Baibel i Tok Wanem?

Bilong Wanem God i No Bagarapim Satan?

SAPOS yu inap long pinisim pen na hevi bilong wanpela man, bai yu mekim? Taim bagarap bilong win na ren samting i kamap, ol volantia i save hariap i go long hap we bagarap i kamap long en bilong givim helpim na seivim laip bilong ol man maski ol i no save long ol. Olsem na ating yu laik save, ‘Bilong wanem God i no hariap long bagarapim Satan, em man husat i as bilong olgeta pen na hevi ol man i karim?’

Bilong bekim dispela askim, piksaim long tingting wanpela bikpela kot i kamap. Kilman i laik stopim kot olsem na em i sutim tok olsem jas i no mekim stretpela kot na em i tok tu olsem jas i givim gris mani long lain bilong harim kot. Olsem na kot i orait long planti witnes i ken kamapim stori bilong ol.

Jas i save olsem kot bai kisim longpela hap taim na dispela bai kamapim sampela hevi, olsem na em i laik bai kot i mas pinis hariap. Tasol em i luksave olsem bilong kot i ken wokim disisen we bai stap olsem eksampel bilong ol wankain kot olsem i kamap bihain, jas i mas larim sampela hap taim i lus bambai tupela sait wantaim i ken kamapim stori bilong ol.

Olsem wanem dispela tok piksa i stret long tok em Satan​—⁠Baibel i kolim narapela nem long em olsem “snek”​—⁠i sutim long Jehova, em ‘God Antap Tru na man i save bosim olgeta hap bilong graun’? (KTH 12:9; Song 83:18) Satan em i husat tru? Na em i sutim wanem ol tok long God Jehova? Na tu, wanem taim God bai bagarapim em?

Bihainim Lo Stret

Long pastaim Satan i bin stap olsem wanpela gutpela ensel bilong God. (Jop 1:​6, 7) Tasol bihain em i kisim strongpela laik long ol man i mas lotuim em na dispela i mekim na em i kamap Satan. Em i sutim tok olsem God i no gat rait long bosim yumi, na i no stret long yumi bihainim tok bilong God. Satan i tok olsem ol man i lotuim God, long wanem, God i save mekim gut long ol. Satan i tok sapos taim nogut i painim ol man, ol bai “tok nogut tru” long Man Bilong Wokim ol.​—⁠Jop 1:​8-11; 2:​4, 5.

Bilong bekim ol dispela tok em Satan i bin sutim, i no olsem God i mas stretim wantu tasol. Sapos em i bin kilim i dai Satan long gaden Iden, ating bai sampela i ting olsem tok bilong Satan i tru. Olsem na God husat i gat bikpela strong na namba, em i larim kot i kamap long pasin we olgeta man i lukim na harim ol bai wanbel long en.

God Jehova i mekim pasin i stret wantaim ol stiatok na stretpela pasin bilong em, na em i kamapim olsem i mas i gat ol witnes bilong sapotim sait bilong em na ol witnes bilong sapotim sait bilong Satan. God i larim hap taim i stap yet bambai lain tumbuna pikinini bilong Adam i ken kamapim klia olsem ol i laik stap gut long God maski wanem hevi i painim ol. Na long dispela rot ol i ken sapotim sait bilong God.

Satan i Gat Hamas Yia Moa Bilong i Stap?

God Jehova i save olsem insait long dispela haptaim em i larim i stap, ol man i wok long kisim yet pen na hevi. Tasol em i tingting pinis olsem klostu nau em bai pinisim dispela kot. Baibel i kolim em olsem Papa bilong “pasin marimari na pasin sori. Em i God bilong mekim isi bel bilong olgeta man i gat hevi.” (2 Korin 1:⁠3) Dispela i kamapim klia olsem “God bilong mekim isi bel bilong olgeta man” bai i no inap larim Satan i stap longpela taim moa, na Em bai pinisim ol hevi em Satan i kamapim. Tasol God bai larim Satan i stap yet inap long kot i go kamap long pinis stret bilong en, na em bai bagarapim Satan.

Taim kot i kamap long pinis bilong en, ol samting bai kamapim klia tru olsem i stret Jehova i stap nambawan bos. Dispela kot Jehova i mekim long Satan bai stap olsem samting ol man bai tingim inap oltaim oltaim. Sapos bihain wanpela i sutim tok long God olsem Satan i bin mekim, orait wankain bagarap i painim Satan bai painim em tu.

Klostu nau, long rot bilong Pikinini man bilong em, Jisas Krais, Jehova bai bagarapim Satan na pinisim olgeta wok bilong em. Baibel i tokaut long taim we Krais bai “pinisim olgeta gavman na olgeta strongpela spirit na olgeta samting i gat strong, na bai em i putim kingdom long han bilong God Papa. Long wanem, Krais i mas i stap king i go inap em i daunim olgeta birua bilong en. Em i pinisim pinis olgeta arapela birua, orait em bai i pinisim dai tu.”​—⁠1 Korin 15:​24-26.

Baibel i tok promis olsem Paradais bai kamap long olgeta hap bilong graun. Ol man bai stap bel isi wantaim olsem God i bin i gat laik long en long pastaim! “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Yes “ol stretpela man bai i kisim graun God i givim ol, na bai ol i stap oltaim long en.”​—⁠Song 37:​11, 29.

Tingim dispela gutpela samting bai painim ol wokman bilong God em Baibel i stori long en, olsem: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠KTH 21:​3, 4.

YU LAIK SAVE?

● Olsem wanem Satan i sutim tok giaman long God na ol man?​—⁠Jop 1:​8-11.

● Wanem ol pasin bilong God i mekim na yumi bilip tru olsem long taim stret em bai bagarapim Satan?​—⁠2 Korin 1:⁠3.

● Baibel i kamapim wanem gutpela samting em yumi inap wet long en?​—⁠KTH 21:​3, 4.

[Piksa long pes 24]

Bilong kot i ken wokim disisen we bai stap olsem eksampel long ol wankain kot olsem i kamap bihain, jas i mas larim sampela hap taim i lus bambai tupela sait wantaim i ken kamapim stori bilong ol