Ol i Gat Strongpela Bilip

DISPELA em i het-tok long wanpela nius bilong Buenos Aires (Crónica) bilong Disemba 7, 1990, i stori long wanpela kibung bilong ol Witnes Bilong Jehova i kamap long tupela stediam bilong pilai soka (em River Plate na Vélez Sarsfield). Tru tumas, em dispela strongpela bilip i bin kirapim bikpela lain Witnes bilong 20 kantri samting, em ol inap olsem 6,000, na ol i kam long dispela longwe ples long Ajentina bilong bung wantaim planti tausen brata Kristen bilong ol long “Gutpela Tok Ples” Kibung. I gat sampela kongrigesen bilong ol Witnes bilong Korea long Ajentina na ol tu i kam long dispela kibung. Ol Witnes bilong ol narapela kantri i kam long dispela kibung ol i bilong Inglan, Kanada, Sili, Japan, Spen, Not Amerika (na Alaska), na planti ol narapela kantri. Wanem samting i bin kirapim ol na ol i kam? Ol i gat bikpela laik long helpim dispela kibung, em namba 2 kibung intenesenel i kamap long Ajentina.

Ol i Dediketim Nupela Haus Betel

Tasol taim dispela kibung i no kamap yet, ol i bin mekim planti bikpela wok i kamapim dispela strongpela bilip bilong ol. Long mun Oktoba wanpela bilong Lain Bilong Bosim Ol Witnes, em Theodore Jaracz, em i kam na mekim wanpela tok bilong dediketim nupela brens-ofis bilong Ajentina. Inap 259 Witnes bilong ol narapela narapela kantri na 690 bilong Ajentina yet ol i bin wokim dispela bikpela haus Betel, olsem “Haus Bilong God.” Dispela haus i gat 129 rum slip na wanpela bikpela rum kaikai em inap long 300 manmeri. Winim 84,000 Witnes ol i stap long Ajentina, tasol ol samting i kamap i makim olsem lain Witnes bai i go bikpela moa yet long dispela hap. Olsem na ating i no longtaim na ol bai inapim olgeta rum slip insait long dispela nupela haus brens.

“Gutpela Tok Ples” Bilong Ol Witnes Bilong Jehova

Planti manmeri, na sampela man bilong kisim tok bilong ol nius tu, ol i kirap nogut long nem bilong dispela kibung intenesenel, olsem “Gutpela Tok Ples” Kibung. Aninit long het-tok “Gutpela Tok Ples Bilong Ol Witnes Bilong Jehova,” dispela nius i kamapim wanpela hap tok bilong kibung long insait bilong dispela tok “gutpela tok ples,” olsem: “Insait tru bilong en, em stretpela save long God na long ol samting em i laik mekim long dispela graun na ol man, olsem Baibel i kamapim. . . . Taim man i lain pinis long mekim dispela gutpela tok ples, em nau, olgeta tingting na toktok na pasin bilong em i kamapim bilip bilong em, em i bilip olsem God em wanpela tasol i God tru.”

Biktaun Buenos Aires i gat olsem 10 milion manmeri long en, na ol i save i gat wanpela kibung i kamap long dispela biktaun bilong ol. Lo bilong kantri i orait long ol i ken putim toksave long redio na televisen na i no gat pe bilong en, olsem na inap 6-pela de ol i putim toksave bilong dispela kibung. Ol nius i stori long baptais i bin kamap long Sarere bilong dispela kibung, em ol nupela Witnes i kisim baptais. Ol i putim 3-pela 3-pela liklik raunwara long arere arere bilong tupela stediam, tasol dispela 12-pela raunwara i no inap long olgeta i ken kisim baptais paslain long taim bilong kirapim program bilong apinun. Olsem na ol liklik raunwara bilong wanpela stediam (River Plate) ol i putim long baksait na bai ol man i no inap lukim. Long dispela stediam inap 1,363 ol i kisim baptais, na long narapela stediam (Vélez Sarsfield) i gat 748 i kisim baptais​—bungim tupela namba wantaim, em i kamap olsem 2,111! Nius (Crónica) i raitim bikpela het-tok olsem: “Narapela Bikpela Samting Bilong Kamapim Strongpela Bilip i Kamap Long River na Vélez​—Ol Witnes i Kisim Baptais.” Winim 67,000 manmeri ol i bung long dispela tupela kibung.

