Pait i No Pasim Mipela Long Autim Tok
EM STORI BILONG LEODEGARIO BARLAAN
Long 1942, long taim bilong Namba Tu Pait, ol Japan i pait wantaim ol Amerika long kisim Filipin, em as ples bilong mi. Mi stap long wanpela liklik ples long maunten, long Tabonan, em hap ol paitman i pait long ol Japan ol i kalabusim mi. Ol i paitim mi, na sutim tok long mi olsem mi man bilong lukstil, na ol i tok long kilim mi i dai. Mi laik stori long olsem wanem ol dispela samting i painim mi, na olsem wanem mi stap laip yet.
MAMA i karim mi long Janueri 24, 1914, long taun bilong San Kalos, Pangasinan. Bihain long 1930 samting, papa i salim mi i go long skul bilong kisim save long pasin bilong wokim gaden samting. Long Sande mi save go long lotu, na pris i save toktok long ol Gutnius—Matyu, Mak, Luk, na Jon. Dispela i kirapim laik bilong mi long kaunim ol Gutnius.
Wanpela taim mi go long haus sister bilong baim 4-pela Gutnius long mani mi bin kisim long salim ol kaikai bilong gaden. Tasol ol i givim mi wanpela liklik buk, nem bilong en Rot Bilong i Go Long Heven, na i no gat ol stori bilong ol Gutnius long en. Mi bel hevi long dispela. Mi gat strongpela laik yet long kisim 4-pela Gutnius, olsem na bihain mi go long Manila. Long Manila, ankol bilong mi em i wanpela Witnes Bilong Jehova, na em i givim wanpela Baibel olgeta long mi.
Mi bungim sampela Witnes long Manila na mi kirap nogut long pasin bilong ol long kolim ol tok bilong ol skripsa. Ol i bekim gut planti askim bilong mi. Bihain, ankol bilong mi, Ricardo Uson, i kisim mi i go long wanpela miting long brens-ofis bilong ol Witnes Bilong Jehova. Taim mipela i kamap klostu long brens-ofis, mi laitim wanpela smok. Ankol i tok: “Tromoi dispela samting i go. Ol Witnes Bilong Jehova i no save smok.” Olsem na mi tromoi dispela smok i go na mi lusim smok olgeta. Mi bungim Joseph Dos Santos, em wasman bilong brens, na sampela narapela Witnes tu. Nau, planti yia i lus pinis tasol mi tingim yet ol dispela gutpela brata Kristen.
Laik Bilong Mekim Wok Bilong God
Long Oktoba 1937, taim mi stap yet olsem sumatin long skul koles (Los Baños Agricultural College) bilong lain long wok gaden samting, mi no save go moa long lotu. Tasol mi save kaunim Baibel na ol buk na nius samting em ankol i bin givim long mi. Sampela Witnes Bilong Jehova i kam long skul na taim mi toktok wantaim wanpela bilong ol, Elvira Alinsod, dispela i strongim laik bilong mi long mekim wok bilong God Jehova.
Taim mi tokim ol tisa olsem mi laik lusim skul, ol i askim mi: “Husat bai lukautim yu?” Mi tokim ol olsem mi bilip strong olsem sapos mi mekim wok bilong God, em bai lukautim mi. Taim mi lusim skul pinis, mi go long ofis bilong Sosaiti Was Taua na mi kamapim mi yet olsem mi laik mekim wok volantia, na mi tok: “Mi kaunim pinis buk Loyalty, Riches, na Where Are the Dead? Nau mi laik mekim wok bilong Jehova long olgeta de.” Ol i tokim mi long go long provins Sebu na wok wantaim 3-pela painia—em ol Witnes Bilong Jehova i save mekim wok autim tok long olgeta de.
Mi Kirap Mekim Wok Autim Tok
Long Julai 15, 1938, Salvador Liwag i bungim mi long bris taim mi kamap long ailan Sebu. Long de bihain, mi kirap mekim wok autim tok long ol haus. I no gat wanpela i lainim mi long pasin bilong autim tok. Mi save lusim wanpela kat long man bilong haus, na dispela kat i stori long wok bilong mipela. Mi save long tupela tok tasol bilong tok Sebuano, em tok ples ol i mekim long dispela hap. Em namba wan de bilong mi long autim tok.
