlakaskinka xliʼakxilhkgo Jerusalén. ¿Tuku xlakata? Xlakata anta kilhtsukulh xapulana congregación kkata 33, chu anta xwilakgo lakgkgolotsin tiku xpulalinankgo. Nachuna, lhuwa kstalaninanin Cristo anta xwilakgo chu lhuwa tuku xtapalh xkgalhikgo. Pero Jesús kawanilh kstalaninanin pi xlitsalataxtutkan xwanit kJerusalén chu kJudea (Mat. 24:16).

5. ¿Tuku tlawalh Pablo xlakata xkamakgtayalh kstalaninanin Cristo skgalalh xtawilakgolh?

⁵ Pablo xlakaskin pi kstalaninanin Cristo skgalalh xtawilakgolh xlakata xtsalataxtukgolh kJerusalén. Wa xlakata kamakgtayalh naʼakgatekgskgo la xʼakxilha Jehová Jerusalén. Kawanilh pi Jehová nialh xasanto xliʼakxilha templo, nipara sacerdotes chu nipara tamakamastan nema xtlawakan anta (Heb. 8:13). Lhuwa latamanin xalak uma kachikin, xlakgmakgankgonit Mesías. Jehová nialh xmakgamakglhtinan takaknin nema xmaxkikan ktemplo xalak Jerusalén chu xʼamaka malakgsputukan (Luc. 13:​34, 35).

6. ¿Tuku xlakata lu kamakgtayalh tuku kawanilh Pablo kstalaninanin Cristo nema tatsokgtawilanit k’Hebreos 13:​5, 6?

⁶ Akxni Pablo katsokgnanilh hebreos, Jerusalén akgtum xlakaskinka kachikin xwanit. Chatum tsokgna xalak Roma tiku xwanikan Plinio wa pi “Jerusalén wa kachikin nema tlakg xlakgapaskan k’Oriente” (Historia Natural, libro V, traducción de Gerónimo de Huerta). Akgatunu kata, lhuwa judíos xalak atanu kachikin xʼankgo kJerusalén xlakata xmakgtlawakgolh paskua, chu wa xlakata tiku xlamakgo anta xtlajakgo lhuwa tumin. Makgapitsi kstalaninanin Cristo na xtlajakgo lhuwa tumin, chu max wa uma tuku xpalakata Pablo kawanilh: «Ni lu kakgalhiputuntit tumin kmilatamatkan, chu kalipaxuwatit tuku kgalhiyatit». Chu alistalh lichuwinalh tuku wan Tatsokgni xlakata xkamalakapastakalh xtamalaknun Jehová: «Nikxni ktimakgxtakgni chu ankgalhin nakmakgtayayan» (kalikgalhtawakga Hebreos 13:​5, 6; Deut. 31:6; Sal. 118:6). Uma tastakyaw lu xʼama kamakgtaya kstalaninanin Cristo xalak Jerusalén chu kJudea. ¿Tuku xlakata? Xlakata nialh makgas xʼama talakaskin pi xmakgxtakgkgolh xchikkan, xtaskujutkan chu tuku lhuwa xtapalh xkgalhikgo. Xʼama talakaskin pi xʼankgolh latamakgo kʼalakatanu kachikin niku nitu xkgalhikgo, chu uma lu tuwa xʼama kakitaxtuni.

7. ¿Tuku xlakata talakaskin pi lata uku tlakg nalipawanaw Jehová?

