Gutpela Samting Mi Wetim i Strongim Mi Long Karim Ol Hevi

EM STORI BILONG MICHIKO OGAWA

Long Epril 29, 1969, polis i ringim mi. Man bilong mi, Seikichi, em i bin kisim bagarap long rot na em i slip long haus sik. Mi lusim tupela pikinini man bilong mi wantaim wanpela pren na mi siksti i go long haus sik. Kirap long dispela taim i kam inap nau skin olgeta bilong Seikichi i dai na tingting bilong em i no bin kirap gen. Mi laik stori long famili bilong mipela na olsem wanem mipela i bin karim dispela hevi.

MAMA i karim mi long Februeri 1940 long Sanda, klostu long Kobe, Japan. Kirap long taim mipela i bin go long pilai-skul bilong ol liklik pikinini, mi save long Seikichi na em i save long mi. Mipela i marit long Februeri 16, 1964. Man bilong mi em i no man bilong toktok, tasol em i laikim tru ol pikinini. Bihain, mipela i kamapim tupela pikinini man, Ryusuke na Kohei.

Seikichi i wok long wanpela kampani bilong sanapim ol haus long Tokyo, olsem na taim mipela i marit pinis, mipela i sindaun long wanpela hap bilong dispela biktaun. Long Oktoba 1967, wanpela yangpela meri i kam long haus bilong mipela, na em i tok em i save lainim ol man long Baibel. Mi tokim em: “Mi no laik. Mi gat Baibel bilong mi yet.”

Em i askim mi olsem: “Mi inap lukim Baibel bilong yu?”

Mi kisim Baibel long kabot bilong mipela na givim long em​​—⁠em Baibel bilong Seikichi. Meri i soim nem Jehova long dispela Baibel. Mi no bin save olsem dispela em nem bilong God. Dispela meri i lukim tupela liklik pikinini bilong mi, na em i ritim dispela tok bilong Baibel long mi: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.” (Sindaun 22:⁠6) Mi bin tingting long olsem wanem mi ken mekim bikpela long ol pikinini bilong mi bambai ol i ken kamap gutpela man. Olsem na wantu mi laik stadi long Baibel.

Mi singautim dispela meri i kam insait, na mipela i kirap toktok long buklet “Harim! Mi Mekim Olgeta Samting i Kamap Nupela.” Mi tingting, ‘Em bai gutpela tru sapos mipela famili inap i stap amamas!’ Taim Seikichi i kam long haus, mi tokim em olsem: “Mi laik stadi long Baibel.”

Em i tok: “Lewa bilong mi, i no olsem yu mas kisim planti save. Mi bai helpim yu long save long ol samting yu laik save long en.” Tasol mi kirap stadi long Baibel wantaim ol Witnes Bilong Jehova long olgeta wik, na i no longtaim na mi kirap long i go long ol miting bilong ol.

Kirap Bilong Ol Hevi Bilong Mipela

Taim mi kamap long haus sik long nait long Epril 1969 olsem mi stori pinis long en, mi kirap nogut long save olsem pren bilong Seikichi​—⁠em man bilong dispela meri mi bin lusim tupela pikinini man bilong mi wantaim em​—⁠em tu i bin stap long teksi taim bagarap i painim ol. Bihain long wanpela wik, dispela pren bilong man bilong mi em i dai.

Long dispela nait ol nes i tokim mi long askim ol pren na famili long kam lukim Seikichi, long wanem, ol i ting bai em i dai. Bun daunbilo long het bilong em i bruk na mit bilong kru i bagarap. Long de bihain, ol wanblut i stap long hap bilong Kobe ol i kam hariap long haus sik.

Wanpela nek i toksave long bikmaus bilong haus sik, olsem: “Olgeta wanblut bilong Seikichi Ogawa, plis kam lukim em hariap.” Mipela i go hariap long hap bilong haus sik i bilong ol man i gat bikpela sik tru, na mipela olgeta i tok gutbai long em. Tasol skin bilong em i stap nogut olsem inap wanpela mun. Bihain ol dokta i tok, bai em i stap olsem inap longpela taim.

