Sili—Narapela Kain Kantri, Narapela Kain Kibung

PLANTI tausen i kam long Santiago, biktaun bilong Sili. Maski i gat 4 milion man i sindaun long dispela taun, ol i save wanpela bikpela lain i kam long taun bilong ol. Olgeta long dispela lain i pasim liklik blupela kat i gat nem bilong 1993 “God i Skulim Yumi” Kibung Bilong Ol Witnes Bilong Jehova.

Winim 400 Witnes i kam long Japan na winim 700 i kam long Amerika. Winim wan tausen i lusim ples klostu, em Ajentina, na kam long balus na rot. Bihain long kibung, nius La Tercera i stori olsem: ‘Ol man i bung long Nesenel Stediam i bilong kain kain ples na skin​—waitskin, braunskin, yeloskin, blakskin. Na ol Witnes bilong Meksiko, Brasil, Peru, Bolivia, Veneswela, Spen, Japan, ol tu i kam long kibung, em ol i gat ol bilas bilong ples bilong ol.’ Na planti Witnes i kam long Beljam, Briten, Frans, Holan, Jemani, Kanada, Ostrelia, Paragwai, Swiselan, na planti kantri moa bilong Saut Amerika. Long wik bilong Novemba 15, 1993, winim 4,500 Witnes bilong ol narapela kantri i kam long Santiago. Na 30,000 Witnes bilong Sili ol i kam long ol longwe ples. Bilong wanem ol i kam long Santiago?

Sili​—Narapela Kain Kantri

Olsem wanem Sili i narapela kain kantri? Lukim wanpela mep na bai yu save Sili em i wanpela longpela hap graun i no braitpela tumas. Longpela bilong en i olsem 4,310 kilomita, na hap bilong en i bikpela liklik em i braitpela inap 440 kilomita. Ol narapela hap bilong en i braitpela inap 180 kilomita tasol. Santiago em biktaun bilong Sili na em i stap namel long dispela hap. Olsem na bilong kamap long kibung intenesenel planti tausen Witnes bilong Sili wantaim famili bilong ol, ol i mas wokabaut planti handet kilomita, na planti bilong ol i rabis. Tasol ol i amamas long kam na pes bilong ol i lait.

Sili i gat kain kain gutpela samting. Ples wesan Atakama i stap long hap bilong not, na ol hap klostu long Santiago i gat ol gutpela gaden wain. Long hap saut i gat ol maunten Andis em ol diwai i karamapim, na ol i save go daun long solwara Pasifik. Long ol hap i go inap long Antaktika i gat ol maunten ais na ol bikpela maunten i go antap na ol baret bilong en i daun moa na solwara i kam insait long en.

Ol Witnes bilong ol narapela kantri i kirap nogut long biktaun Santiago. Wanpela i tok: ‘Maski i gat planti man na ol i go i kam olsem ol i no inap malolo, ol i mekim gutpela pasin pren. Bipo mi no bin lukim planti planti bas i go i kam long wanpela rot olsem mi lukim long dispela hap. I gat planti kampani bas na ol i resis long kisim ol pasindia. Na long olgeta hap i gat ol liklik teksi i spit i go nabaut. Wanpela samting i no gutpela tumas em smok bilong ol bas na ka samting i bagarapim win. Bilong stretim dispela hevi i gat lo long Santiago olsem: Ol ka i gat wanem wanem namba long laisens-plet bilong en, ol i mas raun long de stret dispela lo i makim​—ol i no ken abrusim na raun long narapela de. Olsem na i no gat planti ka i raun long olgeta de. Mi amamas long lukim ol pikinini i go long skul ol i bilas gut na pasim skul yunifom, i no gat wanpela skulmanki i no mekim olsem. Em gutpela, long wanem, narapela i no resis wantaim narapela long pasim ol klos i gat stail stret o long pasim bikpela su bilong spot i gat rop bilong pasim! Na i no gat wanpela i no mekim gut skin.’

Ol i Amamas Long Ol Narapela Man

“God i Skulim Yumi” kibung i kirap long Fonde, Novemba 18, 1993. Ol Witnes bilong ol narapela kantri i kam long kibung ol i kirap nogut taim ol i kamap long Nesenel Stediam. Taim ol i lusim bas bilong ol na wokabaut olsem 270 mita bilong kamap long stediam, ol i mas wokabaut namel long ol man meri pikinini Witnes bilong Sili, em ol i pas pas na lain i stap bilong tok amamas na sekanim ol. Planti bilong ol i bin lain long liklik tok Inglis olsem: “Welcome to Chile!” (“Mipela amamas yu kam long Sili!”) Inap 4-pela de ol i kibung na maski planti i no save long tok ples bilong narapela narapela, pasin pren i kamap namel long ol. Ol kamera na video-kamera i no malolo. Planti i wok long givim nem na atres long narapela narapela na bihain ol i ken raitim pas, o ol i givim liklik samting olsem presen long narapela narapela bilong karim i go bek long ples.

