Sampela Tok i Kam Long Olgeta Hap
Planti Pikinini Moa i Bikhet
Wanpela nius (Hessische-Niedersächsische Allgemeine) i tok, long yia i go pinis long Jemani, namba bilong ol yangpela i mekim pasin raskol i go antap. “Namba bilong ol pikinini em ol man i ting ol i bagarapim skin” bilong ol narapela, i go antap inap 14.1 pesen. Namba bilong ol yangpela i no winim 14 krismas na ol polis i ting ol i mekim pasin raskol, i go bikpela inap 5.9 pesen—em olsem 152,774 yangpela. Wanpela minista (Federal Minister of the Interior), em Otto Schily, em i tok dispela samting i “nogut tru,” na em i tok ol i mas i gat sampela strongpela lo moa bilong daunim pasin raskol. Em i tok, gavman inap helpim ol yangpela long ol samting bilong skul na wok mani, tasol famili i gat bikpela wok bambai ol yangpela i no ken mekim pasin raskol.
Nupela Provins Bilong Kanada
Long Epril 1, 1999, nupela provins bilong Kanada long hap not i kamap. Nem bilong en Nunavut. Dispela em i namba wan taim mep bilong Kanada i senis bihain long taim provins Nufaunlan i kamap hap bilong Kanada long 1949. Nius Toronto Star i tok, Nunavut i kisim bikpela hap (20 pesen) graun long Kanada, olsem na bikpela bilong en i winim bikpela bilong nambawan bikpela provins bilong Kanada, em Kwibek. Na tu, Nunavut i narapela kain, long wanem, i no gat planti man i sindaun long en na planti bilong ol i yangpela. Inap 27,000 manmeri tasol i sindaun long dispela hap, na planti bilong ol (56 pesen), ol i no winim 25 krismas. Insait bilong nem Nunavut long tok ples Inuktitut em olsem “Graun Bilong Mipela,” na dispela nupela provins i bin kamap, long wanem, lain Inuit na gavman ol i stretim tok long ol samting bilong graun na long ol samting i stret ol asples i mas kisim.
Tomato i Pait Long Sik Kensa
Ol ripot bilong nau em wanpela lain (American Association for Cancer Research) i kamapim i tok, ating ol tomato i gat wanpela kain marasin i ken pasim kensa bilong prostet long kamap bikpela. Marasin ol i kolim laikopin i save givim retpela kala long ol tomato, na ol i ting dispela inap mekim na ol buk nogut long prostet ol i go liklik, na kensa i no ken kalap long ol narapela hap bilong skin. Ripot bilong lain U.S. National Cancer Institute i “kamapim olsem tomato na ol samting ol i save wokim long en i ken helpim skin long sakim kensa bilong prostet, na pankrias, na wetlewa, na long rop bilong bel tu.”
Bagarap Inap Kamap Taim Mambu i Putim Plaua
Ol mambu i karamapim bikpela hap bilong not-is India. Ol man bilong provins Manipur na Misoram ol i pret taim ol mambu bilong dispela hap i kirap putim plaua. Bilong wanem? Long wanem, mambu ol i kolim mautang na i save kamap long ol dispela hap, em i save putim plaua long olgeta 50 yia tasol, na ol plaua i save pulim ol rat i kam. Ol rat i kaikai ol dispela plaua na ol i kamap planti hariap, na ol i kirap kisim kaikai bilong gaden, na bihain ol man i sot long kaikai. Nius The Times of India i tok, bikpela hangre i bin kamap long 1957 bihain long mambu i bin putim plaua long 1954 na 1955. Gavman bilong provins Misoram i givim mani bilong baim ol man long kilim ol rat bambai narapela bikpela hangre i no ken kamap. Ol i tok, bai ol i givim wanpela mani rupi long olgeta wan wan tel bilong rat em ol man i kisim. Kirap long Epril na i kam inap nau, ol i bin bungim 90,000 tel bilong rat, na ol i askim gavman long givim sampela mani moa bilong ol i ken mekim yet dispela wok bilong pinisim ol rat.
Pasin Bilong Birua Long Narapela Lotu i Go Bikpela
Nius Catholic International i tok, wanpela lain (International Helsinki Federation) i gat wok long helpim ol man ol narapela i save daunim ol, ol i tok long Yurop “kain kain pasin bilong birua” i kamap long ol lotu ol i kolim ol olsem nupela lotu. Bilong pasim ol liklik lotu long mekim wok bilong ol, sampela gavman i laik kamapim sampela lo em ol i no stret wantaim wok bilong helpim ol man long i stap fri long lotu na long bihainim maus bilong bel bilong ol. Ripot bilong sampela gavman na lista bilong ol i gat nem bilong ol liklik lotu long Beljam, Frans, na Jemani, em ol i tok ol i “lotu nogut,” dispela i mekim na pasin bilong birua na daunim ol narapela lotu i go bikpela. Tasol presiden bilong wanpela lain (Human Rights Without Frontiers), em Willy Fautré, em i tok, “wan wan tasol” bilong ol dispela liklik lain lotu inap bagarapim sindaun bilong ol man, na tok bilong ol man olsem ol dispela lotu i samting bilong pret long en, em tok nating tasol. Dispela presiden i tok, ol bikpela lotu i mekim dispela hevi i go bikpela, long wanem, ol i ‘helpim wok bilong gavman long daunim ol dispela lain, na ol i stap olsem jas bilong skelim ol dispela lain long kot,’ na tu, ol i save “tok pait na ol i no laik toktok gut wantaim.”