⁷ ¿Tuku kinkamasiyaniyan? Xtachuna la kstalaninanin Cristo xalak pulana siglo, talakaskin skgalalh natawilayaw (Luc. 21:​34-36). ¿Tuku xlakata? Xlakata nialh makgas natsuku «lhuwa tapatin» chu namalakgsputukan uma kakilhtamaku (Mat. 24:21). Akxni lama nawan lhuwa tapatin, max natalakaskin namakgxtakgaw makgapitsi tuku kgalhiyaw o putum tuku kgalhiyaw chu natalakaskin nalipawanaw pi Jehová nikxni kintikamakgxtakgni. Pero la uku, maski nina tsuku lhuwa tapatin, talakaskin nalimasiyayaw la xlilhuwa lipawanaw Jehová. Kalilakpuwaw: «¿Limasiya tuku klaksaka chu tuku ktlawaputun pi ni klipawan tumin, wata klipawan pi Dios nakinkuentajtlawa chuna la xla malaknunit?» (1 Tim. 6:17). Tuku titaxtukgolh kstalaninanin Cristo kxapulana siglo, kinkamakgtayayan nakatsiyaw tuku natlawayaw kkilhtamaku nema aku mima. Maski chuna, na katsiyaw pi akxni lama nawan lhuwa tapatin natitaxtuyaw tuku tuwa nema nikxni chuna lanit. Wa xlakata, akxni lama nawan lhuwa tapatin, ¿la nalikatsiyaw tuku kilitlawatkan nawan?

KAKAKGALHAKGAXMATWI TIKU KINKAPULALINKGOYAN

8. ¿Tuku kawanilh Jesús xtamakgalhtawakgen pi xlitlawatkan xwanit?

⁸ Akxni nina makgas xtitaxtunit lata Pablo xkamalakgachaninit xcarta hebreos, soldados xalak Roma stiliwilikgolh Jerusalén. Akxni kstalaninanin Cristo akxilhkgolh uma, akgatekgskgolh pi xlitsalatkan xwanit xlakata Jerusalén xʼamaka malakgsputukan (Mat. 24:3; Luc. 21:​20, 24). Pero ¿niku xʼamakgo tsalakgo? Jesús kajwatiya xkawaninit: «Tiku wilakgolh kJudea katsalakgolh kkasipijni» (Luc. 21:21). Pero lakatsu kJerusalén xwilakgo lhuwa kasipijni. Wa xlakata, ¿niku kkasipijni tlan xtsalakgolh?

9. ¿Tuku max xlakata kstalaninanin Cristo xlilakpuwamakgo niku xlitsalatkan xwanit? (Na kaʼakxilhti mapa).

⁹ Kstalaninanin Cristo lakalhuwa niku tlan xtsalakgolh. Max tlan xtsalakgolh kxkasipijni Samaria, kxkasipijni Galilea, ksipi Hermón, kxkasipijni Líbano, chu kkasipijni nema xwilakgo pakganacha kkgalhtuchokgo Jordán (kaʼakxilhti mapa). Makgapitsi kachikinin nema xwilakgo kʼumakgolh kasipijni xtasiya pi nitila xʼama kaʼakgchipa. Akgtum kachikin wa Gamala, nema xwi kxʼakgspun akgtum sipi nema lu tuwa xchankan. Makgapitsi judíos lakpuwankgolh pi uma kachikin akgtum tlan putatsekgni xwanit. Pero romanos akgchipakgolh chu malakgsputukgolh Gamala, chu lhuwa tiku xlamakgo anta, nikgolh.b

10, 11. 1) ¿Tuku tlawalh Jehová xlakata xkapulalilh xkachikin? (Hebreos 13:​7, 17). 2) ¿La kakitaxtunilh tiku kgalhakgaxmatnankgolh? (Na kaʼakxilhti dibujo).

¹⁰ ¿La likatsikgolh kstalaninanin Cristo niku xlitsalatkan xwanit? Max Jehová kamaklakaskilh tiku xpulalinankgo kcongregación xlakata xkapulalilh. Titaxtulh kilhtamaku, historiador Eusebio tsokgwililh pi Dios «kamakatsinilh tiku xpulalinankgo amacha kilhtamaku» pi xkalimapakgsikgolh congregación xalak Jerusalén pi «xtsalakgolh akxni nina xtsuku guerra chu xʼankgolh latamakgo kPella, akgtum kachikin xalak Perea» (Historia eclesiástica, tomo I, traducción de George Grayling). Pella o Pela akgtum tlan putatsekgni xwanit. Lakatsu xwi kJerusalén chu ni lu tuwa xchankan. Nachuna, lhuwa latamanin tiku xwilakgo kʼuma kachikin ni judíos xwankgonit chu ni xkatatayakgo judíos tiku xkatalalakatawakamakgo romanos (kaʼakxilhti mapa).