Planti Man

Ol i ting 60,000 bai kam long kibung​—44,000 Witnes bilong Sili na 4,500 Witnes bilong ol narapela kantri, na ol man i laik harim tok bilong Baibel. Olsem na ol i kirap nogut tru taim planti man i bung long Fonde na Fraide​—winim 50,000. Long Sarere 67,865 i bung long moningtaim na 70,418 long belo bek. Long moningtaim Sande 80,981 i bin lukim wanpela pilai bilong Baibel! Dispela pilai i bin kamapim sampela hevi ol Witnes i mas winim long nau. Stediam i pulap tru na sampela man i mas sindaun ausait na harim tok long ol bikmaus. I no gat narapela “God i Skulim Yumi” kibung i gat planti man i bung wantaim olsem dispela kibung long Sili, olsem na kibung long Sili i narapela kain. Ol Witnes bilong Sili i kirap nogut tru long bikpela lain i bung. Dispela i makim olsem lain Witnes long Sili inap i go bikpela moa yet.

Stediam i gat wanpela bikpela notisbot i wok long paua. Het-tok bilong olgeta tok bilong kibung i bin kamap long dispela notisbot long tok Spen na Inglis. Taim kibung i pinis, tok gutbai i kamap long dispela notisbot long planti tok ples, na sampela bilong ol dispela tok ples em tok Frans, Holan, Japan, Jeman.

Baptais i Kamap Long Ol Nius

Dispela kibung i narapela kain tru na i pulim ol niusman i kam. Olsem na long olgeta de ol nius, redio, televisen, i bin stori gut long en. Na ol i stori gut long baptais i bin kamap long Sarere, long wanem, planti i bin kisim baptais. Ol i putim 12-pela liklik tang wara long wanpela hap bilong stediam. Long taim bilong tok bilong baptais, sampela handet nupela Witnes i sanap bilong makim olsem ol i laik bihainim Krais na mekim laik bilong God Jehova. Taim tok na beten na singsing i pinis, 24 wokman bilong God, em ol i pasim waitpela trasis na T-siot, ol i kam na sanap klostu long ol liklik tang wara​—tupela tupela long olgeta tang wara. Na sampela meri tu i kam bilong mekim sampela wok. Nau ol man i laik kisim baptais i wokabaut i kam​—ol man long narapela hap na ol meri long narapela hap​—tupela longpela lain i olsem i no gat pinis bilong en. Insait long wanpela aua 1,282 nupela Witnes i bin kisim baptais. Ol i kisim baptais olsem Jisas i bin kisim​—ol i go insait tru long wara.

Tok Gutbai

Mun Novemba em taim bilong san long Sili, olsem na long taim bilong kibung i no gat ren. Long Sande i gat bikpela san olsem 30 digri Selsias. Klostu olgeta famili i sindaun aninit long ambrela bilong pasim san. Ol dispela planti tausen tausen ambrela i gat kala kala ol i olsem planti tausen bataplai i sindaun long ol plaua. Laspela tok bilong kibung i pinis long 5 klok apinun. Taim singsing na beten i pinis, olgeta i no laik lusim stediam hariap. Ol i no laik bai kibung i pinis. Sampela Witnes i kirap mekim ol singsing bilong Kingdom long tok ples bilong ol yet; long olgeta hap bilong stediam ol i amamas na paitim han; ol i holim hankisip na mekim olsem ol i tromoi han; sampela i tantanim ambrela bilong ol. Na baksait long stediam i gat ol maunten Andis, na ol Kristen i pulap long stediam, em ol i amamas na narapela i laikim tru narapela. Man! Em i gutpela samting tru bilong lukim. Ol i amamas long “God i Bin Skulim Ol,” olsem na nau i stap bilong ol i narapela kain.

Long taim bilong kibung long Sande, tupela bikpela pisin i raun long gras i stap arere long stediam bilong painim kaikai. Wan wan taim ol i singaut na dispela i katim sampela tok bilong kibung. Long laspela tok bilong kibung ol i mekim olsem ol i save kibung i laik pinis nau. Isi isi ol i flai i go antap, raunim stediam, na flai i go olgeta. Ating bihain ol bai kam bek long dispela stediam, olsem ol Witnes Bilong Jehova bai amamas long kam bek long narapela yia na kibung gen long Sili​—em dispela kantri i narapela kain. Tru tumas, ol bai amamas long kamapim gen bilip na amamas bilong ol.

[Ol Piksa long pes 17]

Winim 80,000 i bung long kibung long Santiago

[Piksa long pes 18]