Ol i Bilong Kain Kain Ples

Sapos yu stap long dispela kibung, yu inap lukim ol manmeri bilong kain kain ples na skin, em ol i gat ol bilas na pasin bilong ples bilong ol. Em wanpela sista bilong Ajentina i stap​—em i holim wanpela kap diwai na i dring wanpela kain ti bilong ol, ol i kolim yerba maté, na em i pulim ti long wanpela liklik paip ol i kolim bombilla. I gat 800 Witnes bilong Spen i kam, na sampela sista bilong Spen ol i putim ol gutpela bilas bilong ples bilong ol. Na i gat 900 bilong Japan ol i kam, na sampela sista ol i putim ol bilas bilong Japan yet, ol i kolim kimono. Wanpela Witnes bilong Meksiko i putim blakpela saket na trasis na bikpela hat bilong ol Meksiko. Tasol maski ol i gat ol narapela narapela kain skin na bilas bilong ol, olgeta i stap wanbel long ol samting bilong spirit, na dispela pasin wanbel i stap ples klia tru. Taim kibung i pinis, planti ol i wok long givim ol liklik samting long narapela narapela bilong karim i go bek long ples​—olsem ol liklik kat bilong kibung bilong pasim long klos, na ol pen bilong rait, na ol kat bilong raitim pas long en​—em bilong kirapim ol long tingim dispela gutpela kibung.

Dispela pasin wanbel i stap yet long ol taim ol i go long ol ples balus bilong kisim balus bilong ol. Dispela pasin i kamap ples klia long Maiami long Florida, long hap bilong Not Amerika​—planti lain Witnes bilong ol narapela narapela kantri ol i mas lusim balus long dispela hap na kisim narapela balus gen bilong i go long ples bilong ol, na taim narapela lain i bungim narapela lain, ol i amamas tru. Wanpela bikpela lain Witnes bilong Not Amerika i lusim Buenos Aires na ol i pundaun long wanpela hap na ol i bungim wanpela lain Witnes bilong Japan em ol i laik i go long Meksiko. Ol dispela Witnes bilong Japan i amamas tru long lukim ol Witnes bilong Amerika na ol i ran i go long ol na holim ol. Ol man i stap long ples balus ol i kirap nogut long lukim dispela samting ol Witnes i mekim. Ol i no save, dispela “gutpela tok ples” i mekim na ol Witnes i stap wanbel, maski ol i bilong narapela narapela kantri o skin!

Ol tok i bin kamap long kibung, na pasin wanbel i stap namel long ol Witnes bilong ol narapela narapela hap, dispela i kirapim tru bel bilong ol. Olsem na taim kibung i pinis long Sande, olgeta i no laik lusim stediam hariap. Ol lain Witnes bilong ol narapela narapela tok ples ol i kirap mekim ol singsing bilong Kingdom long tok ples bilong ol yet, na ol i holim hankesip na mekim olsem ol i tromoi han long ol lain Witnes bilong ol narapela tok ples. Ol i mekim olsem klostu olsem wanpela aua, na bihain ol i lusim tupela stediam na i go bek long ples bilong ol. Wanpela man bilong kisim piksa bilong putim long ol nius samting, em man Ajentina, em i lukim dispela pasin amamas na wanbel i stap namel long ol na em i tok: “Bipo mi no bin lukim dispela pasin long Ajentina . . . bel bilong ol i kirap tru, na narapela i laikim tumas narapela!”

[Ol Piksa long pes 17]

Winim 67,000 ol i bung long tupela “ Gutpela Tok Ples” Kibung bilong ol Witnes Bilong Jehova long Buenos Aires, long Disemba 6 i go 9, 1990

[Ol Piksa long pes 18]

Nupela brens-ofis bilong Ajentina i redi pinis long mekim wok bilong helpim olsem 84,000 Witnes ol i stap long dispela hap