¹¹ Pablo katsokgnanilh kstalaninanin Cristo: «Kakakgalhakgaxpattit tiku kapulaliman» (kalikgalhtawakga Hebreos 13:​7, 17). Tiku kgalhakgaxmatnankgolh chu tsalakgolh kʼumakgolh kasipijni, lakgtaxtukgolh. Dios nikxni kamakgxtakgli tiku xkgalhkgalhimakgo «kachikin nema kgalhi xaxlikana xkilhtsukut», xTamapakgsin Dios (Heb. 11:10).

12, 13. ¿La pulalinit Jehová xkachikin akxni titaxtunit tuku tuwa?

¹² ¿Tuku kinkamasiyaniyan? Jehová kamaklakaskin tiku kinkapulalinkgoyan xlakata nakinkawaniyan tuku kilitlawatkan. Biblia lichuwinan pi Jehová kamaklakaskilh lakchixkuwin xlakata nakapulalin xkachikin akxni xtitaxtumakgo tuku lu tuwa (Deut. 31:23; Sal. 77:20). La uku liwana akxilhaw pi Jehová chuntiya kamaklakaskima lakgkgolotsin xlakata nakinkapulalinkgoyan.

¹³ Kalilakpuwaw uma, akxni tsukulh pandemia xla COVID-19, tiku kinkapulalinkgoyan liwana kinkawanikgon tuku kilitlawatkan xwanit. Lakgkgolotsin xalak congregación kawanika tuku xlitlawatkan xwanit xlakata xkamakgtayakgolh natalan chuntiya natamakxtumikgo chu nakakninanikgo Jehová. Ni makgas kilhtamaku titaxtulh, tlawaw akgtum asamblea regional nema nikxni chuna xtlawanitaw, xlakata matitaxtika kʼinternet, ktelevisión chu kradio kliwaka 500 tanu tanu tachuwin. Maski xʼanan pandemia, Jehová chuntiya kinkamakatsinin tuku kilitlawatkan xwanit, chu uma kinkamakgtayan makxtum xtawilaw. Kaxatukawa tuku nala kkilhtamaku nema aku mima, liwana kakatsiw pi Jehová chuntiya nakamakgtaya tiku kinkapulalinkgoyan xlakata tlan tuku nalaksakkgo. Pero ni kajwatiya talakaskin nalipawanaw Jehová chu nakgalhakgaxmatnanaw. ¿Tuku atanu kilitlawatkan xlakata nakatsiyaw tuku natlawayaw akxni lama nawan lhuwa tapatin?

KALALIMASIYANIW TAPAXKIT CHU TLAN KALAMAKGAMAKGLHTINAW

14. Chuna la wan Hebreos 13:​1-3, ¿tuku tayat xtalakaskin xlalimasiyanikgolh kstalaninanin Cristo chuna la xtalakatsuwitilhama akxni x’amaka malakgsputukan Jerusalén?

¹⁴ Akxni natsuku lhuwa tapatin, tlakg natalakaskin nalalimasiyaniyaw tapaxkit. Natalakaskin nastalaniyaw xliʼakxilhtitkan kstalaninanin Cristo tiku latamakgolh kJerusalén chu kJudea. Xlakan xlapaxkikgoya (Heb. 10:​32-34). Pero chuna la xtalakatsuwitilhalh kilhtamaku akxni xʼamaka malakgsputukan Jerusalén, xtalakaskin tlakg tlan xlalikatsinilh chu xlalimasiyanilh «tapaxkit xtachuna nema lakgalhinikan kfamilia» (kalikgalhtawakga Hebreos 13:​1-3). Chu nachuna kilitlawatkan nawan akxni lama nawan lhuwa tapatin.

15. ¿Tuku xlakata xtalakaskin pi kstalaninanin Cristo tlan xlalikatsinilh chu xlapaxkilh xtachuna la xpaxkikgo tiku xalak xfamiliajkan akxni taxtukgolh kJerusalén?