Olsem na long rot bilong ambulens Seikichi i lusim Tokyo na i go long Kobe, em longwe inap 650 kilomita. Mi lusim em long ambulens na mi kalap long tren i save spit tru bilong i go bek long haus, na taim mi mekim olsem mi beten askim God long helpim Seikichi long abrusim bagarap. Bihain long apinun, taim mi lukim em i stap laip long wanpela haus sik long Kobe, mi amamas nogut tru. Mi tok isi long em, ‘Lewa bilong mi, yu stap laip yet!’

Mi Stap Wantaim Papamama Bilong Mi

Mi go wantaim tupela pikinini man bilong mi long haus bilong papamama bilong mi long Sanda, na long dispela hap tupela pikinini i go long pilai-skul bilong ol liklik pikinini. Mi baim wanpela tiket bilong tren mi inap mekim wok long en bilong i go i kam planti taim long Kobe. Kobe i stap longwe long hap bilong mipela inap 40 kilomita, na inap wanpela yia mitupela tambu mama i senis senis long i go long haus sik long olgeta de. Long olgeta de mi tingting, ‘Tingting bilong Seikichi bai kirap nau long dispela de? Pastaim bai em i mekim wanem tok long mi? Bai mi mekim wanem tok long em?’ Na tu, taim mi lukim wanpela famili i stap amamas wantaim, mi tingting, ‘Sapos Seikichi i orait, tupela pikinini man bilong mipela bai i stap amamas.’ Aiwara i pulap long ai bilong mi.

Taim dispela hevi bilong mipela i nupela samting yet, mi ritim long niuspepa stori bilong wanpela man em tingting bilong em i kirap gen bihain long tingting i bin dai inap sampela mun, na mi ting Seikichi tu inap kirap gen. Olsem na wanpela taim mi tokim tambu brata bilong mi olsem: “Mi laik kisim Seikichi i go long haus sik i stap long hap not-is bilong Honsu.” Tasol em i tokim mi olsem i no gat marasin bilong oraitim Seikichi, na em i tokim mi long mekim wok long mani bilong mipela bilong lukautim ol narapela long famili.

Wanpela elda Kristen long wanpela kongrigesen bilong ol Witnes Bilong Jehova long Kobe, em i stap klostu long haus sik na mi save go long haus bilong em paslain long mi go lukim Seikichi. Wanpela taim long wik, meri bilong dispela brata em i stadi wantaim mi long Baibel. Na tupela pikinini bilong ol i kam long rum bilong mipela long haus sik, na givim kaset i gat ol tok bilong miting bilong kongrigesen long en. Dispela famili i strongim mi na mekim gut bel bilong mi.

Samting Mi Wet Long En i Strongim Mi

Long wanpela de, wanpela wasman bilong raun bilong ol Witnes Bilong Jehova em i kam lukim mipela long haus sik, na em i ritim Rom 8:​18-​25 long mi. Hap bilong en i tok: “Dispela gutpela sindaun na biknem bai i kamap ples klia long yumi bihain, mi ting em bai i winim tru dispela pen yumi save karim nau long dispela taim. . . . Yumi save, olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau . . . . Sapos man i kisim pinis wanpela samting, orait bilong wanem em bai i wet i stap? Tasol yumi save, yumi bai kisim tru ol dispela samting yumi no kisim yet, olsem na yumi save strongim bel na wetim i stap.”

Mipela i toktok long ol gutpela samting mipela ol Kristen i wet long kisim, na dispela i helpim mi long tingim olsem ol hevi bilong nau i liklik samting taim yumi tingim ol amamas Jisas i tok promis long givim​​—⁠em laip long Paradais long graun. (Luk 23:43) Dispela i helpim mi long karim ol hevi bilong nau, na long tingim ol gutpela samting nupela taim bai kamapim long bihain.​​—⁠2 Korin 4:​17, 18; KTH 21:​3, 4.

Long Jun 1970, ol i kisim Seikichi i go long wanpela haus sik long Sanda, em hap mi na papamama bilong mi i sindaun long en. Long Janueri 1971, mi kisim wanpela pepa i kam long loya bilong mipela, na pepa i tok dispela bagarap i bin painim man bilong mi i mekim na em i no inap mekim wanpela wok, olsem na mi bel hevi nogut tru na mi krai. Planti taim tambu mama bilong mi em i tokim mi olsem: “Sori tru Michiko, pikinini man bilong mi i mekim na yu karim bikpela hevi.” Na tu, em i save tok olsem: “Sapos mi inap, mi bai kisim ples bilong Seikichi.” Na mipela i krai wantaim.

