Mekim Wok Long Tupela Stik!

WANPELA MAN LONG TAIWAN I RAITIM DISPELA STORI BILONG KIRAP!

TAIM yu lukim pes bilong liklik pikinini meri i lait, yu save em i amamas long kaikai. Long han kais em i holim plet em rais wantaim liklik kumu na pis i pulap long en. Long han sut em i holim tupela stik ol i wokim long mambu. Em i holim gut tupela stik mambu long liklik han bilong em, na em i kisim ol kaikai em i save laikim na putim long maus bilong em. Sampela taim em i holim plet klostu long maus na mekim wok long tupela stik mambu bilong savolim kaikai i go insait long maus. I no hatwok long em long mekim olsem, na kaikai i no pundaun nabaut.

Yu save, dispela meri i holim tupela stik ol i kolim sopstik. Long Saina ol i kolim ol dispela stik olsem k’uai tzu, insait bilong dispela nem i olsem “mekim hariap.” Klostu olgeta famili long hap bilong Saut-is Esia i save mekim wok long ol dispela stik. Nogut yu bin traim taim yu kaikai long wanpela haus kaikai bilong ol Saina. Dispela tingting bilong mekim wok long tupela stik bilong kaikai i kamap olsem wanem? Husat ol i mekim wok long en pastaim, na olsem wanem ol i mekim? Yu laik kisim save long pasin bilong mekim wok long en?

Tupela Stik Bilong “Mekim Hariap”

Ol sopstik i olsem ol liklik stik longpela bilong ol i olsem 20 i go inap long 25 sentimita. Antap bilong ol i skwe na i no hatwok long holim, na hap daunbilo i raunpela. Ol sopstik bilong Japan i liklik long ol narapela na sap bilong ol i sap moa.

Long nau ol masin i save wokim ol samting hariap, olsem na planti haus kaikai i putim ol sopstik i stap yet long karamap na antap bilong ol i pas yet, olsem na man i laik kaikai em i mas brukim karamap bilong mekim wok long en. Ol man bai mekim wok long en long wanpela taim tasol, olsem na ol i wokim long diwai o mambu. Tasol sampela sopstik bilong haus o bilong ol haus kaikai i gat bikpela pe ol i wokim gutpela tru​—⁠ol i wokim long mambu ol i bin polisim o long diwai ol i putim vanis long en. Sampela ol i wokim long plastik, ain, silva o tit bilong elefan. Sampela i gat ol gutpela rait long en o ol i penim gutpela piksa long en.

Pasin Bilong Mekim Wok Long Ol Stik

Taim ol man i go raun long ol kantri bilong Is olsem Saina o Japan, ol i kirap nogut long lukim ol liklik pikinini i gat olsem 2-pela krismas i mekim wok long ol sopstik. Pikinini i save kisim ol kaikai hariap na putim i go stret long maus bilong em. I olsem i no gat hatwok long mekim.

Olsem wanem? Yu laik traim na mekim wok long tupela stik bilong “mekim hariap”? Pastaim yu bai pilim olsem i hatwok long holim gut stik na kisim kaikai long en, tasol bihain taim yu mekim mekim bai yu pilim olsem i no hatwok, na tupela stik i kamap olsem hap han bilong yu.

Ol i save holim tupela stik long wanpela han tasol, olsem long han sut. (Lukim ol piksa i stap long pes 15.) Wanpela stik bai stap namel long pinga namba wan na pinga namba tu, na pinga namba 4 bai holim gut hap daunbilo bilong en. Holim narapela stik olsem wanpela pensil. Namba wan stik bai stap tasol na namba tu stik bai mekim wok long go i kam. Traim planti taim na bai yu inap wokim gut ol stik. Nau yu inap mekim wok long tupela stik bilong kisim olgeta kain kaikai ol i redim long pasin bilong ol Saina! I gutpela long mekim wok long ol stik taim yu kisim ol kaikai bilong Saina, long wanem, ol i save katim ol kaikai long ol liklik hap bilong putim i go stret long maus.

Olsem wanem sapos ol i kukim sampela kakaruk o pato o hap bilong pik na ol i no katim i go liklik? Ol i save kukim longtaim na i no hatwok long brukim long dispela tupela stik. I gutpela long mekim wok long ol sopstik taim yu kaikai pis, long wanem, planti taim ol i no save katim pis na taim yu mekim wok long ol stik yu inap abrusim ol bun bilong en, na em bai hatwok moa sapos yu mekim wok long naip na fok.

Olsem wanem long kaikai rais? Sampela taim yu inap holim plet klostu long maus bilong yu na mekim wok long tupela stik bilong savolim rais i go long maus. Tasol taim yu bung wantaim ol narapela long bikpela kaikai samting, i gutpela long kisim liklik hap rais tasol long stik na kaikai.

Olgeta taim ol kaikai bilong Saina bai i gat sup long en, olsem na bai yu kaikai olsem wanem? Planti taim ol bai putim wanpela spun i stap. Tasol sapos ol nudol, o plaua, o kumu, o abus, o pis samting i stap long sup, orait long wanpela han yu ken holim ol samting long tupela stik na long narapela han yu ken mekim wok long spun bilong putim long maus.

