Husat i Wokim Nektai Pastaim?
WANPELA MAN LONG JEMANI I RAITIM DISPELA STORI BILONG KIRAP!
LONG olgeta hap, inap olsem 600 milion man i save pasim nektai long olgeta taim. Long Jemani, planti man i gat olsem 20 nektai samting. Planti man, taim ol i pasim nektai, ol i no amamas na ol i tok: ‘Em tingting bilong husat long wokim nektai?’ Nektai i bin kirap we?
Ol i tok, nektai i bin kirap pastaim long wanpela taun long Beljam, em Stinkerk. Long yia 1692, ol soldia bilong Frans i bin stap long dispela taun na wantu ol soldia bilong Inglan i kam pait long ol. Wanpela nius bilong Jemani (Frankfurter Allgemeine Sonntagszeitung) i tok: ‘Ol ofisa bilong Frans i no gat taim bilong pasim gut klos. Kwiktaim ol i pasim bikpela hankisip bilong yunifom long nek olsem long pasin bilong pasim nektai, na subim arere bilong en i go insait long saket. Voilà, [em nau], nektai i kamap!’
Tasol dispela narakain pasin bilong ol soldia long pasim bikpela hankisip long nek, i no nupela pasin. Ol saveman i tok, inap planti handet yia paslain long dispela taim, ol soldia bilong King Seng (Si Huang Ti) bilong Saina, ol i bin pasim wanpela kain bikpela hankisip long nek, na dispela i makim olsem ol i gat namba.
Tasol ating ol bikpela hankisip i gat nem, em hankisip ol Kroesia i bin pasim taim ol i pait bilong helpim King Lui Namba 14 bilong Frans. Bihain long ol i winim pait, ol i mats long Paris. Ol Frans i kirap nogut long lukim bikpela hankisip ol Kroesia i pasim, na ol i givim nem kravat long en—em nem ol i save kolim long wanpela man Kroesia. Na ol tu i kirap na pasim dispela kain nektai. Nius i tok: “Kirap long dispela taim olgeta man i amamas long pasim nektai. Tasol ol soldia long Stinkerk ol i namba wan lain bilong wokim buk long bikpela hankisip na hankisip i kamap nektai.”
Taim wanpela pait i kamap long Frans (1789-1799), kala bilong hankisip wanpela man i save pasim long nek, em i makim wanem lain politik em i save laikim. Bihain long yia 1800, ol man bilong Yurop i save laikim ol gutpela klos, ol i kisim save long dispela kain bilas. Em nau, kravat i no wanpela samting ol soldia na ol man politik tasol i save pasim; planti man i kirap na pasim. Long nau, planti man long olgeta hap i save pasim nektai; long sampela ples na long sampela taim, i gat lo olsem man i mas pasim nektai.
[Piksa Kredit Lain long pes 30]
Historic Costume in Pictures/Dover Publications, Inc., New York