Papa bilong mi em i kirapim mi long painim wok mani, tasol mi strong long lukautim Seikichi. Maski tingting bilong em i dai, em i pilim ol samting i hat o kol, na pasin bilong ol nes long lukautim em i mekim gut long em o nogutim em. Papa i laik mi marit gen, tasol mi save i no stret long mekim olsem, long wanem, man bilong mi em i stap laip yet. (Rom 7:⁠2) Bihain, taim papa i dring em i save tok: “Taim mi dai, bai mi kisim Seikichi i go wantaim mi.”

Mi amamas nogut tru long ol i kamapim wanpela kongrigesen long Sanda long 1971. Bihain, long Julai 28, 1973, mi inap kisim baptais long wara bilong makim olsem mi dediket pinis long Jehova. Dispela i kamap long kibung intenesenel bilong ol Witnes Bilong Jehova long So Graun Bilong Osaka.

Bihain, long 1973, pikinini man bilong mi Kohei em i kisim bikpela sik long kidni, na em i slip long haus sik inap 5-pela mun. Papa bilong mi em i kisim sik TB na em tu i slip long haus sik. Olsem na long Janueri 1, 1974, mi go long lukim papa, na man, na pikinini man bilong mi long 3-pela narapela narapela haus sik. Long ol Sande taim mi go lukim Kohei wantaim narapela pikinini man bilong mi, em Ryusuke, mi stadi wantaim tupela long buk Harim Tok Bilong Bikpela Tisa. Bihain long stadi, mitupela Ryusuke i go long miting long Kobe, na bihain long en mipela i go bek long haus na bel bilong mipela i amamas.

Oltaim mi bin pilim tru gutpela wok ol man i bin mekim bilong lukautim Seikichi. Mi autim tok bilong Baibel long ol. Taim paia i kilim i dai susa bilong wanpela nes, em i laik harim tok taim mi soim long em gutpela tok promis long Baibel olsem ol daiman bai kirap bek. (Jop 14:​13-​15; Jon 5:​28, 29) Em i kirap stadi long Baibel long haus sik, na bihain em i kisim baptais long wanpela kibung long 1978.

Ol Pikinini Bilong Mi, As Bilong Amamas

I hatwok long mekim bikpela long tupela pikinini taim man bilong mi em i no inap helpim mi, tasol mi bin kisim bikpela amamas tru! Mi skulim ol long bihainim ol gutpela pasin na long tingim bel bilong ol narapela. Taim Ryusuke i gat 3-pela krismas tasol na em i no bin mekim gutpela pasin, em i tok: “Mama, mi laik tok sori.” Kohei i bikhet liklik, na sampela taim em i nolaik tru long mi stretim em. Wanpela taim em i laik kisim wanpela samting, olsem na em i slip i go daun long graun long ai bilong wanpela stua na i krai. Tasol mi toktok gut wantaim em, na mi mekim pasin sori long em na mi stap isi. Bihain, em i kamap gutpela manki bilong harim tok. Dispela i helpim mi long bilip tru olsem Baibel em i Tok Bilong God.​​—⁠2 Timoti 3:​15-​17.

Taim Ryusuke i go long haiskul, em i tokim ol tisa long as na em i no ken lain long karate samting. (Aisaia 2:⁠4) Long wanpela de, em i kam bek long haus na em i amamas nogut tru, long wanem, em i bin bung wantaim sampela tisa na em inap bekim ol askim bilong ol.

Ol gutpela poroman long kongrigesen i helpim tru tupela pikinini man bilong mi. Planti taim ol elda Kristen i singautim ol long kaikai wantaim ol, na long insait long famili-stadi bilong ol, na long ol amamas bilong ol. Na tu, ol pikinini inap raun wantaim ol gutpela poroman na insait long kain kain spot. Long 1979, Ryusuke i kisim baptais long wara bilong makim olsem em i dediket pinis long Jehova, na Kohei i kisim baptais long yia bihain.

