Nius i Kam Long Olgeta Hap
◼ “Long olgeta 3-pela 3-pela meri long Amerika em ol i kisim bel, wanpela i no winim yet 20 krismas.”—CENTERS FOR DISEASE CONTROL AND PREVENTION, U.S.A.
◼ Long Amerika ol i mekim wok painimaut long 420 man em “narapela long famili i paitim ol o mekim nogut long ol,” na ol i kisim save olsem “long olgeta 10-pela 10-pela man, 3-pela man em narapela i bin paitim ol o mekim nogut long ol.”—AMERICAN JOURNAL OF PREVENTIVE MEDICINE.
Planti Tokples
Planti papamama i pret olsem sapos ol i larim ol pikinini bilong ol long putim yau long namba tu tokples, dispela bai bagarapim pasin bilong ol long mekim tokples tru bilong ol. Wanpela lain saientis bilong Toronto, Kanada, i tok dispela tingting i no tru. Laura-Ann Petitto, em gopas bilong dispela lain, em i tok: “Wanpela kain rop wailis bilong kru i stap pinis taim yu bon . . . na i redi na i wet tasol long lainim tokples, na em inap lainim planti tokples.” Long ol skul, ol pikinini em ol i save mekim 2-pela tokples o moa, ol i save mekim gut ol skul wok winim ol pikinini i save mekim wanpela tokples tasol. Tasol nius Toronto Star i tok: “Ol papamama i mas go pas long wok bilong skulim ol pikinini long namba tu tokples sapos ol i laik bai ol pikinini i kisim ol gutpela samting em pasin bilong mekim planti tokples i save kamapim.”
Ponografi i Bagarapim Tingting Bilong Ol Pikinini
Taim ol pikinini i liklik yet planti bilong ol i save lukim ponografi na ol piksa long Intenet i soim pasin bilong pait na bagarapim man. Peter Meidinger, em siaman bilong lain German Association of Philologists, em i tok ol pikinini man i gat 12 krismas na i go antap, planti taim ol i save pinis long ol Web-sait i gat ol pasin bilong pait na bagarapim man na piksa ponografi i nogut tru. Ating i luk olsem ol pikinini i gat strongpela bel na ol i no tingting tumas long samting ol i lukim, tasol dispela i save bagarapim bel na tingting bilong planti bilong ol. Meidinger i kirapim ol papamama olsem ol i mas i gat laik long save long ol samting i stap long tingting bilong ol pikinini na ol samting em ol pikinini i lukim long kompiuta.
Redim Ol Samting Bilong Katim Marit
Wanpela nius bilong Sydney, (Sunday Telegraph) i tok, planti manmeri long Australia i sainim wanpela kain kontrak paslain long marit, em kontrak i gat lista bilong ol samting em poroman marit i mas inapim. Dispela kontrak i kolim tok long olsem wanem ol marit bai tilim ol kago samting bilong ol taim ol i katim marit. Long nau, planti bilong ol dispela kontrak i kolim stret samting poroman marit i mas mekim insait long marit bambai marit i ken i stap longpela taim. Ol tok i stap long kontrak i makim husat i mas kukim kaikai, klinim haus, draivim ka, na tu, i gat tok long ol i mas i gat ol animal samting long haus o nogat, poroman marit i mas bun nating o pat, husat bai kisim dok i go wokabaut, na husat i mas rausim ol rabis bilong haus. Loya Christine Jeffress i tok ol manmeri “i no ting marit bilong ol bai stap longpela taim.”
Papamama i Hatwok Long Soim Pasin Laikim
Wanpela magasin bilong Polan, (Newsweek Polska) i tok: “Planti papamama i mas i gat liklik buk i stori long pasin ol i mas mekim long ol pikinini bilong ol, long wanem, ol i hatwok long soim pasin laikim long ol pikinini. Namba wan samting ol papamama i mas lain long en em pasin bilong holimpasim ol pikinini, pilai wantaim ol, na singsing long ol. Dispela em i bikpela samting bilong helpim pikinini long kamap gut. Wok painimaut i kamapim klia olsem, “long ol famili long Polan, pasin bilong lukim TV wantaim o i go raun wantaim long stua na baim samting, dispela em namba wan rot we ol papamama i save stap wantaim pikinini.” Pasin bilong pilai wantaim ol pikinini em samting ol i save mekim wan wan taim tasol.