Wanpela Baiskol i Save Sapim Ol Naip
Dispela stori i kam long Tansania
◼ Bai yu ting olsem wanem sapos yu lukim wanpela man i sindaun long baiskol, tasol em i tanim baksait long fran bilong baiskol na em i kikim strong, tasol baiskol i no ron i go? Long sampela hap bilong graun, olsem long Is Afrika, sapos yu lukim kain man olsem, ating em wanpela man bilong sapim naip—em i mekim dispela wok bilong kisim mani na long wankain taim dispela wok i helpim ol manmeri.
Em i bin mekim sampela bikpela senis long baiskol bilong em. I gat wanpela raunpela ston ol i putim long ples bilong karim kago. Bilong mekim ston i tanim, ol i putim wanpela string nailon i raunim wil ol i bin kisim long narapela baiskol na ol i bin hapim na weldim long wil i stap long baksait bilong baiskol.
Ol man i no kliagut long olsem wanem dispela pasin bilong sapim naip i kam long Afrika. Andrea, wanpela man i bin bihainim dispela pasin bilong sapim naip kirap long 1985, i tok: “Ol i bin tokim mi olsem ol i bin mekim wok long dispela kain baiskol long Dar es Salaam, em namba wan biktaun bilong Tansania, paslain long dispela save i kam long taun Moshi, em hap mi sindaun long en. Kirap long 1982 na i kam inap nau, ol i bihainim dispela pasin long hia.”
Olsem wanem ol man inap kisim wanpela baiskol bilong sapim naip? Andrea i tok: “Mipela i go long wanpela fundi, long tok ples Swahili dispela tok i makim olsem ‘man i gat save long wokim kain kain samting,’ na mipela i askim em long stretim baiskol olsem mipela i tokim em long mekim.” Bihain long 1-pela o 2-pela de, baiskol bai i stret olsem mipela i laikim.
Ol Lait i Sut Nabaut na Tuhat!
Long 7 klok long moning, Andrea i kirapim wok bilong em taim em i kalap long baiskol na i go long hap we i gat planti man. Taim em i kamap, em bai singaut olsem: “Sapim naip! Sapim naip!” Em i save pairapim belo tu i stap long baiskol bilong em. I no longtaim na wanpela meri i lukluk ausait long wanpela windo na em i singautim Andrea i kam na i givim em sampela naip bilong sapim. Man bilong narapela haus i kisim busnaip bilong em i kam, na man bilong katim gras i bringim ol sisis i kam. Andrea i save sapim tu ol baira, boa, na ol kain kain samting i gat sap long en.
Bilong kirapim wok bilong em, Andrea i painim wanpela hap graun i stap stret na putim ain bilong baiskol i go daun bilong sanapim baiskol, na dispela i apim wil long baksait. Orait nau em bai putim string nailon, na em i sindaun long namba tu sia bilong baiskol we em i lukluk i go baksait, na em kirap kikim baiskol. Ol lait i sut nabaut na tuhat i kamap taim em i sapim ol naip i kamap sap olsem resa. Long 6 klok long apinun wok bilong em i pinis.
Pasin bilong mekim wok long baiskol bilong sapim naip em wanpela rot bilong soim olsem “man bilong hatwok” i ken mekim kain kain wok bilong kisim mani bilong helpim sindaun bilong em, maski i gat hevi bilong mani.—Sindaun 13:4.