Mipela i Autim Tok Long Olgeta De

Taim wasman bilong raun i kam lukim kongrigesen bilong mipela, mi tokim em olsem mi laik kamap wanpela painia, em nem bilong ol Witnes Bilong Jehova i save autim tok long olgeta de. Long dispela taim i stap bilong mi i mekim na i no gutpela long mi mekim wok painia, olsem na dispela wasman i helpim mi long tingim wok bilong mi long lainim gut tupela pikinini man long tok i tru bilong Baibel. Em i tok: “Bikpela samting em olsem: Yu mas i gat tingting olsem bilong ol painia.” Olsem na mi mekim wok painia haptaim, na mi insait long dispela wok wantaim tupela pikinini man bilong mi taim ol i malolo long skul. Dispela wok i helpim mi long stap amamas na bel isi taim mi wok long lukautim Seikichi.

Bihain, long Septemba 1979, mi inap kamap wanpela painia oltaim. Long Me 1984, inap wanpela yia bihain long Ryusuke i winim haiskul, em tu i kirap mekim wok painia. Kohei i kirap mekim wok painia long Septemba 1984. Olsem na mipela olgeta 3-pela i bin insait long dispela wok. Taim mi tingim ol dispela 20 yia mi bin mekim wok painia, na long dispela hap taim mi bin helpim planti manmeri long mekim wok bilong Jehova, mi ting dispela wok i bin helpim mi long karim ol hevi bilong mi.

Ryusuke i insait long wok bilong sanapim wanpela haus i stap klostu long Haus Kibung Bilong Kansai na ol Witnes i mekim wok long en bilong skulim ol brata sista. Bihain em i lukautim Haus Kibung Bilong Hiogo inap 7-pela yia. Nau em i wanpela elda Kristen long wanpela kongrigesen klostu long mi long Kobe, na em i lukautim mi. Kirap long yia 1985, Kohei i bin wok long brens-ofis bilong ol Witnes Bilong Jehova long Ebina.

Planti Blesing i Strongim Mi

Inap planti yia na inap planti taim long olgeta wik, mi go long haus sik long lukim Seikichi na long wasim em. Wok mi mekim i antap long wok wanpela nes i mekim bilong lukautim Seikichi long olgeta taim. Long Septemba 1996, taim Seikichi i bin slip long haus sik inap 27 yia, em i kam bek long haus wantaim wanpela nes bilong lukautim em. Long rot bilong rop gumi i go insait long nus bilong em, Seikichi inap kisim kaikai i olsem wara. Maski tupela ai bilong em i pas, em i save makim olsem em i harim mipela taim mipela i toktok long em. Mi bel hevi tru long lukim Seikichi i stap nogut olsem, tasol ol gutpela samting mi wet long kisim long bihain i strongim mi.

Paslain liklik long Seikichi i kam bek long haus, mi bin singautim wasman sekit na meri bilong em long i stap wantaim mipela, olsem na inap wanpela yia mipela 5-pela i sindaun wantaim long liklik haus bilong mipela. Mi no bin ting bai mi stap gen wantaim Seikichi, na mi tok tenkyu long Jehova long mi inap mekim olsem. Inap planti yia mi gat bikpela laik long Seikichi i mas opim ai bilong em, tasol nau laik bilong mi em olsem laik bilong Jehova i ken kamap.

Mi ken tok tru olsem: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.” (Sindaun 10:22) Taim Seikichi i no sik yet mi bin stap amamas wantaim em inap sotpela taim, tasol mi bin kisim tupela pikinini man em ol i bin ‘tingim Bikpela Man bilong wokim yumi.’ Mi amamas tru long dispela samting!​​—⁠Saveman 12:⁠1.

Tasol nau mi laik long tupela i mekim yet wok painia na helpim ol narapela long painim “laip tru,” na long wankain taim lukautim gut Seikichi. (1 Timoti 6:​19) Ol samting i bin painim mi i bin lainim mi long bilip long tok bilong man bilong raitim Song: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”​​—⁠Song 55:⁠22.

[Piksa long pes 23]

Mi na man bilong mi wantaim Ryusuke

[Piksa long pes 23]

Seikichi wantaim tupela pikinini man bilong mipela, inap 6-pela mun paslain long bagarap i painim em

[Piksa long pes 25]

Mipela i kisim tupela pikinini man, Ryusuke na Kohei (namel), na ol i bin ‘tingim Bikpela Man bilong wokim yumi’