Taim mipela i kirap long autim tok long wanpela nupela taun, pastaim mipela i save go long haus kaunsil. Taim mipela i kamap long haus kaunsil, Brata Liwag i autim tok long bikman i bosim taun; Pablo Bautista i autim tok long bikman bilong polis; na Conrado Daclan i autim tok long jas. Mi autim tok long bikman bilong posofis samting. Bihain mipela i go autim tok long ol ples bilong kisim bas, long hap bilong ol polis, long ol stua na ol skul. Na tu, mipela i go autim tok long ol man long haus. Mipela i lusim wanpela buk (Enemies) i kamapim ol tok bilong Baibel long ol man. Mi bihainim pasin bilong ol pren bilong mi long autim tok na isi isi mi lain long mekim tok Sebuano, na mi kirap long lusim ol buk long ol man. Insait long 3-pela mun mipela i autim tok long olgeta hap bilong provins Sebu—em 54 taun olgeta. Bihain mi askim brata Liwag: “Mi inap kisim baptais nau?”
Em i tok: “I no yet, brata.” Olsem na mipela i go long narapela ailan, Bohol, na autim tok long hap inap wanpela mun na hap, na mipela i autim tok long 36 taun samting. Orait nau mi askim gen long kisim baptais. Ol i tokim mi: “I no yet, Brata Barlaan.” Olsem na taim mipela i autim tok pinis long Bohol na ailan Kamiguin, mipela i go long bikpela ailan Mindanao na autim tok long biktaun Kagayan de Oro.
Long dispela taim Virginio Cruz i kam wok wantaim mipela. Em i wanpela tisa, tasol em i lusim dispela wok bilong kamap wanpela painia. Mipela i go autim tok long ol narapela taun tu, na bihain mipela i kamap long raunwara Lanao. Taim mipela i stap long dispela hap, mi askim gen long kisim baptais. Em nau, long Disemba 28, 1938, taim mi mekim wok painia inap 6-pela mun pinis, Brata Cruz i baptaisim mi long raunwara Lanao long hap bilong taun Lumbatan.
Kisim Gutpela Samting Long Bilip Long God
Bihain mi go wok wantaim 3-pela painia long Negros Oksidental. Em Fulgencio de Jesus, Esperanza de Jesus, na Natividad Santos—mipela i save kolim em Naty. Mipela i autim tok wantaim long planti taun long dispela provins. Mipela i mas bilip strong long Jehova, long wanem, sampela taim mipela i save sot tru long mani. Wanpela taim mipela i laik painim pis bilong kaikai wantaim rais. Mi bungim wanpela man long nambis na mi askim em long baim sampela pis, tasol ol i kisim olgeta pis bilong em i go pinis long maket. Tasol em i givim mi wanpela pis em i bin putim i stap bilong em yet. Mi askim em long pe bilong pis. Em i tok: “Em i orait. Yu ken kisim nating.”
Mi tok tenkyu long em. Tasol taim mi lusim em, mi skelim olsem wanpela pis bai i no inap long 4-pela man. Taim mi wokabaut klostu long wanpela liklik wara, mi kirap nogut long lukim wanpela pis i stap antap long ston na wara i stap yet long skin bilong en. Mi tingting olsem ‘Ating em i dai pinis.’ Mi kisim dispela pis na mi kirap nogut long lukim olsem em i stap laip yet. Mi kisim na holim strong na wantu mi tingim tok promis bilong Jisas: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.”—Matyu 6:33, Nupela Testamen na Ol Sam, bilong 1978.
Autim Tok Long Taim Bilong Pait
Taim mipela i kamap 9-pela painia, mipela i wokim tupela grup. Ol i makim grup bilong mipela bilong i go long Sebu. Em Disemba 1941, na Namba Tu Pait i kamap long Filipin. Taim mipela i stap long taun Tuburan, wanpela lutenant bilong Filipin i kam long rum bilong mipela long biknait. Em i tok: “Yupela kirap. Ol soldia i wok long painim yupela.” Ol i ting mipela i man bilong lukstil na helpim ol Japan, olsem na ol i sutim ol askim long mipela inap long nait olgeta.
Bihain ol i putim mipela long haus kalabus. Lain ami bilong Amerika i stap long Sebu Siti ol i laik mipela i mas givim olgeta wan wan buk bilong mipela long ol na bai ol i ken skelim olsem mipela i lukstil na helpim ol Japan o nogat. Planti lain i laik save long ol dispela man i lukstil na helpim ol Japan, olsem na ol i kam lukim mipela long haus kalabus. Sampela i givim ol askim long mipela, na mipela i autim tok long ol long Kingdom bilong God.