¹⁵ Akxni soldados xalak Roma kstiliwilikgonit Jerusalén chu kaj xalan tapanukgolh, kstalaninanin Cristo tsalataxtukgolh. Pero ni lhuwa tuku linkgolh, kajwatiya linkgolh tuku lu xmaklakaskinkgo (Mat. 24:​17, 18). Talakaskilh pi lu xlamakgtayakgolh ktiji. Chu akxni xchankgolh kPela na xtalakaskin pi xlataputsakgolh niku xtawilakgolh chu xlamakgtayakgolh natekgskgo tuku xlimakgskujkgolh. Lhuwa natalan max xmaklakaskinkgo pi xkalimakgtayaka liwat, lhakgat chu niku xtawilakgolh. Akxni lalimakgtayakgolh tuku xkgalhikgo, limasiyakgolh pi tlan xlalikatsini chu xlikana xlapaxki chuna la xkapaxkikgo tiku xalak xfamiliajkan (Tito 3:14).

16. ¿La tlan nakalimasiyaniyaw tapaxkit natalan? (Na kaʼakxilhti dibujo).

¹⁶ ¿Tuku kinkamasiyaniyan? Tapaxkit kinkamakgpuwantiniyan nakamakgtayayaw kinatalankan akxni maklakaskinkgo. Lhuwa kskujnin Jehová xatapaxuwan kamakgtayakgonit natalan tiku ankgonit latamakgo alakatanu xlakata kxkachikinkan anan guerra o wi tuku masputunalh. Kamakgtayakgo chuntiya naskujnanikgo Jehová chu kamaxkikgo tuku maklakaskinkgo. Chatum tala puskat tiku tsalataxtulh kʼUcrania xlakata lama guerra, wa: «Kakxilhnitaw la Jehová kinkapulalinitan chu kamaklakaskinit natalan xlakata nakinkamakgtayayan. Lu kaks kinkamalakawaniyan la kinkamakgamakglhtinankgonitan chu kinkamakgtayakgonitan natalan xalak Ucrania, xalak Hungría..., ¡chu la uku, tiku xalak Alemania!». Akxni tlan kamakgamakglhtinanaw natalan, mastayaw talakaskin pi Jehová nakinkamaklakaskinan xlakata nakakuentajtlawa (Prov. 19:17; 2 Cor. 1:​3, 4).

17. ¿Tuku xlakata lu xlakaskinka pi lata uku nalapaxkiyaw chuna la kapaxkiyaw tiku xalak kifamiliajkan chu tlan nalamakgamakglhtinanaw?

¹⁷ La uku lu xlakaskinka pi nalamakgtayayaw chatunu akinin, pero kkilhtamaku nema aku mima tlakg natalakaskin nalamakgtayayaw (Hab. 3:​16-18). Wa xlakata Jehová kinkamasiyaniman nalapaxkiyaw xtachuna la kapaxkiyaw tiku xalak kifamiliajkan chu tlan nalamakgamakglhtinanaw. Tlakg natalakaskin nalimasiyayaw umakgolh tayat akxni lama nawan lhuwa tapatin.

¿TUKU NALA KKILHTAMAKU NEMA AKU MIMA?

18. ¿La tlan nastalaniyaw xliʼakxilhtitkan kstalaninanin Cristo tiku hebreos xwankgonit?

¹⁸ Kstalaninanin Cristo tiku tsalakgolh kkasipijni, lakgtaxtukgolh akxni masputuka Jerusalén. Maski makgxtakgkgolh xkachikinkan, Jehová nikxni kamakgxtakgli. ¿La tlan nastalaniyaw xliʼakxilhtitkan? Akinin na ni katsiyaw putum tuku nala kkilhtamaku nema aku mima. Pero chuna la umakgolh kstalaninanin Cristo, skgalalh kilitawilatkan xlakata nakatsiyaw tuku natlawayaw, chuna la wa Jesús (Luc. 12:40). Na kgalhiyaw carta nema Pablo katsokgnanilh hebreos nema tlan nakinkamakgtayayan asta la uku. Jehová na kinkamalaknuninitan pi nikxni kintikamakgxtakgni (Heb. 13:​5, 6). Wa xlakata, chuntiya kaputsaw kachikin nema putum kilhtamaku namakgapala, xTamapakgsin Dios. Komo chuna natlawayaw, namakglhtinanaw lhuwa tasikulunalin putum kilhtamaku (Mat. 25:34).