Ol Samting i Go Antap Bai Kam Daun
Long sampela hap bilong Yunaitet Stets na long planti kantri bilong Latin-Amerika, planti manmeri i save sut long gan i go antap bilong makim amamas bilong nupela yia i kirap. Tasol ol polis i laik kirapim ol long ol i no ken mekim olsem. Nambawan polis bilong Los Enjeles, em Willie Williams, em i tok: “Taim yu sut long gan i go antap, katres bilong en bai kam daun long wanpela hap.” Em inap pundaun long het bilong wanpela man. Insait long sampela yia, winim 12-pela man i bin dai long dispela rot long Yunaitet Stets. Na tu, planti handet man i stori olsem ol i bin kisim bagarap o wanpela samting bilong ol i bagarap, na sampela taim ol dispela katres i bin go longwe hap inap sampela kilomita. Ol man i save sut long gan i go antap, planti bilong ol i tingting kranki olsem katres bai pinis long win o katres i no inap bagarapim man taim em i pundaun. Mausman bilong lain polis bilong Huston, em Fred King, em i tok, katres em man i bin sutim i go antap stret, em inap kam daun wantaim bikpela strong tru na “go insait long skin bilong man, o bagarapim ai, o go insait long het bilong bebi long hap bilong het i malumalum.”
Yu Slip Inap Long Skel Bilong Yu?
Nius Toronto Star i tok, ol manmeri “i laik slip inap liklik taim long san, o ai i laik slip long ol miting, o ol i hatwok long putim gut tingting long ol samting,” ol i no slip inap long skel bilong ol long nait. Klostu olgeta manmeri i mas slip inap 7-pela i go inap 9-pela aua long olgeta nait bambai ol inap mekim gut wok bilong ol long san. Sampela tok ol saveman i mekim bilong helpim ol man long slip inap long skel bilong ol em olsem: Yu mas ting slip em i bikpela samting. Paslain long taim bilong slip, lusim liklik hap taim bilong maloloim tingting na skin. Ating pasin bilong wokabaut liklik inap helpim yu long mekim olsem. Tasol yu no ken mekim strongpela eksasais insait long 3-pela aua paslain long yu go slip. Go slip na kirap long wankain taim long olgeta de. Sapos yu kirap long nait, yu no ken tingting planti o traim long stretim sampela hevi, nogat, yu mas tingting long ol gutpela samting. Sapos hap aua i lus na yu no slip yet, kirap na mekim sampela samting i helpim yu long stap bel isi, olsem ritim buk. Yu no ken kaikai o dring planti klostu long taim bilong slip, tasol yu no ken go slip taim yu hangre.
Sik Bilong Tingting Bilong Ol Pikinini
Ripot bilong wanpela lain (Mental Health Foundation) i tok, olgeta 5-pela 5-pela yangpela bilong Briten em ol i no winim 20 krismas, ol i gat sik bilong tingting. Dairekta bilong dispela lain, em June McKerrow, em i tok, “gavman, na ol saveman, na ol nius samting i tingting tasol long skin bilong ol pikinini, olsem skin bilong ol i mas strong na ol i mas skul gut,” tasol “bel na tingting bilong ol pikinini i no stap gut.” Dispela ripot i tok, planti samting i as bilong dispela. Nius The Daily Telegraph i tok, ‘long rot bilong tes na ripot bilong tisa samting, ol i subim ol pikinini i yangpela tru long skelim ol yet wantaim wanlain bilong ol,’ na taim planti bilong ol i lusim skul ol i ting wok bilong ol i pundaun. Pilai bal samting i save helpim ol yangpela “long wokim tingting, na long ting ol inap mekim gutpela wok, na long kamap orait gen taim hevi i painim ol,” tasol ol kompyuta na televisen i kisim ples bilong pilai bal. Ol toksave bilong grisim ol man long baim ol samting, dispela “i kirapim laik bilong ol yangpela long kisim ol samting ol i no bin kisim o long kamap wankain olsem man ol i lukim long toksave.” Na tu, planti marit (50 pesen) i katim marit na planti papamama i mekim wok mani, olsem na ol pikinini ‘i bel hevi moa yet, long wanem, famili i no inap helpim ol long i stap bel isi.’