Bihainim Gutpela Pasin Taim Yu Kaikai Long Stik

Taim yu go long haus bilong ol Saina bilong kaikai, i gutpela sapos yu save gut long pasin bilong ol long kaikai. Pastaim ol i save putim ol plet i gat kaikai namel long tebol. Wet i stap na taim het bilong famili o bos bilong kaikai i kisim ol stik bilong em na kirapim ol narapela long kaikai, yu inap kisim ol stik bilong yu na kaikai.

Ol i no save bihainim pasin bilong ol lain bilong Wes, olsem sampela taim ol i save salim ol bikpela plet i go long ol man wan wan, nogat. Ol kaikai i stap namel long tebol na ol man i kisim samting long laik bilong ol. Sapos ol famili tasol i stap wantaim ol i save mekim wok long ol stik bilong ol yet na kisim kaikai i stap namel long tebol na putim i go stret long maus bilong ol. Tasol i no gutpela pasin sapos yu mekim bikpela pairap long maus taim yu kaikai, o mekim wok long tang bilong yu long klinim tupela stik bilong yu. Na tu, i no gutpela long mekim wok long ol stik bilong lukluk gut long ol kaikai na painim ol hap kaikai yu save laikim moa yet. Ol mama i stap long hap bilong Is ol i save tambuim ol pikinini long kaikaim arere bilong ol stik long tit, long wanem, ol i tingting long pasin bilong stap klin, na tu ol stik bai bagarap.

Ol i tingim ol lain ol i bin singautim na sampela taim ol bai putim ol spun na sampela stik moa i stap. Ol bai mekim wok long dispela bilong kisim ol kaikai i stap long ol bikpela plet namel long tebol na bihain putim long narapela plet o long plet rais bilong yu yet. Tasol no ken tingting planti sapos man bilong bosim dispela kaikai em i kisim sampela kaikai long tupela stik bilong em na putim long plet bilong yu. Em i laik bai man em i bin singautim i kam em i kisim nambawan gutpela hap bilong kaikai!

I no gutpela pasin sapos yu mekim wok long ol dispela stik bilong makim wanpela samting, wankain olsem pasin bilong makim samting long naip na fok i no gutpela. Na tu, i no gutpela pasin long kisim narapela samting long han taim yu holim yet tupela stik. Olsem na taim yu laik kisim spun o kisim kap bilong dring, lusim ol stik long tebol. Sampela taim ol i putim ol naispela liklik plet samting bilong slipim ol stik long en.

Taim yu kaikai pinis, putim gut ol stik na wet i stap. I no gutpela pasin long lusim tebol taim ol narapela i kaikai yet. Em wok bilong man i bosim kaikai long sanap na tokim ol narapela long lusim tebol.

Nau yu save pinis long pasin bilong mekim wok long tupela stik, olsem na yu ken kisim sampela na traim mekim wok long en, a? Na taim sampela i singautim yu long go long wanpela haus kaikai bilong ol Saina o go long haus bilong ol yet long kaikai long sampela kaikai bilong ol Saina, yu inap mekim wok long tupela stik. Ating kaikai bai i swit moa!

[Blok/Piksa long pes 14]

Stori Bilong Ol Stik Bilong Kaikai

Sampela saveman bilong Saina ol i ting taim ol man i no kirap mekim wok yet long ol stik bilong kisim kaikai, ol i bin mekim wok long en long taim ol i kukim kaikai. Ol i bin kisim ol liklik hap kaikai na karamapim long ol lip na bihain ol i mekim wok long ol stik bilong kisim ol liklik ston ol i bin hatim long paia na putim i go wantaim ol kaikai i stap insait long ol lip. Long dispela rot man inap kukim ol kaikai tasol paia i no kukim han bilong em! Bihain long dispela taim, ol i mekim wok long ol stik bilong rausim kaikai long sospen.

Ating bipo ol i bin wokim ol dispela stik long ol diwai i save sting hariap o long mambu.a Olsem na em i wanpela as na i hatwok tru long save wanem taim stret ol i kirap na mekim wok long ol stik bilong kaikai. Sampela i ting ol i bin mekim wok long en long Saina long taim ol lain Shang i stap king (em long yia 1500 samting i go inap long yia 1000 samting paslain long Krais). Wanpela olpela rait bihain liklik long taim bilong ol Konfusas (551-479 B.C.E.) i stori long pasin bilong sampela long “stilim” ol hap kaikai long sup, na dispela i makim olsem ol i mekim wok long sampela kain samting olsem stik bilong kaikai.

Long taim bilong ol lain Han long stap king (206 B.C.E. i go inap long 220 C.E.), ol Saina i kisim pinis pasin bilong kaikai long tupela stik. Sampela i bin rausim ol samting i stap long wanpela matmat bilong dispela taim bilong bipo na ol i painim ol samting ol man i bin mekim wok long en bilong kaikai na ol stik bilong kaikai tu i stap.

Ol Japan, ol Korea, ol Vietnam, wantaim ol narapela i stap long hap bilong Is, ol tu i kisim pasin bilong kaikai long ol stik bilong ol Saina.

[Futnot]

[Ol Piksa long pes 15]

Sapos yumi mekim planti taim bai yumi save gut long mekim wok long en