Taim mipela i stap 5-pela de pinis long haus kalabus, bikman bilong polis i kisim wanpela telegram i kam long bikpela ofis bilong ami bilong Amerika. Hetkota bilong ami i tokim ol long lusim ol Witnes Bilong Jehova. Tasol em i tokim mipela long no ken autim tok moa, long wanem, nau em taim bilong pait. Mipela i tok olsem mipela i no inap lusim wok autim tok, long wanem, God i tokim mipela long mekim dispela wok. (Aposel 5:28, 29) Dispela bikman i kros na i tok: “Sapos yupela i autim tok yet, orait bai mi tokim ol man long kilim yupela i dai.”
Insait long sampela de bihain, bikman bilong polis i painim rot bilong ol i ken holim mipela. Bihain, sampela soldia bilong Amerika i pasim mipela na wanpela lutenant bilong ol, em Soriano, i askim Sista Santos: “Bai yupela i pinis long autim tok?”
Sista Santos i tok: “Nogat.”
Soriano i askim gen: “Bai yupela i mekim wanem sapos mipela i sanapim yupela long ai bilong ol soldia i holim gan?”
Sista Santos i tok: “Dispela i no inap senisim tingting bilong mipela.”
Ol i putim mipela long wanpela ka bilong kisim ol kago na ol i bringim mipela i go long Sebu Siti bilong lukim Kenel Edmund. Taim Lutenant Soriano i kisim mipela i go long em, Soriano i tok: “Em ol Witnes Bilong Jehova. Ol i lain bilong lukstil na helpim ol Japan!”
Kenel i tok: “Ol Witnes Bilong Jehova, a? Mi save gut long ol Witnes Bilong Jehova long Amerika. Ol i no lain bilong lukstil! Ol i no save insait long ol pait samting.” Orait nau em i lukluk long mipela na em i tok: “Yupela i no save insait long ol pait samting, olsem na mipela i no inap larim yupela i go.” Ol i putim mipela long wanpela rum bilong putim ol kago samting, na bihain Kenel Edmund i toktok gen wantaim mipela na em i askim mipela olsem: “Yupela i stap olsem yet?”
Mipela i tok: “Yes, Bikman, mipela i no inap insait long pait.”
Em i tok: “Olsem bai mipela i no inap larim yupela i go, long wanem, sapos mipela i larim yupela i go, yupela bai autim tok yet na olgeta man i bihainim yupela bai i no inap insait long pait. Na sapos olgeta man i mekim olsem bai i no gat man bilong pait.”
Stap Fri Gen Long Autim Tok
Bihain ol i salim mipela i go long haus kalabus long Sebu Siti. Long Epril 10, 1942, ol Japan i go insait long biktaun. Ol i tromoi ol bom long olgeta hap, na bikpela paia i kirap! Wasman bilong haus kalabus i lukim Sista Santos, em sel bilong em i stap klostu long dua, na em i singaut: “Olaman! Ol Witnes Bilong Jehova i stap yet insait! Opim dua na larim ol i kam ausait!” Mipela i tenkyu long Jehova long em i lukautim mipela.
Wantu mipela i go long ples maunten bilong painim ol wanlain Witnes. Mipela i painim wanpela Witnes long taun bilong Kompostela. Pastaim em i bin i go pas long wok autim tok, tasol nau em i tingting long lusim na go long Sebu Siti na kirapim wanpela bisnis bilong salim ol kain kain samting. Tasol mipela i tingting pinis long wok yet long autim tok long Kingdom bilong God, maski wanem wanem samting i kamap.
Mipela i gat planti liklik buk Comfort All That Mourn, na mipela i wok strong long tilim long ol man. Tasol planti man i laik pretim mipela na ol i tok, sapos ol Japan i lukim mipela, ol bai katim na rausim het bilong mipela. I no longtaim na wanpela lain paitman i kirap long birua long ol Japan na ol i holim dispela brata i bin lusim wok autim tok na i go long Sebu Siti long mekim wok bisnis. Mipela i sori tru long harim olsem ol i sutim tok long em olsem em i lukstil na helpim ol Japan na ol i kilim em i dai.
Sutim Tok Olsem Mipela i Lain Bilong Lukstil
Mipela i wok yet long autim tok long ol ples maunten. Wanpela taim mipela i harim olsem wanpela meri i laik kisim sampela save moa, tasol bilong i go lukim em, mipela i mas abrusim sampela hap em ol paitman i save pasim ol man long en. Mipela i kamap long liklik ples Mangabon, em hap dispela meri i stap long en, tasol sampela soldia i lukim mipela na ol i singaut: “Wanem as na yupela i kam long hia?”
Mi tok: “Mipela i Witnes Bilong Jehova. Olsem wanem? Yupela i laik harim tok mipela i bringim i kam long rot bilong masin bilong pilaim musik?” Taim ol i orait long harim, mi pilaim wanpela tok long ol (The Value of Knowledge). Bihain ol i sekim mipela na givim sampela askim long mipela na nau ol i kisim mipela i go long bikpela ofis bilong ol paitman long liklik ples Tabonan. Mipela i beten long Jehova i ken lukautim mipela, long wanem, ol man i tok olsem planti lain ol i kisim i go long hap ol i save kilim ol i dai.
Ol soldia i was long mipela na ol i mekim nogut long mipela. Samting mi stori long en long kirap bilong dispela stori i bin kamap long dispela taim. Ol i paitim mi na ofisa bilong ol i makim pinga long mi na tok: “Yu wanpela man bilong lukstil!” Ol i mekim nogut long mipela inap sampela taim, na bihain ol i makim mipela bilong mekim ol strongpela wok kalabus na ol i no kilim mipela i dai.
Brata bilong mi, Bernabe, em tu i kalabus long Tabonan. Long olgeta moningtaim ol i laik mipela i mas mekim ol singsing “God i Mekim Gut Long Amerika” na “God i Mekim Gut Long Filipin.” Tasol ol Witnes i save mekim singsing “Husat i Stap Long Lain Bilong Bikpela?” Wanpela taim ofisa i bosim mipela em i singaut: “Husat man i no mekim singsing ‘God i Mekim Gut Long Amerika,’ mipela bai hangamapim em long dispela diwai akas!” Tasol maski ol i mekim ol kain tok olsem bilong pretim mipela, ol i no kilim wanpela bilong mipela i dai. Bihain ol i salim mipela i go long ol narapela kem. Long Julai 1943 mi kisim pepa bilong larim mi i lusim kem. Mi bin stap kalabus inap 8-pela mun na 10-pela de pinis.
Autim Tok Inap Mi Lapun
Mipela i laik lukim ol lain mipela i bin autim tok long ol long bipo, olsem na mipela i go longwe inap 60 kilomita long biktaun Toledo. Mipela i kirapim ol miting Kristen long hap na isi isi planti man i bin kisim baptais. Long 1945 pait i pinis. Tupela yia bihain, klostu 9-pela yia bihain long mi bin kisim baptais, rot i op na mi inap go long namba wan kibung bilong mi i kamap long wanpela stediam bilong pilai spot long Santa Ana, Manila. Inap olsem 4,200 ol i bung bilong harim pablik-tok “Amamas Bilong Olgeta Man.”
Paslain long pait i bin kirap, i gat olsem 380 Witnes long Filipin, tasol long 1947, i gat olsem 2,700! Kirap long dispela taim na i kam inap long nau, mi bin amamas long kisim planti gutpela wok bilong Jehova. Long 1948 i go inap long 1950, mi mekim wok olsem wasman bilong raun long hap bilong Surigao. Long 1951, mi maritim Natividad Santos, em i bin strongim bel na autim tok wantaim grup bilong mipela long taim bilong pait. Bihain long mipela i marit pinis, mipela i mekim wok bilong raun long ol hap bilong Mindanao, kirap long 1954 na i go inap long 1972.
Mipela i laik stap klostu long ol papamama bilong mipela em ol i lapun pinis, olsem na mipela i kamap painia salim long 1972. Mitupela i winim pinis 80 krismas, tasol mipela i save mekim yet wok painia, na taim mipela i bungim ol yia bilong mipela wantaim, mipela i bin lusim planti yia tru long mekim wok painia samting, winim 120 yia. Mipela i amamas tru long lukim namba bilong ol man i autim gutnius bilong Kingdom bilong God long Filipin i go antap winim 130,000! Em laik bilong mipela long helpim planti man moa long pilim tru olsem Kingdom bilong God tasol em i rot bilong yumi ken i stap bel isi tru na amamas long graun.
[Rait long pes 16]
Ol i ting mipela i man bilong lukstil na helpim ol Japan, olsem na ol i sutim ol askim long mipela inap long nait olgeta
[Piksa long pes 17]
Long 1963, wantaim ol pren bilong mipela long ailan Bohol. Mi na meri bilong mi i namba 4 na namba 5 long han sut
[Piksa long pes 18]
Wantaim meri bilong mi long nau
[Piksa Kredit Lain long pes 14]
Background photo: U.S. Signal Corps photo